དེ་རིང་སྔ་དྲོར་༧གོང་ས་མཆོག་གྷོ་པ་པུར་བོད་ཁྱིམ་དུ་ཆིབས་བསྒྱུར་གནང་སྟེ། སློབ་མ་ཚོར་ཁྱེད་རང་ཚོ་བོད་པའི་བོད་ཕྲུག་ཅིག་དང་བོད་པའི་མི་རབས་གསར་བ་ཞིག་ཆགས་ཡོད་སྟབས། དུས་རབས་ཉེར་གཅིག་ནང་འཛམ་གླིང་སྦྱིར་འཚེ་བ་མེད་པ་ཡོང་བར་ཞབས་འདེགས་བསྒྲུབ་རྒྱུར་བསམ་བློ་གཏོང་དགོས་སྐོར་གསུངས་འདུག
དེ་རིང་ཕྱི་ཚེས་ ༢༩ ཉིན་གྱི་ཞོགས་པའི་ཆུ་ཚོད་ ༨།༠༠ པའི་ཐོག ༧གོང་ས་མཆོག་གྷོ་པ་པུར་བོད་ཁྱིམ་སློབ་གྲྭའི་དགེ་ལས་སློབ་ཕྲུག་རྣམས་ཀྱི་ཕེབས་བསུའི་ཁྲོད། ༡༩༩༧ ལོར་སློབ་གྲྭ་གསར་འཛུཊ་གནང་རྗེས་ཀྱི་ཆིབས་བསྒྱུར་ཐོག་མ་གནང་སྟེ། སློབ་གྲྭས་ལོ་ལྟར་གོ་སྒྲིག་གནང་བཞིན་པའི་གངས་ལྗོངས་ང་ཚོའི་ཕ་ཡུལ་ཞེས་པའི་སློབ་མའི་བྱ་འགུལ་དང་ མཚན་ཉིད་རྩོད་པ་བཅས་ལ་གཟིགས་ཞིབ་གནང་རྗེས། སློབ་གྲྭའི་ཚོགས་ཁང་དུ་དགེ་ལས་སློབ་ཕྲུག་ཡོངས་ལ་བཀའ་སློབ་གནང་དང་གང་བློ་མའི་ལྗགས་ལུང་བཅས་གནང་ཡོད་འདུག
སྐབས་དེར་གྷོ་པ་པུར་བོད་ཁྱིམ་སློབ་གྲྭའི་འགན་འཛིན་ཚུལ་ཁྲིམས་རྡོ་རྗེས་ལགས་ཀྱིས། གྷོ་པ་པུར་བོད་ཁྱིམ་སློབ་གྲྭའི་སྤྱི་ཡོངས་སློབ་སྦྱོང་གནས་སྟངས་ཡག་པོ་ཡོད་པ་དང་། དམིགས་བསལ་ ༢༠༠༩ ལོ་ནས་ ༢༠༡༣ བར་གྱི་ལོ་ལྔའི་རིང་ཡིག་རྒྱུགས་གཙང་འཕྲོད་ཀྱི་བརྒྱ་ཆ་ ༡༠༠ མུ་མཐུད་བླངས་ཏེ་གཟེངས་སུ་ཐོན་པ་བྱུང་ཡོད་པར་མ་ཟད། ད་ལྟའི་ཆར་སློབ་གྲྭ་འདིར་སློབ་ཟུར་གྲངས་ ༣༣༠ ཙམ་ཡོད་པ་དང་། རྒྱ་གར་གྱི་མཐོ་སློབ་ཁག་ནང་གསེར་གྱི་རྟགས་མ་སོགས་བཞེས་མཁན་གྱི་སློབ་མ་རིམ་པར་ཐོན་བཞིན་ཡོད་སྐོར་སོགས་ངོ་སྤྲོད་གནང་འདུག
༧གོང་ས་མཆོག་གིས་དགེ་སློབ་རྣམས་ལ་བཀའ་སློབ་གནང་སྐབས། མི་སྤྱི་དང་བྱེ་བྲག་བོད་རང་ལ་ཕན་པ་བསྒྲུབ་པར་ཤེས་ཡོན་དགོས་ཀྱི་ཡོད་པ་རེད། ཤེས་ཡོན་མེད་ན་ལྷག་བསམ་ཡོད་ཀྱང་མི་ལག་རྡུམ་ལྟ་བུ་རེད། ལྷག་བསམ་དང་ཤེས་ཡོན་ཟུང་འབྲེལ་དགོས་ཀྱི་འདུག སྤྱི་ཚོགས་ནང་ལ་མཚོན་ནའང་། ཤེས་ཡོན་ཡོད་ཀྱང་ལྷག་བསམ་མེད་ན་རྙོག་གྲ་བཟོ་མཁན་ཞིག་ཆགས་འདུག གང་ལྟར། འཛམ་གླིང་འདིའི་ཐོག་ད་ལྟ་ཡོད་བསྡད་པའི་ཤེས་ཡོན་དེས་འདང་གི་མི་འདུག ལྷག་བསམ་དགོས་ཀྱི་འདུག ལྷག་བསམ་ཞེས་པ་དེ་ལོ་སྟོང་ཕྲག་རིང་གི་ཆོས་དང་འབྲེལ་ནས་ཡོང་བསྡད་ཀྱི་ཡོད་པ་རེད། ཅེས་གསུངས་སོང་།
༧གོང་ས་མཆོག་གིས་མུ་མཐུད་དུ་གསུངས་དོན། “ ང་ཚོ་བོད་པར་ཆ་བཞག་ན་དུས་རབས་ཉི་ཤུ་བའི་ནང་ང་དང་ཁྱོད་ཅེས་པའི་བསམ་བློ་དང་རང་རྒྱལ་གཞན་ཕམ་གྱི་གནས་སྟངས་འོག་ནས་ང་ཚོ་བོད་པའི་དཀའ་ངལ་དེ་འཕྲད་པ་རེད། ཁྱེད་རང་ཚོ་བོད་པའི་བོད་ཕྲུག་ཅིག་དང་བོད་པའི་མི་རབས་གསར་བ་ཞིག་ཆགས་ཡོད། དུས་རབས་ཉེར་གཅིག་པའི་ནང་བོད་དེ་འཛམ་གླིང་སྦྱིར་འཚེ་བ་མེད་པ་ཡོང་བར་ང་ཚོས་ཞབས་འདེགས་ག་ཚོད་བསྒྲུབ་ཐུབ་མིན་དང་། ཞབས་འདེགས་བསྒྲུབ་རྒྱུའི་བསམ་བློ་གཏོང་དགོས་པ་རེད། བོད་ཀྱི་གནས་ཚུལ་རང་རྒྱལ་གཞན་ཕམ་གྱི་བསམ་བློ་ཤུགས་དྲག་པོ་མེད་པར་ཡག་པོ་ཞིག་གི་སྒང་ལ་ཕྱིན་པ་ཡིན་ན། བོད་པའི་གནས་ཚུལ་ལ་ཆ་བཞག་ནའང་རྗེས་མར་བདེ་ཞིང་སྐྱིད་པ་ཞིག་ཏན་ཏན་ཡོང་ཐུབ་ཀྱི་རེད་བསམ་གྱི་འདུག དེ་ང་ཚོའི་དམིགས་ཡུལ་ལ་འཇོག་གི་ཡོད་པ་རེད། དེ་ཚོའི་གྲས་དེ་མ་འོངས་པར་འཛམ་གླིང་སྤྱི་ལ་ལེགས་སྐྱེས་འབུལ་ཐུབ་པའི་ཆ་རྐྱེན་དང་ནུས་པ་ཡོད་པའི་སྲོལ་འདྲ་རེད། ཁྱེད་རང་ཚོས་དེ་རྙོག་གྲ་ཚ་བོ་རེད། དེ་ལས་གཉིད་ཉལ་ན་སྐྱིད་པོ་རེད་དེ་འདྲ་མ་བསམ། ཨུ་ཚུགས་ཏོག་ཙམ་རྒྱག་དགོས་པ་རེད། མཁས་པར་འདོད་ན་དཀའ་ལས་རྒྱག་དགོས་པ་རེད། ཨུ་ཚུགས་རྒྱག་དགོས་པ་རེད། ཨུ་ཚུགས་རྒྱག་པ་དེ་ཡང་བདུན་ཕྲག་གཅིག་ནང་ཚར་བ་མིན་པར། ལོ་ནས་ལོ་བསྟུད་དེ་གྲྭ་སར་དཔེ་ཆ་བལྟ་མཁན་ཚོས་ལོ་ ༢༠ དང་ ༣༠ འགྲོ་བསྡད་ཀྱི་འདུག དེར་བརྟེན། ཁྱེད་རང་ཚོས་ཐོག་མར་ཁག་པོ་ཡོད་ཀྱང་། ག་ལེར་གོམས་ཡོང་སྐབས་ལས་སླ་རུ་འགྲོ་གི་རེད། ཅེས་གསུངས་སོང་།
ཡང་༧གོང་ས་མཆོག་གིས་དགེ་རྒན་ཚོར། “ ཁྱེད་རང་ཚོ་དགེ་རྒན་ཚོ་ཧ་ཅང་གལ་ཆེན་པོ་རེད། ཁྱེད་རང་ཚོས་ད་ལྟའི་བར་ཧུར་ཐག་གནང་འདུག ད་དུང་ཡང་སོ་སོའི་འཕྲལ་སེལ་ལྟོ་གོས་ཀྱི་ལས་ཀ་ཡིན་མི་བསམ་པར། དངོས་ནས་མི་རབས་གསར་བ་དེ་དག་འཚར་ལོངས་ཚུལ་དང་མཐུན་པ་ཞིག་ཡོང་བའི་འགན་ཡོད་བསམ་པའི་ཐོག་ནས། སྒོ་གང་ས་ནས་ཡག་པོ་ཡོང་ཐུབ་པ་ཞིག་ལ་བསམ་བློ་གཏོང་དགོས་པ་རེད། དེ་ཧ་ཅང་གལ་ཆེན་པོ་རེད། མ་འོངས་པར་ཧུར་ཐག་གནང་རོགས། ”ཞེས་གསུངས་སོང་།
ཁ་སང་ཕྱི་ཚེས་ ༢༨ ཉིན་གུང་ཆུ་ཚོད་ ༡།༠༠ ཙམ་ལ་རྫོང་གསར་བཤད་གྲྭར་ཆིབས་བསྒྱུར་གནང་ཡོད་པར་མ་ཟད། འབྲི་གུང་བཀའ་བརྒྱུད་བུམ་མང་བྱམས་པ་གླིང་དུ་ཆིབས་བསྒྱུར་གྱིས་དགོན་པར་གཟིགས་ཞིབ་དང་དགེ་འདུན་པ་རྣམས་ལ་བཀའ་སློབ་བཅས་གནང་སྟེ། ལུང་སྡེ་སྣོད་གསུམ་གྱི་འཆད་ཉན་དང་རྟོགས་པའི་བསྟན་པ་བསླབ་པ་གསུམ་གྱི་ཉམས་ལེན་དགོན་པ་ཆེ་ཆུང་ཚང་མར་དགོས་ངེས་ཡིན་པ་དང་། སྡེ་སྣོད་གསུམ་གྱི་འཆད་ཉན་བརྗོད་སྐབས་ཚུལ་ཁྲིམས་ཀྱི་བསླབ་པས་གཙོ་བོར་སྟོན་པ་འདུལ་བའི་སྡེ་སྣོད་དང་། ཏིང་ངེས་འཛིན་གྱི་རྣམ་གཞག་གཙོ་བོར་སྟོན་པའི་མདོ་སྡེའི་སྡེ་སྣོད། ཤེས་རབ་ཀྱི་བསླབ་པས་གཙོ་བོར་སྟོན་པ་མངོན་པའི་སྡེ་སྣོད་བཅས་སངས་རྒྱས་ཆོས་ཀྱི་འགྲོ་སྟངས་གཙོ་བོ་རེད། ཚུལ་ཁྲིམས་དང་ཏིང་ངེ་འཛིན། ཤེས་རབ་བཅས་བསླབ་པ་གསུམ་བརྗོད་བྱར་བྱེད་མཁན་གཙོ་བོ་སྡེ་སྣོད་གསུམ་ཡོད་སྟབས། སྡེ་སྣོད་གསུམ་ལ་ཐོས་བསམ་བྱས་ཏེ་དོན་རྟོགས་པར་བསླབ་པ་གསུམ་ལ་ཉམས་ལེན་བྱེད་དགོས་པ་དང་། བསླབ་པ་གསུམ་གྱི་འགྲོ་སྟངས་སྐོར་གང་ཡང་མ་ཤེས་པར་ཁ་ནས་གྲྭ་པ་ཡིན་བཤད་དེ་འདོན་པ་བཏོན་པ་ཙམ་གྱིས་ངོ་མཚར་ཆེ་རྒྱུ་མེད། གང་ལྟར་སློབ་སྦྱོང་བྱས་ནས་ཆོས་འདི་ངོ་ཤེས་པ་བྱ་རྒྱུ་ཧ་ཅང་གལ་ཆེན་པོ་རེད། ཅེས་གསུངས་ཡོད་འདུག
ཡང་༧གོང་ས་མཆོག་གིས། གར་ཞྭ་ཁུ་ནུ་ལ་དྭགས། མོན། བོད་མི། རྒྱ་གར་བ་སོགས་སུ་ནང་པ་ཡིན་ཟེར་མཁན་མང་པོ་ཡོད་ཀྱང་། ནང་པའི་ཆོས་གང་ཡིན་དང་སངས་རྒྱས་ཆོས་དང་དགེ་འདུན་གང་ཡིན་འདྲི་སྐབས་མི་ཤེས་མཁན་མང་པོ་ཡོད། ཆོས་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། ང་ཚོའི་ཁ་དཔེར། སོ་ནམ་གྲོང་པའི་དཔེ་ལ་ལྟོས་བརྗོད་སྲོལ་ཡོད་པ་ལྟར་ཉེས་ཆའམ་ཞན་ཆ་དེ་དག་གྲོང་པར་བལྟས་ནས་ང་ཚོས་ཤེས་ཀྱི་ཡོད། རྒྱ༌ནག་དང་ཐེ་ཝན་ནང་ནང་པ་ཧ་ཅང་ཤུགས་ཆེན་པོ་རེད། ཉི་ཧོང་དང་ཀོ་རི་ཡ། ཝེ་ཐི་ནམ་སོགས་ཤེར་ཕྱིན་གྱི་གཞུང་ལ་ལྟ་མཁན་གཅིག་མཚུངས་ཆགས་ཡོད། ཚང་མས་ཤེས་རབ་སྙིང་པོ་འདོན་གྱི་ཡོད། ཐ་སྙད་གཞན་ཞིག་གི་ཐོག་ནས་བཤད་ན་ཐེག་ཆེན་ཡིན་པ་གཅིག་གྱུར་རེད། ཉེ་ལམ་ངོས་རང་ཉི་ཧོང་ནས་ཕྱིར་འཁོར་མཚམས་རེད། ངོས་ཀྱི་ངོ་ཤེས་ཉི་ཧོང་གི་ཆོས་གྲོགས་ཤིག་ཡོད། ཁོང་གིས་ངོས་ལ་ང་ཚོས་ཤེས་རབ་སྙིང་པོ་འདོན་གྱི་ཡོད་ཀྱང་ནང་དོན་ཤེས་ཀྱི་མེད། ཅེས་ནང་ཚགས་ཀྱིས་བརྗོད་བྱུང་། དེར་བརྟེན་ང་ཚོའི་གྲོང་པ་ནང་པ་ཚོས་ཆོ་ག་འདོན་རྒྱུ་དེ་དག་ལུགས་སྲོལ་ལྟ་བུ་བྱས་པ་མ་གཏོགས་ངོ་ཐོག་སངས་རྒྱས་ཆོས་ཀྱི་འགྲོ་སྟངས་གང་འདྲ་ཡིན་ཤེས་ཀྱི་མི་འདུག་གོས་ངུར་སྨྲིག་གྱོན་པ་ཙམ་གྱིས་ཆོག་ཤེས་བྱས་ནས་ང་གྲྭ་པ་ཡིན་ཞེས་གྲྭ་ཆས་ཤིག་གྱོན་པ་མ་གཏོགས་གཞན་སྒོམ་རྒྱག་རྒྱུ་དང་བསླབ་པ་སློབ་གཉེར་གང་ཡང་མེད་པར་བསྡད་ན་ངུར་སྨྲིག་གྱོན་པ་ཙམ་གྱིས་ཆོག་པ་རེད། དེ་འདྲ་བྱ་རྒྱུ་མེད། ང་ཚོ་བོད་གངས་ཅན་ལྗོངས་ལ་སངས་རྒྱས་བསྟན་པ་ཐེག་པ་ཆེ་ཆུང་སྔགས་དང་བཅས་པ་ཆ་ཚང་བ། བསམ་གྱིས་མི་ཁྱབ་པ་ཞིག་དར་ཡོད། ཕྱོགས་མཚུངས་རབ་བྱུང་ཕོ་མོ་མང་པོ་ཡོད་ཀྱང་། སློབ་གཉེར་བརྒྱབ་ནས་དོ་སྣང་ཆེན་པོ་བྱེད་མཁན་མ་འདང་པའི་རྣམ་པ་ཤུགས་ཆེན་པོ་འདུག ཅེས་གསུངས་ཡོད།
གསར་འགོད་པ། དོན་གོ
