རྒྱ་གཞུང་གིས་ཆབ་མདོ་ཁུལ་ཆབ་མདོ་རྫོང་སྨན་མདའ་མཚོ་ཤོད་འབོད་ཡག་དགོན་པའི་མཁན་པོ་འཛིན་བཟུང་བྱས་ཏེ། ད་ཆར་ཆབ་མདོ་རྫོང་གི་བཙོན་ཁང་ཞིག་ཏུ་བཀག་ཉར་བྱས་ཡོད་འདུག
རྒྱ་ནག་གཞུང་གིས་ཕྱི་ལོ་ ༢༠༡༢ ལོའི་ཟླ་ ༡༡ པ་ནས་བཟུང་ཆབ་མདོ་སྨན་མདའ་དགོན་པའི་རང་ལོ་ ༤༠ ཡིན་པའི་མཁན་པོ་མཁས་གྲུབ་བམ། ཡོངས་གྲགས་སུ་ཆབ་མདོ་མཁས་གྲུབ་ལགས་སུ་ལྟ་རྟོག་བྱས་ཡོད་པ་དང་། ༢༠༡༣ ལོར་ཟླ་ ༡ རིང་བཙོན་འཇུག་བཀག་ཉར་བཅས་བྱས་ཡོད་པ་མ་ཟད། ཟླ་འདིས་ཚེས་ ༡༣ ཉིན་མཁན་པོ་ལྷ་སར་ཡོད་པའི་བོད་ལྗོངས་ནང་བསྟན་སློབ་གླིང་དུ་ཚོགས་འདུ་ཞིག་ཏུ་བཅར་སྐབས་གློ་བུར་འཛིན་བཟུང་བྱས་ཡོད་འདུག ཉེ་ལམ་ཉེན་རྟོག་པ་དང་ལས་བྱེད་མི་སྣས་མཁན་པོའི་གྲྭ་ཤག་སྔོག་གཤེར་བྱས་ཏེ་གློག་ཀླད་སོགས་འཁྱེར་ཡོད་པ་མ་ཟད། ས་གནས་མང་ཚོགས་དགོན་པའི་གྲྭ་བ་ཚོར་མཁན་པོ་བཙོན་ཁང་ནང་གདན་འདྲེན་གྱིས་རབ་གནས་བྱེད་འཇུག་གི་ཡོད་ཅེས་དགོན་གྲོང་གཉིས་ཀྱི་སེམས་ལ་གནོད་པའི་སྐད་ཆ་མང་པོ་བཤད་ཡོད་འདུག
གནས་ཚུལ་འདིའི་ཐད་བོད་ནས་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་པ་ཀུན་བཟང་བསྟན་འཛིན་ལགས་སུ་ཡི་གེ་ཞིག་བཏང་ཡོད་པའི་ནང་། རྒྱ་ནག་གཞུང་གིས་ ༢༠༡༢ ལོའི་ཟླ་ ༣ ཚེས་ ༡༢ ཉིན་བོད་རང་སྐྱོང་ལྗོངས་ཆབ་མདོ་ཁུལ་ཆབ་མདོ་རྫོང་སྨན་མདའ་མཚོ་ཤོད་དང་འབོད་ཡག་དགོན་པ་བཅས་སུ་སྤྱི་བདེ་ཉེན་རྟོག་པ་དང་ལས་བྱེད་མངགས་གཏོང་གིས། དེ་སྔོན་བོད་དོན་དང་འབྲེལ་བའི་ཡིག་ཆ་ཞིག་གཏོར་འགྲེམས་བྱས་པའི་ས་གནས་ཀྱི་མང་ཚོཊ་བསྡུ་སྐོང་གིས་༧གོང་ས་མཆོག་ལ་མཚན་དམོད་དང་། སྲིད་གཞུང་གིས་ས་གནས་བོད་མི་ཚོར་དབུལ་སྐྱོར་གྱི་སྒོར་མོ་མང་པོ་སྤྲོད་ཀྱི་ཡོད་ཚུལ། ས་གནས་མང་ཚོགས་སྲིད་གཞུང་ལ་དགའ་མོས་ཡོད་ཚུལ་སོགས་འཁོད་ཡོད་པའི་ཡི་གེ་ཞིག་ལ་བཙན་དབང་གིས་མཛུལ་ཐེལ་རྒྱག་བཅུག་ཡོད་སྐོར་བཀོད་འདུག
ཡི་གེ་དེའི་ནང་ ༢༠༡༢ ལོའི་ཟླ་ ༣ ཚེས་ ༡༢ ཉིན་སྨན་མདའ་དགོན་པའི་དགེ་རྒན་འཇམ་དབྱངས་ཡེ་ཤེས་དང་། གྲྭ་སྒྲུབ་རྒྱུད་ཞུ་བ་གཉིས་ཀྱིས་ལོ་སར་ཚེས་ ༡ ཉིན་བོད་དོན་ཆེད་སྐུ་གཤེགས་པའི་དཔའ་བོ་དཔའ་མོ་རྣམས་ཀྱི་ཆེད་བསྔོ་སྨོན་གནང་ཡོད་པའི་ཉེས་འཛུཊ་འོག་འཛིན་བཟུང་བྱས་ཡོད་པར་མ་ཟད། གྲྭ་བ་ཁོང་གཉིས་གྲྭ་ཤག་ལ་སྔོག་གཤེར་གྱིས་སྐུ་པར་དང་འོད་སྡེར་སོགས་འཁྱེར་ཡོད་པ་དང་། སྐབས་དེར་དགོན་པའི་གྲྭ་ཤག་ཚང་མ་སྔོག་གཤེར་བྱེད་སྐབས་གྲྭ་སྐལ་བཟང་ཚེ་རིང་ལགས་ཀྱིས་ཞལ་འདོན་དཔེ་ཆའི་སྟེང་༼བོད་རང་དབང་༽ ཞེས་བྲིས་ཡོད་པའི་ཉེས་མིང་འོག་འཛིན་བཟུང་། དགུང་ལོ་ ༦༥ ཡིན་པའི་སྤྲུལ་སྐུ་འཕྲིན་ལས་རབ་བརྟན་ཞུ་བར་སྙུང་གཞི་ཕོཊ་མིན་ལ་མ་ལྟོས་པར། བཙན་གྱིས་ཚོགས་འདུར་ཞུགས་བཅུག་སྟབས། ལོ་དེའི་ཟླ་ ༡༡ ཚེས་ ༡༤ ཉིན་དགོངས་པ་རྫོགས་ཡོད་སྐོར་བཀོད་ཡོད་འདུག
ད་དུང་སྐབས་དེར་དགོན་པའི་ནང་གྲྭ་བ་ ༣༠ ལས་འདུག་མི་ཆོག་པའི་བཙན་བཀའ་བཏང་བ་དང་། གྲྭ་བ་ ༤༠ ཙམ་ལ་བཙན་དབང་གིས་སྐྱ་ཆས་གྱོན་བཅུག་པར་མ་ཟད། ཡང་བསྐྱར་གྲྭ་བ་མི་བྱེད་པའི་མཛུབ་ཐེལ་རྒྱག་བཅུག་ཏེ་དགོན་པའི་བཤད་གྲྭ་སྟོང་པ་ཆགས་བཅུག་ཡོད་སྐོར་སོགས་བཀོད་འདུག
ཉེ་བའི་ཆར་རྒྱ་གཞུང་གི་མི་སྣ་ས་གནས་སུ་འབྱོར་དེ་ཉིན་བཅུའི་རིང་མཐུན་སྒྲིལ་དཔུང་རྟགས་བཏག་ཡོད་རིགས་ཀྱི་དཔང་རྟགས་སྲིད་གཞུང་ལ་རྩིས་སྤྲོད་བྱེད་དགོས་པ་དང་། རྩིས་སྤྲོད་མ་བྱས་ཚེ་དྲག་རྡུང་དང་བཙོན་འཇུག་གི་བྱ་འགུལ་སྤེལ་རྒྱུ་ཡིན་ཞེས་བཤད་དེ་ས་གནས་མི་མང་ལ་དམ་དྲག་དང་འཇིགས་སྐུལ་རབ་དང་རིམ་པ་བྱེད་ཀྱིན་ཡོད་འདུག
གསར་འགོད་པ། དོན་གོ
གསར་འགོད་པ་དོན་གོ་ལགས་སུ།
བོད་རང་སྐྱོང་ལྗོངས་ཀྱི་ཁྱབ་ཁོངས་སུ་ཁུལ་གཅིག་དང་། ས་ཁུལ་དྲུག་ཡོད་པ་རེད། ལྷ་ས་ནི་ཁུལ་རེད། ཁུལ་གཅིག་ལྷ་ས་དང་། ས་ཁུལ་དྲུག་ནི་ཆབ་མདོ་ས་ཁུལ། གཞིས་རྩེ་ས་ཁུལ། ལྷོ་ཁ་ས་ཁུལ། མངའ་རིས་ས་ཁུལ། ནག་ཆུ་ས་ཁུལ། ཉིང་ཁྲི་ས་ཁུལ་བཅས་རེད།
དེས་ན་ཁྱེད་ཀྱིས་ཆབ་མདོ་དེ་ཁུལ་ཡིན་མིན་རྟོགས་ཡོད་ཤག་ཡིན་ལགས།
ཀློག་པ་པོ་རྣམ་རྒྱལ་དོན་འགྲུབ་ལགས། ཁྱེད་ཀྱིས་ང་ལ་བོད་རང་སྐྱོང་ལྗོངས་ཁྱབ་ཁོངས་སུ་ས་ཁུལ་ག་ཚོད་དང་ཁུལ་ག་ཚོད་ཡོད་མེད་དང་། ལྷ་ས་ཁུལ་ཡིན་མིན། ཁྱེད་ཀྱིས་ལྷ་ས་ཁུལ་འོག་ན་ས་ཁུལ་དྲུག་ཟེར་བ་རེ་རེ་བཞིན་ངོ་སྤྲོད་གནང་ན་ཕན་ཐོགས་བྱུང་ས་རེད།
ངས་ཤེས་ཚོད་ལྟར་ན། བོད་རང་སྐྱོང་ལྗོངས་ཁྱབ་ཁོངས་ན་ས་ཁུལ་དང་ཁུལ་བདུན་འདུག དེ་དག་ནི་ལྷ་ས་དང་། ཆབ་མདོ། གཞིས་ཀ་རྩེ། ནག་ཆུ། མངའ་རིས། ཉིང་ཁྲི། ལྷོ་ཁ་བཅས་རེད་འདུག
བཀུར་འོས་བོད་ཀྱི་དུས་བབ་གསར་འགོད་པ་དོན་གོ་ལགས།
སྤྱིར་དེང་སང་དུས་བབ་དྲ་རྒྱའི་ནང་དུ་ཡིག་ནོར་ཅུང་མང་དུ་སོང་བ་ཚོར་གྱི་འདུག་ལ་དོན་གྱི་ཆ་ནས་ཀྱང་ཏག་ཏག་མ་བསྡད་པ་དེ་འདྲ་ཡོང་གི་འདུག་ཞུ་ཡ་ཡིན།
དཔེར་ན་བོད་རང་སྐྱོང་ལྗོངས་ཀྱི་ཁོངས་གཏོགས་ཆབ་མདོ་ཟེར་བ་དེ་ཁུལ་གཏན་ནས་མ་རེད། ཁུལ་དང་ས་ཁུལ་གཉིས་ལ་ཁྱད་པར་ཆེན་པོ་ཡོད། ལྷ་ས་ནི་ཁུལ་དང་དེ་འོག་ས་ཁུལ་དྲུག་ཡོད་པ་ལས་ཆབ་མདོ་ནི་ས་ཁུལ་གཅིག་རེད། ཐུགས་རྗེ་ཆེ་ཕན་ཐོགས་འདྲ་བྱུང་ན་བསམ།