འདི་ལོའི་སྐབས་བཅུ་དྲུག་པའི་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུ་ཆེན་མོའི་སྐོར་ལ་བསམ་ཤོག་བསྡུ་ལེན་བྱས་པ་བརྒྱུད་བྷེ་ཇཱའེ་པི་ཚོགས་པར་འོས་ཚད་མཐོ་ཤོས་ཐོབ་ཡོད་འདུག
ཁ་སང་ཕྱི་ཚེས་ ༡༤ ཉིན་ཨན་ཌི་ཌི་བྷི་ (NDTV) ཡིས་རྒྱ་གར་རྒྱལ་ཡོངས་ཀྱི་གྲོང་ཁྱེར་དང་ས་ཁུལ་ཆེ་ཁག་ཏུ། རྒྱ་གར་རྒྱལ་ཡོངས་སྐབས་བཅུ་དྲུག་པའི་གྲོས་ཚོགས་འོག་མའི་འོས་བསྡུ་ཆེན་མོའི་ཁྲོད། ཆབ་སྲིད་ཚོགས་པ་གང་ལ་རྒྱལ་ཁ་ཐོབ་མིན་ཐད་བསམ་ཤོག་བསྡུས་པ་བརྒྱུད། སྐུ་ཞབས་ཎ་རིན་ཌ་མུ་དྷི་ལགས་ཀྱིས་མགོ་ཁྲིད་པའི་བྷེ་ཇཱའེ་པི་ཚོགས་པར་བསམ་ཤོག་མང་ཤོས་ཨང་དང་པོ་དང་། ར་ཧུལ་གྷན་དྷི་ལགས་ཀྱིས་མགོ་ཁྲིད་པའི་ཀོང་རེ་སེ་ཚོགས་པ་ཨང་གཉིས་པ། མེམ་ཋ་བྷེ་ཎར་ཇེ་ (Ms Banerjee) ལགས་ཀྱིས་སྣེ་ཁྲིད་པའི་ཊེར་ཎ་མོལ་ཀོང་རེ་སི་ (Trinamool) ཚོགས་པར་ཨང་གསུམ་པ་བཅས་ཐོབ་རྒྱུ་ཡིན་སྐོར་ཚོད་དཔག་བྱས་ཡོད་འདུག
མང་མོས་བསམ་ཤོག་དེའི་ནང་། རྒྱལ་ཡོངས་འོས་བསྡུའི་ཁྲོད་གྲོས་ཚོགས་འཐུས་མི་ ༥༤༣ འདེམ་དགོས་པ་ལས། བྷེ་ཇཱའེ་པི་ཚོགས་པར་འཐུས་མི་ ༢༧༥ དང་། ཀོང་རེ་ཚོགས་པར་འཐུས་མི་ ༡༡༡། ཊེར་ཎ་མོལ་ཀོང་རེ་སི་ཚོགས་པར་འཐུས་མི་ ༣༠། ཇཱ་ཡ་ལ་ལི་དྷ་ལགས་ཀྱིས་སྣེ་ཁྲིད་པའི་ (J Jayalalithaa) ཨལ་ཨའེ་ཌི་ཨེམ་ཁེ་ ( AIADMK) ཚོགས་པར་འཐུས་མི་ ༢༢། མུ་ལཱ་ཡམ་སིང་ཡཱ་ཋེབ་ལགས་ཀྱིས་སྣེ་ཁྲིད་པའི་སམ་མཱ་ཇེ་ཚོགས་པར་ (SP) འཐུས་མི་ ༡༤། ནེ་ཝན་པཱ་ཌེ་ནེག་ (Naveen Patnaik) ལགས་ཀྱིས་སྣེ་ཁྲིད་པའི་བྷེ་ཇུ་ཇཱ་ན་ཌ་ཌལ་ (Biju Janata Dal) ཚོགས་པར་འཐུས་མི་ ༡༣། ཀཱ་རན་ཎ་ཌི་ལགས་ཀྱིས་སྣེ་ཁྲིད་པའི་ཌི་ཨེམ་ཁེ་ (DMK) ཚོགས་པར་འཐུས་མི་ ༡༤། དམར་ཤོག་ཚོགས་པར་འཐུས་མི་ ༢༢། ཨར་ཝུན་ཁེ་ཅེ་རེ་ཝལ་ལགས་ཀྱིས་སྣེ་ཁྲིད་པའི་མི་སེར་དཀྱུས་མའི་ཆབ་སྲིད་ཚོགས་པར་གྲོས་ཚོགས་འཐུས་མི་ ༡ ལས་ཐོབ་རྒྱུ་ཡིན་སྐོར་བརྗོད་འདུག
ཐེངས་འདིའི་འོས་བསྡུའི་ཁྲོད་བྷེ་ཇའི་པིས་སྣེ་ཁྲིད་པའི་༼རྒྱལ་ཡོངས་དམངས་གཙོའི་མཐུན་སྒྲིལ་ཚོགས་པ་༽( National Democratic Alliance ) ཞེས་པར་ ༢༠༠༩ ལོའི་རྒྱལ་ཡོངས་འོས་བསྡུ་དང་བསྡུར་ན་ཅུང་ལེགས་པ་ཡོང་རྒྱུ་ཡིན་པ་ཚོད་དཔག་བྱེད་བཞིན་ཡོད་འདུག་ལ། རྒྱལ་ཡོངས་དམངས་གཙོའི་མཐུན་སྒྲིལ་ཚོགས་པར་རྒྱལ་ཡོངས་འོས་བསྡུ་ཆེན་མོའི་ཁྲོད་ཡུ་པི་མངའ་སྡེ་ནས་གྲོས་ཚོགས་འཐུས་མི་ ༤༡ དང་། མཱཧ་ར་ཤི་ཌ་ནས་འཐུས་མི་ ༡༧། ར་ཇེ་སི་ཐན་ནས་འཐུས་མི་ ༡༧། བྷེ་ཧར་ནས་འཐུས་མི་ ༡༢། ཨན་དྷ་ར་པར་དྷི་ཤི་ནས་འཐུས་མི་ ༡༢། མཱ་དྷེཡ་པར་དྷི་ཤི་ནས་འཐུས་མི་ ༡༠ བཅས་ཐོབ་རྒྱུ་ཡིན་པར་ཚོད་དཔག་བྱས་ཡོད་ཀྱང་། བྷེ་ཇཱའེ་པི་ཡིས་ཤུགས་རྐྱེན་ཆེན་པོ་ཡོད་པའི་ཀཱ་ཎཱ་ཀྲ་ཁཱ་ནང་འཐུས་མི་ ༧ དང་། ཆཱ་དྷིསེ་གྷར་ནང་འཐུས་མི་ ༢། ནུབ་བྷང་གྷར་ནང་འཐུས་མི་ ༡ ལས་ཐོབ་རྒྱུ་མིན་སྐོར་བསྒྲགས་འདུག
ཐེངས་འདིའི་འོས་བསྡུའི་ཁྲོད་གཞུང་འཛིན་ཀོང་རེ་སེ་ཚོགས་པར་ ༢༠༠༩ ལོའི་རྒྱལ་ཡོངས་འོས་བསྡུ་ཆེན་མོ་དང་བསྡུར་ན་ཀཱ་ཎཱ་ཀྲ་ཁཱ་དང་། ཨ་སམ། ཆཱ་དྷིསེ་གྷར་བཅས་ཀྱི་གྲོས་ཚོགས་འཐུས་མིའི་རྒྱལ་ཁ་ཐོབ་རྒྱུ་ཙམ་ལས། མངའ་སྡེ་གཞན་ནང་བྷེ་ཇཱའེ་པི་གཙོས་ཆབ་སྲིད་ཚོགས་པ་ཁག་ལ་མང་མོས་ཐོབ་རྒྱུ་དང་། ཀོང་རེ་སེ་ཚོགས་པས་ཤུགས་རྐྱེན་ཆེན་པོ་བཟོ་བཞིན་ཡོད་པའི་ཨན་དྷ་ར་པར་དྷི་ཤི་ནང་གྲོས་ཚོགས་འཐུས་མི་ ༣ ལས་ཐོབ་རྒྱུ་མིན་སྐོར་བརྗོད་འདུག
བྷེ་ཇཱའེ་པི་ཚོགས་པར་རྒྱལ་ཁ་ཐོབ་པ་ཡིན་ན། ཚོགས་པའི་འོས་མི་སྐུ་ཞབས་ཎ་རིན་ཌ་མུ་དྷི་ལགས་རྒྱ་གར་གྱི་སྲིད་བློན་ཆགས་རྒྱུ་ཡིན་སྟབས། རྒྱལ་སྤྱི་རྒྱལ་ནང་གི་རྒྱ་གར་བ་སྒྱུ་རྩལ་མཁས་ཅན་དང་། སྙན་གྲགས་ཅན་གྱི་རྩོམ་པ་པོ་སྐུ་ཞབས་སཱ་མན་ར་ཤི་ཌི་ (Salman Rushdie) ལགས་ཀྱི་གཙོས་གནད་ཡོད་མི་སྣ་མང་པོས་ཎ་རིན་ཌ་མུ་དྷི་ལགས་ནི་ཧིན་རྡུའི་ཆོས་ལུགས་ཀྱི་ལྟ་བ་ཤུགས་ཆེན་འཛིན་མཁན་ཞིག་ཡིན་པ་མ་ཟད། ༢༠༠༢ ལོར་གྷུ་ཆུ་ར་ཌི་ནང་ཉེས་མེད་ཁ་ཆེ་མི་རིགས་ ༢༠༠༠ ལྷག་དམར་བསད་ཀྱིས་ཧིན་རྡུ་དང་ཁ་ཆེ་མི་རིགས་བར་འགལ་ཟླ་བཟོ་མཁན་ཞིག་ཡིན་པར་བརྟེན། རྒྱ་གར་གྱི་རྩ་ཁྲིམས་ནང་གསལ་ཆོས་ལུགས་རིས་མེད་ཀྱི་སྲིད་གཞུང་ ( Secular State) རྒྱུན་འཁྱོངས་ཐུབ་རྒྱུ་ཁག་པོ་ཡིན་སྐོར་སྐྱོན་བརྗོད་བྱས་ཡོད་འདུག
ཆབ་སྲིད་དབྱེ་ཞིབ་པ་ཚོས། ད་རེབ་རྒྱལ་ཡོངས་འོས་བསྡུའི་ཁྲོད་བྷེ་ཇཱའེ་པི་ཚོགས་པར་རྒྱལ་ཁ་ཐོབ་སྲིད་ཀྱང་། ཚོགས་པའི་མགོ་ཁྲིད་བར་ལྟ་བ་ལངས་ཕྱོགས་མི་མཐུན་པའི་དབང་གིས་གཞུང་ཡུན་རིང་སྲ་བརྟན་ཐུབ་རྒྱུ་དཀའ་ལས་ཁག་པོ་ཡིན་སྐོར་བརྗོད་འདུག
རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུ་ཟླ་འདིའི་ཚེས་ ༧ ཉིན་མགོ་བཙུགས་ཀྱིས་ཨ་སམ་དང་ཏེར་པུ་ར་མངའ་སྡེ་དང་། ཚེས་ ༩ ཉིན་ཨ་རུ་ན་ཅལ་དང་མ་ནི་པུར། མེ་གྷ་ལཱ་ཡཱར། མེ་ཛོ་རམ། ཎ་གྷ་ལན་ཌི་ནང་བྱས་ཡོད་ཅིང་། ཚེས་ ༡༠ ཉིན་བྷེ་ཧར་དང་ཆཱ་དྷིསེ་གྷར། ཧར་ཡཱ་ན། ཇམ་མུ་དང་ཀཱ་ཤི་མེར། ཇར་ཁནཌི། ཀེ་ར་ལཱ། མཱ་དྷེཡ་པར་དྷི་ཤི མཱཧ་ར་ཤི་ཌ། ཡུ་པི། ཨོ་རི་ས། ཨན་དྷ་མན་དང་ཎ་ཁཱོ་བྷར་གླིང་ཕྲན། ལག་ཤི་དྷེཝུབ། རྒྱལ་ས་ལྡི་ལི། ཅན་དྷི་གྷར་བྱས་དང་། ཚེས་ ༡༢ ཉིན་འབྲས་ལྗོངས་དང་། ཏེར་པུ་ར། ཨ་སམ་བཅས་ནང་འོས་བསྡུ་བྱས་ཡོད་འདུག
ཚེས་ ༡༧ ཉིན་བྷེ་ཧར་དང་ཆཱ་དྷིསེ་གྷར། གྷོ་ཝ། ཇམ་མུ་དང་ཀཱ་ཤི་མེར། ཇར་ཁན་ཌི། མཱ་དྷེཡ་པར་དྷི་ཤི ཀཱ་ཎཱ་ཀྲ་ཁཱ། མཱཧ་ར་ཤི་ཌ། ཨོ་རི་ས། མ་ཎི་པུར། ར་ཇེ་སི་ཐན། ཏ་མིལ་ན་ཌོ། ཡུ་པི། ནུབ་བྷང་གྷལ་བཅས་ནང་འོས་བསྡུ་གནང་རྒྱུ་ཡིན་འདུག
གསར་འགོད་པ། དོན་གྲུབ།
