དེ་རིང་རྒྱ་ནག་ཆེས་མཐོའི་ཁྲིམས་ཁང་གིས། ཆབ་འབངས་གསར་པའི་ཚོགས་མི་དང་ལྐོག་ཟ་རུལ་སུངས་ལ་ངོ་རྒོལ་བྱེད་མཁན་ཏིན་ཅ་ཞི་ (Ding Jiaxi)ལ་ལོ་གསུམ་དང་ལོ་ཕྱེད། ཀྲའོ་ཆང་ཆིན་ (Zhao Changqing)ལ་སུ་ལོ་གཉིས་དང་ལོ་ཕྱེད། ཀྲང་པའོ་ཁྲིན་ (Zhang Baocheng) དང་ལེ་ཝེ་ (Li Wei)གཉིས་ལ་ལོ་གཉིས་རེ་བཅས་ཀྱི་བཙོན་འཇུག་ཁྲིམས་ཐག་བཅད་ཡོད་འདུག དེ་ནི་ ༢༠༡༣ ལོར་ཁོང་ཚོས་མང་ཚོགས་འདུ་སྐོང་གིས་ལྐོག་ཟ་རུལ་སུངས་ལ་རྡུང་རྡེག་གཏོང་དགོས་སྐོར་རྒྱ་གཞུང་ལ་ངོ་རྒོལ་སྐད་འབོད་བྱས་སྟབས་ཐེངས་འདིར་ཁྲིམས་ཆད་བཅད་པ་ཞིག་ཡིན་འདུག
བཅད་ཁྲ་འདི་རྒྱ་ནག་ཆེས་མཐོའི་ཁྲིམས་ཁང་གིས། རྒྱ་ནག་གི་ཆབ་འབངས་གསར་པའི་ཚོགས་པ་གསར་འཛུགས་གནང་མཁན་ཞི་ཀྲི་ཡུང་ (Xu Zhiyong) ལགས་ལ་ལོ་བཞིའི་དུས་བཀག་བཙོན་འཇུག་ཁྲིམས་ཐག་བཅད་རྗེས་ཕྱིར་བསྒྲགས་བྱས་པ་ཞིག་ཡིན་པ་དང་། གནད་དོན་འདིའི་ཐད་ཀྲང་པའོ་ཁྲིན་གྱི་ཁྲིམས་རྩོད་པ་ཡུང་ཞི་ (Ge Yongxi) ལགས་ཀྱིས། “ འདི་ནི་རྒྱ་ནག་གི་རྩ་ཁྲིམས་དང་འགལ་བའི་ཐག་གཅོད་ཅིག་ཡིན་སྟབས། མ་འོངས་པར་རྒྱ་ནག་ནང་མགོ་ཐར་དཔུང་འཛུལ་གྱི་ཁྲིམས་ཆད་དེ་འདྲ་མི་ཡོང་བའི་ཆེད་ཁྲིམས་ཐོག་ནས་ཁོང་ལ་ཉེས་པ་མེད་པའི་དག་སེལ་བྱ་རྒྱུ་ཡིན།” ཅེས་བརྗོད་འདུག
རྒྱ་ནག་ནང་གཟིགས་སྐོར་བྱེད་བཞིན་ཡོད་པའི་ཡུ་རོབ་མཐུན་ཚོགས་ཀྱི་སྐུ་ཚབ་ར་ཧྥེལ་ (Raphael Droszewsk) ལགས་ཀྱིས་རྒྱ་གཞུང་གིས་ལྐོག་ཟ་རུལ་སུངས་ལ་ངོ་རྒོལ་བྱེད་མཁན་ཚོར་དུས་བཀག་བཙོན་འཇུག་གི་ཁྲིམས་ཐག་གཅོད་བཞིན་པ་དེ་ནི་རྒྱལ་སྤྱིའི་ཁྲིམས་ལུགས་དང་འགལ་བའི་བྱ་སྤྱོད་ཅིག་རེད་ཟེར།
༢༠༡༢ ལོར་ཞི་ཀྲི་ཡོན་གྱིས་སྣེ་ཁྲིད་པའི་ཆབ་འབངས་གསར་པའི་ཚོགས་མི་ཚོས་རྒྱ་ནག་གི་གྲོང་ཁྱེར་ཧྲང་ཧེ་དང་པེ་ཅིན། ཅང་ཞི་སོགས་ནང་རྒྱ་ནག་གི་མགོ་ཁྲིད་ཚོས་ལྐོག་ཟ་རུལ་སུངས་བྱེད་བཞིན་པ་དང་། རྒྱ་ནག་མི་སེར་ཚོར་འགྲོ་བ་མིའི་ཐོབ་ཐང་མེད་པ་སོགས་ངོ་རྒོལ་བྱས་སྟབས། ཁོ་ཚོར་རྒྱ་གཞུང་གིས་ཡུལ་བདེ་ཞི་འཇགས་ལ་གཏོར་བརླག་གཏོང་མཁན་གྱི་ནག་ཉེས་བཙུགས་ཏེ། ༢༠༡༣ ལོའི་ཟླ་ ༤ པའི་ནང་ཚོགས་མི་ ༡༡ དང་། དེའི་རྗེས་སྔ་རྗེས་སུ་ཚོགས་མི་ ༢༨ ལ་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
ཆབ་སྲིད་དབྱེ་ཞིབ་པ་ཚོས། ལྐོག་ཟ་རུལ་སུངས་ལ་ངོ་རྒོལ་བྱེད་མཁན་དག་ནི་སྲིད་འཛིན་ཞི་ཅིན་ཕིན་གྱི་སྲིད་ཇུས་དང་རྒྱབ་འགལ་ཆགས་མེད་ཀྱང་། རྒྱ་གཞུང་གི་ལས་འགུལ་བ་ཚོ་གང་སར་འཛིན་བཟུང་བཙོན་འཇུག་བྱེད་ཀྱི་ཡོད་སྟབས། རྒྱ་ནག་ནང་སྔར་ལས་ལྷག་པའི་མཁྲེགས་འཛིན་སྲིད་ཇུས་རྒྱུན་འཁྱོངས་བྱས་ཏེ་གཞུང་ལ་ངོ་རྒོལ་བྱེད་མཁན་ཚོར་དམ་དྲག་བྱ་འཆར་ཡིན་སྐོར་བརྗོད་འདུག
ཆབ་འབངས་གསར་པའི་ལས་འགུལ་ (New Citizens’ Movement) ཞེས་པ་དེ་ནི་ ༢༠༡༢ ལོར་རྒྱ་རིགས་ཁྲིམས་རྩོད་པ་ཞི་ཀྲི་ཡོན་གྱིས་གསར་འཛུགས་བྱས་པ་ཞིག་ཡིན་ཞིང་། ཚོགས་པ་འདིས་རྒྱ་ནག་མི་སེར་ཚོར་ཁྲིམས་ལུགས་ཀྱི་གོ་རྟོགས་དང་ཤེས་ཡོན་གྱི་ཐོབ་ཐང་། ཉམ་ཐག་ལ་རོགས་རམ། དཔོན་རིགས་ཚོའི་རྒྱུ་ནོར་ཐེར་འདོན། ཚོགས་མི་ཕན་ཚུན་བར་བསམ་ཚུལ་བརྗེ་ལེན་སོགས་ཀྱི་ལས་འགུལ་སྤེལ་ཡོད་འདུག
གསར་འགོད་པ། དོན་གྲུབ།
