ཐེ་ལན་ཌིའི་ཆེས་མཐོའི་ཁྲིམས་ཁང་གིས་ད་ལྟའི་སྲིད་བློན་ལྕམ་ཡེན་ལོག་གིས་སྲིད་དབང་ལོག་སྤྱོད་བྱས་པའི་ཉེས་མིང་འོག་སྲིད་བློན་ལས་གནས་ནས་དགོངས་པ་ཞུ་དགོས་པའི་བཅད་ཁྲ་བཏང་ཡོད་འདུག
དེ་རིང་ཕྱི་ཚེས་ ༧ ཉིན་ཐེ་ལེན་ཌིའི་ཆེས་མཐོའི་ཁྲིམས་ཁང་གིས་བཅད་ཁྲ་བཏང་སྟེ། སྲིད་བློན་ལྕམ་ཡེན་ལོག་ (Yingluck Shinawatra)གིས་དབང་ཆ་ལོག་པར་སྤྱད་དེ་རང་གི་ནང་མི་དང་སྲིད་དོན་ཚོགས་པའི་ཁེ་ཕན་ཆེད་གཉེན་ཉེ་ཐྰ་ཝེལ་ (Thawil Pliensri)རྒྱལ་ཁབ་བདེ་འཇགས་ལྷན་ཁང་གི་མགོ་གཙོར་བསྐོས་པ་དང་། རྒྱལ་ཁབ་ནང་སྲིད་དོན་དཀའ་རྙོག་ཆེན་པོ་བཟོས་པ་སོགས་ཀྱི་ཉེས་འཛུགས་འོག ཁོང་མོས་སྲིད་བློན་གོ་གནས་ནས་དགོངས་པ་ཞུ་དགོས་པའི་བཀའ་རྒྱ་བཏང་ཡོད་འདུག
སྲིད་བློན་ལྕམ་ཡེན་ལོག་གིས་གསར་འགོད་གསལ་བསྒྲགས་ཤིག་སྤེལ་ཏེ། མི་མང་གིས་ལོ་གཉིས་རིང་ཁོང་མོར་རྒྱབ་སྐྱོར་གནང་བར་ཐུགས་རྗེས་ཞུས་པ་དང་འབྲེལ། “ ཐེངས་འདིར་ཕྱོགས་འགལ་ཚོགས་པའི་སྐྱོན་འཛུགས་ལ་ངོས་ལེན་བྱེད་ཐབས་མེད་པ་དང་རྒྱལ་ཁབ་བདེ་འཇགས་ལྷན་ཁང་གི་མགོ་གཙོ་བསྐོ་བཞག་བྱས་པ་མི་སྒེར་དང་སྲིད་དོན་ཚོགས་པའི་ཁེ་ཕན་ཆེད་མིན་” ཞེས་བརྗོད་ཡོད་འདུག
སྲིད་གཞུང་ལ་ངོ་རྒོལ་བྱེད་མཁན་ཚོས་ཁྲིམས་ཁང་གི་ཐག་གཅོད་དེར་དགའ་བསུ་ཞུས་ཡོད་པ་དང་། ལྕམ་ཡེན་ལོག་ལ་རྒྱབ་སྐྱོར་བྱེད་མཁན་ཚོས་ཁྲིམས་ཁང་གི་ཐག་གཅོད་དེར་སྐྱོན་བརྗོད་བྱས་ཏེ། ཟླ་འདིའི་ཚེས་ ༡༠ ཉིན་གྲོང་ཁྱེར་བྷན་ཁཱོག་ནང་མང་ཚོགས་ཀྱིས་གཞི་རྒྱ་ཆེ་བའི་ངོ་རྒོལ་བྱེད་པའི་གྲ་སྒྲིག་བྱེད་བཞིན་ཡོད་ལ། ད་ལོའི་ཟླ་དྲུག་པའི་ནང་ཐེ་ལན་ཌིའི་ནང་སྲིད་བློན་འོས་བསྡུ་བྱ་འཆར་ཡོད་འདུག
གནད་དོན་འདིའི་ཐད་ཕྱོགས་འགལ་དམངས་གཙོ་ཚོགས་པའི་མགོ་ཁྲིད་གཞོན་པ་སྐུ་ཞབས་ཁད་ཊི་(Kiat Sittheeamamorn)ལགས་ཀྱིས་གསར་འགོད་པར། ཁྲིམས་ཁང་གི་ཐག་གཅོད་དེས་ཐེ་ལན་ཌིའི་ནང་སྲིད་དོན་དཀའ་རྙོག་སེལ་ཐུབ་ཀྱི་མེད་པར་བརྟེན། སྲིད་བློན་འོས་བསྡུ་མ་བྱས་སྔོན་ལ་སྲིད་དོན་ཚོགས་པའི་བར་དཀའ་རྙོག་སེལ་རྒྱུ་གལ་ཆེན་ཡིན་སྐོར་བརྗོད་འདུག
ཁྲིམས་ཁང་གིས་བཅད་ཁྲ་དེ་བསྒྲགས་རྗེས། སྲིད་བློན་གཞོན་པ་སྐུ་ཞབས་ཕོན་ཐེ་ཕུ་ (Phongthep Thepkanjana) ལགས་ཀྱིས། བློན་ཆེན་ལྷན་ཚོགས་དང་མཉམ་དུ་གྲོས་བསྡུར་བྱས་ཏེ། ད་ལྟའི་ཚོང་ལས་བློན་ཆེན་སྐུ་ཞབས་ནེ་ཝ་ཊོམ་རོན་ (Niwattumrong) ལགས་སྲིད་བློན་ལས་ཚབ་ལ་བསྐོ་བཞག་བྱས་ཡོད་འདུག
གནད་དོན་དབྱེ་ཞིབ་པ་ཚོས། ཁྲིམས་ཁང་གི་ཐག་གཅོད་དེ་འབར་བཞིན་པའི་མེ་ཐོག་ལ་ས་སྣུམ་བླུགས་པ་ལྟར། ཐེ་ལན་ཌིའི་ནང་སྲིད་དོན་རྩོད་རྙོག་ཤུགས་ཆེ་རུ་འགྲོ་རྒྱུ་ཡིན་པ་དང་། ཡང་བསྐྱར་སྲིད་བློན་འོས་བསྡུ་བྱས་ན་ད་ལྟའི་གཞུང་འཛིན་སྲིད་དོན་ཚོགས་པར་རྒྱལ་ཁ་འཐོབ་རྒྱུ་ཡིན་པའི་ཚོད་དཔག་བྱེད་ཀྱི་ཡོད་འདུག
སྔར་ལོའི་ཕྱི་ཟླ་ ༡༡ པ་ཡས་མས་ནས་ཐེ་ལེན་ཌིའི་ཕྱོགས་འགལ་ཚོགས་པའི་སྣེ་ཁྲིད་འོག་མི་མང་འབུམ་གཅིག་ལྷག་གིས། གཞུང་འཛིན་ཚོགས་པའི་མི་སྣའི་ཁྲོད་ལྐོག་ཟ་རུལ་སུངས་ཤུགས་ཆེན་ཡོད་པ་དང་། སྲིད་གཞུང་གིས་གྲོང་གསེབ་ཁག་ཏུ་འཚོ་སྣོན་སྤྲོད་སྟངས་འགྲིག་གི་མེད་པ་སོགས་ལ་བརྟེན་ཏེ་སྲིད་བློན་ལྕམ་ཡེན་ལོག་གིས་སྲིད་བློན་ནས་དགོངས་པ་ཞུ་དགོས་པའི་ངོ་རྒོལ་ཤུགས་ཆེན་བྱས་ཡོད་ཅིང་། རྒྱལ་ཁབ་ལྐོག་ཟ་རུལ་སུངས་རྟོག་ཞིབ་ཚོགས་པས་ཞིབ་འཇུག་བྱས་པ་བརྒྱུད་སྲིད་བློན་ཁྲིམས་གཏུགས་བྱས་ཏེ། ཐེངས་འདིར་ཁྲིམས་ཁང་གིས་ཁོང་མོས་སྲིད་དབང་ལོག་སྤྱོད་བྱས་པའི་ཐག་གཅོད་བཅད་ཁྲ་བཏང་བ་ཞིག་ཡིན་འདུག
གསར་འགོད་པ། ལྷ་སྐྱབས་རྒྱལ།
