ང་ཚོ་ལུས་སེམས་གཉིས་ཀྱི་སྨན་པ་ཆཊ་ཐུབ་ན་ཐུཊ་ཕན་གསོ་ཐུབ་པ་ཡོང་གི་རེད།

འབྲས་དང་ལྡ་ལི་འཕྲོ་ལྷག་མ་སོང་བའི་མཁས་དབང་བློ་བཟང་སེངྒ་།

རྒྱ་ནག་པོའི་དམར་ཕྱོགས་ཀྱི་ལྟ་གྲུབ་དང་། ས་འཁོབས་རྒྱ་སྐྱེད་ཀྱི་རིང་ལུགས་ཏེ་གླིང་ཆེན་པོ་ལྔར་རྔ་ཆེན་རྡུང་བཞིན་པའི་སྐབས་དེར།  གཞུང་ས་དགའ་ལྡན་ཕོ་བྲང་གི་གཙོས་པའི་བླ་ཆེན་དང་མི་དྲག  བོད་ཆོལ་ཁ་གསུམ་གྱི་སེར་སྐྱ་ཕོ་མོ་ཁྲི་ཚོ་འགའ་ཞིག་རྒྱ་གར་ལ་སྐྱབས་བཅོལ་དུ་མི་འབྱོར་ཐམས་མེད་བྱུང་བ་ནས་བཟུང་། རྒྱ་ནག་པོའི་དམར་ཕྱོགས་ཀྱི་ལྟ་གྲུབ་དང་། ས་འཁོབས་རྒྱ་སྐྱེད་ཀྱི་རིང་ལུགས་ཏེ་གླིང་ཆེན་པོ་ལྔར་རྔ་ཆེན་རྡུང་བཞིན་པའི་སྐབས་དེར།  གཞུང་ས་དགའ་ལྡན་ཕོ་བྲང་གི་གཙོས་པའི་བླ་ཆེན་དང་མི་དྲག  བོད་ཆོལ་ཁ་གསུམ་གྱི་སེར་སྐྱ་ཕོ་མོ་ཁྲི་ཚོ་འགའ་ཞིག་རྒྱ་གར་ལ་སྐྱབས་བཅོལ་དུ་མི་འབྱོར་ཐམས་མེད་བྱུང་བ་ནས་བཟུང་།
ད་ལྟའི་བར་བགྲང་བྱ་དྲུག་ཅུ་རེ་བཞིར་འཁོར་བའི་བོད་རིགས་སྤུན་ཟླའི་ཁྲོད་ནས། ཡར་ཐོན་ཅན་གྱི་རྒྱལ་ཁབ་དང་། སྤྱི་ཚོགས་གཞན་གྱི་རྐུབ་སྟེགས་ཀྱི་སྡོད་གྲལ་དུ་དོ་མཉམ་པའི་ཤེས་ལྡན་གྱི་མི་སྣ་སྟེ། རྡོ་གླིང་གཞིས་ཁོངས་སུ་བླ་མའི་སྐེམ་ནང་ཕ་དམ་པའི་ཞལ་ཆེམས་བཞིན། འཚར་ལོང་བྱུང་བའི་བློ་བཟང་སེངྒ་ཞེས་པའི་ཕོ་རྒོད་དེ་རེད། ཁོང་ནི་སྐྱེ་ས་དང་འཚར་ས་གཉིས་ཁ་ཧ་ཅང་གིས་སྟབས་བདེ་ཞིང་། རྙོག་འཛིངས་མེད་པའི་གུ་ཡངས་པའི་རྣམ་པའི་ཐོག་ནས་ཁྱིམ་རྒྱུད་ཉམ་ཆུང་ཞིག་གི་ནང་དུ་སྐྱེས་པ་ཡིན་ཕྱིར། རྒྱབ་ལ་དར་དང་གོས་ཆེན་སོགས་མཚོན་པའི་གྱོན་ཆས། དཀར་སེར་དང་དམར་ལྗང་། མཐུག་པོ་དང་བསྲབ་པོ། འཇམ་པོ་དང་སྣུམ་པོ་སོགས་ཀྱིས་ལུས་ཕུང་ཡོངས་རྫོགས་བཏུམས་ནས་མི་ཚེ་ཉིན་ཞིག་ཀྱང་སྐྱེས་མྱོང་མེད། ནང་གྲོད་པར་མངར་མོ་དང་སྐྱུར་མོ། ཚྭ་བ་དང་སྐ་བ། མདོར་ན་ཆང་དང་ཨ་རག་སོགས་མཚོན་པའི་བཟའ་བཏུང་ལོངས་སྤྱོད་གང་འདོད་པ་རྣམས་ཀྱིས་ཁོང་ཡོངས་སུ་བཀང་སྟེ། ལུས་གཡོ་འགུལ་ཙམ་ཡང་བྱེད་དཀའ་བའི་གནས་སུ་སྐད་ཅིག་ཀྱང་གྱུར་མེད། དེ་བས་ཀྱང་དེ་ལྟ་བུའི་ལོངས་སྤྱོད་བྱས་ནས་མི་ཚེ་ཤ་སྟག་བསྐྱེལ་དགོས་བསམ་པའི་ཀུན་སློང་འཁོར་མྱོང་མེད། སློབ་འབྲིང་དང་སློབ་ཆེན། མཐོ་སློབ་དང་གཙུག་ལག་སློབ་གྲྭ་སོགས་གང་དུ་འགྲོ་འདོད་ནའང་། ཌོ་ལོར་དང་པཾ་ཌུ། ཡུ་རོབ་དང་རྒྱ་གར། ཧིན་སྒོར་དང་བལ་སྒོར་སོགས་ཇི་ཙམ་དགོས་ཀྱང་ཕངས་སེམས་མེད་པར་གྲོན་སོང་གཏོང་མཁན་མེད། གུང་གསེང་གི་དུས་སུ་གནམ་གྲུ་དང་མེ་འཁོར་ལེགས་ཤོས་ནང་དུ་ཕེབས་སྐྱེལ་དང་བསུ་མ་བྱེད་མཁན་ཨ་ཁུ་དང་ཨ་ནེ་མེད་ལ། དེ་བས་སྐུ་དྲག་དང་མི་དྲག བླ་དྲག་དང་སྤྲུལ་གཟུགས་སོགས་ཀྱིས་རྒྱབ་ཏུ་གངས་རིའི་ཕྲེང་བས་བསྒྲེངས་བ་ལྟར། མི་ཤུགས་དང་། རྒྱུ་ཤུགས་སོགས་ཀྱི་ནུས་པ་དེ་བས་མེད། དེའི་ཕྱིར་ཁོང་ནི་གང་ཡང་མེད་པའི་གནས་སྟངས་ཀྱི་ངང་ནས། དེ་དག་ཡོད་མཁན་གྱི་བུ་ཕྲུག་རྣམས་ཀྱི་མདུན་ལམ་དང་། ནུས་ཤུགས་ཡོངས་རྫོགས་ལ་རྡོག་རོལ་བཏང་སྟེ་དམའ་རིམ་ནས་མཐོ་རིམ་བར་དུ་འཕར་བའི་མི་སྣ་ཆེ་ཤོས་ཤིག་ཏུ་གྱུར་པ་དང་། ལྷག་པར་བཙན་བྱོལ་སྤྱི་ཚོགས་ཀྱི་ཁྲོད་ནས། བོད་གཞུང་གི་སློབ་གྲྭ་དང་། བོད་ཁྱིམ་སློབ་གྲྭ རྒྱ་གར་ཤེས་རིག་ལས་ཁུངས་ཀྱི་སྟངས་འཛིན་འོག་ཏུ་གནས་པའི་སློབ་གྲྭ་རྣམས་ཀྱི་ནང་ནས། དེ་སྔོན་རྩད་ནས་ཐོན་མྱོང་མེད་པའི་ཤེས་ལྡན་གྱི་མི་སྣ་ཆེ་ཤོས་ཤིག་དང་། དྲང་བདེན་གྱི་དབུ་ཁྲིད་ཆེ་ཤོས་ཤིག་ཏུ་གྱུར་པ་ཡིན།

དེ་བས་ཁོང་ནི་གཞོན་སྐྱེའི་སྐབས་ནས། འཇིག་རྟེན་སྲིད་ལུགས་ཀྱི་ཐད་ལ། བྱས་པ་སྔོན་སོང་ཞིག་མེད་ནའང་། མི་ལོ་མང་པོ་ཞིག་ལ་ཆབ་སྲིད་ཀྱི་ལས་ཁུར་བྱས་པའི་དཔྲལ་བ་ཡོངས་རྫོགས་ལ་གཉེར་མ་བརྒྱ་ཕྲག་མང་པོས་བང་ལྟར་བསྒྲིགས་པའི་རྒན་པ་ཚོ་ལས་ཀྱང་། མངོན་གསལ་དོད་པོས་སྙན་གྲགས་ནི། རྒྱ་ནག་སྐམ་སར་གཙོས་པའི་ས་ཕྱོགས་གང་སར་གྱི་ཚགས་ཤོག་དང། བརྙན་འཕྲིན་དང་། རླུང་འཕྲིན། དུས་དེབ་དང་གསར་འགྱུར་སོགས་ནང་མ་བཀོད་པར་ཤོག་ལྷེ་ལྷན་པ་ཙམ་ཡང་ལྷག་མྱོང་མེད་ལ། འཛམ་གླིང་རྒྱལ་ཁབ་མང་པོས་མཐོ་སྒང་རྒྱལ་ཁབ་ཆེན་པོའི་དཔལ་འབྱོར་དང་དམག་དོན་ལ་ཤིན་ཏུ་ནས་སེམས་འཚབ་དང་བལྟོས་དགོས་པའི་རྣམ་པ་ཡོད་པ་བཞིན། རང་བཙན་ཡོད་པའི་རྒྱལ་ཁབ་ཆེན་པོའི་སྲིད་འཛིན་འདེམས་ལུགས་ལྟར། དབུལ་ཕོངས་དང་། ཉམ་ཐག་གི་ཆེད་དུ་ས་ཁུལ་མང་པོ་ཞིག་ལ་དངོས་སུ་གཟིགས་སྐོར་དང་། མི་དམངས་ཀྱི་འདོད་མོས་ལྟར། བགྲོ་གླེང་དང་དོགས་འདྲི། བསམ་ཚུལ་བཅས་བསྡུ་རུབ་བྱས་ཏེ་མི་མང་གི་འོས་བསྡུའི་ལམ་ནས་སྲིད་སྐྱོང་གི་ཁྲིར་འཁོད་པ་སྟེ། དྲང་བདེན་ཅན་གྱི་མི་རྣམས་ཡིད་དགའ་བ་དང་། ཕྲག་དོག་ཅན་གྱི་མི་རྣམས་ཀྱང་བློ་ཕམ་བྱེད་དགོས་པ་སོགས་བྱུང་ཡོད། དེ་ནི་ཁ་ཙམ་དང་ཚིག་ཙམ་གྱི་སྐད་ཆ་མ་ཡིན་པར་གཞི་རིམ་མི་དམངས་ཀྱི་མཁོ་དགོས་དང་། ཕགས་འདུན་བཅས་ལ་ཁ་ཐུག་ལག་ཐུག་གིས་ཕན་པར་བྱེད་འདོད་དེ་མཚོན་ཡོད་ཅིང་། དེ་བས་ཁོང་གི་རྣམ་དཔྱོད་དང་སྤོབས་པ། གཟིག་བརྗིད་དང་དབང་ཐང་། ལྷག་བསམ་དང་དྲང་བདེན། གཏམ་གླེང་དང་རྣམ་འགྱུར། གསར་གཏོད་དང་གཅིག་སྒྲིལ་སོགས་ཀྱང་། མི་ལོ་དྲུག་ཅུའི་ནང་ནས་སྐྱབས་བཅོལ་བོད་མིའི་ནུས་པ་དང་ལེགས་ཆ་གཅིག་ཏུ་བསྡུས་པ་ལྟ་བུའི་ལངས་ཕྱོགས་སོགས་བཟུང་ནས་ཕྱི་རྒྱལ་ཁག་ཏུ་གཟིགས་སྐོར་ཕེབས་པ་ནི། དེ་སྔོན་བཙན་བྱོལ་སྤྱི་ཚོགས་ཀྱི་ཁྲོད་ནས། སྲིན་འབུ་མེ་འཁྱེར་གྱི་ལོ་རྒྱུས་སུ། ཚེས་པ་བཅོ་ལྔའི་ཟླ་བ་ཤར་བ་ལྟར། དགུང་སྔོན་གྱི་དཀྱིལ་དུ་འོད་ཟེར་གྱི་རྣམ་པ་ལྷམ་མེར་གསལ་བཞིན་པ་དེ་ཡང་། འདས་དུས་ཀྱི་བཀའ་ཁྲི་རྣམ་པའི་སྤྱན་སྔ་ལ་རང་ཉིད་ཀྱིས་ལས་ཟིན་པའི་བྱ་བཞག་སྟེ། བཟང་ངན་ཅི་འདྲ་བྱུང་ཡོད་ནའང་དེ་ལ་དྲན་གསོ་གསར་པ་ཞིག་བཏང་ཡོད། དེ་བས་ཤ་ཁྲག་གཅིག་པའི་བོད་རིགས་སྤུན་ཟླའི་ན་གཞོན་གྱི་ཁྲོད་ནས་མངོན་གསལ་དོད་པོའི་འཇོན་ཐང་གི་རྒྱལ་ཁ་ཆེ་ཤོས་དེ་ཡིན་ལ། ལྷག་པར་ཁོང་གིས་སྲོལ་འབྱེད་པའི་གསར་གཏོད་གསུམ་གྱི་ལམ་བུ་ནི། དེ་སྔོན་མེས་པོ་རྣམ་པའི་བློ་ངོར་ཤར་ཙམ་ཡང་བྱེད་མྱོང་མེད་པའི་ཧ་ཅང་གིས་གཏིང་ཟབ་དང་། ཤིན་ཏུ་ནས་རྒྱ་ཆེ་བའི་གནས་སྟངས་ཤིག་ཏུ་གྱུར་པས། ལམ་སང་གོ་ཆོག་ཆོག་དང་བཤད་ཆོག་ཆོག་གི་རྣམ་པ་ཞིག་གཏན་ནས་མིན། འདི་ལྟ་བུའི་དོན་ལ། དེང་སང་ནའང་བླ་རྒན་དང་གྲྭ་རྒན་དང་། སྤོ་རྒན་དང་རྨོ་རྒན། ཕོ་རྒན་དང་མོ་རྒན་འགའ་ཞིག་གིས་མི་འདོད་པའི་རྣམ་འགྱུར་གྱིས་བཤད་པ་ལྟར་མ་ཡིན་པར། འཕྲལ་ཕུགས་རྒྱངས་གསུམ་གྱི་སྒོ་ནས་བསམ་གཞིགས་བྱེད་དགོས་པ་ལས། ཡོད་ན་མེད་མདོག་གི་སྐུར་འདེབས་དང་། མེད་ན་ཡོད་མདོག་གི་སྒྲོ་སྐུར་ཞིག་གཏན་ནས་བྱེད་མི་ཉེན། དེའི་ཕྱིར་འདས་ཟིན་པའི་བཙན་བྱོལ་སྤྱི་ཚོགས་ཀྱི་ནང་ན། ལོ་རྒྱུས་ལ་ཡིད་སྐྱོ་དགོས་པ་དང་། འབྱུང་འགྱུར་ལ་བློ་འཕམ་དགོས་པའི་བྱུང་བ་སྣ་ཚོགས་ཤིག་ཡོད་པ་དེ་དག་རྒྱུན་མཐུད་འདོད་ནའང་། ལས་ཀ་གསར་གཏོད་དང་། ལམ་བུ་གཅིག་སྒྲིལ། འཚོ་བ་རང་མགོ་རང་ཐོན། དད་ཡུལ་གྱི་ཆོས་ལུགས་རིས་མེད། ཕོ་མོའི་ཐོབ་ཐང་དབྱེར་མེད། ཆོལ་ཁའི་ལུང་ཚན་ཕྱོགས་མེད་ཀྱི་རྒྱལ་མཚན་དཀར་པོ་འདི་ནི། འབྱུང་འགྱུར་བོད་པའི་མདུན་ལམ་གྱི་ཁང་བཟང་ཐོག་ཏུ་བསླངས་པ་འདིས། སྔར་དྲི་ངན་འགོས་པའི་ཚོན་མདངས་སྣ་ཚོགས་ལྡན་པའི་དར་ཆེན་དང་། དར་ཆུང་ཡོངས་རྫོགས་ཕམ་ཉེས་སུ་བཏང་ཡོད། དེའི་ཕྱིར་དུས་རབས་གསར་པའི་བོད་རིགས་སྤུན་ཟླ་ཁྲོད་ནས་སྔར་བྱུང་མྱོང་མེད་པའི་རྒྱལ་ཁ་ཆེ་ཤོས་དེ་གྱུར་ཡོད་ལ། བོད་ཀྱི་གཞོན་སྐྱེས་རྣམས་ཀྱིས་ཀྱང་གནས་སྟངས་དེ་ཤེས་ནས། གུས་བཀུར་དང་རྒྱབ་བྱེད་དོན་ཡང་ཡིན།

དེས་ན་སྲིད་སྐྱོང་མཆོག་གིས་ཀྱང་རྒན་པ་ཚོའི་ཁ་ཏ་དང་། བསླབ་བྱ་དེ་གཙོས་བོར་མི་འཛིན་པར། རང་ཉིད་ལ་ཕུགས་རྒྱངས་ཡོད་པའི་ལྟ་གྲུབ་དང་། དེང་རབས་ཕྱི་མའི་བོད་ཀྱི་ཁ་ཕྱོགས། མཐོ་སྒང་པའི་ན་གཞོན་གསར་པའི་དགོས་དམིགས་བཅས་ལ་གཟིགས་ནས། འདས་ཟིན་པའི་ལམ་ཤུལ་ཁོ་ན་ལ་ཕྱིར་རྒྱུ་བྱེད་རྒྱུ་དེ་གདམ་མི་རུང་། འབྱུང་འགྱུར་གྱི་ལས་དོན་ལ་མི་རིགས་དང་། རྒྱལ་ཁབ་མང་པོས་གསར་གཏོད་དང་ཁ་ཕྱོགས་འཛིན་པ་བཞིན་དུ། ང་ཚོ་བོད་ཀྱི་ན་གཞོན་རྣམས་ཀྱང་། མི་རིགས་གཞན་གྱི་ཅི་མཚུངས་སུ་འཛམ་གླིང་སྒང་པར་འགྲེང་དགོས་ན། འདས་དུས་ཀྱི་ལམ་ཤུལ་དང་། སྔོན་སོང་གི་ལངས་ཕྱོགས་ཁོ་ན་ལ་འགྲོ་མི་ཉེན། སོང་ཟིན་པའི་གནས་ཚུལ་གང་ཞིག་ཡིན་ནའང་། དེས་ད་ཆར་ང་ཚོ་མིའི་གྲལ་དུ་བསྐྱེལ་ཐུབ་མེད་ལ། འབྱུང་འགྱུར་ཡིན་ནའང་གནས་སྟངས་དེ་དག་གིས། བོད་ཀྱི་བུ་རབས་ཚ་རྒྱུད་རྣམས་དགོས་ས་ཞིག་ལ་དེ་བས་བསྐྱེལ་མི་ཐུབ། དེའི་ཕྱིར་རྒྱལ་ཁབ་རྣམས་ཀྱི་སྲིད་འཛིན་དང་སྲིན་བློན་རྣམས་འདེམས་དུས་སུའང་། ཐོག་མར་འོས་མི་རྣམས་ཀྱིས་རང་ཉིད་ཀྱི་ལངས་ཕྱོགས་གསར་པ་དང་། ལྟ་གྲུབ་གསར་པ་སོགས་བཤད་ནས་དེ་དག་མི་དམངས་ལ་ཤེས་རྟོགས་བྱེད་བཅུགས་ཤིང་། ད་གཟོད་མི་རྣམས་ཀྱིས་འབྱུང་འགྱུར་སོ་སོའི་མི་རིགས་ལ་ཕན་པའི་འོས་མི་དེ་ངོས་ཟིན་ནས། སྲིད་འཛིན་དང་སྲིན་བློ་སོགས་འདེམས་ཀྱི་ཡོད། དེ་མཚུངས་སྲིད་སྐྱོང་མཆོག་ཀྱང་བོད་ཀྱི་བཀའ་བློན་ཁྲིར་འདེམས་རྒྱུ་དེ་ཡང་། ན་གཞོན་གསར་པའི་བསམ་བློ་དང་། དེང་རབས་ཀྱི་ཁ་ཕྱོགས་གསར་པ་སོགས་ཡོད་པར་བསམས་ནས་གདམས་པ་ལས། འདས་པའི་གནས་ཚུལ་མཐའ་དག་རྒྱུན་འཁྱོངས་བྱེད་མཁན་ཞིག་ལ་བརྩིས་ནས་གདམས་མེད། འདས་པའི་དུས་ཀྱི་མི་སྣ་ཕལ་མོ་ཆེ་ནི་ཆོས་ལུགས་ཀྱི་བྱ་བ་ཁོ་ནའི་བྱེད་མཁན་ལྟ་བུ་ཞིག་ལས། ཆབ་སྲིད་ཀྱི་བྱ་བ་གཙང་མ་བྱེད་གཅིག་ཀྱང་མཁན་བྱུང་མེད། མི་རིགས་གང་ཞིག་གིས་ཆོས་ཐག་དང་སྲིད་ཐག་མི་ཆོད་པའི་ལས་དོན་ཅི་ཞིག་བགྱིས་ནའང་། མཐར་ཆོས་མིན་སྲིད་མིན་གྱི་གྲུབ་འབྲས་ཏེ་དོར་ན་མི་རུང་། བླངས་ན་མི་ཕན་པའི་འབྲས་བུ་ས་བོན་མེས་ཚིག་པ་ལྟ་བུ་ཞིག་ལས་མི་འོང་པར་ཐེ་ཚོམ་མེད།
འདབ་པ་ཚེ་དབང་མགོན་པོ།