ཁ་ཉིན་སུ་ཌན་གྱེན་ལོག་པས་ལྷོ་སུ་ཌན་གྱི་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ས་ཚིགས་ནང་གང་བྱུང་མེ་མདའ་བརྒྱབ་ཏེ་མི་ ༥༨ དམར་གསོད་བཏང་ཡོད་འདུག
ཁ་ཉིན་ལྷོ་སུ་ཌན་གྱི་བྷོར་ས་ཁུལ་དུ་དྲག་ཆས་སྤྲས་པའི་མི་འགས་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ས་ཚིགས་ཤིག་ཏུ་གང་བྱུང་མེ་མདའ་བརྒྱབ་སྟེ་མི་ ༥༨ བསད་པ་མ་ཟད། མཉམ་འབྲེལ་རྒྱལ་ཚོགས་ཀྱི་ཞི་བདེའི་སྲུང་དམག་གཉིས་ཐེ་བའི་མི་ ༡༠༠ ཙམ་ལ་རྨས་སྐྱོན་ཚབས་ཆེན་བཏང་ཡོད་འདུག དེ་ནི་བྷོར་ས་ཁུལ་གྱི་ཎུར་ (Nuer) མི་རིགས་ཚོས་སུ་ཌན་གྱེན་ལོག་ཤོག་ཁག་གིས་བྷེན་ཌོ་ (Bentiu) གྲོང་བརྡལ་བཙན་བཟུང་བྱས་པར་འགོག་རྒོལ་ཙམ་ཡང་མ་བྱས་སྟབས། བྷེན་ཌོའོ་མི་རིགས་ཁོང་ཁྲོ་ལངས་ཏེ་འཇབ་རྒོལ་བྱས་པ་ཞིག་ཡིན་སྐོར་བསྒྲགས་འདུག
འདིའི་ཐད་མཉམ་འབྲེལ་རྒྱལ་ཚོགས་བདེ་འཇགས་ལྷན་ཁང་གིས། གྱེན་ལོག་པ་ཚོས་གང་བྱུང་མེ་མདའ་བརྒྱབ་སྟེ་ཉེས་མེད་མི་སེར་མང་པོ་དམར་གསོད་བཏང་ཡོད་སྟབས། སུ་ཌན་གཞུང་གིས་བརྟག་དཔྱད་མཐིལ་ཕྱིན་བྱས་ཏེ་མང་ཚོགས་ལ་སྲུང་སྐྱོབ་བྱ་དགོས་སྐོར་དང་། མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཁེ་མོན་མཆོག་གིས་ཀྱང་“ སུ་ཌན་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ས་ཚིགས་ནང་གང་བྱུང་མེ་མདའ་བརྒྱབ་སྟེ་མི་མང་པོ་བསད་ཡོད་སྟབས། མཉམ་འབྲེལ་རྒྱལ་ཚོགས་ཀྱི་ངོས་ནས་ཐག་གཅོད་ནན་པོ་བྱ་རྒྱུ་ཡིན།” ཅེས་བརྗོད་འདུག
སུ་ཌན་སྲིད་འཛིན་གྱི་མགྲིན་ཚབ་པ་ཨ་ཌེ་ནི་ (Ateny Wek Ateny) ལགས་ཀྱིས། ད་ལྟ་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ས་ཚིགས་ནང་གཞུང་དམག་འགྲེམ་འཇོག་གིས་ཡུལ་མི་ཚོར་སྲུང་སྐྱོབ་བྱེད་བཞིན་ཡོད་སྟབས། མ་འོངས་པར་འཇབ་རྒོལ་དེ་འདྲ་ཡོང་མི་སྲིད་ཅེས་བརྗོད་འདུག
རྒྱ་གར་གཞུང་དང་ཨ་རིའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་སུ་མན་ཌ་ (Samantha Power) ལགས་ཀྱི་གཙོས་རྒྱལ་སྤྱིའི་སྒྲིག་འཛུགས་ཁག་གིས། སུ་ཌན་གྱི་བྷོར་ས་ཁུལ་ནང་བྱུང་བའི་འཇབ་རྒོལ་དེ་ནི་མི་ཆོས་རིང་ལུགས་ཀྱི་བྱ་སྤྱོད་དང་། རྒྱལ་སྤྱིའི་ཁྲིམས་ལུགས་ཡོངས་དང་འགལ་ཡོད་པ་ཞིག་ཡིན་སྟབས། སུ་ཌན་སྲིད་གཞུང་ལ་རྒྱབ་སྐྱོར་བྱས་ཏེ་གྱེན་ལོག་པ་དག་ལ་ཁ་གཏད་གཅོག་རྒྱུ་ཡིན་སྐོར་བསྒྲགས་འདུག
ཆབ་སྲིད་དབྱེ་ཞིབ་པ་ཚོས། སུ་ཌན་ནང་གི་མི་གསོད་དོན་རྐྱེན་དེ་རིགས་རྒྱུན་ལྡན་ཞིག་ཡིན་སྟབས། རྒྱལ་སྤྱིའི་སྒྲིག་འཛུགས་ཁག་གིས་ཐེ་ཇུས་བྱས་ཀྱང་བཟང་ཕྱོགས་ཀྱི་འགྱུར་བ་གང་ཡང་ཐེབས་རེ་མེད་སྐོར་བརྗོད་འདུག
༢༠༡༣ ལོའི་ཟླ་ ༡༢ ཚེས ༡༥ ཉིན་ལྷོ་སུ་ཌན་གྱི་སྲིད་འཛིན་སལ་ཝ་ ( Salva Kiir) དང་སྲིད་འཛིན་གཞོན་པ་རེག་མཱ་ཆར་( Riek Machar) གཉིས་བར་དབང་ཆའི་འཐབ་རྩོད་ཀྱིས་ནང་འཁྲུག་ཤུགས་ཆེན་བྱུང་པ་ནས་བཟུང་ད་བར། ཡུལ་མི་ ༢༤༠༠༠༠ ལྷག་ཁྱིམ་མཚེས་རྒྱལ་ཁབ་ཁག་ནང་བྲོས་བྱོལ་དང་། མི་མང་ཁྲི་ ༦ ལྷག་སུ་ཌན་མཉམ་འབྲེལ་རྒྱལ་ཚོགས་ཀྱི་སྐྱབས་བཅོལ་ས་ཚིགས་ནང་ལྟ་རྟོག་སྲུང་སྐྱོབ་བྱེད་བཞིན་ཡོད་འདུག
ད་ལྟ་མི་ས་ཡ་ ༡ ཙམ་ལ་བཟའ་བཏུང་གི་དཀའ་ངལ་འཕྲད་བཞིན་ཡོད་པ་མ་ཟད། མི་ ༦༠༠༠ ལྷག་ལ་ཤི་རྨས་བྱུང་ཡོད་འདུག
གསར་འགོད་པ། དོན་གྲུབ།
