ཨོ་སི་ཊོ་ལི་ཡ་གཞུང་གིས་རྒྱ་ནག་ལ་བསྟུན་མཁས་མ་བྱེད་རང་བྱེད་ཆཊ་འདུག

ཨོ་སི་ཊོ་ལི་ཡའི་སྐུ་ཚབ་དོན་གཅོད་དྭགས་པོ་བསོད་ནམས་ནོར་བུ་མཆོག་ལ་ཨོ་སི་ཊོ་ལི་ཡའི་ནང་བོད་མིའི་གནས་སྟངས་དང་གཞུང་གི་ངོས་ནས་བོད་དོན་རྒྱབ་སྐྱོར་གནང་ཕྱོཊ་བཅས་ཀྱི་སྐོར་ལ་བཅར་འདྲི་བྱས་ཞུས་ཡོད།

དྲི་བ། ཨོ་སི་ཊོ་ལི་ཡའི་སྐུ་ཚབ་དོན་གཅོད་ཀྱི་ལས་འགན་གཙོ་བོ་གང་ཡིན་དང་ད་བར་ཕྱག་ལས་གཙོ་བོ་གང་དག་བསྒྲུབས་ཡོད་དམ།

ལན། ཨོ་སི་ཊོ་ལི་ཡའི་དོན་གཅོད་ཀྱི་ལས་འགན་གཙོ་ཆེ་ཤོས་དེ་དོན་གཅོད་ཀྱི་ཁྱབ་ཁོངས་ཨོ་སི་ཊི་ལི་ཡ་དང་ནེའུ་ཛེ་ལན་ཌི་གཙོས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་གི་གཞུང་ལ་བོད་དོན་ཞུ་སྐུལ་དང་བོད་ནང་གི་ཛ་དྲག་གནས་སྟངས་སྐོར་སྙན་སེང་ཞུ་རྒྱུ་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་མ་འོངས་བོད་ཀྱི་གནད་དོན་གཉིས་མོས་དབུ་མའི་ལམ་གྱི་ཐོག་ནས་སེལ་བར་རྒྱབ་སྐྱོར་ཡོང་རྒྱུ་དེ་རེད། དེ་བཞིན་གྲོས་ཚོགས་ནང་བོད་དོན་སྐོར་ལ་གླེང་སློང་དང་གྲོས་བསྡུར། གྲོས་ཆོད་འཇོག་པའི་ཐབས་ཤེས་གཏོང་དགོས་པ་ཆགས་བསྡད་ཡོད། ཨོ་སི་ཊོ་ལི་ཡ་དང་ནེའུ་ཛི་ལན་ཌི་གཉིས་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་རེ་ཡོད། ན་ནིང་ཟླ་ ༩ པའི་ནང་ཨོ་སི་ཊོ་ལི་ཡའི་གྲོས་ཚོགས་གོང་འོག་གི་འོས་བསྡུ་བྱས་ཚར་རྗེས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་ཚོས་གྲོས་ཚོགས་ནང་བོད་དོན་ཐོག་གྲོས་ཆོད་འཇོག་པར་ཐབས་ཤེས་གནང་བར་རྒྱ་ནག་གཞུང་གིས་གནོན་ཤུགས་སྤྲད་ནས་འཇོག་ཐུབ་མེད་ཀྱང་། བོད་ནང་གི་བོད་མིའི་རང་ལུས་མེར་བསྲེགས་དང་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་གླེང་སློང་ཡག་པོ་གནང་སོང་། གཞན། རྒྱ་གར་ནས་བོད་པ་ཚོ་ཨོ་སི་ཊོ་ལི་ཡའི་ནང་གཞིས་ཆགས་ཡོང་མཁན་ཚོར་སྣེ་ལེན་སོགས་ཞུ་བའི་འགན་དེ་ང་ཚོས་ལེན་དགོས་ཀྱི་ཡོད་སྟབས། ཁོང་ཚོ་ཚུར་བསླེབས་རྗེས་ང་ཚོས་ས་ཁུལ་ཆ་བགོས་བྱེད་ཀྱི་ཡོད། ཁ་ཤས་སོ་སོའི་དགའ་ཉེ་སྤུན་མཆེད་དེ་འདྲས་ཁོང་ཚོ་སྡོད་གནས་ས་ཁུལ་དེར་འཁྲིད་འགྲོ་ཡི་ཡོད། དེ་མིན་པ་རྣམས་ང་ཚོས་ས་ཁུལ་སོ་སོའི་བོད་རིགས་ཚོགས་པར་འབྲེལ་བ་བྱས་ཏེ་ཁོང་ཚོར་སྣེ་ལེན་ཞུས་པ་དང་ཁང་པ་གོ་སྒྲིག བྱིས་པ་སློབ་གྲྭར་གཏོང་བ་སོགས་ཀྱི་སྐད་བསྒྱུར་རོགས་རམ་ཞུས་དང་ཞུ་བཞིན་ཡོད། སྔོན་མ་བོད་རིགས་ཚོགས་པ་ཚང་མ་ཁ་འཐོར་ཡོད་པ་དང་། བོད་རིགས་སྤྱི་མཐུན་ཚོགས་པ་འཛུགས་ཐུབ་ཡོད་པ་མ་རེད། དེ་ནས་ཨོ་སི་ཊོ་ལི་ཡའི་སྐུ་ཚབ་དོན་གཅོད་གྱི་གོ་སྒྲིག་འོག་ཨོ་སི་ཊོ་ལི་ཡའི་ནང་ཡོད་པའི་བོད་རིགས་ཚོགས་པ་ཚང་མའི་ཚོགས་གཙོ་དང་དྲུང་ཆེ་ཚང་མ་འཛོམས་པའི་ཚོགས་འདུ་ཐེངས་གཉིས་ཚོགས་པའི་གྲུབ་འབྲས་ལ་བརྟེན་ནས་ཨོ་སི་ཊོ་ལི་ཡ་རྒྱལ་ཡོངས་བོད་རིགས་སྤྱི་མཐུན་ཚོགས་པ་བཙུཊ་ཐུབ་ཡོད། དེས་བོད་རིགས་ཚོགས་པ་རྣམས་ཆིག་སྒྲིལ་དང་ནུས་སྟོབས་སྲ་བརྟན་ཡོང་བར་ཕན་ཐོགས་བྱུང་བ་རེད་བསམ་གྱི་འདུག

དྲི་བ། ཨོ་སི་ཊོ་ལི་ཡའི་ནང་བོད་རིགས་ག་ཚོད་ཅིག་ཡོད་པ་དང་ཨོ་སི་ཊོ་ལི་ཡ་གཞུང་གིས་བོད་ཀྱི་ཆོས་དང་རིག་གཞུང་སྲུང་སྐྱོབ་ཆེད་གནས་སྤོར་བྱེད་མཁན་བོད་རིགས་ཚོར་ས་ཁུལ་གཅིག་མ་སྤྲད་པའི་རྒྱུ་མཚན་གང་ཡིན་ནམ།

ལན། སྤྱིར་འཛམ་གླིང་རྒྱལ་ཁབ་ ༤༠ ལྷག་ནང་ང་ཚོ་བོད་རིགས་གནས་སྡོད་བྱེད་ཀྱི་ཡོད་ཀྱང་། ཨོ་སི་ཊོ་ལི་ཡའི་ནང་བོད་རིགས་ ༡༠༠༠ ཙམ་ལས་མེད་པ་དང་ཨོ་སི་ཊོ་ལི་ཡ་ལུང་པ་འདི་མངའ་སྡེ་དྲུག་དང་ས་ཁུལ་གཉིས་ལ་བགོས་ཡོད། གྲོང་ཁྱེར་སེ་ཌེ་ནེ་ (Sydney) ནང་བོད་མི་ ༥༠༠ ལྷག་དང་། གྲོང་ཁྱེར་མེལ་བྷོན་ (Melbourne) ནང་བོད་མི་ ༣༠༠ ལྷག་ཡོད། ཁཱན་བྷེ་རྭ་ (Canberra) ནང་བོད་མི་ ༧༠ ཙམ་ཡོད། དེ་བཞིན་ཨོ་སི་ཊོ་ལི་ཡའི་ནེ་ཨོ་ཀ་སི་ཊིལ་ (Newcastle) སྦིར་ཐི་ (Perth) སོགས་ནང་བོད་མི་གནས་སྡོད་བྱེད་ཀྱི་ཡོད། ཡང་གྲོང་ཁྱེར་ཁ་ཤས་ནང་མི་བཅུ་གྲངས་ལས་མེད་ཀྱང་ཁོང་ཚོས་ས་ཁུལ་དེར་བོད་རིགས་ཚོགས་པ་བཙུགས་ནས་བོད་དོན་དང་བོད་ནང་གི་གནས་སྟངས་སོགས་ཁྱབ་བསྒྲགས་དང་། ངོ་རྒོལ་ཁྲོམ་སྐོར། བོད་ཀྱི་ཆོས་དང་རིག་གཞུང་སྲུང་སྐྱོབ་ཆེད་བྱིས་པ་ཚོར་བོད་ཡིག་དང་གཞས་སྣ་རོལ་ཆ་སློབ་ཁྲིད་སོགས་ཀྱི་ལས་འགུལ་སྤེལ་གྱི་ཡོད། ཨོ་སི་ཊོ་ལི་ཡའི་ནང་ཆབ་སྲིད་བཙོན་པ་དང་འབྲེལ་བའི་བོད་མི་མ་བསླེབས་པའི་སྔོན་ལ་བོད་པ་ཉུང་ཤས་ཡོད། ཁོང་ཚོ་མང་ཆེ་བའི་སྡོད་གནས་སེ་ཌེ་ནེ་ཁུལ་རེད། དེ་འདྲ་ཡིན་དུས་བོད་རིགས་གནས་སྤོར་བྱེད་མཁན་ཚོ་དང་པོ་ཕར་སླེབ་དུས་ཁོང་ཚོས་སྣེ་ལེན་ཞུས་ཡོད། སྔོན་མ་བོད་པ་ཚོ་རྒྱ་གར་ནས་ཚུར་གཞིས་ཆགས་ལ་བསླེབས་དུས་སེ་ཌེ་ནེ་ཁུལ་གྱི་བོད་མི་ཚོས་སྣེ་ལེན་དང་སྐད་བསྒྱུར་རོགས་རམ་བྱས་པར་བརྟེན་ཏེ། སེ་ཌེ་ནེ་ཁུལ་དུ་བོད་པ་མང་པོ་ཆགས་སྟབས། བོད་པ་མང་ཆེ་བས་ཀྱང་སེ་ཌེ་ནེར་འགྲོ་རྒྱུ་ཡིན་ལབ་ཀྱི་ཡོད། བོད་པ་ཚོ་ས་ཁུལ་གཅིག་ལ་གཞིས་མ་བཞག་པ་ཨོ་སི་ཊོ་ལི་ཡའི་སྲིད་བྱུས་ཤིག་མ་རེད། གཙོ་བོ་སོ་སོའི་འདོད་མོས་དང་བོད་པ་ཚོས་སྣེ་ལེན་གང་དུ་མང་བ་ཞུས་པ་དང་། བོད་རིགས་ཚོགས་པ་ཚོས་གང་དུ་རོགས་རམ་བྱེད་ཐུབ་མིན་ལ་རག་ལས་ཡོད་པ་རེད་བསམ་གྱི་འདུག

དྲི་བ། ཨོ་སི་ཊོ་ལི་ཡར་བོད་པའི་ཆོས་ཚོགས་ག་ཚོད་ཅིག་ཡོད་པ་དང་། དེ་དག་གིས་བོད་དོན་ལ་རོགས་སྐྱོར་འདྲ་གནང་གི་ཡོད་དམ།

ལན། ཨོ་སི་ཊོ་ལི་ཡའི་ནང་བོད་བརྒྱུད་ནང་བསྟན་གྱི་ཆོས་བརྒྱུད་གྲུབ་མཐའ་ཚང་མ་ཡོད་པ་རེད། ཆོས་ཚོགས་དེ་ཚོས་ངོས་ནས་བོད་དོན་ངོ་སྤྲོད་བྱེད་པ་དང་བོད་ཀྱི་ཆོས་དང་རིག་གཞུང་ཁྱབ་སྤེལ་བྱེད་པར་ཕན་ཐོགས་བྱུང་ཡོད། བོད་བརྒྱུད་ནང་བསྟན་ཚང་མ་ཨོ་སི་ཊོ་ལི་ཡའི་ལུང་པ་ཆ་ཚང་ལ་ཁྱབ་ཡོད་སྟབས། ཚང་མས་བོད་ཀྱི་ཆོས་དང་རིག་གཞུང་ལ་དགའ་བོ་བྱེད་ཀྱི་ཡོད། སྤྱིར་བོད་ཀྱི་ཆབ་སྲིད་ཐོག་ལ་རྒྱབ་སྐྱོར་བྱེད་མཁན་མང་པོ་ཡོད་པ་རེད། ཁ་ཤས་ཀྱིས་ཆབ་སྲིད་ཐོག་ལ་ཐེ་གཏོགས་མ་བྱས་ཀྱང་བོད་ཀྱི་ཆོས་དང་རིག་གཞུང་ལ་དོ་སྣང་ཆེན་པོས་རྒྱབ་སྐྱོར་བྱེད་ཀྱི་ཡོད།

དྲི་བ། ཨོ་སི་ཊོ་ལི་ཡའི་ནང་ནུབ་ཕྱོགས་ཤུགས་ལྡན་ཚོགས་པ་དེ་འདྲ་ཡོད་དམ།

ལན། ཨོ་སི་ཊོ་ལི་ཡ་དང་ནེའུ་ཛི་ལན་ཌི་གཉིས་ནང་དོལ་རྒྱལ་སྟེན་མཁན་དང་ཚོགས་པ་ཡོད། དེ་ཚོར་ཆོས་ཚོགས་ཟེར་བའི་ཤུགས་ཆེན་པོ་གང་ཡང་མེད་པར་སོ་སོས་ཁང་པ་ཆུང་ཆུང་དང་དཔེ་མཛོད་འདྲ་བོ་ནང་དུ་ཆོས་དང་ཞལ་འདོན་སོགས་སྐྱོར་བསྡད་ཡོད། ཨོ་སི་ཊོ་ལི་ཡའི་ནང་བོད་རིགས་དོལ་རྒྱལ་སྟེན་མཁན་གཅིག་ཀྱང་མེད་ལ་དོལ་རྒྱལ་སྟེན་མཁན་མང་ཆེ་བ་ཕྱི་རྒྱལ་མི་རིགས་རྐྱང་ཆགས་བསྡད་ཡོད། ལྷག་པར་དུ་ ༢༠༡༣ ལོའི་ཟླ་ ༦ པའི་ནང་༧གོང་ས་མཆོག་ཨོ་སི་ཊོ་ལི་ཡའི་ནང་ཆིབས་བསྒྱུར་གནང་སྐབས་སེ་ཌེ་ནེའི་ནང་དོལ་རྒྱལ་སྟེན་མཁན་བོད་པ་ཁ་ཤས་ཀྱིས་ངོ་རྒོལ་བྱས་ཡོད། ཁོ་ཚོ་ཚང་མ་ནེའུ་ཡོག་ནས་ཚུར་བསླེབས་པ་རེད། ཨོ་སི་ཊོ་ལི་ཡའི་ནང་ཡོད་པའི་བོད་རིགས་ཚོའི་ཁྲོད་དོལ་རྒྱལ་སྟེན་མཁན་མེད་དུས་ཁོ་ཚོ་ཕར་ནས་ཚུར་བསླེབས་དགོས་ཆགས་པ་རེད།

དྲི་བ། ཨོ་སི་ཊོ་ལི་ཡའི་སྐུ་ཚབ་དོན་གཅོད་ཀྱིས་ཕྱག་ལས་གནང་སྐབས་དཀའ་ངལ་གཙོ་བོ་གང་དག་འཕྲད་སོང་།

ལན། དཀའ་ངལ་གཙོ་བོ་ལས་བྱེད་མ་འདང་བའི་དཀའ་ངལ་རེད། ང་ཚོ་ལས་བྱེད་མང་པོ་ཡོད་ན་ལས་ཀ་མང་པོ་བྱེད་ཐུབ་ལ་མི་མེད་ན་ལས་ཀ་དེ་ཙམ་བྱེད་ཐུབ་ཀྱི་མེད། གཞན། ཨོ་སི་ཊོ་ལི་ཡ་གཞུང་གིས་ཆབ་སྲིད་ཀྱི་ཐོག་ནས་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་ཤིག་ལ་ངོས་འཛིན་བྱེད་ཀྱི་ཡོད་ཀྱང་། ཨོ་སི་ཊོ་ལི་ཡ་གཞུང་གིས་བོད་ནང་དཀའ་སྡུག་མྱོང་བཞིན་པའི་བོད་མི་ཚོའི་འགྲོ་བ་མིའི་ཐོབ་ཐང་ལ་བློ་འཚབ་ཡོད་པ་རྒྱ་ནག་གིས་ངེས་པར་སེལ་དགོས་པའི་ནན་སྐུལ་བྱེད་ཀྱི་ཡོད། རྒྱལ་ཁབ་གཉིས་བར་ཚོང་འབྲེལ་ཤུགས་ཆེན་བྱེད་ཀྱི་ཡོད་སྟབས། རྒྱ་ནག་གིས་གནོན་ཤུགས་ལ་བརྟེན་ནས་ཨོ་སི་ཊོ་ལི་ཡ་གཞུང་གི་ངོས་ནས་བོད་དོན་ལ་མངོན་གསལ་དོད་པོས་རྒྱབ་སྐྱོར་བྱེད་པར་དཀའ་ལས་ཁག་པོ་ཆགས་བསྡད་ཡོད་པ་ང་ཚོའི་དཀའ་ངལ་ཞིག་རེད། དཔེར་ན། ཨོ་སི་ཊོ་ལི་ཡའི་མཐོ་རིམ་གཙུག་ལག་སློབ་གཉེར་ཁང་ཁག་ནང་རྒྱལ་སྤྱིའི་སློབ་ཕྲུག་མང་ཤོས་རྒྱ་རིགས་སློབ་མ་ཆགས་པ་དང་། ཨོ་སི་ཊོ་ལི་ཡའི་ནང་ལོ་གཅིག་རིང་རྒྱ་རིགས་ཡུལ་སྐོར་སྤྲོ་འཆམ་པ་འབུམ་ ༣ ནས་ ༥ བར་ཡོང་གི་ཡོད་སྟབས་དཔལ་འབྱོར་གྱི་གནས་ཚུལ་ཞིག་ཀྱང་ཆགས་ཡོད། ཨོ་སི་ཊོ་ལི་ཡ་གཞུང་གིས་རྒྱ་ནག་མཉམ་དུ་བསྟུན་མཁས་མ་བྱེད་རང་བྱེད་ཆགས་བསྡད་ཡོད། དེར་བརྟེན། ཨོ་སི་ཊོ་ལི་ཡ་གཞུང་གིས་ཨ་རི་ནང་བཞིན་མངོན་གསལ་དོད་པོས་བོད་དོན་ལ་རྒྱབ་སྐྱོར་བྱེད་རྒྱུ་དཀའ་ལས་ཁག་པོ་རེད་བསམ་གྱི་འདུག

དྲི་བ། བོད་མིའི་སྒྲིག་འཛུཊ་ཀྱིས་འདི་ལོ་ཨོ་སི་ཊོ་ལི་ཡའི་ནང་གསར་བཙུགས་བྱས་པའི་བོད་རིགས་སྤུན་ཟླའི་མཐུན་འབྲེལ་ལྷན་ཚོཊ་ཟེར་བར་ངོས་ལེན་མེད་ཟེར་བའི་རྒྱུ་མཚན་གང་ཡིན་ནམ།

ལན། འཛམ་གླིང་དང་སྤྱི་ཚོགས་གང་ཡིན་ནང་རྙོག་དྲ་བཟོ་མཁན་ཡོད་ཡོད་པ་རེད། ལྷག་པར་དུ་བོད་པའི་སྤྱི་ཚོགས་དང་མཐུན་སྒྲིལ་གཏོར་བཤིག་གཏོང་བར་རྒྱ་གཞུང་གིས་ཕྱོགས་གང་སར་ལས་འགུལ་སྤེལ་དང་སྤེལ་བཞིན་ཡོད། དེ་ཡིན་པའི་ཆ་ནས་ང་ཚོ་ཨོ་སི་ཊོ་ལི་ཡའི་ནང་སྡོད་མཁན་མི་ཁ་ཤས་ལ་རྒྱ་གཞུང་གིས་བརྒྱུད་སྐུལ་དང་བེད་སྤྱོད་བཏང་ནས་ན་ནིང་ཕྱི་ཟླ་ ༡༡ པའི་ནང་ཕྱི་སྡོད་བོད་རིགས་སྤུན་ཟླའི་མཐུན་ཚོགས་པ་ཟེར་བ་ཞིག་བཙུགས་པ་རེད། ཚོགས་པ་དེའི་རྒྱུན་ལས་དང་ཚོགས་མིའི་ནང་བོད་པ་ཉུང་ཉུང་ལས་ཡོད་པ་མ་རེད། དེ་ཚོས་ཨོ་སི་ཊོ་ལི་ཡའི་ནང་སྡོད་མཁན་བོད་རིགས་ཚང་མས་ཚབ་བྱས་ཏེ་བོད་རིགས་ཀྱི་བདེ་སྡུག་ལྟ་རྟོག་དང་ལྷག་པར་དུ་རྒྱ་ནག་གིས་བོད་ནང་ཡར་རྒྱས་ བཏང་བར་རྒྱབ་སྐྱོར་དང་བསྔགས་བརྗོད་བྱེད་ཀྱི་ཡོད་པ་དང་། རང་བཙན་ལ་ངོ་རྒོལ་བྱེད་ཀྱི་ཡོད་མདོག་མདོག་ལབ་ཀྱི་ཡོད། ཚོགས་པ་དེའི་རྒྱབ་ལྗོངས་ལ་བལྟས་པ་ཡིན་ན། ཚོགས་པ་དེར་རྒྱབ་སྐྱོར་བྱེད་མཁན་ཕྱི་སྡོད་རྒྱ་མིའི་ཚོགས་པ་མང་པོ་ཡོད་པ་རེད། ཚོགས་པའི་ཚོགས་གཙོ་དང་དྲུང་ཆེ་སོགས་བོད་པ་ཡིན་ཡང་ཚོགས་པའི་སྲིད་འཛིན་ཚོགས་གཙོ་ (Honorary President) ཡི་ནང་རྒྱ་རིགས་ཚོགས་པའི་ཚོགས་གཙོ་དེ་འདྲ་ཡོད་པ་རེད། ཚོགས་པ་དེ་ཚོ་རྒྱ་གཞུང་ལ་ཐད་ཀར་འབྲེལ་བ་ཡོད་པའི་ཚོགས་པ་དང་མི་སྣ་ཆགས་ཡོད། ལྷག་པར་དུ་ ༢༠༠༩ དང་ ༢༠༡༣ ལོར་༧གོང་ས་མཆོག་ཨོ་སི་ཊོ་ལི་ཡའི་ནང་ཆིབས་བསྒྱུར་གནང་སྐབས་ངོ་རྒོལ་བྱེད་མཁན་གྱི་མི་སྣ་དེ་ཚོ་ཆགས་ཡོད། བོད་མིའི་སྒྲིག་འཛུགས་ཀྱི་ངོས་ནས་ཨོ་སི་ཊོ་ལི་ཡའི་རང་དབང་རྒྱལ་ཁབ་ནང་ཚོགས་པ་སུས་བཙུགས་ན་འགྲིག་གི་རེད། ཡིན་ནའང་། ༧གོང་ས་མཆོག་ལ་ངོ་རྒོལ་བྱེད་མཁན་དང་ཚོགས་པ་ཚོ་མཉམ་དུ་ལག་སྦྲེལ་བྱས་ཏེ་བོད་མི་མང་གི་ཚབ་བྱེད་པ་དང་ལས་འགུལ་སྤེལ་ཟེར་བ་ང་ཚོས་ངོས་ལེན་མེད་པ་གསལ་བོ་རེད། ད་ལོའི་ཟླ་ ༢ པའི་ནང་ཕྱི་དྲིལ་བཀའ་བློན་མཆོག་ཨོ་སི་ཊོ་ལི་ཡའི་ནང་ཕེབས་ནས་བོད་མིའི་སྒྲིག་འཛུགས་ཀྱི་ངོས་ནས་ཨོ་སི་ཊོ་ལི་ཡའི་ཕྱི་སྡོད་བོད་རིགས་སྤུན་ཟླ་མཐུན་ཚོགས་ཟེར་བར་ངོས་ལེན་རྩ་བ་ཉིད་ནས་མེད་གསུངས་པ་རེད། ཉེ་ཆར་ཨོ་སི་ཊོ་ལི་ཡའི་རྒྱལ་ཡོངས་བོད་རིགས་ཚོགས་པའི་ཚོགས་ཆེན་ཐེངས་ ༦ སྐབས་ཚོགས་པ་དེར་ངོས་ལེན་མེད་པའི་གྲོས་ཆོད་ཅིག་བཞག་པའི་ཐོག་ནས་ཀྱང་གསལ་བོར་བཤད་ཡོད།

དྲི་བ། མ་འོངས་པར་བོད་མིའི་སྒྲིག་འཛུཊ་དང་བོད་མི་ཚོའི་ངོས་ནས་བོད་དོན་རྒྱབ་སྐྱོར་འཚོལ་ཐབས་དང་ཕན་ཚུན་འབྲེལ་ལམ་གོང་མཐོར་གཏོང་ཐབས་ལ་ཕྱག་ལས་ག་རེ་གནང་དགོས་ཀྱི་འདུག་གམ།

ལན། རྨང་གཞི་ཡོད་ཡོད་པ་རེད། གྲོས་ཚོགས་ནང་གྲོས་ཚོགས་བོད་དོན་རྒྱབ་སྐྱོར་ཚོགས་པ་ཡོད་པ་དང་དེ་མིན་བོད་དོན་རྒྱབ་སྐྱོར་ཚོགས་པ། བོད་རིགས་ཚོགས་པ་ཡོད་པ་འདི་ཚོ་ཚགས་ཚུད་བཟོ་རྒྱུ་དང་མེད་པ་ནས་ཡོད་པ་བཟོ་དགོས་པ་དང་ཡོད་པ་ཚགས་ཚུད་གཏོང་དགོས། དེ་བཞིན་ང་ཚོ་བོད་པ་མང་པོ་ཕར་འགྲོ་བཞིན་ཡོད་སྟབས་ཁོང་ཚོར་རོགས་རམ་དང་ཕར་ཕྱོགས་ནས་བོད་ཡིག་དང་གཞས་ཞབས་བྲོ། རོལ་ཆ་སློབ་པ་སོགས་ཡོད་པ་ཚགས་ཚུད་བཏང་ནས་ནུས་པ་ཆེ་རུ་གཏོང་དགོས། ཨོ་སི་ཊོ་ལི་ཡའི་ནང་ཨ་རི་དང་ཁེ་ཎ་ཌ་བཞིན་བོད་མིའི་གྲངས་འབོར་ཉུང་ཉུང་ཡིན་སྟབས། ཕར་ནས་ཤེས་ཡོན་ཅན་གྱི་གཞོན་སྐྱེས་མང་ཙམ་འཚར་ལོངས་བྱུང་བ་ཡིན་ན་རང་བཞིན་གྱི་ཡར་རྒྱས་འགྲོ་དགོས་པ་དང་ད་ལྟ་གང་ཡོད་པ་ཚགས་ཚུད་བཟོ་དགོས་རྒྱུ་གལ་ཆེན་རེད་བསམ་གྱི་འདུག

གསར་འགོད་པ། ལྷ་སྐྱབས་རྒྱལ།