བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༠ སྟེང་གི་རྩོམ་སྒྲིག་པའི་གཏམ།
ཕྱི་ཟླ་གསུམ་པའི་ཚེས་གཅིག་ཉིན། ད་ལྟའི་རྒྱ་འོག་གི་ཡུན་ནན་ཞིང་ཆེན་ཁོན་མེན་གྲོང་ཁྱེར་མེ་འཁོར་ས་ཚིགས་སུ་དམར་གསོད་དོན་རྐྱེན་ཆེན་པོ་ཞིག་བྱུང་། མགོ་ལ་རས་ནག་པོས་གཡོག་པའི་ཕོ་མོ་བཅུ་གྲངས་ཤིག་གིས་གང་བྱུང་མི་ཚོགས་ཁྲོད་གྲིས་བརྒྱབ་སྟེ། རྒྱ་མི་སུམ་ཅུ་ཙམ་བསད་ཅིང་བརྒྱ་ཕྲག་ཅིག་ལ་རྨས་སྐྱོན་བཟོས། རྨས་མ་མང་པོ་ཞིག་ད་དུང་ཤི་གསོན་བརྗོད་དཀའ་བའི་གནས་སྟངས་ཆགས་ཡོད། རྒྱ་ནག་གི་ཉེན་རྟོག་པ་ཚོས་མེ་མདའ་བརྒྱབ་སྟེ་མི་དེ་དག་ལས་བཞི་ཡུལ་ངོས་ནས་བསད་ཅིང་གཞན་དག་འཛིན་བཟུང་བྱས་ཡོད་ཚོད་འདུག
གནས་ཚུལ་དེ་བྱུང་མ་ཐག་རྒྱ་གཞུང་གིས་མི་དེ་དག་ཡུ་གུར་དྲག་སྤྱོད་པ་ཡིན་ཚུལ་མངོན་ཆུང་གིས་བསྒྲགས་ཡོད། འོན་ཀྱང་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་ཡུ་གུར་བ་རེད་ཅེས་དམིགས་སུ་བཀར་ཏེ་བཤད་ཐུབ་མེད། དེ་ལྟར་མ་བསྒྲགས་པའི་རྒྱུ་མཚན་བདེན་དཔང་འདང་ངེས་མ་རྙེད་པ་མིན་པར་ཡུ་གུར་མི་མང་ལ་འཛེམ་ཟོན་བྱེད་དགོས་ཐུག་ཡོད། དེ་སྔའི་རྒྱ་ནག་གི་དྲིལ་བསྒྲགས་བྱེད་སྟངས་མང་པོ་ཞིག་ལ་ནོར་འཁྲུལ་ཤོར་ཡོད། གནས་ཚུལ་ཆུང་ཆུང་ཆེན་པོ་དང་ཆེན་པོ་གཏིང་ནག་ཏུ་གྱུར་ཏེ་བསམ་བློ་བསྐྱར་དུ་གཏོང་དགོས་བྱུང་ཡོད།
ཉིས་སྟོང་བརྒྱད་ལོའི་བོད་ནང་གི་ཡར་ལངས་དང་། ཉིས་དགུ་ལོའི་ཡུ་གུར་གྱི་ཡར་ལངས། དེ་བཞིན་ཉིས་སྟོང་བཅུ་གཅིག་བཅུ་གཉིས་ལ་སོག་པོར་གནས་ཚུལ་སྣ་ཚོགས་བྱུང་སྐབས། རྒྱ་གཞུང་གིས་ཐོག་མ་ནས་བྱ་སྤྱོད་དེ་དག་གི་ངོ་བོ་གཞན་གྱི་བརྒྱུད་སྐུལ་བྱས་པའི་འཇིགས་སྐུལ་དྲག་སྤྱོད་ཡིན་པ་དང་། ནང་དོན་ཆབ་སྲིད་དང་མི་རིགས་ནང་ཁུལ་གྱི་གནད་དོན་ཡིན་ཚུལ་ཚམ་ཚོམ་མེད་པར་བསྒྲགས། དེའི་མཇུག་འབྲས་སུ་མི་མང་གཞུང་ལ་མཁོན་སེམས་སྐྱེས་ཏེ་དོན་རྐྱེན་རིམ་བསྟུད་དུ་བྱུང་བ་དང་། གནས་ཚུལ་ཁྱབ་བསྒྲགས་ཆེན་པོ་ཕྱིན་ཏེ་རྒྱལ་སྤྱིའི་དོ་སྣང་ཇེ་ཆེར་ཕྱིན་པ། འདི་དག་རྒྱ་ནག་གཞུང་གི་བསམ་ཡུལ་ལས་འདས་པའི་གནས་ཚུལ་དག་རེད།
ངས་བཤད་འདོད་པའི་གནས་ཚུལ་གཞན་ཞིག་ནི། ཐེངས་འདིའི་མི་གསོད་དོན་རྐྱེན་རྗེས་སུ་ངོ་དེབ་སོགས་བརྒྱུད་ལམ་ཁག་ཏུ་བརྙན་ཐུང་ཞིག་ཁྱབ་བརྡལ་དུ་འགྲོ་བཞིན་ཡོད་པ་དེ་རེད། བརྙན་ཐུང་དེར་སྐར་མ་གཅིག་གཉིས་ཤིག་ལས་མི་འདུག དེའི་ནང་མི་གཉིས་ཀྱིས་ཁྲོམ་གཞུང་ན་གྲི་རིང་གནམ་ལ་འཕྱར་ནས་སྒྲིག་ཆས་ནག་པོ་གྱོན་པའི་རྒྱ་ནག་གི་ཉེན་རྟོག་པ་བཅུ་གྲངས་ཤིག་ཡར་བདའ་མར་བདའ་བྱེད་ཀྱིན་འདུག ཉེན་རྟོག་ཚོས་གང་བྱུང་མེ་མདའ་རྒྱག་བཞིན་གཅིག་ལས་གཅིག་མགྱོགས་ཀྱིས་འབྲོ་བཞིན་འདུག མཚམས་ཤིག་ལ་མི་དེ་གཉིས་སྔ་རྗེས་སུ་ས་ལ་འགྱེལ་སོང་། འདི་འཚེ་བ་ཡིན་མིན་གང་ལྟར་ཡང་ངེས་པ་དོན་གྱིས་མི་རིགས་ཀྱི་དཔའ་བོ་རེད།
གནས་ཚུལ་འདི་རྒྱ་ནག་སྲིད་གྲོས་དང་དམངས་ཆེན་ཚོགས་འདུར་གྲ་སྒྲིག་བྱེད་བཞིན་པའི་སྔོན་ཏག་ཏག་རེད། ཚོགས་འདུ་དབུ་འཛུགས་ཉིན་སླར་ཡང་གནམ་སྡེ་སྒོ་མོ་ཆེའི་ཐང་ཆེན་དུ་བུད་མེད་ཅིག་གིས་རང་ལུས་མེར་བསྲེགས་བཏང་རབས་འདུག བུད་མེད་དེ་མི་རིགས་གང་ཡིན་དང་དགོས་འདུན་ཅི་ཡིན་ད་དུང་ཤེས་ཐུབ་མེད། སྔར་ལོའི་ཕྱི་ཟླ་བཅུ་པའི་ནང་རླངས་འཁོར་ཞིག་གནམ་བདེ་སྒོ་མོ་ཆེའི་ཐང་ཆེན་གྱི་མི་ཚོགས་ཁྲོད་བརྒྱུགས་ཏེ་མི་ལྔ་བསད། རྒྱ་གཞུང་གིས་རླངས་འཁོར་དེའི་ནང་ཡུ་གུར་དྲག་སྤྱོད་པའི་བཟའ་མི་གསུམ་གྱིས་གྲི་དང་སྟ་རེ་གྲ་སྒྲིག་བྱས་ཡོད་ཚུལ་བསྒྲགས་ཡོད།
བསམ་བློ་བསྐྱར་དུ་གཏོང་དགོས་ས་ཞིག་ནི། ཡུ་གུར་བ་ཚོས་ངོ་རྒོལ་བྱེད་ཡུལ་དེ་རྒྱ་ནག་གཞུང་དང་རྒྱ་མི་རིགས་ལ་དབྱེ་བ་མི་འདུག ངོ་རྒོལ་བྱེད་སྟངས་ཀྱང་འཚེ་བ་ཡིན་མིན་ལ་ཁྱད་པར་མི་འདུག རྒྱ་ནག་གཞུང་གིས་ཀྱང་འདི་ལ་ཡ་ལན་སྤྲོད་སྟངས་གཞན་ཞིག་བྱེད་དགོས་བྱུང་ཡོད། ད་ཆར་ཡུ་གུར་བའི་གནས་ཚུལ་ཁག་ཡུ་གུར་བ་རེད་ཟེར་རྒྱུར་ཞེད་སྣང་དང་། འཚེ་བའི་བྱ་སྤྱོད་ལ་འཇིགས་སྐུལ་དྲག་སྤྱོད་ཅེས་མིང་འདོག་རྒྱུར་ཡང་འཛེམ་ཟོན་བྱེད་ཀྱིན་འདུག
