ཐའེ་ཝན་གྱི་རྒྱལ་ས་ཐའེ་པེ་རུ་ཁུན་མེང་དོན་རྐྱེན་དང་བོད་མིའི་རང་སྲེག་ནས་རྒྱ་ནག་མི་རིགས་གནད་དོན་ལ་བལྟ་བ་ཞེས་པའི་བགྲོ་གླེང་ཞིག་ཚོགས་འདུག
ཟླ་འདིའི་ཚེས་ ༣ ཉིན་ཐའེ་ཝན་སྐུ་ཚབ་དོན་གཅོད་ལས་ཁང་དང་། ཐའེ་ཝན་བོད་རིགས་ཚོགས་པ། ཐའེ་ཝན་བོད་རྒྱ་མཛའ་འབྲེལ་ཚོགས་པ། ཐའེ་ཝན་སློབ་ཆེན་སྤྱི་ཚོགས་ཚན་རིག་ཁང་བཅས་ཐུན་མོང་གི་གོ་སྒྲིག་འོག ཐའེ་ཝན་སློབ་ཆེན་སྤྱི་ཚོགས་ཚན་རིག་ཞིབ་འཇུག་ཁང་གི་ཚོགས་ཁང་དུ་༼ཁོན་མེན་དང་བོད་མིའི་རང་སྲེག་དོན་རྐྱེན་ནས་རྒྱ་ནག་གི་མི་རིགས་གནད་དོན་ལ་བལྟ་བ༽ཞེས་པའི་བརྗོད་གཞིའི་ཐོག་བགྲོ་གླེང་ཞིག་ཚོགས་ཡོད་འདུག དེར་ཐའེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་དང་། སྤྱི་འཐུས་འབའ་པ་སྐལ་བཟང་རྒྱལ་མཚན། སྤྱི་འཐུས་ཤར་གླིང་ཟླ་སྒྲོན་ལགས། ཐའེ་སྡོད་བོད་མིའི་བདེ་རྩ་ཚོགས་པའི་དབུ་འཛིན་དགེ་བཤེས་བྱམས་པ་རྒྱལ་མཚན། ཕྱི་དྲིལ་རྒྱ་ཡིག་སྡེ་ཚན་གྱིས་ལས་བྱེད་ཡེ་ཤེས་བསྟན་འཛིན་བཅས་དང་། ཐའེ་ཝན་གྲོས་ཚོགས་ཀྱི་འཐུས་མི་སྐུ་ཞབས་ཁྲན་ཅེ་རུ། ཐའེ་ཝན་སློབ་གྲྭ་ཆེན་མོའི་སྤྱི་ཚོགས་ཚན་རིག་ཞིབ་འཇུག་ཁང་གི་དབུ་འཛིན་ཆུའུ་རུང་ཅུས། ཐའེ་ཝན་ཕུ་ཡིང་ཚན་རྩལ་སློབ་གྲྭ་ཆེན་མོའི་སློབ་དཔོན་སྐུ་ཞབས་སུའུ་ཅ་ཧུང་།
ཐའེ་ཝན་རྒྱལ་འཛུགས་ཆབ་སྲིད་སློབ་གྲྭ་ཆེན་མོའི་སློབ་དཔོན་དང་སྤྱི་ཚོགས་ཚན་རིག་ཞིབ་འཇུག་ཁང་གི་དབུ་འཛིན་ལི་ཡུ་ཐང་། མང་གཙོ་ཡར་རྒྱས་མནའ་མཐུན་ཚོགས་པའི་དྲུང་ཆེ་དང་གྲོས་ཚོགས་ཀྱི་འཐུས་མི་ཟུར་པ་ཆན་ཏ། ཐའེ་ཝན་དུ་རྟེན་གཞི་བྱས་པའི་རྒྱ་ནག་འགྲོ་བ་མིའི་ཐོབ་ཐང་ལྟ་རྟོག་མནའ་མཐུན་ཚོགས་པའི་ཚོགས་གཙོ་ཡང་ཤན་ཧུང་། ཐའེ་ཝན་མཉམ་འབྲེལ་སློབ་ཆེན་གྱི་དགེ་རྒན་ཆེན་མོ་ཀྲུའུ་ཏེ་རུང་། ཀྲུང་ཧྭ་སློབ་ཆེན་འཛིན་སྐྱོང་དོ་དམ་ཚན་ཁག་གི་དབུ་འཛིན་གཞོན་པ་ཙིང་ཅེན་ཡུན། རྒྱ་ནག་མང་གཙོ་འཐབ་ཕྱོགས་ཚོགས་པའི་གཙོ་འཛིན་ལྕམ་ཧྲེང་ཤོད ཚའེ་དབྱིང་ཝོན་སློབ་གསོ་ཐེབས་རྩ་ཚོགས་པའི་སྤྱི་ཚོགས་འཕེལ་རྒྱས་བསྟི་གནས་ཁང་ གི་གཙོ་འཛིན་ཡང་ཁྲང་ཀྲིང་། ཐེ་ཝན་སློབ་གྲྭ་ཆེན་མོའི་རྒྱལ་ཁབ་འཕེལ་རྒྱས་ཞིབ་འཇུག་ཚན་ཁག་གི་རབ་འབྱམས་པ་ལིའུ་ཝོན་ཞོན་བཅས་ཚོགས་ཞུགས་ཀྱིས་གསུང་བཤད་འདུག
ཚོཊ་ཐོག་ཏུ་བོད་མི་མང་སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་ཀྱིས། དབུས་བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་དང་འབྲེལ། བོད་ནང་ད་ལྟའི་བར་བོད་མི་ ༡༣༠ རང་ལུས་མེར་བསྲེཊ་ཀྱིས་རྒྱ་གཞུང་ལ་ངོ་རྒོལ་གནང་ཡོད་པ་དང་། བོད་མི་ ༡༡༢ འདས་གྲོངས་སུ་ཕྱིན་ཡོད་པའི་བོད་ནང་གི་ཛ་དྲག་གི་གནས་སྟངས་ངོ་སྤྲོད་གནང་ཡོད་པར་མ་ཟད། དེང་སྐབས་རྒྱལ་སྤྱིའི་གནད་དོན་ཏུ་གྱུར་ཟིན་པའི་བོད་ཀྱི་གནད་དོན་འདིར་ཐག་གཅོད་མ་བྱས་བར་ཡོལ་ས་གཏན་ནས་ཡོང་མི་སྲིད་པ་དང་། བོད་ཀྱི་གནད་དོན་ཇི་ཙམ་གྱིས་ནར་འགྱངས་བྱས་པ་ཡིན་ན་དེའི་ཚོད་ཀྱིས་ཕྱོགས་གཉིས་ཀར་འཐུས་ཤོར་དང་གྱོང་གུད་ལས་ཅི་མེད་པ་དང་། རྒྱ་ནག་སྟོབས་ཆེན་ཇི་ཙམ་ཆགས་རུང་བོད་མིའི་རང་དབང་འཐབ་རྩོད་ཀྱི་ལས་འགུལ་དེ་དྲང་བདེན་གྱི་འཐབ་རྩོད་ཅིག་ཡིན་སྟབས། བོད་པ་རང་ངོས་ནས་འཐབ་རྩོད་འདི་རྒྱུན་བསྐྱང་ཐུབ་སྐོར་སོགས་བརྗོད་ཡོད་འདུག
ཐའེ་ཝན་མང་གཙོ་ཡར་རྒྱས་མནའ་མཐུན་ཚོགས་པའི་དྲུང་ཆེ་དང་གྲོས་ཚོགས་ཀྱི་འཐུས་མི་ཟུར་པ་ཆན་ཏ་ལགས་ཀྱིས། རྒྱ་ནག་གཞུང་གིས་ཏཱ་ལའི་བླ་མས་བཏོན་པའི་དབུ་མའི་ལམ་གྱི་སྲིད་བྱུས་འདིར་ད་དུང་ཡང་གོ་སྐབས་དམ་འཛིན་མ་བྱས་པ་ཡིན་ན། ཉིན་ཞིག་ཏཱ་ལའི་བླ་མ་མ་བཞུགས་པ་དང་། བོད་མི་ཚོས་ཡུ་གུར་བ་མཉམ་དུ་དྲག་པོའི་ལམ་དུ་ཞུགས་ནས་རྒྱ་ནག་ལ་ངོ་རྒོལ་བྱས་པ་ཡིན་ན། རྒྱ་ནག་གི་རྙོག་གྲ་ཆུང་ཆུང་ཞིག་རྩ་བ་ནས་མིན་པ་དང་། རྒྱ་ནག་གིས་ཏཱ་ལའི་ཕྱིར་བོད་ནང་ཕེབས་བཅུག་གི་མེད་པ་དེ་ནི་རྒྱ་ནག་དབང་འཛིན་པ་ཚོས་དབང་ཆ་གཅིག་སྡུད་བྱེད་བཞིན་ཡོད་པས་ཡིན་པ་དང་། གུང་ཁྲན་ཏང་གིས་མ་འོངས་ལོ་ལྔའི་ནང་༸གོང་ས་ཏཱ་ལའི་བླ་མ་མཆོག་ཕྱིར་བོད་ནང་ཕེབས་རྒྱུ་དང་། ༢༠༡༧ ལོར་ཧོང་ཀོང་མི་མང་ལ་འོས་འདེམས་ཀྱི་ཐོབ་ཐང་མ་སྤྲད་ཚེ། ཐེའེ་ཝན་མི་དམངས་ཀྱིས་རྒྱ་ནག་ལ་ཡིད་ཆེས་མེད་པའི་ཐོག་རང་བཙན་གཙང་མར་རྩོད་ལེན་བྱེད་ངེས་སྐོར་སོགས་བརྗོད་འདུག་ལ། ད་དུང་ཚོགས་འདུའི་ཐོག་རྒྱ་རིགས་ཚོས་རྒྱ་ནག་གི་ད་ལྟའི་གནས་སྟངས་དང་བོད་མིའི་ཆབ་སྲིད་ཀྱི་གནས་བབ་སོགས་ཀྱི་ཐོག་གཏམ་བཤད་གནང་ཡོད་འདུག
གསར་འགོད་པ། དོན་གོ
