བྷེ་ཇེ་པེ་ལ་རྒྱལ་ཁ་ཐོབ་འདུག

རྒྱ་གར་གྱི་སྐབས་ ༡༦ པའི་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོའི་འོས་གྲངས་རྩིས་བཤེར་བྱས་ཏེ། བྷེ་ཇེ་པེ་སྲིད་དོན་ཚོགས་པར་རྐུབ་སྟེགས་མང་ཤོས་ཐོབ་ཡོད་སྟབས་སྐབས་རྗེས་མའི་གཞུང་འཛིན་ཚོགས་པ་ཆགས་རྒྱུ་ཡིན་འདུག

དེ་རིང་རྒྱ་གར་དབུས་འོས་བསྡུ་ལྷན་ཁང་གིས་སྐབས་ ༡༦ པའི་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུ་ཆེན་མོའི་འོས་གྲངས་རྩིས་བཤེར་བྱེད་བཞིན་ཡོད་ཅིང་། རྒྱ་གར་གྲོས་ཚོགས་འོག་མའི་ནང་རྐུབ་སྟེགས་ ༥༤༣ ཡོད་པའི་ཁྲོད། ད་སྔ་འོས་གྲངས་རྩིས་བཤེར་བྱས་འབྲས་སུ་སྲིད་བློན་འོས་མི་སྐུ་ཞབས་ནཱ་རན་ཌི་མུ་དྷེ་ (Narendra Modi) ལགས་ཀྱིས་སྣེ་ཁྲིད་པའི་བྷེ་ཇེ་པེ་སྲིད་དོན་ཚོགས་པར་རྐུབ་སྟེགས་ ༢༧༨ ཙམ་ཐོབ་ཡོད་པ་དང་། ད་ལྟའི་གཞུང་འཛིན་ཀོང་རེ་སི་ཚོགས་པར་ཕམ་ཉེས་ཆེན་པོ་བྱུང་ཡོད་འདུག བྷེ་ཇེ་པེ་སྲིད་དོན་ཚོགས་པས་སྣེ་ཁྲིད་པའི་རྒྱལ་ཡོངས་དམངས་གཙོའི་མཐུན་སྒྲིལ་ཚོགས་པ་(NDA) ཡིས་རྒྱ་གར་གྱི་གཞུང་འཛིན་པར་རྐུབ་སྟེགས་ ༣༣༢ ལྷག་འཐོབ་དགོས་ཀྱི་ཡོད་འདུག

ཐེངས་འདིའི་རྒྱ་གར་གྲོས་ཚོགས་འོག་མའི་འོས་བསྡུའི་ཁྲོད་བྷེ་ཇེ་པེ་སྲིད་དོན་ཚོགས་པར་འོས་གྲངས་མང་ཤོས་ཐོབ་སྟེ་མི་འགྱངས་བར་རྒྱ་གར་གཞུང་འཛིན་ཚོགས་པ་ཆགས་རྒྱུ་ཡིན་པར་བརྟེན། རྒྱ་གར་སྲིད་བློན་མན་མོ་ཧན་སིན་མཆོག་གིས་ཁ་པར་བརྒྱུད་བྷེ་ཇེ་པེ་ཚོགས་པའི་སྲིད་བློན་འོས་མི་སྐུ་ཞབས་ནཱ་རན་ཌི་མུ་དྷེ་ལགས་སུ་འཚམས་འདྲི་ཞུས་ཡོད་འདུག དེ་བཞིན། ལྡི་ལིར་རྟེན་གཞི་བྱས་པའི་བྷེ་ཇེ་པེ་སྲིད་དོན་ཚོགས་པའི་བསྟི་གནས་དང་གྷོ་ཇི་རེ་ཐའེ་རྒྱལ་ས་གཙོས་བྷེ་ཇེ་པེ་སྲིད་དོན་ཚོགས་པར་རྒྱབ་སྐྱོར་བྱེད་མཁན་མང་ཚོགས་ཀྱིས་ས་གནས་གང་སར་དགའ་བསུ་རྟེན་འབྲེལ་བྱེད་བཞིན་ཡོད་འདུག

ཐེངས་འདིར་བྷེ་ཇེ་པེ་སྲིད་དོན་ཚོགས་པའི་ཚོགས་གཙོ་སྐུ་ཞབས་རའ་ཇི་ནཱ་ཐི་སིན་(Rajnath Singh) ལགས་ཀྱིས་རྒྱལ་ཁ་ཐོབ་པའི་སྐོར་ལ་གསར་འགོད་གསལ་བསྒྲགས་སྤེལ་ཏེ། རྒྱ་གར་མི་མང་གིས་ཡིད་ཆེས་བློ་འགེལ་ཆེན་པོ་བྱས་པ་དེར་ལས་འགན་ཆེན་པོ་ཞིག་ཡོད་སྐོར་དང་། ཐེངས་འདིའི་འོས་བསྡུ་དེ་ནི་རྒྱ་གར་མི་མང་གི་རྒྱལ་ཁ་ཆེན་པོ་ཞིག་ཡིན་ཚུལ་སོགས་བརྗོད་འདུག ཀོང་རེ་སི་ཚོགས་པའི་མགྲིན་ཚབ་པ་སྐུ་ཞབས་ཤཱ་ཀེལ་(Shakil Ahmed) ལགས་ཀྱིས་གསར་འགོད་པར། ད་ལྟའི་འོས་གྲངས་རྩིས་བཤེར་གནས་སྟངས་ལ་བལྟས་ཡོང་ན་ང་ཚོར་འོས་གྲངས་མང་པོ་ཐོབ་མེད་པ་གསལ་བོ་རེད། ང་ཚོས་མི་མང་གི་ཐག་གཅོད་ལ་གུས་ཞབས་ཀྱིས་ཁས་ལེན་བྱེད་བཞིན་ཡོད། ཅེས་བརྗོད་འདུག

གནད་དོན་དབྱེ་ཞིབ་པ་ཚོས། ཐེངས་འདིར་ནེའུ་རོ་གྷན་དྷི་ཁྱིམ་རྒྱུད་ཀྱིས་སྣེ་ཁྲིད་པའི་ཀོང་རེ་སི་ཚོགས་པར་ཕམ་ཉེས་ཆེན་པོ་བྱུང་ཡོད་པ་དང་། ཀོང་རེ་སི་ཚོགས་པས་རྒྱ་གར་གཞུང་འཛིན་སྐྱོང་བྱས་པའི་རིང་ལྐོག་ཟ་རུལ་སུངས་ཤུགས་ཆེན་བྱུང་ཡོད་སྟབས། ཐེངས་འདིའི་འོས་བསྡུ་བརྒྱུད་དེ་མང་ཚོགས་ཀྱིས་གཞུང་ལ་གསལ་བཤད་ཅིག་བྱས་ཡོད་སྐོར་བརྗོད་བཞིན་ཡོད་འདུག

ཐེངས་འདིར་རྒྱ་གར་དབུས་འོས་བསྡུ་ལྷན་ཁང་གིས་སྐབས་ ༡༦ པའི་རྒྱལ་ཡོངས་འོས་བསྡུའི་བདེ་འཇགས་དང་འོས་ཤོག་ལྡུག་སྟངས་བཅས་ལ་ཕྱི་གསལ་ནང་གསལ་ཡོང་ཆེད། འོས་བསྡུ་བྱེད་སྟངས་ལ་འགྱུར་བ་བཏང་སྟེ་མངའ་སྡེའི་རིམ་པར་འོས་བསྡུའི་ས་ཁུལ་ཁག་དགུ་ལ་ཆ་བགོས་བྱས་ཏེ། ཟླ་སྔོན་མའི་ཚེས་ ༧ ཉིན་ནས་ཟླ་འདིའི་ཚེས་ ༡༢ ཉིན་བར་འོས་བསྡུ་བྱས་ཏེ་མཇུག་སྒྲིལ་ཡོད་པ་དང་། ཟླ་རྗེས་མའི་ཚེས་མགོར་རྒྱ་གར་སྲིད་འཛིན་མཆོག་ལྷན་བཞུགས་ཐོག་སྐུ་ཞབས་ནཱ་རན་ཌི་མུ་དྷེ་ (Narendra Modi) ལགས་སྲིད་བློན་ལ་བསྐོ་བཞག་དང་ཀོང་རེ་སི་གཞུང་འཛིན་ཚོགས་པས་སྲིད་གཞུང་རྩིས་སྤྲོད་བྱ་རྒྱུ་ཡིན་འདུག

སྐུ་ཞབས་ནཱ་རན་ཌི་མུ་དྷི་ལགས་ནི། ༡༩༥༠ ལོའི་ཟླ་ ༩ ཚེས་ ༡༧ ཉིན་གྷོ་ཇི་རྰ་ཐའེ་ནང་ཟས་རིགས་འཚོང་མཁན་གྱི་ཁྱིམ་ཚང་ཞིག་ཏུ་སྐྱེས་ཤིང་། ཁོ་རང་ཆུང་དུས་མེ་འཁོར་དང་སྤྱི་སྤྱོད་རླངས་འཁོར་ས་ཚིགས་སུ་ཇ་འཚོང་ཞོར་དུ་སློབ་ཆུང་མཐར་ཕྱིན་པ་དང་། ལོ་ ༡༨ སྟེང་ཆང་ས་བརྒྱབ་ཡོད་འདུག ༡༩༧༠ ལོར་གྷོ་ཇི་རྰ་ཐའི་མེ་འཁོར་གྱི་ཐབ་ཚང་ཞིག་ཏུ་ལས་ཀ་བྱས་པ་དང་། ཕྱིས་སུ་ཡིག་འབྲེལ་ལམ་ནས་ལྡི་ལི་མཐོ་སློབ་ནས་སྲིད་དོན་ཚན་རིག་གི་རིག་གནས་རབ་འབྱམས་པའི་ལག་འཁྱེར་དང་གྷོ་ཇི་རྰ་ཐའེ་གཙུག་ལག་སློབ་གྲྭ་ནས་སྲིད་དོན་ཚན་རིག་གི་གཙུག་ལག་རབ་འབྱམས་པའི་ལག་འཁྱེར་བླངས་ཡོད་འདུག ༡༩༩༥ ལོར་བྷེ་ཇེ་པེ་སྲིད་དོན་ཚོགས་པའི་དྲུང་ཆེར་བདམས་ཐོན་བྱུང་སྟེ་ཧི་མ་ཅལ་དང་ཧ་རེ་ཡཱ་ནཱ་མངའ་སྡེ་གཉིས་ནང་སྲིད་དོན་གྱི་ཕྱག་ལས་གནང་བ་དང་། ༡༩༩༨ ལོར་གྷོ་ཇི་རྰ་ཐའེ་གྲོས་ཚོགས་ནང་བདམས་པ་དང་། ༢༠༠༡ ལོ་ནས་བཟུང་གྷོ་ཇི་རྰ་ཐའེ་མངའ་སྡེའི་སྤྱི་ཁྱབ་བློན་ཆེན་གྱི་ཕྱག་ལས་གནང་དང་གནང་བཞིན་ཡོད་འདུག

གསར་འགོད་པ། ལྷ་སྐྱབས་རྒྱལ།