དབྱིན་གཞུང་གིས་བོད་དང་ཞིན་ཅང་གཉིས་ནང་འགྲོ་བ་མིའི་ཐོབ་ཐང་མེད་པའི་སྙན་ཐོ་ཞིག་བཏོན་སྟབས། རྒྱ་གཞུང་གིས་རྒྱལ་ཁབ་གཉིས་ཀྱི་འགྲོ་བ་མིའི་ཐོབ་ཐང་སྐོར་གྱི་ཚོགས་འདུ་ཕྱིར་འཐེན་བྱས་འདུག
དེ་རིང་སྔ་དྲོར་རྒྱ་ནག་གཞུང་གིས་སང་ཉིན་རྒྱ་ནག་དང་དབྱིན་ཡུལ་གཉིས་ཀྱིས་འགྲོ་བ་མིའི་ཐོབ་ཐང་སྐོར་ལ་ཚོགས་འདུ་ཞིག་དབྱིན་ཡུལ་རྒྱལ་ས་ལོན་ཌོན་དུ་ ཚོགས་འཆར་ཡོད་པ་ཕྱིར་འཐེན་བྱས་པའི་གསལ་བསྒྲགས་སྤེལ་ཏེ། དབྱིན་གཞུང་གིས་རྒྱ་ནག་གི་ནང་སྲིད་གནད་དོན་ལ་ཐེ་གཏོགས་བྱས་ཚུལ་སྐྱོན་བརྗོད་བྱས་འདུག
ཟླ་འདིའི་ཚེས་ ༡༡ ཉིན། དབྱིན་གཞུང་གིས་འཛམ་གླིང་ནང་གི་འགྲོ་བ་མིའི་ཐོབ་ཐང་གནས་སྟངས་སྐོར་ལ་སྙན་ཐོ་ཞིག་བཏོན་ཏེ། རྒྱ་གཞུང་གིས་བོད་དང་ཞིན་ཅང་གཉིས་ནང་འགྲོ་བ་མིའི་ཐོབ་ཐང་མེད་པར་གདུག་རྩུབ་ཀྱིས་གཉའ་གནོན་དྲག་པོ་བྱས་དང་བྱེད་བཞིན་ཡོད་སྟབས། རྒྱ་ནག་འཛམ་གླིང་ནང་གི་འགྲོ་བ་མིའི་ཐོབ་ཐང་གནས་སྟངས་ཡག་པོ་མེད་པའི་རྒྱལ་ཁབ་ཀྱི་ཐོ་གཞུང་ནང་བཞག་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་དཔའ་ཆོན་ཡུན་གྱིས། དབྱིན་གཞུང་གིས་རྒྱ་ནག་གི་སྲིད་དོན་ལ་འགན་འཁུར་མེད་པའི་སྙན་ཐོ་བཏོན་ཏེ་སྒྲོ་འདོག་མང་པོ་བྱེད་ཀྱིན་ཡོད་པ་དེ་ངེས་པར་དུ་མཚམས་འཇོག་བྱེད་དགོས་ཤིང་། དེ་མིན་རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་ཡར་རྒྱས་ལ་གནོད་སྐྱོན་འགྲོ་ངེས་རེད་ཅེས་བརྗོད་འདུག
གནད་དོན་དེའི་ཐད་དབྱིན་ཡུལ་ཕྱི་སྲིད་ལས་ཁུངས་ཀྱི་མགྲིན་ཚབ་པས་གསལ་བསྒྲགས་སྤེལ་ཏེ། རྒྱ་གཞུང་གིས་རྒྱལ་ཁབ་གཉིས་ཀྱི་ཚོགས་འདུ་ཕྱིར་འཐེན་བྱས་པར་བློ་ཕམ་ཡོད་། འོན་ཀྱང་། ང་ཚོས་ཡང་བསྐྱར་གྲོས་བསྡུར་བརྒྱུད་ཚོགས་འདུ་དེ་ཚོགས་རྒྱུར་དུས་ཚོད་གཏན་འབེབས་ཡོང་ཐབས་བྱ་རྒྱུ་ཡིན་ཞེས་བརྗོད་འདུག
ན་ནིང་ཕྱི་ཟླ་ ༡༢ པའི་ནང་དབྱིན་ཡུལ་གྱི་སྲིད་བློན་ཁེམ་མེ་རོན་ (David Cameron)མཆོག རྒྱ་ནག་ལ་གཞུང་འབྲེལ་གཟིགས་སྐོར་སྐབས། རྒྱལ་ཁབ་གཉིས་ཀྱི་འགྲོ་བ་མིའི་ཐོབ་ཐང་སྐོར་ལ་ཚོགས་འདུ་ཞིག་ཚོགས་རྒྱུའི་གྲོས་ཆོད་བྱུང་བ་ལྟར། ཐེངས་འདིའི་ཚོགས་འདུ་དེ་གོ་སྒྲིག་བྱས་པ་ཞིག་ཡིན་འདུག
གསར་འགོད་པ། ལྷ་སྐྱབས་རྒྱལ།
