བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༣ སྟེང་གི་རྩོམ་སྒྲིག་པའི་གཏམ།
འབའ་བ་ཕུན་ཚོགས་དབང་རྒྱལ་ཉེ་ལམ་སྐུ་གཤེགས་པ་དང་མཉམ་དུ་བརྒྱུད་ལམ་ཁག་ཏུ་ཁོང་གི་སྐོར་གླེང་མགོ་བརྩམས། སྤྱི་ཚོགས་ནང་ཁོང་ལ་དཔྱད་འཇོག་བྱེད་སྟངས་རིགས་གཉིས་རེད། ཁག་གཅིག་གིས་ཁོང་ནི་བོད་མི་རིགས་ལ་བྱས་རྗེས་ཆེ་བའི་རླབས་ཆེན་གྱི་མི་སྣ་ཞིག་རེད་ཟེར། ཡང་ཁག་གཅིག་གིས་ཁོང་ནི་བོད་མི་རིགས་དང་རྒྱལ་ཁབ་ལ་བྱས་ཉེས་གསོག་མཁན་གྱི་རྒྱལ་ཚོང་བ་ཞིག་རེད་ཟེར། ཕུན་དབང་གླེང་སྟངས་འདིར་གནའ་ནས་ད་བར་འགྱུར་བ་གང་ཡང་ཕྱིན་མི་འདུག གླེང་གཞི་གསར་པ་ཞིག་མགོ་འབུས་པ་ནི་ཕུན་དབང་དང་དབུ་མའི་ལམ་གྱི་འབྲེལ་བ་དེ་རེད།
གླེང་ཕྱོགས་རྙིང་པ་འདི་གཉིས་བོད་རྒྱ་ལག་ཏུ་ཚུད་པའི་སྔ་རྗེས་ལ་ཕུན་དབང་གི་ཕྱག་ལས་གནང་སྟངས་དང་རེ་འདུན་འཆང་སྟངས་ལ་གཞིགས་ཏེ་ཆབ་སྲིད་རྐྱང་པའི་ངོས་ཐད་ཀྱི་གླེང་ཕྱོགས་ཤིག་རེད། གནས་ཚུལ་འདི་གཉིས་བརྒྱུད་ནས་ཕུན་དབང་ཡག་པོ་དང་སྡུག་ཅག་གི་སྡོམ་ཚིག་འགོད་ཐབས་བྱེད་པ་ནི་ཆབ་སྲིད་པའི་གཡོ་ཐབས་ཤིག་རེད། དོན་ལ་འདི་ཙམ་གྱིས་ཕུན་དབང་གིས་བོད་མི་རིགས་ལ་འཆང་བའི་ལ་རྒྱ་དང་ལྷག་བསམ། བྱས་རྗེས་སོགས་མཚོན་མི་ཐུབ་ཅིང་། ཚོད་དཔག་དང་སྒྲོ་སྐུར་རང་བཞིན་གྱི་སྒྲུབ་བྱེད་འདིས་ཁོང་ནག་པོ་བཟོ་ཐབས་བྱེད་པའང་དྲང་བདེན་ཞིག་མིན།
སྤྱིར་མི་ཞིག་ལ་དཔྱད་འཇོག་བྱེད་སྐབས། ཁོའི་ལྟ་བ་བསམ་བློ་དང་ཕྱག་ལས་གནང་སྟངས། མི་གཤིས་འཇོན་ཐང་སོགས་ཡུལ་དུས་གནས་བབ་ལ་སྦྱར་ནས་གླེང་དགོས། ཕུན་དབང་གིས་བོད་རྒྱའི་གནད་དོན་ཐོག་འཛིན་པའི་ལྟ་ཚུལ་དེ་མཱར་ཁེ་སི་རིང་ལུཊ་ཀྱི་མི་རིགས་སྲིད་ཇུས་དང་འབྲེལ་ཡོད་ལ། ཕུན་དབང་གི་མར་ཁེ་སིའི་མི་རིཊ་གནད་དོན་དེ་རྩོད་སྒྲུབ་དངོས་གཙོ་རིག་པའི་གཞུང་ལུགས་དང་འབྲེལ་ཡོད། ཕུན་དབང་གི་མི་ཚེ་ཧྲིལ་བོའི་ཆ་ནས་སྐབས་དོན་ཆབ་སྲིད་པ་ཞིག་ལས་བསམ་བློའི་ལྟ་གྲུབ་སྨྲ་བ་ཞིག་ཏུ་ཐག་ཉེ་བ་ཡོད། ཁོའི་མི་ཚེའི་ཕྱག་ལས་གནང་ཕྱོཊ་དང་བསམ་བློ་འཁྱེར་ཕྱོགས་ཡོངས་རྫོཊ་ལྟ་གྲུབ་ཅིག་གམ་གཞུང་ལུཊ་ཤིག་རྒྱབ་རྟེན་དུ་བྱས་པའི་བདེན་དོན་ཁོ་ན་ཡིན།
༡༩༣༩ ལོར་རྒྱ་ནག་ནན་ཅིན་གྱི་གོ་མིན་ཏང་གཞུང་གི་ཆབ་སྲིད་སློབ་གྲྭའི་ནང་བོད་སྤྱི་ཚོགས་རིང་ལུགས་གསར་བརྗེ་ལས་འགུལ་ཚོགས་ཆུང་བཙུགས་པ་དང་། ༡༩༤༢ ལོར་ལྷ་སར་གངས་ཅན་བོད་ཀྱི་སྤྱི་ཚོགས་རིང་ལུགས་གསར་བརྗེ་ཚོགས་ཆུང་བཙུགས་པ། དེ་བཞིན། ༡༩༤༥ ལོར་ཡུན་ནན་བདེ་ཆེན་དུ་བོད་ཤར་ཕྱོགས་མི་དམངས་རང་སྐྱོང་མནའ་མཐུན་བཙུགས་པ། ༡༩༤༩ ལོར་འབའ་ཐང་དུ་རྒྱ་ནག་དམར་ཤོག་ཚོགས་པའི་ཁམས་ཕྱོགས་ལས་དོན་ཨུ་ཡོན་ལྷན་ཁང་བཙུགས་པ་སོགས་གང་ལ་དཔྱད་ཀྱང་། ཕུན་དབང་ནི་གསར་བརྗེ་བསམ་བློ་བ་ཞིག་དང་། མར་ཁེ་སིའི་སྤྱི་ཚོགས་རིང་ལུགས་ཀྱི་ལྟ་གྲུབ་ལ་ཡིད་ཆེས་ཡོད་པ། བོད་མི་རིགས་ཀྱི་འཕྲལ་ཕུགས་བདེ་དོན་ལ་ལྷག་བསམ་དཀར་བ་གསལ་བོར་མཐོང་ཐུབ།
རྒྱ་ནག་གིས་བོད་སར་བཙན་འཛུལ་བྱས་སྐབས་ཕུན་དབང་གིས་ལམ་ཁྲིད་བྱས་པ་དང་། རྗེས་སུ་བོད་མི་རིགས་ཀྱི་ཆེད་དུ་བཙོན་ནས་ལོ་བཅོ་བརྒྱད་བསྡད་པ། བཙོན་གྲོལ་རྗེས་རྒྱ་ནག་གི་སྲིད་འཛིན་ཅིང་དང་ཧུའུ། ད་ལྟའི་སྲིད་འཛིན་ཞི་སོགས་ལ་ཁྲིམས་ཐོག་ནས་མི་རིགས་ཀྱི་ཐོབ་ཐང་གླེང་བ་སོགས། མདོ་བསྡུས་ན། ད་ལྟའི་དབུ་མའི་ལམ་དང་རང་བཙན་གྱི་གཡུལ་ས་ནས་ཕུན་དབང་རྒྱལ་ཞེན་ཅན་ཞིག་ཡིན་མིན་ཁ་ཚོན་གཅོད་དཀའ་ཡང་། བོད་མི་རིགས་ཀྱི་ལ་རྒྱ་དང་ཞེན་ཁོག ལྷག་བསམ་དང་སྙིང་སྟོབས་སོགས་སུས་ཀྱང་ནག་གསུབ་གཏོང་ཐུབ་མེད་ལ། རྒྱལ་ཞེན་ཡོད་མེད་ཀྱི་ཐེ་ཚོམ་དེས་ཁོང་རྒྱལ་ཚོང་བ་ཞིག་ཡིན་པའང་གཏན་ནས་སྒྲུབ་མི་ཐུབ་བོ།།
