འཇིགས་བྲལ་གློག་བརྙན་གྱི་ཕབ་བསྐྲུན་ལས་རོཊ་ཆབ་སྲིད་བཙོན་པ་གྲྭ་མགོ་ལོག་འཇིཊ་མེད་ལཊ་མདང་དགོང་དྷ་རམ་ས་ལའི་དབུས་སྣེ་ལེན་ཁང་དུ་འབྱོར་འདུག
ཁ་སང་ཕྱི་ཚེས་ ༡༨ ཉིན་གྱི་དགོང་མོར་ཕྱི་ལོ་ ༢༠༠༨ ལོར་ཆབ་སྲིད་བཙོན་པ་དོན་འགྲུབ་དབང་ཆེན་ལགས་དང་མཉམ་དུ་༼འཇིགས་བྲལ༽ཞེས་པའི་གློག་བརྙན་ཕབ་བསྐྲུན་གནང་མཁན་གྲྭ་མགོ་ལོག་འཇིགས་མེད་ལཊ་དབུས་བོད་ཀྱི་སྣེ་ལེན་ཁང་དུ་འབྱོར་ཡོད་པ་དང་། མདང་དགོང་ནས་བཟུང་བཞུགས་སྒར་དུ་ཡོད་པའི་ཚོགས་པ་སྐྱིད་སྡུག་དང་། ཁོང་གི་ངོ་ཤེས་གྲོགས་པོ་ཚོ་འཚམས་འདྲིར་སྐྱོད་བཞིན་ཡོད་ཅིང་། ཉིན་ཤས་རྗེས་ཁོང་གིས་ཡོངས་ཁྱབ་གསར་འགོད་གསལ་བསྒྲགས་ཤིག་སྤེལ་འཆར་ཡོད་འདུག
མགོ་ལོག་འཇིགས་མེད་ལགས་ནི། མགོ་ལོག་དབལ་ཤུལ་གསེར་རྟའི་རག་ཁྲམ་ཡུལ་ཚོའི་ཏོག་ཚ་སྡེ་བ་ནས་ཡིན་པ་དང་། ཆུང་དུས་ནས་བླ་བྲང་བཀྲ་ཤིས་འཁྱིལ་དུ་འཛུལ་ཞུགས་ཀྱི་སློབ་གཉེར་གནང་ཡོད་འདུག
ཕྱི་ལོ་ ༢༠༠༨ ལོར་དོན་འགྲུབ་དབང་ཆེན་ལགས་དང་མཉམ་དུ་བོད་ནང་གི་བོད་མི་ཁག་ཅིག་ལ་བོད་ནང་གི་དངོས་ཡོད་གནས་སྟངས་སྐོར་སྐད་ཆ་བྲིས་ཏེ་༼འཇིགས་བྲལ༽ཞེས་པའི་གློག་བརྙན་ཞིག་བཟོ་སྐྲུན་བྱས་སྟབས། རྒྱ་གཞུང་གིས་དོན་འགྲུབ་དབང་ཆེན་ལགས་འཛིན་བཟུང་གིས་ལོ་ ༦ བཙོན་འཇུག་ཁྲིམས་ཐག་བཅད་ཡོད་པ་དང་། ལོ་དེའི་ཕྱི་ཟླ་ ༣ ཚེས་ ༢༣ ཉིན་མགོ་ལོག་འཇིཊ་མེད་ལགས་བླ་བྲང་བཀྲ་ཤིས་འཁྱིལ་ནས་འཛིན་བཟུང་གིས་ཟླ་ ༧ རིང་བཀག་ཉར་བྱས།
༢༠༠༩ ཕྱི་ཟླ་ ༣ པ་ཙམ་ནས་རྒྱ་གཞུང་གིས། འཇིགས་བྲལ་གློག་བརྙན་བཟོ་མཁན་གྱི་ལག་རོགས་ཡིན་པ་དང་། ༢༠༠༨ ལོའི་བོད་ནང་གི་ཞི་རྒོལ་སློང་མཁན་ཡིན་པ་བཅས་ཀྱི་ཉེས་འཛུཊ་འོག་གཅར་རྡུང་འདྲི་གཅོད་མང་པོ་བྱས་ཡོད་འདུག ༢༠༡༢ ལོའི་ཟླ་ ༩ བའི་ཚེས ༢༠ ཉིན་རྒྱ་གཞུང་གིས་བླ་བྲང་དགོན་པར་ཡོད་པའི་ཁོང་གི་གྲྭ་ཤག་གཏོར་བཤིག་བཏང་ཡོད་པ་མ་ཟད། སྐབས་དེར་ཁོང་ལན་ཀྲུའུ་ལ་ཕྱིན་ཏེ་ཕྱིར་ལོག་པའི་ལམ་བར་ནས་འཛིན་བཟུང་བྱས་པའི་གནས་ཚུལ་ཞིག་ཐོན་ཡོད་ཀྱང་། རྗེས་སུ་རྒྱ་གཞུང་གིས་མགོ་ལོག་འཇིགས་མེད་འཛིན་བཟུང་བྱེད་དགོས་པའི་བཀའ་རྒྱ་བསྒྲགས་ཡོད་པ་མ་ཟད། ཁ་པར་དང་གློག་ཀླད་སོགས་སུ་ཁོང་གི་གནས་ཚུལ་ཡར་ཞུ་བྱེད་མཁན་ལ་རྒྱ་སྒོར་ཁྲི་ ༢༠ སྤྲོད་རྒྱུ་ཡིན་པའི་གསལ་བསྒྲགས་སྤེལ་ཡོད།
གསར་འགོད་པ། དོན་གོ
དཔའ་བོ་གཤིན་རྗེའི་ཁ་ནས་ཐར་བར་དགའ་གུས་ཞུའོ།། །།
ངེས་པ་དོན་གྱི་མི་རིགས་ཀྱི་དཔའ་བོ་མགོ་ལོག་འཇིགས་མེད་མཆོག་བདེ་བླགས་ཏུ་རྒྱ་གར་ནང་སྐྱབས་བཅོལ་དུ་འབྱོར་བར་བཀྲ་ཤིས་བདེ་ལེགས་གྲངས་མེད་ཞུ། ད་རེས་བོད་མིའི་སྒྲིག་འཛུགས་དང་ངྷ་སའི་ཚོགས་པ་སྐྱིད་སྡུག་ཁག་གིས་ཁོང་ལ་བདག་པོ་ཡག་པོ་ཞིག་གནང་རྒྱུའི་རེ་བ་དང་འབོད་སྐུལ་ཞུ་བཞིན་ཡོད། ཆོས་ལུགས་ཆོལ་ཁའི་འཐེན་འཁྱེར་དང་རང་བཙན་དབུ་མའི་རྩོད་གླེང་མེད་པར་བོད་གངས་ཅན་པ་སྤྱི་ཡོངས་ཀྱི་དཔའ་རྒོལ་ཁོང་ལུང་ཚན་བྱེ་བྲག་པ་ཞིག་དང་ཆོལ་ཁ་བྱེ་བྲག་པ་ཞིག་གི་ངོ་བོར་བསྒྱུར་ཐབས་བྱས་ཏེ་ཁོང་གི་གཟི་བརྗིད་དང་རིན་ཐང་རྩིས་མཐོང་བཅས་ལ་སྦག་བཙོག་མ་བཟོས་བར་སྔར་བཞིན་བོད་གངས་ཅན་པ་སྤྱི་ཡོངས་ཀྱི་མི་སྣ་རླབས་ཆེན་དེའི་ངོ་བོར་གནས་ཐུབ་པ་དང་། ད་དུང་གཟི་བརྗིད་རིན་ཐང་སྔར་ལས་བླ་ལྷག་ཏུ་རྒྱས་སུ་འཇུག་རྒྱུར་སྙིང་ཁུངས་རུས་པའི་གཏིང་ནས་སྐྱབས་འཇུག་ཞུ་བཞིན་ཡོད།
དགའ་བསུ་ཡོད་བདེ་འབྱོར་བྱུང་པ་དགའ་བསུ་ཡོད་
མགོ་ལོག་འཇིགས་མེད་ཁོང་བདེ་ལེགས་ངང་རྒྱ་གར་རྡ་རམ་ས་ལར་འབྱོར་བར་དགའ་བསུ་དང་བཀྲ་ཤིས་བདེ་ལེགས་ཞུ་བཞིན་ཡོད།