ཁྲིམས་ལུཊ་ལེཊ་བཅོས་སྐོར་ལ་སེམས་ནང་རེ་བ་ཞིག་ཡོང་གི་འདུག

༧གོང་ས་མཆོག་གིས་རིག་གནས་གསར་བརྗེའི་སྐབས་རྒྱ་གཞུང་གིས་རྙིང་བཞི་རྩ་གཏོར་ཞེས་ནང་ཆོས་རྩ་མེད་གཏོང་ཐབས་བྱས་ཡོད་ཀྱང་། ད་ཆ་རྒྱ་ནག་གི་མགོ་ཁྲིད་མི་རབས་ལྔ་པའི་སྐབས་ནང་ཆོས་གལ་ཆེན་ཡིན་པའི་ངོས་འཛིན་བྱེད་བཞིན་ཡོད་སྐོར་གསུངས་འདུག

ཉེ་བའི་དུས་ནས་༧གོང་ས་མཆོག་གིས་ཉི་ཧོང་དུ་མུ་མཐུད་མཛད་འཕྲིན་སྐྱོང་བཞིན་པ་ལྟར། ཁ་སང་ཚེས་ ༡༧ ཉིན་རྒྱལ་ས་ཊོག་ཀྱོའི་ནང་ཉི་ཧོང་དང་ཀོ་རི་ཡ། རྒྱ་རིགས། སོག་རིགས། བོད་རིགས་བཅས་ཀྱི་དད་ལྡན་པ་རྣམས་ལ་མགོན་པོ་ཀླུ་སྒྲུབ་ཀྱིས་མཛད་པའི་༼ཆོས་དབྱིངས་བསྟོད་པ༽དང་། རྒྱལ་སྲས་ཐོགས་མེད་བཟང་པོས་མཛད་པའི་༼ལག་ལེན་སོ་བདུན་མ༽བཅས་ཀྱིས་ཆོས་འབྲེལ་སྩལ་ཡོད་འདུག་ལ། ཆོས་འབྲེལ་གྱི་ཐོག་མར་༸གོང་ས་མཆོག་གིས། ངོས་ཀྱིས་ནམ་རྒྱུན་འཆར་ཅན་འདི་ལྟར་བརྗོད་བཞིན་ཡོད། འཛམ་གླིང་འདིའི་སྟེང་ཆོས་ལུཊ་ཧ་ཅང་མང་པོ་ཡོད་པ་དང་། ལྟ་གྲུབ་ཡོད་མེད་ཀྱི་ཐོག་ནས་ནང་གསེས་གཉིས་ཡོད། ལྟ་གྲུབ་མེད་མཁན་གྱི་ཆོས་ལུགས་འདི་མི་ལོ་སྟོང་ཕྲག་ལྔ་དྲུག་ཙམ་ཕྱིན་ཡོད། ཕལ་ཆེར་མིའི་སྤྱི་ཚོགས་ནང་རིམ་བཞིན་སྐད་འཕེལ་རྒྱས་འགྲོ་སྐབས་དད་པའི་ཐོག་ནས་མི་ལ་དཀའ་ངལ་འཕྲད་སྐབས་སྐྱབས་གཅིག་ཡོད་ཟེར་བ་དང་། རང་སྲུང་སྐྱོབ་བྱེད་མཁན་ཞིག་ཡོད་ཟེར་ནས་ལྷ་གསོལ་རྒྱུའི་རིགས་དེ་འདྲ་ཡོང་བཞིན་ཡོད། དེ་ནས་རིམ་བཞིན་དད་པ་ཙམ་མིན་པར་ལྟ་གྲུབ་ཀྱི་ཐོག་ནས་འགྲེལ་བཤད་རྒྱག་རྒྱུ་ཡོད་པ། ལྟ་གྲུབ་ཡོད་པའི་ཆོས་བརྒྱུད་སྡེ་ཚན་གཅིག་བྱུང་ནས་ད་བར་ཕལ་ཆེར་ལོ་སྟོང་ཕྲག་གསུམ་ཙམ་འགྲོ་བཞིན་ཡོད།

སྔ་ཤོས་འདི་ཕལ་ཆེར་རྒྱ་གར་ནང་གྲངས་ཅན་པའི་ཆོས་རྒྱུད་དེ་རེད། དེ་ནས་མར་གྲུབ་མཐའ་མང་པོ་ཕྱེ་སྟེ་དཀྱིལ་ཤར་ཡུལ་གྲུའི་ནང་ཇིའུ་དང་ཡི་ཤུ། ཁ་ཆེ། ཨི་རན་ནས་ཛོ་ར་ཛོ་ཏིན་བྱུང་ཡོད། ཛོ་ར་ཛོ་ཏིན་ལྟ་གྲུབ་ད་སྐབས་ཤུགས་ཆེ་བ་རྒྱ་གར་ནང་ཡོད། དེ་ནས་རྒྱ་གར་རང་གི་གཅེར་བུ་བའི་ཆོས་ལུགས་ལོ་ཉིས་སྟོང་དྲུག་བརྒྱའི་གོང་བྱུང་ཡོད། དེ་དང་ལོ་སུམ་ཅུ་ཙམ་ལས་ཁྱད་པར་མེད་པ་སངས་རྒྱས་པའི་ཆོས་ལུགས་བྱུང་ཡོད་སྐོརསོགས་གསུངས་ཏེ། རྩ་བའི་ལྟ་བའི་ཐོག་ནས་སངས་རྒྱས་པའི་གྲུབ་མཐའ་མི་འདྲ་བ་བཞི་གསུངས་ཡོད་པ་དང་། ནང་གསེས་ཀྱི་ཁྱད་པར་མི་འདྲ་བ་དང་ལྟ་གྲུབ་མི་འདྲ་བའི་ཆོས་ལུགས་ཡོད་ཀྱང་། རྒྱུ་མཚན་གཙོ་བོ་བྱམས་པ་དང་བརྩེ་བ། བྱམས་པ་དང་བརྩེ་བའི་འགལ་ཟླ་དེ་ཞེ་སྡང་དང་འཁོན་འཛིན་གྱིས་བྱེད་ཀྱི་ཡོད་སྟབས། ཞེ་སྡང་གི་གཉེན་པོར་བཟོད་པ་སྒོམ་རྒྱུ་དང་། འཁོན་འཛིན་གྱི་གཉེན་པོར་འཁོན་ལེན་མི་སློག་པ། འདོད་རྔམ་གྱི་གཉེན་པོ་ཆོག་ཤེས་བྱ་རྒྱུ། རང་རྒྱུ་མཚན་དུ་བྱས་ནས་ངོ་ཚ་དང་གཞན་རྒྱུ་མཚན་དུ་བྱས་ན་ཁྲེལ་ཡོད་པ་བྱེད་ཆེད་རང་ཁྲིམས་སྡོམ་རྒྱུ་བཅས་བསླབ་བྱ་དེ་དག་ཆོས་ལུགས་ཚང་མའི་ནང་ཡོད་སྟབས། ལྟ་གྲུབ་མི་འདྲ་བ་ཡོད་པ་དེའང་མིའི་ཁམས་དང་མོས་པ་སྣ་ཚོགས་ཡོད་པར་དགོས་མཁོ་ཡོད་སྐོར་གསུངས་ཡོད།

ཚེས་ ༡༦ ཉིན་རྒྱལ་སར་སོ་ཏོ་ (Soto sect) ཆོས་ལུཊ་ཀྱི་དགེ་འདུན་པ་ཚོས་བཙོན་པར་སློབ་གསོའི་ལས་འགུལ་སྤེལ་ནས་ལོ་ ༥༠ འཁོར་བའི་དུས་དྲན་བགྲོ་གླེང་ཐོག་ཆིབས་བསྒྱུར་གནང་སྟེ། འགྲོ་བ་མིའི་བཟང་སྤྱོད་ཅེས་པའི་བརྗོད་གཞིའི་ཐོག་བགྲོ་གླེང་གནང་ཡོད་པ་དང་། སྐབས་དེར་༸གོང་ས་མཆོག་གིས་དགེ་འདུན་པ་རྣམས་ཀྱིས་ལོ་ངོ་ ༥༠ རིང་བཙོན་པ་རྣམས་ལ་སློབ་གསོའི་ལས་འགུལ་སྤེལ་བར་བསྔགས་བརྗོད་དང་འབྲེལ། གང་ཉིད་འཛམ་གླིང་ས་ཕྱོགས་གང་དུ་བསྐྱོད་ཀྱང་འགྲོ་བ་མིའི་བཟང་པོའི་རིན་ཐང་དང་ཆོས་ལུགས་མཐུན་སྒྲིལ་གོ་འཕེལ་གཏོང་ཐབས་བྱེད་བཞིན་ཡོད་པ་དང་། འཛམ་གླིང་ནང་མི་འབོར་འཐེར་འབུམ་བདུན་ཡོད་པ་ཚང་མས་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན་པ་མ་ཟད། མི་ཚེ་བདེ་སྐྱིད་ལྡན་པ་ཞིག་བསྐྲུན་པར་བྱམས་བརྩེ་དང་བཟོད་སྲན། ཆོག་ཤེས་སོགས་མིའི་བཟང་པོའི་རིན་ཐང་དེ་དག་གོང་མཐོར་བཏང་སྟེ་ཡོང་དགོས་སྟབས། ཆོས་ལུགས་ཚང་མས་རིན་ཐང་དེ་དག་གོང་མཐོར་གཏོང་ཐབས་དང་། ཆོས་ལུགས་ཕན་ཚུན་གུས་བརྩི་དང་འཆམ་མཐུན་ངང་གནས་རྒྱུ་གལ་ཆེན་པོ་ཆགས་ཡོད་སྐོར་སོགས་གསུངས་འདུག

ཡང་ཉིན་དེར་རྒྱལ་ས་ཊོག་ཀྱོ་ནང་རྒྱ་གར་གྱི་ཚོང་པ་ཁག་ཅིག་དང་རྒྱ་རིཊ། སོ་ཏོ་ཆོས་ལུཊ་ཀྱི་རྗེས་འབྲང་པ་བཅས་ལ་མཇལ་འཕྲད་གནང་སྐབས། ༧གོང་ས་མཆོག་གིས་རྒྱ་རིགས་ཚོར་དེང་སྐབས་འཛམ་གླིང་གི་ནང་པ་མང་ཤོས་རྒྱ་ནག་ནང་ཡོད་པ་དང་། པེ་ཅིང་གཙུག་ལག་སློབ་གྲྭས་ཉམས་ཞིབ་སྙན་ཐོ་ཞིག་བཏོན་པའི་ནང་རྒྱ་ནག་ནང་རྒྱ་རིཊ་ནང་པ་ས་ཡ་ ༣༠༠ ལྷག་ཡོད་ཚུལ་བཀོད་ཡོད་པར་མ་ཟད། ཉེ་ལམ་སྲིད་འཛིན་ཞི་ཅིན་ཕིན་གྱིས་ནང་ཆོས་རྒྱ་ནག་གི་ཆོས་ལུགས་གཙོ་གྲས་ཤིག་ཡིན་པའི་ངོས་འཛིན་བྱས་ཡོད། ཁོང་གིས་གསུངས་པའི་སྐད་ཆ་འདི་གནད་འགག་ཆཊ་ཡོད། གང་ཡིན་ཞེ་ན། རིག་གནས་གསར་བརྗེའི་སྐབས་རྙིང་བཞི་རྩ་གཏོར་ཞེས་ནང་ཆོས་རྩ་མེད་གཏོང་ཐབས་བྱས་ཡོད་ཀྱང་། ད་ཆ་རྒྱ་ནག་མགོ་ཁྲིད་མི་རབས་ལྔ་པའི་སྐབས་ནང་ཆོས་གལ་ཆེན་ཡིན་པའི་ངོས་འཛིན་བྱེད་བཞིན་ཡོད་ཅེས་གསུངས་འདུག

ཡང་༧གོང་ས་མཆོག་གིས་རྒྱ་ནག་ནང་གི་དབུལ་ཕྱུག་གི་བར་ཁྱད་དང་དཀའ་ངལ་གྱི་སྐོར་ལ། དེང་སྐབས་རྒྱ་ནག་ནང་དབུལ་ཕྱུག་གི་བར་ཁྱད་ཧ་ཅང་ཆེན་པོ་འདུག ང་རང་རྒྱ་ནག་ནས་ཡོང་བའི་ཞིང་པ་ཁག་ཅིག་དང་ཐུག་སྐབས། ཁོང་ཚོས་དེང་སྐབས་རྒྱ་ནག་ནང་ཞིང་པར་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད་ཀྱང་། དཀའ་ངལ་ཞུ་གཏུག་བྱེད་ས་མེད་སྐོར་བརྗོད་བྱུང་ལ། ས་གནས་དཔོན་རིགས་ཚོས་དབང་ཆ་དང་དངུལ་ཁོ་ན་བསམ་བསྡད་ཀྱི་ཡོད་སྟབས། ཉེ་ལམ་ཏང་གི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པའི་སྐབས་སྲིད་འཛིན་ཞི་ཅིན་ཕིན་གྱིས་ཞིང་པ་ཚོའི་དཀའ་ངལ་སེལ་ཐབས་དང་། ཁྲིམས་ཀྱི་ལམ་ལུགས་ལ་ལེགས་བཅོས་གཏོང་རྒྱུའི་སྐོར་བཤད་ཡོད་པ་དག་ནི་བཟང་ཕྱོགས་ཀྱི་འགྱུར་བ་ཞིག་ཡིན་སྟབས། སེམས་ནང་རེ་བ་ཞིག་ཡོང་གི་འདུག་ཅེས་གསུངས་འདུག ཅེས་གསུངས་འདུག

ཚེས་ ༡༥ ཉིན་༸གོང་ས་མཆོག་གིས་ཀོ་ཡ་སེན་གཙུག་ལག་སློབ་གྲྭའི་ཚོགས་ཁང་དུ་དུས་རབས་ཉེར་གཅིག་ནང་མི་ཚེ་བཟང་སྤྱོད་ལྡན་པའི་ཐོག་ཇི་ལྟར་སྐྱེལ་དགོས་མིན་ཞེས་པའི་བརྗོད་གཞིའི་ཐོག་མང་ཚོགས་བཀའ་སློབ་གནང་ཡོད་པ་མ་ཟད། ཉིན་དེར་ཀོ་རི་ཡའི་དད་ལྡན་པར་མཇལ་ཁ་གནང་སྐབས། བོད་པ་དང་ཀོ་རི་ཡ་གཉིས་སྟོན་པ་བཅོམ་ལྡན་འདས་ཀྱི་རྗེས་འཇུག་ཡིན་པ་གཅིག་པ་ཡིན་སྟབས། བཅོམ་ལྡན་འདས་ཀྱི་བཀའ་དང་བཀའི་དགོངས་པ་རྒྱ་གར་གྱི་དཔལ་ན་ལེནྜའི་མཁས་པས་མཛད་པའི་འགྲེལ་བ་རྣམས་ལ་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་ཆཊ་ཡོད་པ་དང་། ང་ཚོས་ནང་ཆོས་དང་དེང་དུས་ཤེས་ཡོན་ཟུང་འབྲེལ་ཐོག་དུས་རབས་ ༢༡ ནང་པ་ཞིག་ཆཊ་ཐབས་དང་། ནང་ཆོས་ནས་གསུང་པའི་ཚན་རིག་དང་དེང་དུས་ཀྱི་ཚན་རིག་བར་འབྲེལ་བ་བྱས་ནས་འཛམ་གླིང་བདེ་སྐྱིད་ལྡན་པ་ཞིག་བཟོ་ཐུབ་རྒྱུའི་ནུས་པ་ཡོད་སྐོར་སོགས་བཀའ་སློབ་གནང་ཡོད་པ་མ་ཟད། སྐབས་དེར་ཚོགས་བཅར་བ་རྣམས་ཀྱིས་༸གོང་ས་མཆོག་ཀོ་རི་ཡར་གདན་འདྲེན་ཞུ་རྒྱུའི་མདུན་པ་ཡོད་སྐོར་ཞུས་སྐབས། འདས་པའི་ལོ་མང་རིང་ཀོ་རི་ཡའི་ཆོས་གྲོགས་ཚོས་མགྲོན་འབོད་བྱ་རྒྱུའི་ཐབས་ཤེས་གང་མང་གནང་ཡོད་ཀྱང་། གཙོ་བོ་སྲིད་གཞུང་གི་ཆབ་སྲིད་དང་དཔལ་འབྱོར་གྱི་གནས་བབ་ཐོག་བསམ་བློ་བཏང་སྟེ་ཐག་གཅོད་དགོས་པ་ཆགས་ཡོད། ནང་པའི་རྒྱལ་ཁབ་མང་པོ་ཡོད་ཁོངས་ནས་ངོས་རང་དཀའ་ངལ་གང་ཡང་མེད་པར་ཡོང་ཐུབ་ཡུལ་ཉི་ཧོང་གཅིག་པུ་ཡིན། ངོས་རང་ནང་པ་སངས་རྒྱས་པ་ཞིག་ཡིན་ནའང་ནང་པའི་རྒྱལ་ཁབ་ནང་འགྲོ་ཐུབ་ཀྱི་མེད། ཅེས་གསུངས་ཡོད་འདུག

གསར་འགོད་པ། དོན་གོ