དཔའ་བོ་འདི་སུ་རེད།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༤ སྟེང་གི་རྩོམ་སྒྲིག་པའི་གཏམ།

     ཉེ་མ་སྤྱི་ཚོགས་བརྒྱུད་ལམ་ཁག་ནང་སྐྱི་གཡའ་བའི་བརྙན་ཐུང་ཞིག་ཁྱབ་བཞིན་འདུག བོད་ནང་གི་གྲོང་ཁྱེར་ག་གེ་མོ་ཞིག་གི་གཞུང་ལམ་དཀྱིལ་ན། ཕོ་སར་ཤ་དར་ཁྲག་དར་བོད་ཆས་གྱོན་མཁན་ཞིག་གིས། བོད་ལ་རང་དབང་དགོས། རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བསྟན་པར་ཤོག ཅེས་འབོད་ཚིག་སྒྲོག་བཞིན་སོ་སོའི་ཁོག་པ་ནས་སྒྱུ་མ་དམར་འཛར་འཛར་ཕྱི་ལ་བཏོན་ནས་དུམ་བུ་དུམ་བུར་གཅོད་ཀྱི་འདུག ཕར་བལྟས་ཚོད་ཀྱིས་ཁོའི་གཟུགས་པོའང་མེ་ལ་འཚིགས་ཡོད་པ་འདྲ། མཚམས་ཤིག་ས་ལ་འགྱེལ་མ་ཐག་མི་མང་ཁོའི་མཐའ་ལ་རུབ་སྟེ་ངུ་འབོད་བྱེད་ཀྱིན་འདུག ཁོའི་མིག་ཟུང་ཧྲིག་ཧྲིག་དང་དབུགས་ལྷེམ་ལྷེམ་གྱིས་ད་དུང་ཅི་ཞིག་ལ་རེ་འབོད་བྱེད་ཀྱིན་འདུག

    གནས་ཚུལ་འདི་ངོ་དེབ་དང་སྐད་འཕྲིན་སོགས་སྤྱི་ཚོཊ་བརྒྱུད་ལམ་རེ་ཟུང་མ་གཏོཊ། ཚད་ལྡན་གསར་འགྱུར་བརྒྱུད་ལམ་གཅིག་ཏུའང་བཀོད་མ་སོང་། ངས་ཡར་མར་རྩད་གཅོད་བྱས་པ་ཡིན། མི་མང་པོ་ཞིག་གིས་གནས་ཚུལ་འདི་མཐོང་འདུག ཁོང་ཚོ་ཧ་ལས་ནས་ཧོན་ཐོར་འདུག འོན་ཀྱང་འདིའི་རྒྱབ་ལྗོངས་གནས་ཚུལ་ལ་རྒྱུས་ཡོད་མཁན་གཅིག་ཀྱང་མི་འདུག ཐ་ན་འདིའི་སྐོར་ལ་དོ་སྣང་ཆེན་པོས་བགྲོ་གླེང་དང་རྩད་གཅོད་བྱེད་མཁན་ཡང་བྱུང་མ་སོང་། འདི་མཐོང་མཁན་ཚང་མས་ཞེད་སྣང་དང་ཚེར་སྣང་བྱེད་ཀྱིན་འདུག མཐའ་མ་ངས་ཀྱང་ཅི་མི་སྙམ་པར་མི་འཇོག་ཐབས་མེད་བྱུང་སོང་།

    བོད་ནང་ས་རྒྱ་ཆེན་པོ་དང་བརྡ་འཕྲིན་བརྒྱུད་ལམ་སྟབས་བདེ་མེད་པ། རྒྱ་གཞུང་གིས་ཕྱི་བཀག་ནང་སྡོམ་བྱས་ཡོད་ས་ཞིག་རེད། ད་དུང་འདི་དང་འདི་ལྟ་བུ་དང་། འདི་ལས་ལྷག་གི་ཚབས་ཆེའི་གནས་ཚུལ་མང་པོ་ཞིག་གོ་མེད་ཚོར་མེད་དང་། གྲགས་མེད་འགུལ་མེད་ངང་ས་དང་རྡོ་ལ་འཐིམ་གྱི་མེད་འགྲོ་བསམ་གྱི་འདུག རང་ལུས་མེར་བསྲེགས་གནང་མཁན་བསྟན་འཛིན་དབང་མོ་དང་སྒྲོལ་དཀར་མཚོ། འཕྲིན་ལས་རྣམ་རྒྱལ་སོགས་མང་པོ་ཞིག་གིས་ས་སྟོང་ལུང་སྟོང་མི་མེད་ཐང་སྟོང་ནས་རང་རང་གི་གཏན་ཚིགས་མངོན་འགྱུར་བྱས་ཡོད། རང་ལུས་མེར་བསྲེགས་གནང་མཁན་རིགས་ཞེན་ཅན་མང་པོ་ཞིག་འདི་ལྟར་མིས་མ་མཐོང་ཁྱིས་མ་ཚོར་བར་འཕྲོ་བརླག་ཏུ་འགྲོ་བཞིན་མེད་འགྲོ་བསམ་གྱི་འདུག

    ང་ཚོས་ཛ་དྲག་གི་གནས་ཚུལ་གསར་པ་མང་པོ་ཞིག་དུས་ཐོག་ཏུ་བསྡུ་རུབ་མ་ཐུབ་པར་བོར་བཞིན་འདུག རླབས་ཆེན་གནས་ཚུལ་རྙིང་པ་མང་པོ་ཞིག་དྲན་པ་གཏིང་རྗེད་དུ་འགྲོ་བཞིན་འདུག ཆབ་སྲིད་བཙོན་པ་བློ་བཟང་དོན་གྲུབ་དང་འཇིགས་མེད་མགོ་རིལ། སྤྲུལ་སྐུ་བསྟན་འཛིན་བདེ་ལེགས་དང་རོང་རྒྱས་ཨ་གྲགས། སྒྲོལ་མ་སྐྱབས་སོགས་ད་ལྟ་གང་ན་ཡོད། ཁོང་ཅག་གི་གནས་སྟངས་ག་འདྲ་རེད། ག་དུས་འཛིན་བཟུང་བྱས་ཤིང་། ནམ་ཞིག་ཇི་ལྟར་ཀློད་གྲོལ་གཏོང་རྒྱུ་རེད། ནག་ཐོམ་ཐོམ་གྱི་དྲི་བ་འདི་དག་གསར་འགྱུར་བརྒྱུད་ལམ་ཙམ་མིན་པར། གཞུང་དམངས་གཉིས་དང་ཚོགས་པ་སྒྲིག་འཛུགས། རྩོམ་པ་པོ་དང་ཉམས་ཞིབ་པ་ཡོངས་ལ་འགན་འཁྲི་ཡོད།

   ང་ཚོས་མཆོད་འབུལ་སྨོན་ལམ་དང་གདུང་སེམས་མཉམ་སྐྱེད་བྱེད་རྒྱུ་གལ་ཆེན་ཡིན་མོད། བོད་ནང་གི་རླབས་ཆེ་བའི་གནས་ཚུལ་རྙིང་པ་དག་ལ་དྲན་གསོ་བྱེད་རྒྱུ་དང་གསར་པ་ཁག་འཚོལ་བསྡུ་བྱས་ཏེ་ཁྱབ་སྤེལ་གཏོང་རྒྱུ་འུ་བུ་ཅག་གི་ལས་འགན་དང་པོ་ཡིན། བོད་ནང་གི་ལས་འགུལ་དེ་དག་ཆབ་སྲིད་པའི་འཁྲབ་སྟོན་ཙམ་མིན་པར་སེམས་ཐག་གཙང་བཅད་དང་མི་ཚེའི་གཏན་ཚིགས་ཀྱི་ལས་འགུལ་ཞིག་ཡིན། རྒྱལ་སྤྱིར་འབོད་སྒྲ་དང་དྲིལ་བསྒྲགས་ཆེད་ཡིན་དུ་ཆུག་ཀྱང་། དྲིལ་བསྒྲགས་ཁོ་ནའི་ཆེད་དུ་ལས་འགུལ་སྤེལ་བ་ཞིག་གཏན་ནས་མིན་པར། ཚེ་སྲོག་གི་འགྲོ་གྲོན་བཏང་བའི་དྲིལ་བསྒྲགས་ཤིག་ཡིན། ཤ་ཁྲག་གི་མཆོད་སྦྱིན་བཏང་བའི་ལས་འགུལ་ཞིག་ཡིན།