གྷོ་པ་པུར་སློབ་གྲྭའི་མ་བྱན་གྱིས་བཙན་གཡེམ།

བཙན་གཆེམ་བྱུང་བ་ཙམ་ལ་ཧང་མི་སངས་ཀྱང་། བུ་མོ་ལོ་ཆུང་ལོ་བརྒྱད་དང་། བུ་མོ་ལོ་གཞོན་ལོ་བཅུ་གསུམ་ཟེར་དུས། བཙན་གཡེམ་པ་བོད་རིགས་འདིའི་རིགས་སྨྱོན་པའི་སྨན་ཁང་ནང་ལ་བཅུག་ནས་བཞག་དགོས་པ་རྐྱང་རྐྱང་རེད་སྙམ་མོ།། །།

ད་རེས་བྱེད་སྟངས་དེ་འགྲིག་འདུག ཁྲིམས་འགལ་གྱི་ལས་དོན་རྣམས་ཁྲིམས་ཐོག་ནས་ཐག་བཅད་ན་ཡག་པོ་ཡོད་རེད། ནམ་རྒྱུན་གྱི་ལས་སྟངས་ཏེ་༼དོན་ལ་ཕ་འགེབ་ཚུར་འགེབ་དང་། ཁ་ལ་ནང་མོལ་ཞི་འགྲིག༽་ཟེར་ནས། སྙིང་རྗེ་སྐྱེས་དང་ཁལ། གུ་ཡངས་ཡིན་དང་ཁལ། ལྟ་བུའི་རུལ་སུངས་རྫོབ་ལས་དེ་རིགས་ལ་དངོས་གནས་སྐྱུག་བྲོ་བ་རང་རེད།

གང་ལྟར། མདའ་འབེན་ལ་ཕོག་ན་གཅིག རྡུལ་གནམ་ལ་འཕྱུར་ན་གཉིས། གཏམ་འདི་བཤད་འདོད་བྱུང་། མ་གཞི་སློབ་གྲྭ་སྟེ་ལུས་སེམས་ནར་མ་སོན་པའི་མི་རིགས་ཀྱི་སོན་རྩ་རྣམས་ཀྱི་ལུས་སེམས་བདེ་ཐང་ངང་འཚར་ལོངས་དང་གསོ་སྐྱོང་བྱེད་ས་ཡིན་ལ། ཡང་གཅིག་བཤད་ན། མི་སྡེ་སྤྱི་ཚོགས་གང་དེའི་ཀུན་སྤྱོད་དང་རིག་གནས་ཀྱི་རྨང་འདང་ས་ཡིན་པས། སློབ་གྲྭ་ནི་མི་སྡེ་སྤྱི་ཚོགས་གཞན་གང་ལས་ཀྱང་ཆེས་རྩ་ཆེན་པོ་དང་ཆེས་བླ་ན་མེད་པ་དེའོ། དེ་བས་ན། སློབ་གྲྭའི་ནང་གི་དགེ་ལས་བ་རྣམས་ནི་ས་ཆའི་ཚོད་ཀྱི་རི་དྭགས་ཀྱི་དཔེ་ལྟར། གང་ལ་གང་འཚམ་གྱིས་ཤེས་སྤྱོད་གཉིས་ཀྱི་ཐད་ནས་ཡག་གྲས་མིན་རུང་འབྲིང་གྲས་ཤིག་ལེགས་འདེམས་གོ་སྒྲིག་དགོས་པ་ནི་སྨྲ་མི་དགོས་པ་ཞིག་རེད།

ཡིན་ནའང་། ཉེ་བའི་ལོ་འགས་ནང་། བཙན་བྱོལ་སློབ་གྲྭའི་ཁག་ནང་གི་རུལ་སུངས་དང་གཡེམ་སྤྱོད་རིགས་གོ་ཐོས་ཇེ་མང་རེད། ངན་སྤྱོད་འདི་རིགས་སྐབས་འཕྲལ་གྱི་ལོ་འདི་དག་རིང་ཆུ་ལོག་ལྟར་གློ་བུར་བརྡོལ་བ་ཡིན་མ་རེད་དེ། ག་ལེར་རུད་གསོབ་ཏུ་གྱུར་ཏེ་ཕྱི་ཐུམ་ནང་ཐུམ་ཚང་མ་བརྡོལ་ནས་ལག་པ་འཆིང་སྲོལ་མེད་པར་འགྱུར་བཞིན་པའི་གནས་སྟངས་ཤིག་གསལ་འདོན་བྱེད་ཀྱིན་ཡོད་པ་རེད། གནས་སྟངས་འདི་ལས་ང་ཚོས་སློབ་གྲྭར་མཐོང་ག་ཚོད་སྤྲོད་ཀྱི་ཡོད་མེད། ང་ཚོས་ཤེས་ཡོན་ལ་རྩིས་ཐང་ཅི་ཙམ་སྤྲོད་ཀྱིན་ཡོད་མེད་དམར་རྗེན་ལ་ཕུད་ཡོད་པ་རེད། དེ་བཞིན། སློབ་གྲྭའི་ལས་སྒོ་ཁག་ཏུ་ངོ་ཡོད་མིང་ཡོད་ཚོས་རྔ་ཚིགས་སྒྲིག་སྟེ་རང་ཕྱོགས་ལས་མེད་ཚོའི་རང་ལྟོ་འཚོལ་དང་དཔུང་སྒྲིག་སའི་སྟེགས་བུ་ཞིག་ཏུ་འགྱུར་གྱིན་པ་ལྷང་ལ་འབུད་ཀྱིན་ཡོད། ང་ཚོའི་མི་རིགས་འདི་གནའ་བོའི་བན་བོན་ཆོས་ལུགས་འཐབ་རྩོད་ནས་ནང་བའི་ཆོས་རྒྱུད་བར་གྱི་འཐབ་རྩོད། དེ་ནས་དགོན་པས་ལྷ་སྡེ་འཕྲོག་རྩོད་འཐབ་རྩོད། དེ་ནས་སྐུ་ངོས་གཞིས་ཀ་ཁེ་སྤོགས་འཐབ་རྩོད། དེ་ནས་ནུབ་ཕྱོགས་སུ་སྤྲང་པོ་རྒྱག་པར་དཔུང་སྒྲིག་འཐབ་རྩོད། ད་ནི་ལྟོ་ཕོར་དཔུང་སྒྲིག་འཐབ་རྩོད་ཀྱི་བར་སླེབས་ཡོད། ང་ཚོ་རྒུད་སྟངས་འདི་འདྲ་རེད།

སྤྱིར་དམངས་གཙོའི་རྒྱལ་ཁབ་དག་གི་ནང་། སྲིད་འཛིན་དང་གྲོས་ཚོགས་ཚོགས་གཙོ་ནི་མང་ཚོགས་སྟེ། ཤེས་བླུན་མཐོ་དམའ་ཀུན་པོས་སོ་སོའི་འདོད་མོས་ལྟར་རང་གི་འོས་ཤོག་གཅིག་པུ་བླུགས་ནས། རླུང་རྟ་རྒྱུགས་སྟངས་དང་ཕྱོགས་ཆད་གཡོ་སྟངས་ཀྱི་རྩི་དང་ལྡན་པར་བསྐོས་ཆོག་གི་རེད་དེ། སྤྱི་ཚོགས་གང་དེའི་ཤེས་རིག་གི་དཔལ་ཡོན་སྤེལ་སའི་སློབ་གྲྭའི་དགེ་རྒན་དང་བུ་གཅོར། སློབ་གྲྭའི་མ་བྱན་བཅས་ནི། ཚད་དང་ལྡན་ཆེད་ལས་བ་ཤ་སྟག་ཡིན་དགོས་པ་མ་ཟད། ཉམས་མྱོང་ཚུལ་ལྡན་ཡོད་པ་ཞིག་དགོས་ཀྱི་ཡོད་རེད།

ང་ཚོས་ནི་དེ་ལས་ལྡོག་སྟེ་སློབ་གྲྭ་ནི་སློབ་མཐར་ཕྱིན་རྗེས་ཀྱི་ལས་མེད་ཚོ་འཚང་ཁ་རྒྱག་ས་དང་། སྤྱི་ཚོགས་ཁྲོད་ཀྱི་འཇོན་ནུས་མེད་པའི་བླུན་རྨོངས་བ་ཚོའི་ལྟོ་རྒྱག་འཚོལ་ས་ལྟ་བུར་གྱུར་ཡོད། རྣར་མི་འགྲོ་ནི་སློབ་གྲྭ་ཁག་གི་མགོ་སློབ་གཙོ་ནས་འོག་མ་བྱིན་བར་དུ་ཞིབ་རྩིས་ཤིག་རྒྱོབ་དང་། སློབ་གསོ་ཆེད་ལས་བ་དང་ཤེས་ཡོན་རིན་ཐང་མིའི་རྩིས་ཐང་ལ་རློམ་སྟེ་མི་ཚེ་སྐྱེལ་མཁན་རི་བོར་གི་རྭ་ཡན་ག་བཅོ་བརྒྱད་ཅན་དུ་གྱུར་འདུག་གོ དེ་ཡི་རྐྱེན་པས། འུ་ཅག་གིས་བཙན་བྱོལ་སློབ་གསོ་སྒྲུབ་ནས་ལོ་ངོ་༥༠ ཕྱིན་པའི་རིང་དུ། སློབ་གསོའི་ལས་དོན་གཉེར་མཁན་དགེ་ལས་སློབ་ཕྲུག་སྔ་ཕྱིར་ཁྲི་འགའ་ཤས་བྱུང་བར་སྐད་པའི་ཁྲོད་དུ། སློབ་གསོའི་ཐད་ལ་ཞིབ་འཇུག་ཆེད་དེབ་བརྩམས་བཞག་པ་ག་ཚོད་ཡོད་དམ། ང་ཚོའི་མི་རིགས་འདི་རྒུད་ནས་ཚད་ག་ཙམ་ཞིག་ལ་སླེབས་འདུག་གམ།

ཚིག་བརྒྱ་མདོར་དྲིལ་ན། ངས་བཤད་འདོད་པ་ནི། ང་ཚོ་དུས་ནས་དུས་སུ་ཕུངས་བྱེད་ནི་རྨོངས་འཐོམ་དང་རུལ་སུངས་རེད། ང་ཚོར་དགོས་པ་ནི་ཤེས་ཡོན་དང་རྣམ་དཔྱོད་རེད།
ང་ཚོས་དངོས་གནས་སེམས་ཀྱི་གཏིང་ནས་སྙིང་གི་དབུས་ནས་མི་རིགས་འཐབ་རྩོད་བྱེད་འདོད་ཡོད་ན། སློབ་གསོའི་ར་བ་དག་ནད་མེད་སྐྱོན་བྲལ་ཞིག་འཛིན་སྐྱོང་དང་གཙུག་འཛིན་བྱེད་རོགས།

ཐབས་སྡུག་ཞེ་བོ་རེད་བྱ། མི་དེ་ཉེན་རྟོག་པར་བརྩི་སྤྲད་པ་ཡག་པོ་རེད། མི་དེ་བུ་མོ་ཆུང་ཆུང་ལ་བཙན་གཡེལ་བྱེད་པར་སྐྱག་ལང་ལ་སོང་ཚར་བས་ད་དུང་དེ་འདྲ་བྱས་ནས་བཞག་པ་ཡིན་ན། ཡང་བསྐྱར་བུ་མོ་ཆུང་ཆུང་དེ་འདྲའི་མི་ཚེ་འཕྲོ་བརླག་ལ་གཏོང་ངེས་ཅན་རེད།

དངོས་གནས་དྲང་གནས་ཐབས་སྐྱོ་བོ་ཞེ་དྲག་རེད། བཙན་བྱོལ་སྤྱི་ཚོགས་ཆུང་ཆུང་འདིའི་ནང་གནས་ཚུལ་འདི་དང་འདི་ལྟ་བུ་མང་པོ་ཞིག་བྱུང་དང་འབྱུང་་བཞིན་འདུག ད་དུང་མང་པོ་ཞིག་ནང་འགྲིག་དང་གསང་རྒྱ་བྱས་ཏེ་ཧ་གོ་གི་ཡོད་པ་མ་རེད།