བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༦ སྟེང་གི་རྩོམ་སྒྲིག་པའི་གཏམ།
ཆད་མཐུད་ལན་དགུ་བྱས་པའི་བོད་རྒྱ་འབྲེལ་མོལ་ལ་གྲག་འགུལ་མེད་པར་ལོ་བཞི་ཕྱིན་སོང་། འབྲེལ་མོལ་ལས་རིམ་མཚམས་ཆད་པའི་འགན་དེ་རྒྱ་གཞུང་གིས་བོད་མགོ་ལ་གཡུགས། བོད་མིའི་སྒྲིག་འཛུགས་ཀྱིས་རྒྱ་མགོ་ལ་གཡོག སྤོ་ལོ་བཞིན་ཕར་གཡུག་ཚུར་གཡུག་གིས་ལོ་བཞི་ཕྱིན་སོང་། ཕྱོགས་གཞན་ནས་ཕན་ཚུན་གཉིས་ཀས་འབྲེལ་མོལ་ལ་འདོད་པ་ཡོད་ལ་གྲ་སྒྲིག་ཀྱང་ཨང་གསར་ཡོད་རབ་བཤད། ཡང་སྙིང་བོད་རྒྱ་འབྲེལ་མོལ་དེ་སུ་ཞིག་གིས་བཀག་པ་རེད་དམ། བོད་གཞིས་བྱེས་རྒྱ་ཆེའི་མི་མང་གིས་པེ་ཅིན་གཞུང་དང་རྡ་སའི་སྒྲིག་འཛུགས་ལ་མིག་ཅེར་ནས་རྣ་བ་གཏད་ཡོད།
བཀའ་ཐམ་སྲིད་ཞི་བདེ་སྐྱིད་མ་སྲིད་སྐྱོང་མཆོག་གི་ལག་ནང་རག་པའི་ཉིན་མོར། ༧གོང་ས་མཆོག་དང་ཁྲིམས་དཔོན་ཆེན་མོ། བོད་རྒྱ་ཆེའི་མི་མང་ཚོགས་བཅས་ཀྱི་མདུན་དུ། རྒྱལ་བ་རིན་པོ་ཆེ་ཕོ་བྲང་པོ་ཏཱ་ལར་གདན་འདྲེན་ཞུ་རྒྱུ་ཁས་ལེན་བྱས་ཡོད། དེའི་རྗེས་གྲོས་ཚོགས་ནང་རྒྱ་ནག་གི་སྲིད་འཛིན་འཕོ་འགྱུར་ལ་སྒུག་ཡོད་སྐོར་དང་། ཞི་ཅིན་ཕིན་གྱི་ཨ་ཕ་བོད་པར་དམིགས་བསལ་འབྲེལ་བ་ཡོད་སྐོར་བཤད། ན་ནིང་སླར་ཡང་རྒྱ་ནག་མི་དམངས་འཐུས་མིའི་ཚོགས་ཆེན་དང་ཀྲུང་ཨུད་ཚང་འཛོམས་གྲོས་ཚོགས་སོགས་ལ་ཉན་རྗེས། ཕྱིའི་རྣམ་པ་ལས་ནང་གི་དོན་སྙིང་གལ་ཆེན་དུ་རྩིས་ནས་ཕྱག་ལས་ཤིག་གནང་འཆར་ཡོད་སྐོར་གསུངས།
སྲིད་སྐྱོང་མཆོག་གི་སྲིད་ལོའི་ཕྱེད་ཀ་རྫོགས་སོང་། བོད་རྒྱ་འབྲེལ་མོལ་ད་དུང་མཐུད་ཐུབ་མེད་ལ་འབྲེལ་མོལ་སྐུ་ཚབ་ཀྱང་དམིགས་འཛུགས་མེད། ཞི་མོལ་ལས་དོན་ཚོགས་ཆུང་ཐེངས་མང་ཚོགས་ཀྱང་། མང་ཚོགས་ལ་འཆར་གཞི་འདི་ཡིན་དང་གྲ་སྒྲིག་འདི་ཡོད་ཀྱི་གནས་ཚུལ་གང་ཡང་གསལ་བཤད་བྱས་མེད། སྲིད་སྐྱོང་མཆོག་གིས་ཅི་ཞིག་ལ་སྒུག་ཡོད་པ་དང་གང་ཞིག་ལ་ཉན་ཡོད་པ་མི་ཤེས་མོད། རྒྱ་ནག་གཞུང་གི་བཤད་སྤྱོད་དང་གྲ་སྒྲིག་བྱེད་ཕྱོགས་ལས། བོད་རྒྱ་འབྲེལ་མོལ་ལ་གཡོལ་ཐབས་དང་། དེ་སྔའི་བཤད་མཚམས་ལས་ཀྱང་ཕྱི་བཤོལ་རྒྱག་གི་ཡོད་པ་ཤེས་དགོས།
ཉེ་ལམ་ངེད་དུས་བབ་གསར་ཁང་གིས་དེ་སྔའི་༧གོང་ས་མཆོག་གི་དམིགས་བསལ་སྐུ་ཚབ་སྐལ་བཟང་རྒྱལ་མཚན་ལགས་སུ་བཅར་འདྲི་ཞུས་པར་ཁོང་གིས། བོད་པའི་སྐུ་ཚབ་ཚོགས་པས་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་འགན་འཛིན་གཞོན་པ་ཀྲུའུ་ཝེ་ཆོན་དང་གྲོས་བསྡུར་ཐེངས་མང་བྱས་པ་རེད། འོན་ཀྱང་ཀྲུའུ་ཝེ་ཆོན་གྱིས་རྩོམ་ཡིག་སྤེལ་ཏེ་གྲངས་ཉུང་མི་རིཊ་ལ་ས་གནས་རང་སྐྱོང་ལྗོངས་ཀྱི་ཐོབ་ཐང་སྤྲད་ཡོད་པ་དེ་ཕྱིར་བསྡུ་བྱས་ཏེ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་སེར་ཐོབ་ཐང་འདྲ་མཉམ་བྱེད་དགོས་ཚུལ་བརྗོད་པ་དེས་ཞི་མོལ་གྱི་ལམ་ཁ་མེད་པ་བཟོས་སོང་ཟེར།
རྒྱ་གཞུང་གིས་འཆར་གཞི་ལྡན་པའི་ཐོག་ནས་བཀའ་ཤག་སྐབས་སྔོན་མའི་བརྒྱུད་ལམ་གཅིག་དང་གྲོས་གཞི་གཅིག་གི་སྣེ་མོ་ཀྲུག་ཝེ་ཆོན་འཐབ་ཕྱོགས་གཅིག་གྱུར་གྱི་བློན་ཆེན་གཞོན་པ་ནས་ཆོས་ལུགས་ལས་དོན་སྡེ་ཚན་འགན་འཛིན་དུ་བསྐོས་སོང་། སྐབས་དེ་ཤེད་ཅིག་ནས་ཀྲུག་ཝེ་ཆོན་གྱི་མགྲིན་པ་བརྒྱུད་ནས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་དང་བོད་རྒྱ་འབྲེལ་གཏུག་གི་ནང་དོན་གནས་ཚད་སོགས་ལ་ངོས་འཛིན་གང་འདྲ་ཡོད་མེད་གསལ་བོ་བཟོ་ཐབས་བྱེད་ཀྱིན་འདུག ད་དུང་སྐུ་ཞབས་ཀྲུག་ཡུ་རོབ་ཁག་ཏུ་སྐོར་མྱུལ་བྱས་ཏེ་བོད་གཙོས་པའི་གྲངས་ཉུང་མི་རིགས་གཞན་དག་གི་གནད་དོན་དང་། ནུབ་ཕྱོགས་པས་བོད་པར་ལྟ་སྟངས་གང་འདྲ་འཛིན་དགོས་མིན་སོགས་བསྐྱར་བཤད་ཡང་བཤད་བྱས། འདི་ཀྲུག་ཝེ་ཆོན་གྱིས་ནུབ་ཕྱོགས་པར་འཇིགས་སྐུལ་བྱས་པ་ཞིག་དང་། སྲིད་སྐྱོང་མཆོག་གི་ནང་གི་དོན་སྙིང་ལ་ལྕག་གི་གཟེ་མ་ར་མགོ་སྐོར་ཐབས་བྱེད་ཀྱིན་ཡོད།
