རྒྱ་གཞུང་གིས་ཆབ་མདོ་ཀརྨ་དགོན་པའི་མཁན་པོ་བློ་གྲོས་རབ་གསལ་ལཊ་ཡང་བསྐྱར་འཛིན་བཟུང་གིས་ད་ཆར་གར་ཡོད་མ་ཤེས་པར་ལྷག་འདུག
ཟླ་འདིའི་ཚེས་ ༥ ཉིན་རྒྱ་ནག་གཞུང་གིས་ཕྱི་ལོ་ ༢༠༡༡ ལོར་ཆབ་སྲིད་ཀྱི་ནག་ཉེས་འོག་འཛིན་བཟུང་གིས་ལོ་ ༢ དང་ཟླ་ ༦ རིང་བཙོན་འཇུག་བྱས་པའི་ཆབ་མདོ་ཀརྨ་དགོན་པའི་མཁན་པོ་བློ་གྲོས་རབ་གསལ་ལགས། བཙོན་འཇུག་དུས་ཡུན་རྫོགས་ཏེ་ཀློད་གྲོལ་བཏང་ཡོད་ཀྱང་། ཕྱི་ཚེས་ ༦ ཉིན་གནས་ཚུལ་ཅི་ཡིན་གསལ་བཤད་མེད་པར་ཡང་བསྐྱར་འཛིན་བཟུང་བྱས་ཏེ་ད་ཆར་གར་ཡོད་མ་ཤེས་པར་ལྷག་ཡོད་འདུག
འདི་ཐད་འབྲེལ་ཡོད་མི་སྣས་གསར་ལམ་དུ་གནས་ཚུལ་བརྗོད་གསལ་ལྟར་ན། ཟླ་འདིའི་ཚེས་ ༥ ཉིན་རྒྱ་གཞུང་གིས་མཁན་པོ་བློ་གྲོས་རབ་གསལ་ལགས་ཉིང་ཁྲི་ས་ཁུལ་སྤོ་མེས་རྫོང་སྤྲ་རྨོག་བཙོན་ཁང་ནས་ཀློད་གྲོལ་བཏང་ཡོད་པ་དང་། སྐབས་དེར་རྒྱ་ནག་གི་འབྲེལ་ཡོད་ཚན་པས་མཁན་པོ་ཁོང་ཀརྨ་དགོན་པར་འགྲོ་མི་ཆོག་ཚུལ་དང་། ཆོས་ཕྱོཊ་ཀྱི་དཔེ་ཁྲིད་སོགས་བྱེད་མི་ཆོག་པའི་བཀའ་རྒྱ་བཏང་ཡོད་འདུག ཕྱི་ཚེས་ ༦ ཉིན་ཁོང་ཆབ་མདོ་རྫོང་ཐོག་ཏུ་གློ་བུར་འཛིན་བཟུང་གིས་གར་ཡོད་ཅི་བྱུང་གི་གནས་ཚུལ་ཅི་ཡང་མ་ཤེས་པར་ལྷག་ཡོད་འདུག
གནས་ཚུལ་གཞན་ཞིག་ལ། ཉེ་བའི་ཟླ་ཤས་རིང་ནས་བཟུང་རྒྱ་ནང་གཞུང་གི་མགོ་ཁྲིད་ཚོ་ཡུལ་ཤུལ་སྐྱེ་རྒུ་མདོར་ཡོང་སྟེ། ཁྲི་འདུ་རྫོང་གསེར་ཁང་དགོན་པ་གཙོས་པའི་དགོན་སྡེ་ཁག་ལ། འདི་ལོའི་ཕྱི་ཟླ་ ༦ ཚེས་ ༧ ཉིན་བར་དགོན་པ་ཁག་གི་ལས་བྱེད་དང་དོ་དམ་མི་སྣ་བརྗེ་བོ་རྒྱག་དགོས་པ་མ་ཟད། དགོན་པ་རང་གི་བསྐོ་བཞག་བྱེད་པ་པ་མ་ཡིན་པར་རྒྱ་ནག་གཞུང་ཕྱོཊ་ནས་མངགས་གཏོང་བྱས་པའི་མི་སྣས་དགོན་པར་དོ་དམ་བྱེད་དགོས་སྐོར་བརྗོད་ཡོད་འདུག གནས་ཚུལ་དེའི་ཐད་ས་གནས་ཀྱི་དགོན་སྡེ་ཁག་གི་གྲྭ་བཙུན་དང་མི་མང་གིས་མ་འོངས་པར་དགོན་སྡེ་ཁག་གི་ཆོས་ཕྱོགས་ཀྱི་བྱེད་སྒོ་སྤེལ་བར་འགོག་རྐྱེན་འཕྲད་སྲིད་པའི་སེམས་ཁྲལ་བྱེད་ཀྱི་ཡོད་འདུག
གསར་འགོད་པ། དོན་གོ
