བོད་སྐྱོད་གོམ་བགྲོད་པ་གླིང་ཚ་བོར་སོང་། ཞི་བའི་འཐབ་རྩོད་ཀྱི་དཔེ་དེབ་བརླཊ་སོང་།

གླིང་ཚ་ཚེ་བརྟན་རྡོ་རྗེ་ལགས་ཀྱིས་ཁོ་རང་གི་ཞི་བའི་འཐབ་རྩོད་སྐོར་གྱི་དཔེ་དེབ་མ་ཡིག་ཅིག་སྲིད་སྐྱོང་མཆོག་ལ་ཕུལ་ཏེ་དཔར་སྐྲུན་ཡོང་བའི་རེ་སྐུལ་ཞུས་ཡོད་ཀྱང་། བར་ལམ་སྲིད་སྐྱོང་མཆོག་གིས་དེབ་ཀྱི་མ་ཟིན་བོར་བརླག་ཕྱིན་པའི་གནས་ཚུལ་བྱུང་ཡོད་ཀྱང་། རྗེས་སུ་བཀའ་དྲུང་མཆོག་གིས་གསལ་བཤད་གནང་བ་ལྟར་ན་དེབ་ཀྱི་མ་ཟིན་སླར་རྙེད་སོན་བྱུང་ཡོད་ཀྱང་ཡིག་ཆ་ཁ་འབྱེད་ཐུབ་ཀྱི་མི་འདུག་ཟེར།

བོད་སྐྱོད་ཞི་བའི་གོམ་བགྲོད་པའམ། ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ ༢༠༡༣ ཟླ་ ༣ ཚེས་ ༡༠ ཉིན་བཞུགས་སྒར་ངྷ་རམ་ས་ལ་ནས་ཐེངས་གཉིས་པའི་བོད་སྐྱོད་གོམ་བགྲོད་གནང་སྟེ་ལོ་གཅིག་འཁོར་བ་དང་། ལྷག་པར་དུ་སྔར་ལོའི་ཕྱི་ཟླ་ ༦ ཚེས་ ༨ ཉིན་གྱི་ཞོགས་པར་ཀ་ལོན་སྦུག་སྲད་རྒྱུད་དགོན་པ་ནས་ཁོང་བོར་བརླག་སོང་སྟེ་ཡུན་རིང་ཕྱིན་པ་དང་བསྟུན་ཏེ། སྤྱི་ཚོགས་དྲ་འབྲེལ་སྐད་འཕྲིན་དང་ངོ་དེབ་སོགས་སུ་ཁོང་གི་སྐོར་ལ་གླེང་སློང་མང་པོ་འགྲོ་བཞིན་ཡོད་པ་དང་། ཉེ་ལམ་ངྷ་སར་གནས་སྡོད་ལྷ་ཆབ་སྦྱིན་པ་ལགས་ཀྱིས། གླིང་ཚའི་གོམ་བགྲོད་ཐེངས་གཉིས་པའི་སྔོན་ཙམ་ལ་ཁོང་སྲིད་སྐྱོང་བློ་བཟང་སེང་གེ་མཆོག་གི་དྲུང་དུ་བཅར་ཏེ། ཁོང་རང་ཉིད་ཀྱིས་བརྩམས་པའི་༼ཞི་བའི་འཐབ་རྩོད།༽ཅེས་པའི་དཔེ་དེབ་ཀྱི་མ་ཟིན་བཅུག་ཡོད་པའི་མཐེབ་སྡེར་ (Pen Drive)ཞིག་སྲིད་སྐྱོང་མཆོག་ལ་ཕུལ་ཏེ། དཔེ་དེབ་དེ་བཀའ་ཤག་གི་ངོས་ནས་དཔར་སྐྲུན་ཞུ་རྒྱུར་རེ་སྐུལ་ཞུས་དོན་ལྟར་བཀའ་ཤག་གིས་ཞལ་བཞེས་གནང་ཡོད་ཀྱང་། ཕྱིས་སུ་གྲགས་འགུལ་གང་ཡང་མ་བྱུང་སྟབས་གླིང་ཚའི་ཨ་མ་ལྡོམ་པོ་སྐྱིད་ལགས་ཀྱིས་བོད་མི་མང་སྤྱི་འཐུས་རྨོག་རུ་བསྟན་པ་ལགས་ལ་རེ་སྐུལ་ཞུས་པ་དང་། དེ་སྔོན་གླིང་ཚས་ཀྱང་རྨོག་རུ་བསྟན་པ་ལགས་སུ་ཡི་གེ་ཞིག་བཞག་ཡོད་པ་བཅས་ལ་བརྟེན་ཏེ། རྨོག་རུ་བསྟན་པ་ལགས་བཀའ་ཤག་ཏུ་བཅར་ཏེ་གླིང་ཚའི་དཔེ་དེབ་སྐོར་བཀའ་འདྲི་ཞུ་སྐབས། སྲིད་སྐྱོང་མཆོག་གི་སྒེར་དྲུང་གི་ངོས་ནས་དེབ་ཀྱི་མ་ཟིན་དེ་རག་གི་མི་འདུག་བོར་བརླགས་སུ་ཕྱིན་འདུག་ཅེས་ལན་སྤྲད་ཡོད་སྐོར་བརྗོད་འདུག

ཟླ་འདིའི་ཚེས་ ༡༤ ཉིན་གསར་འགོད་པ་ལྷ་ཆབ་སྦྱིན་པ་ལགས་སུ་དེའི་སྐོར་བཅར་འདྲི་ཞུས་པར་ཁོང་གིས། གནས་ཚུལ་དེ་དངོས་ཡོད་རེད། གླིང་ཚས་གོམ་བགྲོད་ཐེངས་གཉིས་པ་མགོ་འཛུགས་མ་བྱས་པའི་སྔོན་ལ། ཁོང་སྲིད་སྐྱོང་མཆོག་གི་མདུན་ལ་བཅར་ཏེ་དེབ་དེའི་མ་ཟིན་ཕུལ་འདུག དེབ་དེའི་ནང་དོན་གཙོ་བོ་ཁོ་རང་གི་ཞི་བའི་འཐབ་རྩོད་སྐོར་ཡིན་ས་རེད། ཁ་བྱང་ལ་༼ཞི་བའི་འཐབ་རྩོད།༽ཞེས་བཏགས་འདུག ཁོང་གིས་དེབ་དེ་གལ་ཆེན་དོན་ཆེན་དུ་བརྩིས་ཏེ་སྲིད་སྐྱོང་མཆོག་ལ་ཞུ་སྐབས། སྲིད་སྐྱོང་མཆོག་གིས་དེབ་དེ་འདྲ་ཞིག་བྲིས་ཡོད་ན་ཡག་པོ་འདུག གཞུང་གིས་ངོས་ནས་ནོ་སྦེལ་ཞི་བདེའི་གཟེངས་རྟགས་ཉིན་མོའི་བར་དཔར་འགྲེམ་བྱ་རྒྱུ་ཡིན་ཟེར་ནས་ཞལ་བཞེས་གནང་ཡོད་ས་རེད། ཅེས་བརྗོད་སོང་།

ལྷ་ཆབ་ལགས་ཀྱིས་མུ་མཐུད་དུ་བརྗོད་དོན། གླིང་ཚས་དེབ་དེའི་སྐོར་ཁོ་རང་གི་ཨ་ཕར། ང་ལ་མཚོན་ན་དེབ་དེ་གལ་ཆེན་པོ་ཡིན། གལ་སྲིད་གཞུང་གིས་དཔར་སྐྲུན་ཞུ་མ་ཐུབ་པ་ཡིན་ན། པ་ལགས་ཀྱིས་དེབ་ཀྱི་མ་ཟིན་ཕྱིར་བླངས་ཏེ་བོར་བརླག་ཏུ་མ་སོང་བ་གནང་རོགས་ཞེས་ལབ་འདུག པ་ལགས་ན་ནིང་བོད་དུ་འགྲོ་སྐབས་ཨ་མ་ལྡོམ་པོ་སྐྱིད་ལ་མངགས་བཅོལ་བྱས་འདུག ཞི་བདེའི་གཟེངས་རྟགས་སྐབས་དེབ་དེའི་སྐོར་གྲགས་འགུལ་མ་བྱུང་སྟབས། ཨ་མ་ལྡོམ་པོ་སྐྱིད་སྲིད་སྐྱོང་མཆོག་གི་མདུན་ལ་བཅར་ཏེ་བཀའ་འདྲི་ཞུས་སྐབས། ཉིན་གཅིག་གཉིས་རྗེས་ལན་སྤྲད་ཆོག་ཅེས་གསུངས་འདུག རྗེས་སུ་ཨ་མ་ལྡོམ་པོ་སྐྱིད་ལགས་ཀྱིས་སླར་ཡང་སྤྱི་འཐུས་རྨོག་རུ་བསྟན་པ་བཀའ་ཤག་ཏུ་བཏང་སྟེ་སྐད་ཆ་འདྲི་བཅུག་སྐབས་དེབ་ཀྱི་མ་ཟིན་བརླག་འདུག་ཅེས་བཀའ་ལན་གནང་འདུག ཅེས་བརྗོད་སོང་།

གསར་འགོད་པས་ལྷ་ཆབ་ཁོ་རང་དེབ་དེ་དང་འབྲེལ་བ་ཇི་ལྟར་ཆགས་མིན་སྐོར་དྲིས་པར་ཁོང་གིས། གླིང་ཚ་ངེད་གཉིས་གྲོགས་པོ་རྒྱུས་ཡོད་ཡིན། འོན་ཀྱང་། ངས་སྔོན་མ་དེབ་དེའི་སྐོར་ཤེས་ཀྱི་མེད། ཉེ་ལམ་ཨ་མ་ལྡོམ་པོ་སྐྱིད་ལགས་ཀྱིས་དེའི་སྐོར་ང་ལ་བཤད་དེ། དེབ་དེའི་མ་ཟིན་བརླག་མི་ཉན་པའི་གནས་ཚུལ་བཤད་བྱུང་། དེ་ནས་ངས་རྨོག་རུ་བསྟན་པ་ལགས་ཡང་བསྐྱར་བཀའ་ཤག་ཏུ་སོང་ནས་རྩད་གཅོད་ཅིག་གནང་རོགས་ཞུས་པ་ཡིན། ཞེས་བརྗོད་བྱུང་།

གསར་འགོད་པ་ཨ་མ་ལྡོམ་པོ་སྐྱིད་ལགས་སུ་ཐུག་འཕྲད་བྱས་ཏེ་བཅར་འདྲི་ཞུས་པར་ཁོང་མོས། ཚེ་བརྟན་རྡོ་རྗེས་དེབ་དེར་རྩ་ཆེན་པོ་བྱེད་ཀྱི་འདུག གལ་སྲིད་བཀའ་ཤག་གིས་དེབ་དེ་དཔར་སྐྲུན་མ་གནང་བ་ཡིན་ན། ཁྱེད་ཕ་མ་གཉིས་ཀྱིས་མི་གཞན་ཞིག་ལ་རེ་བ་ཞུས་ཏེ་དེབ་དེ་ངེས་པར་དུ་དཔར་སྐྲུན་བྱེད་ཐབས་གནང་དགོས་ལབ་སོང་། ཞི་བདེ་གཟེངས་རྟགས་སྐབས་གྲགས་འགུལ་མ་བྱུང་སྟབས། ང་སྲིད་སྐྱོང་མཆོག་ལ་མཇལ་དུ་འགྲོ་སྐབས་རྒད་པོ་ཞིག་གིས་ངའི་བརྒྱབ་ནས་འཇུས་ཏེ་འདི་སྲིད་སྐྱོང་བློ་བཟང་སེང་གེ་མཆོག་གི་བཞུགས་གནས་རེད་ཟེར་ནས་ང་ཁོང་ལ་དངོས་སུ་མཇལ་བཅུག་མ་སོང་། དེའི་རྗེས་ཨ་ཁུ་རྨོག་རུ་བསྟན་པ་ལགས་ལ་རེ་སྐུལ་ཞུས་པ་ཡིན། ཞེས་བརྗོད་བྱུང་།

གསར་འགོད་པས་སྤྱི་འཐུས་རྨོག་རུ་བསྟན་པ་ལགས་སུ་བཅར་འདྲི་ཞུས་པར། སྔར་ལོའི་ཕྱི་ཟླ་ ༡༠ པའི་ནང་གླིང་ཚའི་པ་ལགས་བོད་ནང་མ་སོང་སྔོན་ཏག་ཏག་ལ་ཁོང་གིས་ང་ལ་ཡི་གེ་ཞིག་བཞག་འདུག ཡི་གེ་ནང་ངའི་ཞི་བའི་འཐབ་རྩོད་ཟེར་བའི་དེབ་ཅིག་སྲིད་སྐྱོང་མཆོག་ལ་ཕུལ་ཏེ། ཕྱི་ཟླ་ ༡༢ ཚེས་ ༡༠ ཉིན་ཏེ་ནོ་བྷེལ་ཞི་བདེ་གཟེངས་རྟགས་ཉིན་མོ་དང་བསྟུན་ཏེ་དཔར་འགྲེམས་ཡོང་བའི་སྐྱབས་འཇུག་ཞུས་ཡོད། གལ་སྲིད། ཁོང་ཚོས་དཔར་སྐྲུན་བྱེད་མ་ཐུབ་པ་ཡིན་ན། ཁྱོད་ཀྱིས་ཐབས་ཤེས་གཞན་ཞིག་གནང་སྟེ་ ༢༠༡༤ ཟླ་ ༣ ཚེས་ ༡༠ ཉིན་བར་དཔར་ཐུབ་གནང་རོགས་ཞེས་འཁོད་འདུག དེ་ནས་ང་བཀའ་ཤག་ཏུ་བཅར་ཏེ་སྲིད་སྐྱོང་མཆོག་གི་སྒེར་དྲུང་འཇིགས་མེད་ལགས་སུ་བཀའ་འདྲི་ཞུས་པ་ཡིན། འཇིགས་མེད་ལགས་ཀྱིས་ང་ཚོས་དེབ་ག་འདྲ་ཞིག་སྲིད་སྐྱོང་མཆོག་ལ་ཕུལ་ཡོད་མེད་ཧ་གོ་ཡི་མེད་ལ། དེབ་དེའི་མ་ཟིན་ཡང་རག་མ་སོང་གསུངས་སོང་། དེ་ནས་ངས་གླིང་ཚས་ང་ལ་བཞག་པའི་ཡི་གེ་དེ་ཕུལ་ནས་དེབ་ཀྱི་མ་ཟིན་རག་ཐབས་གནང་རོགས་ཞེས་ཞུས་པ་ཡིན། ཉིན་གཉིས་གསུམ་རྗེས་ང་རང་ཡང་བསྐྱར་བཀའ་ཤག་ཏུ་བཅར་ཏེ་འདྲི་སྐབས་དེབ་དེ་རྩ་བ་ནས་རག་གི་མི་འདུག་གསུངས་སོང་། དེ་ནས་ཐེངས་གསུམ་པར་བཅར་སྐབས་སྔར་བཞིན་རག་ཐབས་མེད་སྐོར་གསུངས་སོང་། ཞེས་བརྗོད་བྱུང་།

ཚེས་ ༡༥ ཉིན་གསར་འགོད་པ་བཀའ་ཤག་ཏུ་བཅར་ཏེ་སྲིད་སྐྱོང་མཆོག་གི་སྒེར་དྲུང་འཇིགས་མེད་ལགས་སུ་གནས་ཚུལ་དེའི་སྐོར་ཞུ་སྐབས། ད་ལྟ་བཀའ་ཤག་ཚོགས་འདུ་འཚོགས་ཡོད་པས་སང་ཉིན་ལན་སྤྲད་ཆོག་ཟེར། ཚེས་ ༡༦ ཉིན་གྱི་སྔ་དྲོར་ཡང་བསྐྱར་འབྲེལ་བ་ཞུ་སྐབས་བཀའ་དྲུང་གཡུ་ཐོག་ཀརྨ་དགེ་ལེགས་མཆོག་གིས་དེའི་སྐོར་ལ་གསལ་བཤད་གནང་དོན། “ དེ་བཀའ་ཤག་མ་རེད། གནད་དོན་དེའི་ཐོག་ཁོ་རང་སྐུ་ངོ་སྲིད་སྐྱོང་མཆོག་ལ་མཇལ་བ་དང་། མཇལ་དུས་ཕུལ་བ་དེ་ད་ལྟ་ག་རེ་ཆགས་ཡོད་ཟེར་ན། ཁོ་རང་སྐུ་ངོར་ཏན་ཏན་མཇལ་བ་རེད། མཇལ་བའི་སྐབས་ཞུ་དོན་གཙོ་བོ་གཅིག་ཁོ་རང་གི་ལོ་རྒྱུས་ཤིག་དཔར་རྒྱག་པའི་འཆར་གཞི་ཡོད་པ་དེ། གལ་སྲིད་བཀའ་ཤག་དང་གཞུང་གི་ངོས་ནས་དཔར་རྒྱག་ཐུབ་ན་ཡག་པོ་འདུག་ཟེར་ནས་སྙན་སེང་ཞུས་འདུག དེ་ལ་ཕྱིར་ལན་བརྒྱབ་པ་དེ་སྒེར་གྱི་ལོ་རྒྱུས་དཔར་རྒྱག་རྒྱུ་དེ་བར་ལམ་གཞུང་འབྲེལ་གྱིས་གནང་གི་མེད་པ་བཀའ་ལན་གསལ་བོ་གནང་འདུག མ་ཡིག་མཐེབ་སྡེར་ (Pen Drive)ཡིན་ན་འདྲ། ཤོག་བུའི་སྟེང་ཡོད་ནའང་འདྲ། དཔར་རྒྱག་ཐུབ་གི་མ་རེད་གསུང་བཞིན་དུ་མ་ཡིག་ཅིག་འབུལ་རྒྱུ་ཁག་པོ་འདྲ་ཞིག་རེད་དེ། མཐེབ་སྡེར་ཞིག་སྐུ་ངོ་ལ་ཕུལ་བ་དང་བཞེས་པ་དྲན་གནང་གི་ཡོད་སྟབས། དེ་ནས་ང་ཚོས་སྒེར་དྲུང་དང་བཀའ་དྲུང་ལས་ཁུངས་ནང་ཚང་མར་བཙལ་ཡང་། དེ་འདྲ་ཞིག་ཁྱོན་ནས་རྙེད་མ་སོང་། ཡིན་ནའང་ང་ཚོའི་ལས་ཁུངས་ནས་སྣང་མེད་དུ་ཕྱི་ལ་གྱར་བ་ཞིག་ལ་ངོས་འཛིན་བྱེད་ཀྱི་མེད། ད་དུང་མུ་མཐུད་དུ་བཙལ་ཆོག་གི་རེད། གང་ལྟར་ངོ་བཤུས་ཤིག་ཕུལ་བར་ངོས་འཛིན་བྱེད་ཀྱི་ཡོད། གང་ཡིན་ཟེར་ན་ང་ཚོས་དཔར་རྒྱག་གི་མིན་ལབ་དུས་མ་ཡིག་ངོ་མ་ཞིག་ཕུལ་ཤེས་གི་མ་རེད” ཅེས་གསུངས་སོང་།

ཉིན་དེའི་ཉིན་རྒྱབ་སླར་ཡང་བཀའ་ཤག་ནས་ཞལ་པར་འབྱོར་བ་བཞིན་གསར་འགོད་པ་བཅར་སྐབས། བཀའ་དྲུང་མཆོག་གིས་གླིང་ཚའི་དེབ་དང་འབྲེལ་བའི་མཐེབ་སྡེར་དེ་རྙེད་སོང་། ཡིན་ནའང་འདྲ་འབུ་སོགས་ཀྱི་དབང་གིས་ད་ལྟ་ཁ་འབྱེད་ཐུབ་ཀྱི་མི་འདུག་མོད། ང་ཚོས་བསྐྱར་གསོ་ (Restore)བྱས་ཏེ་ཁ་འབྱེད་ཐབས་བྱེད་ཀྱིན་ཡོད། ཅེས་གསུངས་སོང་།

གསར་འགོད་པ། ལྷ་སྐྱབས་རྒྱལ།