ཁ་སང་ཞོགས་པར་ཇོ་མོ་གླང་མའི་རི་འཛེགས་སྣེ་ཤན་པ་ ༡༣ རྐྱེན་འདས་དང་ ༤ བོར་བརླག་ཏུ་གྱུར་ཡོད་འདུག
ཁ་སང་ཕྱི་ཚེས་ ༡༨ ཉིན་གྱི་སྔ་དྲོ་ས་གནས་ཀྱི་ཆུ་ཚོད་ ༦།༤༥ ཙམ་ལ། ཇོ་མོ་གླང་མའི་མཐོ་ཚད་རྨིད་ ༦༤༠༠ ཙམ་གྱི་རི་ངོས་སུ་གངས་རུད་བརྒྱབ་སྟེ། རི་འཛེགས་སྣེ་ཤན་པ་ཤར་པ་ ༡༣ རྐྱེན་འདས་དང་། མི་ ༤ བོར་བརླག་ཏུ་གྱུར་ཡོད་པ་དང་། མི་ ༣ ལ་རྨས་སྐྱོན་ཕོག་སྟེ་བལ་པོའི་རྒྱལ་ས་ཀཱ་ཐི་མན་ཀྲུའུ་ཡི་སྨན་ཁང་ཞིག་ཏུ་མྱུར་སྐྱོབ་བྱེད་བཞིན་ཡོད་འདུག
བལ་པོའི་ཡུལ་སྐོར་སྤྲོ་འཆམ་ལས་ཁུངས་ཀྱི་མགྲིན་ཚབ་པ་མའོ་ཧན་ཀ་རི་ཞི་ནཱ་སཱ་ཀོ་ཊཱ་ (Mohan Krishna Sapkota) ཡིས་བྷི་བྷི་སི་གསར་ཁང་ལ། རྐྱེན་འདས་སུ་གྱུར་བའི་ཕུང་པོ་རྣམས་རི་འདབས་སུ་བསྐྱལ་ཡོད་པ་དང་། མུ་མཐུད་ཐད་འཕུར་གནམ་གྲུས་བོར་བརླག་ཏུ་གྱུར་བ་རྣམས་འཚོལ་བཞིན་ཡོད ་ཀྱང་། ད་ལྟའི་ཆར་གཞུང་ངོས་ནས་འདས་པོ་དང་བོར་བརླག་ཏུ་གྱུར་བ་རྣམས་ཀྱི་མིང་སོགས་ཕྱིར་བསྒྲགས་བྱེད་ཀྱི་མེད་ལུགས་བརྗོད་འདུག
ཟླ་འདིའི་ཟླ་མཇུག་ནས་རྒྱ་མཚོའི་ངོས་ལས་མཐོ་ཚད་རྨིད་ ༨༨༤༨ ཡོད་པའི་ཇོ་མོ་གླང་མར་གངས་འཛེགས་ཀྱི་ལས་མགོ་རྩོམ་རྒྱུ་ཡིན་པ་དང་། ཕྱི་ལོ་ ༡༩༥༣ ལོར་ནིའུ་ཛི་ལན་ཌིའི་རི་འཛེགས་པ་ཨེ་ཌི་མོན་ཌི་ཧི་ལཱ་རི་དང་ཤར་པ་བསྟན་འཛིན་ནོར་རྒྱས་གཉིས་ཆེས་ཐོག་མར་ཇོ་མོ་གླང་མའི་རི་རྩེར་འཛེགས་པ་ནས་ད་ལྟའི་བར་མི་གྲངས་ ༡༤༠༠ ལྷག་ཇོ་མོ་གླང་མའི་རི་རྩེར་འཛེགས་ཐུབ་ཡོད་པ་དང་། ཉུང་མཐར་མི་གྲངས་ ༣༠༠༠ བརྒལ་བ་རྐྱེན་ལམ་དུ་ཤོར་ཡོད་འདུག
གསར་འགོད་པ། པདྨ་མཚོ།
