གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཚེས་ ༢༤ ནས་ ༢༧ ཉིན་བར་ཐའེ་ཝན་གྱི་རྒྱལ་ས་ཐའེ་པེ་རུ། སྤྱི་དམངས་ནུས་སྟོབས་ཚོགས་པ་འགན་འཛིན་ཡང་ཅིས་ལིས་གོ་སྒྲིག་བྱས་པའི་སྐབས་ ༩ པའི་མི་རིགས་དང་ཆོས་ལུགས་མི་འདྲ་བའི་གཞོན་སྐྱེས་ཚོགས་འདུ་དེ་ཚོགས་ཡོད་ཅིང་། ཚོགས་འདུ་དེར་བོད་དང་སོག་པོ། ཡུར་གུར། རྒྱ་ནག་སྐམ་ས་ཆེན་མོ། ཕྱི་སྡོད་རྒྱ་རིགས་དང་། ཧུང་ཀོང་སོགས་མི་རིགས་དང་ཆོས་ལུགས་འདྲ་མིན་གྱི་སྐུ་ཚབ་ ༧༠ ཙམ་མཉམ་ཞུགས་བྱས་ཡོད་འདུག
ཚོགས་འདུའི་སྟེང་ཐབས་ཇུས་པ་དང་རྩོམ་པ་པོ། བརྒྱུད་ལམ་འཐབ་རྩོད་པ། ཁྲིམས་རྩོད་པ་བཅས་ཐུན་མོང་གི་སྟོབས་ཤུགས་བསྐྱེད་དེ་རྒྱ་ནག་གི་སྲིད་དབང་གཅིག་སྡུད་ལམ་ལུགས་འགྱུར་བ་གཏོང་རྒྱུར་འབད་འཐབ་ཇི་ལྟར་དགོས་མིན་ལ་གྲོས་བསྡུར་བྱས་ཡོད་པ་དང་། རྒྱ་ནག་དམར་ཤོག་གིས་བཙན་གནོན་དབང་སྒྱུར་བྱེད་ཀྱིན་པའི་བོད་དང་ཡུ་གུར་སོག་པོ་སོགས་ཀྱི་དཀའ་སྡུག་སེལ་ཐབས་ལས་འགུལ་ཅི་ཞིག་སྤེལ་དགོས་མིན་བཅས་ལ་ཕན་ཚུན་བསམ་ཚུལ་སྤེལ་རེས་བྱས་ཡོད་འདུག
ཚོགས་འདུ་དབུ་འཛུགས་ཐོག ༧གོང་ས་སྐྱབས་མགོན་ཆེན་པོ་མཆོག་ནས་དམིགས་བསལ་ཚོགས་འདུ་འདིའི་ཡི་ཐོག་ལ་གསུངས་འཕྲིན་ཕེབས་ཡོད་པའི་ནང་རྒྱ་ནག་ནང་འགྲོ་བ་མིའི་ཐོབ་ཐང་དང་དམངས་གཙོ། ཁྲིམས་ཀྱི་དབང་བསྒྱུར་སོགས་ཧ་ཅང་གལ་ཆེན་ཡིན། གང་ཞེ་ན། རིན་ཐང་དེ་དག་ནི་སྤྱི་ཚོགས་ཤིག་གི་རང་དབང་དང་གསོན་ཤུགས་ཀྱི་རྨང་རྡོ་ཡིན་པ་མ་ཟད། དོན་དམ་གྱི་བདེ་སྐྱིད་དང་བརྟན་ལྷིང་གི་འབྱུང་ཁུངས་ཀྱང་ཡིན། རྒྱ་ནག་དམངས་གཙོར་འགྱུར་རྒྱུ་དེ་ནི་རྒྱལ་སྤྱིའི་ཁེ་ཕན་ཡིན་པ་མ་ཟད། བྱེ་བྲག་ཏུ་རྒྱ་ནག་གི་ཁྱིམ་མཚེས་རྒྱལ་ཁབ་དག་གི་ཁེ་ཕན་ཡང་ཡིན། རྒྱ་ནག་གི་དམངས་གཙོ་དང་རང་དབང་བཅས་ཀྱི་ཕྱོགས་དེ་མུ་མཐུད་རྒྱ་བསྐྱེད་དང་སྒོ་དབྱེ་བྱས་པ་ཡིན་ན། བོད་མི་ཚོ་ལའང་ཁེ་ཕན་ཆེན་པོ་ཡོད་ཅེས་སོགས་བསྟན་ཡོད་འདུག
ཚོགས་འདུ་དེར་བོད་པའི་སྐུ་ཚབ་མི་ ༧ བཅར་ཡོད་པ་དག་ནི། བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་དང་སྤྱི་འཐུས་ཤར་གླིང་ཟླ་སྒྲོན། བོད་རང་བཙན་སློབ་ཕྲུག་ཚོགས་པའི་ཨེ་ཤི་ཡའི་འགན་འཛིན་རྡོ་རྗེ་ཚེ་བརྟན། རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ཨེ་ཤེ་ཡའི་འབྲེལ་མཐུད་པ་བློ་བཟང་ཚེ་བརྟན། དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་རྒྱ་ཡིག་སྡེ་ཚན་ལས་བྱེད་ཡེ་ཤེས་བསྟན་འཛིན། བོད་ཀྱི་དཔེ་མཛོད་ཁང་གི་ཉམས་ཞིབ་པ་དང་རྩོམ་སྒྱུར་སྡེ་ཚན་གྱི་འགན་འཛིན་མཆོག་བསྟན་འཛིན་སྨོན་ལམ། ལྷ་སྤྱི་ཚོགས་ཞབས་ཞུ་ཚོགས་པའི་འབྲེལ་གཏུགས་དུས་དེབ་རྩོམ་སྒྲིག་པ་འབྲུག་བསྟན་སྐྱིད་བཅས་ཞུགས་ཡོད་འདུག
ཚོགས་ཐོག་ཏུ་བོད་དོན་གནས་སྟངས་སྤྱི་དང་། བྱེ་བྲག་ཏུ་བོད་ནང་གི་གནས་སྟངས་དང་རྒྱ་ནག་གི་གདུག་རྩུབ་ཅན་གྱི་སྲིད་བྱུས་འོག་བོད་མི་བརྒྱ་དང་སུམ་ཅུ་ལྷག་གིས་རང་ལུས་མེར་བསྲེགས་གནང་བའི་གནས་ཚུལ། བཙན་བྱོལ་བོད་གཞུང་གི་ལས་ཁུངས་མ་ལག་གི་བྱུང་བ་ངོ་སྤྲོད་དང་རྒྱལ་སྤྱིའི་ནང་དུ་བོད་དོན་ལས་འགུལ་ཤུགས་ཆེ་རུ་འགྲོ་བཞིན་ཡོད་པ་སོགས་ངོ་སྤྲོད་གནང་ཡོད་འདུག
འབའ་བ་སྐལ་བཟང་རྒྱལ་མཚན་ལགས་ཀྱིས་བོད་ནང་གི་གནད་དོན་མང་པོའི་ནང་ནས་འགྲོ་བ་མིའི་ཐོབ་ཐང་རྡོག་རོལ་བཏང་བའི་སྐོར་དང་རང་ལུས་མེར་བསྲེགས་གཏོང་མཁན་གྱི་ནང་མི་སྤུན་མཆེད་རྣམས་ཁྲིམས་འགལ་ཉེན་འཛུགས་བྱས་པ་དང་། ལྷག་པར་དུ་དཀོན་མཆོག་དབང་མོས་རྒྱ་གཞུང་ལ་ངོ་རྒོལ་བྱས་ནས་རང་ལུས་མེར་བསྲེགས་བཏང་ནས་གྲོངས་རྗེས། ཁོང་གི་བཟའ་ཟླ་སྒྲོལ་མ་སྐྱབས་ལ་སྲོག་ཐོག་ཉེས་པ་བཀལ་བ། དེ་བཞིན་ཁོང་གིས་འབྲོག་པ་རྣམས་རྩྭ་ཐང་ནས་ཕྱིར་འབུད་བྱས་པའི་སྐོར་སོགས་གླེང་ཡོད་འདུག
གཞན་ཚོགས་ཆེན་འདིའི་སྟེང་། རྒྱ་ནག་ནང་དང་རྒྱ་ནག་དམར་ཤོག་གཞུང་གི་དབང་སྒྱུར་འོག་ཏུ་ཡོད་པའི་ས་ཁུལ་ཁག་ཏུ་རང་དབང་དང་དྲང་བདེན་ཡོང་ཆེད་རྒྱལ་སྤྱིའི་ལས་འགུལ་ཤུགས་རྐྱེན་གལ་ཆེ་ཡིན་པར་ངོས་འཛིན་བྱུང་ཡོད་པ་དང་། བོད་དང་ཡུ་གུར། སོག་པོ་སོགས་ལ་འགྲོ་བ་མིའི་ཐོབ་ཐང་རག་ཐབས་ལག་ལེན་དངོས་ལ་ཇི་ལྟར་འགྲོ་དགོས་མིན་སྐོར་གྲོས་བསྡུར། དེ་བཞིན་ཐའེ་ཝན་ནང་གི་དམངས་གཙོའི་འཕེལ་རིམ་སྐོར་དང་། ཧུང་ཀོང་ནང་དུ་མང་མོས་འོས་བསྡུའི་སྐོར་སོགས་ལ་བགྲོ་གླེང་གཏམ་བཤད་གནང་ཡོད་འདུག
ལོ་ལགས་སོ། ཆོས་པའི་སེམས་རྒྱུད་ཆོས་ཀྱིས་འདུལ་ཐུབ་ཀྱི་མེད་པའི་དུས་འདིར། སྐྱ་བོའི་སེམས་པར་སྨན་པས་ལས་ཡ་ཞིག་བརྙེད་ཀྱི་ཨེ་ཡོད་ན། ལམ་སྟོན་གནང་རོགས།
ད་ག་རེ་ལབ་ཀྱི་ཡོག་རེད། གོང་ས་མཆོག་གིས་བོད་པ་ཚོར་རྒྱ་དམར་རྩ་ཁྲིམས་འོག་འགྲོ་དགོས་ཚུལ་གསུང་བཞིན་དུ་རྒྱ་མིའི་ཚོགས་འདུར་རྒྱ་ནག་ལ་འགྱུར་བ་འགྲོ་དགོས་ཚུལ་གསུང་བཞིན་པས། ནང་འགལ་ཆགས་ནས་སོ་སོས་སོ་སོའི་ལམ་ཁ་འགོག་གིན་པ་མ་རེད་པས། རྒྱ་མིའི་གཞུང་གད་མོ་ཤོར་གྱི་མེད་འགྲོ།
ཕྱོགས་གཞན་ནས་བཤད་ན། སྲིད་དོན་ལས་དགོངས་པ་ཞུས་ཟིན་པའི་ཆོས་པ་ཞིག་གིས་སྲིད་དོན་ངོ་རྒོལ་ཚོགས་པར་གཞོགས་འདེགས་གནང་ཡ་དེ་འོས་འཚམས་ཡོད་དམ། བསམ་ཚུལ་སྙན་སེང་ཞུ་ཡ་གལ་ཆེན་རེད།
གནས་གཙང་། རང་ད་དུང་ཡང་ཁྱོད་ན་གི་འདུག་གམ། སེམས་ཁམས་སྨན་པར་སྟོན་རོགས།
(བཙལ་བྱོལ་བོད་གཞུང་)ཞེས་པ་(བོད་མིའི་སྒྲིག་འཛུགས་)ལ་བསྒྱུར་ནས་དུས་ཡུན་རིང་མོ་ཞིག་ཕྱིན་ཚར། སྒྲིག་འཛུགས་རང་གི་ངོས་ནས་ཀྱང་(བོད་གཞུང་ )ཞེས་པའི་མིངབྱང་འདི་ཕྱིར་བསྡུ་བྱས་ཟིན་པ་ས་བསྒྲགས་གནམ་བསྒྲགས་བྱས་ཚར་བ་རེད། ད་རེས་ཚོགས་འདུ་དེར་མཉམ་ཞུགས་གནང་མཁན་གྱི་བོད་མིའི་སྤྱི་འཐུས་དེ་ཚོས་འདི་ཧ་མ་གོ་བ་ཡིན་སྲིད་རྒྱུ་མ་རེད། འོ་ན། ཁོང་ཚོས་༼བཙན་བྱོལ་བོད་གཞུང་གི་ལས་ཁུངས་མ་ལག་གི་བྱུང་བ་ངོ་སྤྲོད་༽ག་འདྲ་ཞིག་གནང་ཡོད་དམ།