ཉིན་འདི་འགར་ཨ་རིའི་སྲིད་འཛིན་ཨོ་བྷ་མ་ཉི་ཧོང་དུ་གཟིགས་སྐོར་གནང་བ་དང་འབྲེལ་ཞི་བདེ་རྒྱ་མཚོའི་མངའ་ཁུལ་གྱི་བདེ་འཇགས་དང་ཚོང་འབྲེལ་སོགས་ལ་མིང་རྟགས་བཀོད་ཡོད་འདུག
ཁ་སང་ནས་བཟུང་ཨ་རིའི་སྲིད་འཛིན་ཨོ་བྷ་མ་ཉི་ཧོང་དང་ལྷོ་ཀོ་རི་ཡ། མཱ་ལེ་ཤི་ཡ། ཧྥི་ལེ་ཕིན་བཅས་རྒྱལ་ཁབ་བཞིའི་ནང་སྐོར་སྐྱོད་བྱེད་མགོ་ཚུགས་ཡོད་པ་དང་། ཁ་སང་ཚེས་ ༢༣ ཉིན་ཉི་ཧོང་སྲིད་བློན་ཤིང་ཛོ་ཨ་བྷེ་དང་ཐུག་འཕྲད་གནང་སྟེ། རྒྱལ་སྲུང་བདེ་འཇགས་དང་རྒྱ་མཚོའི་མངའ་ཁུལ་རྒྱལ་ཁབ་ཁག་གི་ནང་ཚོང་དོན་རྒྱ་སྐྱེད། ཧྥི་ལེ་ཕིན་ནང་ཨ་རིའི་དམག་ཤུགས་མཁོ་གཏོང་བྱེད་ཕྱོགས། ལྷོ་ཀོ་རི་ཡ་དང་ཉི་ཧོང་གི་ས་མཚམས་རྩོད་རྙོག་བཅས་ཀྱི་སྐོར་ལ་གྲོས་བསྡུར་བྱེད་བཞིན་ཡོད་འདུག
འདིའི་ཐད་ཨོ་བྷ་མས་ཉི་ཧོང་གི་གསར་འགྱུར་ (Yomiuri Shimbun)ཐོག་ “སྔོན་ཆད་ཨ་རིས་ཉི་ཧོང་དང་མཉམ་དུ་རྒྱལ་སྲུང་བདེ་འཇགས་ཐད་ཀྱི་གྲོས་མཐུན་ལ་མིང་རྟགས་བཀོད་ཡོད་པ་དེ་ནིི། གལ་སྲིད་རྒྱ་ནག་གིས་ཉི་ཧོང་ལ་དྲག་ཤུགས་སྤྱད་དེ་ཞི་བདེ་རྒྱ་མཚོའི་མངའ་ཁུལ་གྱི་མཚོ་གླིང་ཧམ་བཟུང་བྱས་ཚེ་ཨ་རི་ཉི་ཧོང་གི་ཕྱོགས་སུ་ལངས་ཏེ། རྒྱ་ནག་གི་གནོན་ཤུགས་ལ་གདོང་ལེན་ཁ་གཏད་གཅོག་ཆེད་གྲོས་མཐུན་བཞག་པ་ཞིག་རེད།” ཅེས་བརྗོད་འདུག
ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས། ཨ་རི་དང་ཉི་ཧོང་བར་གྱི་འབྲེལ་ལམ་ནི་འཛམ་གླིང་ཞི་བདེ་ཡོང་ཐབས་ལ་མེད་དུ་མི་རུང་བ་ཞིག་ཆགས་ཡོད་སྟབས། ད་རེབ་གྲོས་མོལ་འདི་བརྒྱུད་ནས་རྒྱལ་ཁབ་གཉིས་ཀྱི་དཔུང་པ་མཉམ་གཤིབ་ཐོག་འཛམ་གླིང་ལ་འཕྲད་བཞིན་པའི་དཀའ་ངལ་ཁག་སེལ་ཐབས་དང་། སྒོས་སུ་ཨེ་ཤ་ཡའི་མངའ་ཁུལ་གྱི་བདག་དབང་རྩོད་ལེན་ཐད་སྒོ་ཀུན་རམ་འདེགས་བྱས་ཏེ། ཧམ་བཟུང་དང་རྒྱ་སྐྱེད་རིང་ལུགས་ཀྱི་རྒྱལ་ཁབ་དག་ལ་གདོང་ལེན་བྱ་རྒྱུའི་གྲ་སྒྲིག་ཡོད་ཅེས་སོགས་བརྗོད་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཆིན་ཀང་གིས། ཞི་བདེ་རྒྱ་མཚོའི་མངའ་ཁུལ་གླིང་ཕྲན་དེ་དག་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་སྟབས། ཨ་རི་དང་ཉི་ཧོང་གི་འགྲོ་འོང་དེས་རྒྱ་ནག་གི་ས་ཁུངས་བདག་དབང་ལ་ཐེ་ཇུས་མི་བྱེད་པའི་རེ་བ་ཡོད་ཅེས་སོགས་བརྗོད་འདུག
ཨ་རིའི་རྒྱལ་སྲུང་བདེ་འཇགས་སློབ་སྟོན་པ་སུ་སན་ (Susan Rice) ལགས་ཀྱིས། རྒྱལ་སྤྱིའི་ཐོག་སྲིད་འཛིན་ཨོ་བྷ་མའི་ཐེངས་འདིའི་སྐོར་སྐྱོད་དེ། རྒྱ་ནག་ལ་ཁ་གཏད་གཅོག་ཐབས་ཤིག་ཏུ་ངོས་འཛིན་བྱེད་མིན་ཇི་ལྟར་ཡང་། ང་རང་གི་ངོས་ནས་སྐོར་སྐྱོད་འདི་ཨ་རིས་མཐུན་ཕྱོགས་རྒྱལ་ཁབ་ཁག་དང་འབྲེལ་ལམ་ཇེ་བཟང་དུ་གཏོང་རྒྱུའི་གོ་སྐབས་ཤིག་ཏུ་ངོས་འཛིན་བྱེད་ཀྱིན་ཡོད་ཅེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། སྲིད་འཛིན་ཨོ་བྷ་མའི་ཐབས་ཇུས་དེ་ནི། ཉེ་ཆར་ཨ་རི་དང་རྒྱ་ནག་གི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པ་དང་། ཉི་ཧོང་དང་རྒྱ་ནག་གཉིས་ཞི་བདེ་རྒྱ་མཚོའི་མངའ་ཁུལ་བདག་དབང་གི་རྩོད་ཉོག་ནང་ཚུད་ཡོད་པ་སོགས་དང་བསྟུན་ཏེ། ཨོ་བྷ་མ་ཉི་ཧོང་ནང་བསྐྱོད་དེ་རྒྱ་ནག་ལ་བརྡ་ལན་ཞིག་སྟོན་གྱི་ཡོད་སྐོར་བརྗོད་འདུག
རྒྱ་གཞུང་གིས་ ༢༠༡༣ ལོའི་ཟླ་ ༡༡ པའི་ཚེས་ ༢༣ ཉིན་ཞི་བདེ་རྒྱ་མཚོའི་ཐོག་མཁའ་དབྱིངས་ཐིག་ཚད་བཟོས་པ་དང་། རྒྱ་ནག་གི་ཤར་ལྷོའི་རྒྱ་མཚོ་མངའ་ཁུལ་རྩོད་ལེན་བྱས་ཏེ་ཨེ་ཤི་ཡའི་བརྟན་བརླིང་ལ་འཇིགས་སྣང་སྐུལ་བཞིན་ཡོད་སྟབས། ཨོ་བྷ་མས་ “ ཤར་ཕྱོགས་ཀྱི་མདུན་སྐྱོད་ཆེན་མོ།” ཞེས་པའི་སྲིད་ཇུས་བཟུང་སྟེ། ཉི་ཧོང་དང་རྒྱ་གར། ཨབ་གྷན། ལྷོ་ཀོ་རི་ཡ་སོགས་མཐུན་གྲོགས་རྒྱལ་ཁབ་ཏུ་འགྱུར་བར་འབད་བརྩོན་བྱས་ཡོད།
༢༠༡༣ ལོའི་ཟླ་ ༡༢ པའི་ནང་ཨ་རིའི་སྲིད་འཛིན་གཞོན་པ་སྐུ་ཞབས་ཇོ་བྷ་ཌན་ (Joe Biden)མཆོག་ཉི་ཧོང་དང་རྒྱ་ནག ལྷོ་ཀོ་རི་ཡ་བཅས་སུ་སྐོར་སྐྱོད་བྱས་ཡོད་ཅིང་། སྐབས་དེར་ཁོས་ཉི་ཧོང་ནང་སྐོར་སྐྱོད་སྐབས་ཞི་བདེ་རྒྱ་མཚོའི་མཚོ་གླིང་རྩོད་རྙོག་ཐོག་ཨ་རིའི་གཞུང་གིས་ཉི་ཧོང་གིས་འཛིན་པའི་མཚོ་གླིང་སྲིད་བྱུས་ལ་རྒྱབ་སྐྱོར་བྱེད་ཀྱི་ཡོད་སྐོར་བརྗོད་ཡོད་སྟབས། སྐབས་དེར་རྒྱ་གཞུང་གིས་ཨ་རིར་སྐྱོན་བརྗོད་ཤུགས་ཆེན་བྱས་ཡོད།
སང་ཉིན་སྲིད་འཛིན་ཨོ་བྷ་མ་མཆོག་ལྷོ་ཀོ་རི་ཡ་དང་། དེ་རྗེས་མཱ་ལེ་ཤི་ཡ་དང་ཧྥི་ལེ་ཕིན་ནང་ཕེབས་འཆར་ཡོད་འདུག
