བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༡ སྟེང་གི་རྩོམ་སྒྲིག་པའི་གཏམ།
བོད་མི་མང་སྤྱི་འཐུས་ལྷན་ཚོགས་ཀྱིས་དོལ་རྒྱལ་བསྟེན་གསོལ་ཐད་ ༡༩༩༦ ལོའི་ཕྱི་ཟླ་ ༦ ཚེས་ ༦ ཉིན་དང་། ༡༩༩༧ ཕྱི་ཟླ་ ༩ ཚེས་ ༡༧ ཉིན། ༢༠༠༨ ལོའི་ཕྱི་ཟླ་ ༣ ཚེས་ ༡༥ ཉིན་བཅས་ཀྱི་གྲོས་ཚོགས་ཚོགས་དུས་རིམ་པའི་ཐོག་དོལ་རྒྱལ་བསྟེན་གསོལ་དང་འབྲེལ་བའི་གཞུང་འབྲེལ་གྲོས་ཆོད་ཁག་གསུམ་སྤྱི་མོས་ཀྱིས་གཏན་འབེབས་བྱས་ཡོད་པ་དང་། ཕྱི་ལོ་ ༢༠༠༩ ལོར་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་དབུ་ཁྲིད་བླ་ཆེན་རྣམ་པ་དང་། མཁན་པོ། བླ་སྤྲུལ། སྐུ་ཚབ་བཅས་འདུ་འཛོམས་ཀྱི་ཆོས་ཚོགས་ཐེངས་བཅུ་བའི་ཐོག་འཇིག་རྟེན་པའི་ལྷ་འདྲེ་སྤྱི་དང་། ལྷག་པར་དམ་སྲི་གདུག་པ་ཅན་ལ་སྐྱབས་སུ་མཆི་ན། ནང་པའི་ཆོས་ལ་འཇུག་པའི་སྒོ་སྐྱབས་འགྲོ་དང་འགལ་བར་བརྟེན། དོལ་རྒྱལ་བསྟེན་གསོལ་བྱེད་མཁན་སྤྱི་སྒེར་གང་ཡིན་རུང་། བོད་གངས་ཅན་གྱི་ཆོས་བརྒྱུད་གང་གིའང་ཁོང་གཏོགས་མིན་པ་གསལ་བོ་བཟོ་རྒྱུ་ཞེས་སྤྱི་མོས་གྲོས་ཆོད་བཞག་ཡོད།
ད་རེབ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བདུན་པའི་ཐོག་དོལ་རྒྱལ་རྗེས་འབྲང་པ་རྣམས་ཀྱི་དངུལ་དངོས་ཀྱི་ཁེ་ཕན་ཁོ་ནའི་བསླུ་བྲིད་འོག་བོད་མི་ནང་ཁུལ་དཀྲུག་ཤིང་རྒྱག་བཞིན་པ་དང་། ༧གོང་ས་མཆོག་ལ་གཞི་མེད་མཚན་སྨད་སྐུར་འདེབས་བྱས་ཏེ་རྒྱ་ནག་གི་ཆབ་སྲིད་ཀྱི་ལག་ཆར་འགྱུར་བཞིན་པ། ཨ་རི་དང་རྒྱ་གར་གསང་བའི་ལས་ཁུངས་ཀྱིས་༧གོང་ས་མཆོག་གི་སྐུ་ཕྱྭར་ལྷག་པར་གཟབ་ནན་བྱ་དགོས་ཚུལ་གྱི་བརྡ་ལན་སྤྲད་པ་དང་། ཉེ་སྔོན་ཨ་རིའི་གྲོང་ཁྱེར་སེན་ཧྥི་རན་སི་ཀོར་བྱུང་བའི་དོལ་རྒྱལ་རྗེས་འབྲང་བའི་བྱ་སྤྱོད་བཅས་ལ་གཞིགས་ཏེ་འབྱུང་འགྱུར་གནད་དོན་དེའི་རིཊ་མི་འབྱུང་བར་བཀའ་ཤག་གིས་ཞིབ་འཇུག་མཐིལ་ཕྱིན་གནང་སྟེ་ལམ་སྟོན་བཀོད་ཁྱབ་གནང་དགོས་པའི་གཞུང་འབྲེལ་གྲོས་ཆོད་གྲོས་འཆར་ཞིག་སྤྱི་མོས་གཏན་འབེབས་བྱུང་སོང་།
ང་ཚོ་མང་པོ་ཞིག་གིས་དེ་སྔོན་དོལ་རྒྱལ་བསྟེན་མཁན་ཚོས་བཙན་བྱོལ་སྤྱི་ཚོགས་ནང་གང་འདྲ་བྱས་མིན་དང་། ད་ཆར་དམངས་ཁྲོད་ཁ་བརྡ་གཙོས་པའི་བརྒྱུད་ལམ་ཁག་ཏུ་༧གོང་ས་མཆོག་དང་། བོད་མིའི་སྒྲིག་འཛུཊ་ཀྱི་གནད་ཡོད་མི་སྣ་བཅས་ལ་མཚན་སྨད་སྐུར་འདེབས་གང་འདྲ་བྱེད་ཀྱི་ཡོད་མེད། ཨ་རི་གཙོས་པའི་དོལ་རྒྱལ་བསྟེན་སྲུང་བ་མང་བའི་སྤྱི་ཚོགས་ཀྱི་སྒྲིག་འཛུཊ་དང་སློབ་གྲྭ་ཁག་ཏུ་ཁོང་ཚོས་ཤུགས་རྐྱེན་གྱིས་བོད་མིར་བརྡབ་གསིག་གང་འདྲ་ཡོང་གི་ཡོད་མེད་གསལ་བོ་ཤེས་ཀྱི་ཡོད་ལ། བོད་ནང་ལ་མཚོན་ནའང་ཉེ་བའི་ལོ་འགའི་རིང་གནད་དོན་འདིའི་རྐྱེན་པས་དགོན་པ་དང་ལྷ་སྡེའི་བར་དང་། ཐ་ན་བཟའ་ཚང་ནང་ཁུལ་དུའང་མི་འཆམ་པའི་རིགས་མང་པོ་བྱུང་ཡོད་པ་མིག་མཐོང་ལག་ཟིན་དུ་གྱུར་ཡོད་པ་རེད།
གནད་དོན་འདི་དག་ལ་གཞིགས་ཏེ། ང་ཚོས་ནམ་རྒྱུན་གྲོས་ཚོགས་དང་ཆོས་ཚོགས་སུ་གྲོས་ཆོད་བཞག་པ་ཙམ་མིན་པར། འཛིན་སྐྱོང་བཀའ་ཤག་གི་ངོས་ནས་བཙན་བྱོལ་སྤྱི་ཚོགས་ནང་དོལ་རྒྱལ་བསྟེན་གསོལ་བྱེད་མཁན་གྱི་ས་གནས་དང་དགོན་སྡེ། མི་སྣ་གཙོ་བོ་སུ་ཡིན་མིན། ༧གོང་ས་མཆོག་ཆིབས་བསྒྱུར་སྐབས་ཁྲོམ་གཞུང་དུ་ཐོན་ཏེ་སྐད་འབོད་བྱེད་མཁན་གྱི་སྣེ་འཁྲིད་པ་སུ་ཡིན་སོགས་ལ་ཞིབ་འཇུག་མཐིལ་ཕྱིན་བྱས་ཏེ་མི་སྣ་གཙོ་བོའི་མིང་དང་པར་རིགས་སོགས་ཕྱིར་བསྒྲགས་ཀྱིས་མི་མང་ལ་ཤེས་སུ་འཇུག་རྒྱུ་ཧ་ཅང་གལ་ཆེན་པོ་རེད་ལ། དེང་སྐབས་བོད་ནང་སྔར་ལས་ལྷག་པའི་ཤུགས་ཆེ་རུ་འགྲོ་བཞིན་པའི་སྐད་ཆ་འདུག་སྟབས། བོད་ནང་དེའི་རིགས་ཀྱི་སྣེ་འཁྲིད་པ་སུ་དང་སུ་ཡིན་མིན་དང་། ཆོལ་ཁ་གསུམ་གྱི་ས་གནས་དང་དགོན་སྡེ་གང་དག་ཡིན་མིན། ཁོང་ཚོའི་ཤུགས་རྐྱེན་བོད་ནང་གི་ས་གནས་དང་ལས་རིགས་སོགས་གང་དང་གང་དུ་ཁྱབ་ཀྱི་ཡོད་མེད་སོགས་ལའང་བརྟག་དཔྱད་དང་ཞིབ་འཇུག་བྱས་ཏེ། མ་འོངས་འདིའི་རིགས་བོད་མི་རིགས་ཀྱི་རྩ་དོན་འཐབ་རྩོད་ཀྱི་བཀག་རྡོར་མི་འགྱུར་བ་གནང་རྒྱུ་ཧ་ཅང་གལ་ཆེན་དུ་མཐོང་ངོ་།།
