ཉི་ཧོང་སྐུ་ཚབ་དོན་གཅོད་ལྷག་པ་མཚོ་སྒོ་མཆོག་ལ་ཉི་ཧོང་ནང་གི་བོད་པའི་གནས་སྟངས་དང་། ཉི་ཧོང་གཞུང་མང་གིས་བོད་དོན་ཐོག་ལྟ་སྟངས་གང་འདྲ་ཡོད་མེད་བཅས་ལ་བཅར་འདྲི་ཞུས་ཡོད།
དྲི་བ། ཉི་ཧོང་སྐུ་ཚབ་དོན་གཅོད་ཀྱི་ལས་འགན་གཙོ་བོ་གང་ཡིན་པ་དང་། སྐུ་ཉིད་ནས་ད་ལྟའི་བར་ལས་དོན་གཙོ་བོ་གང་དག་བསྒྲུབས་ཡོད་དམ།
ལན། ང་རང་ ༡༩༨༤ ལོ་ནས་ ༢༠༠༢ ལོའི་བར་སྐུ་ཚབ་དོན་གཅོད་སྔོན་མའི་འོག་དྲུང་ཆེའི་ལས་ཀ་བྱས་པ་རེད། ༢༠༠༢ ལོ་ནས་ ༢༠༠༧ བར་ལྡི་ལི་སྐུ་ཚབ་དོན་གཅོད་ནང་དྲུང་ཆེའི་མཚན་གནས་དང་སྐབས་ཤིག་ལ་སྐུ་ཚབ་དོན་གཅོད་གཞོན་པའི་འགན་འཁུར་བ་ཡིན། ༢༠༠༧ ལོའི་ཟླ་ ༦ པ་ནས་ད་ལྟའི་བར་ཉི་ཧོང་སྐུ་ཚབ་དོན་གཅོད་རེད། ཉི་ཧོང་དང་ཤར་ཨེ་ཤ་ཡའི་སྐུ་ཚབ་དོན་གཅོད་ཀྱི་ལས་འགན་གཙོ་བོ་གནས་ཡུལ་རྒྱལ་ཁབ་ཀྱི་གཞུང་མང་གཉིས་ལ་བོད་ཀྱི་བདེན་དོན་གསལ་བཤད་དང་། གཞུང་དང་གཞུང་འབྲེལ་མིན་པའི་གསར་འགྱུར་ལས་ཁུངས་དང་ཆབ་སྲིད་མི་སྣ། དོན་གཉེར་ཅན་བཅས་ལ་སྐབས་ཐོག་གི་གནས་ཁྱབ་སྤེལ་གཏོང་རྒྱུ་སོགས་རེད། ང་རང་གིས་ཉི་ཧོང་དོན་གཅོད་ཀྱི་ལས་ཀ་བྱས་པའི་དུས་ཡུན་འདིའི་རིང་གཙོ་བོ་༧གོང་ས་མཆོག་གི་ཆིབས་བསྒྱུར་ལས་རིམ་ཐོག་ཤུགས་བརྒྱབ་པ་ཡིན། ༧གོང་ས་མཆོག་གི་ཕྱག་དེབ་མང་པོ་ཞིག་ཉི་ཧོང་སྐད་ནང་ཕབ་བསྒྱུར་དཔར་འགྲེམ་དང་། ཉི་ཧོང་གི་ནང་པ་དང་ཤིན་ཏོ་ཆོས་བརྒྱུད་ཀྱི་སྒྲིག་འཛུཊ་ཁག་དང་འབྲེལ་ལམ་ཞུས་ཏེ། ༧གོང་ས་མཆོག་ཤིན་ཏོ་ཆོས་བརྒྱུད་ཀྱིས་ཚར་ཁ་ཤས་གདན་འདྲེན་ཞུས་པ་རེད། ༢༠༡༤ ལོའི་ཟླ་ ༤ ཚེས་ ༦ ནས་ ༧ བར་ཤིན་ཏོ་ཆོས་བརྒྱུད་ཀྱིས་གདན་ཞུ་ལྟར། ས་ཡོམ་དང་མཚོ་རླབས་གོད་ཆག་ཆེན་པོ་བྱུང་སར་༧གོང་ས་མཆོག་ཕེབས་ཏེ། དོ་ཕོག་བྱུང་མཁན་མི་མང་ ༡༥༠༠ ལས་ ༡༠༠༠ ཡས་མས་ལ་ཕན་ཐོགས་བྱུང་ཡོད། ཉི་ཧོང་གི་གཙུག་ལག་སློབ་གྲྭ་དང་བོད་མཁས་པའི་སྒྲིག་འཛུགས་བར་འབྲེལ་ལམ་དང་བཅས་བྱས་ཡོད། ད་ལྟའི་བར་༧གོང་ས་མཆོག་ཉི་ཧོང་ནང་ཆིབས་བསྒྱུར་ཐེངས་ ༢༠ དང་། ངའི་སྐབས་སུ་ཆིབས་བསྒྱུར་ཐེངས་ ༡༡ གནང་ཐུབ་པ་བྱུང་ཡོད་ལ། རྒྱ་ནག་དང་ཉི་ཧོང་གི་ཆབ་སྲིད་གནས་སྟངས་འོག་ང་ཚོས་གཞུང་འབྲེལ་ཐོག་འབྲེལ་བ་བྱེད་ཐུབ་ཀྱི་མེད་ཀྱང་། དྲ་རྒྱ་དང་དུས་དེབ། མི་སྣར་མཇལ་འཕྲད་སོགས་བརྒྱུད་ནས་གསལ་བཤད་ཀྱི་གོ་སྐབས་རག་གི་ཡོད་པ་རེད། དེ་བཞིན། ཤེས་ཡོན་ལ་ཕན་པའི་མཐུན་འགྱུར་དང་བོད་མིའི་སྒྲིག་འཛུཊ་ལ་དཔལ་འབྱོར་མཐུན་འགྱུར་ཐབས་འཚོལ་སོགས་གང་ལ་གང་འཚམ་ཡོང་གི་ཡོད་པ་རེད།
དྲི་བ། ད་ཆར་ཉི་ཧོང་ནང་བོད་མི་སྐྱབས་བཅོལ་བ་ག་ཚོད་ཡོད་པ་དང་དེ་དག་གི་འཚོ་བའི་གནས་སྟངས། ཆོས་ཚོགས་དང་བོད་པའི་ཚོགས་པ་སྐྱིད་སྡུག་གི་གནས་སྟངས་གང་འདྲ་ཡིན་ནམ།
ལན། ཉི་ཧོང་ནང་ང་ཚོ་སྐྱབས་བཅོལ་སྤྱི་ཚོགས་རང་ནས་ཡོང་བའི་བོད་མི་ཕལ་ཆེར་ ༡༡༠ ཙམ་ལས་ཡོད་པ་མ་རེད། ཁོང་ཚོ་མང་ཆེ་བ་ཉི་ཧོང་གི་མི་དང་ཆང་ས་བརྒྱབ་ནས་ཡོང་བ་དེ་འདྲ་དང་། གཙུག་ལག་སློབ་གྲྭའི་ནང་དགེ་རྒན་གྱི་ཕྱག་ལས་གནང་མཁན་ཁ་ཤས་དང་སློབ་མ་ཁ་ཤས། དེ་ནས་ཆོས་ཚོགས་ནང་ཕྱག་ལས་གནང་མཁན་ཁག་ཅིག་བཅས་འདུག ཁོང་ཚོ་མང་ཆེ་བ་སོ་སོའི་ལྟོ་གོས་དང་འཚོ་བའི་ནང་མགོ་འཐོམ་སྡོད་པ་ལས་སྤྱི་ཚོགས་ནང་མངོན་གསལ་དོད་པོས་ཕན་ཐོགས་བྱེད་མཁན་ཧ་ཅང་དཀོན་པོ་འདུག ཆོས་ཚོགས་ཀྱི་ཕྱོགས་ནས་ང་རང་ཚོ་བོད་དང་འབྲེལ་བའི་ཆོས་ཚོགས་ ༤ ཙམ་ཡོད་པ་རེད། ང་ཚོའི་བར་གྱི་འབྲེལ་བ་འབྲིང་ཙམ་ཡིན། ཁོང་ཚོ་རྒྱ་ཆེན་པོ་དེ་འདྲ་མ་རེད། ས་གནས་བོད་མིའི་སྐྱིད་སྡུག་ཅེས་པ་ཞིག་ཀྱང་ཡོད་པ་རེད།
དྲི་བ། ཉི་ཧོང་སྐུ་ཚབ་དོན་གཅོད་ཀྱི་ཕྱག་ལས་གནང་སྐབས་དཀའ་ངལ་གཙོ་བོ་ག་རེ་འཕྲད་ཀྱི་འདུག་གམ།
ལན། ཉི་ཧོང་ནང་དཀའ་ངལ་ཆེ་ཤོས་བོད་པའི་མིང་འཁུར་ཏེ་བོད་དོན་རྒྱབ་སྐྱོར་ཚོགས་པ་དང་ཚོགས་པ་འདྲ་མིན་ཡོད་པ་དེ་དག་རེད། ཕར་རེ་བ་བཅངས་ནས་འགྲོ་སྐབས་དམིགས་བསལ་རེ་བ་རྒྱག་ས་མེད་པ་དེ་འདྲ་རེད། དགོས་ས་ཆད་མི་དགོས་སར་ལྷག་ཟེར་བ་ལྟར། ཁ་ཤས་ཀྱིས་སོ་སོའི་ལྟོ་གོས་ཆེད་ལས་ཀ་བྱེད་བསྡད་པ་ལས་བོད་དོན་ཐོག་ཕན་ཐོགས་གང་ཡང་མེད་པ་དེ་འདྲ་འདུག བོད་དོན་རྒྱབ་སྐྱོར་ཚོགས་པ་ཞེས་ལབ་དུས་མིང་དོན་མཚུངས་པ་ཞིག་དང་། ནམ་རྒྱུན་བོད་དོན་ཐོག་ལས་ཀ་བྱེད་མི་ཐུབ་ཀྱང་སྐབས་སྐབས་སུ་ལས་ཀ་གང་འཚམ་བྱེད་ཐུབ་པ་ཞིག་དགོས་པ་རེད། ཉི་ཧོང་ནང་གི་ཚོགས་པ་ཁ་ཤས་ཡག་པོ་འདུག དོན་གཅོད་དང་མཉམ་དུ་བསམ་ཚུལ་གོ་བསྡུར་བྱས་ཏེ་ཕྱི་ནང་མཐུན་པའི་ཐོག་ནས་ལས་ཀ་བྱེད་ཀྱི་ཡོད་པ་རེད། མི་སྒེར་གྱི་ཐོག་ནས་ང་ཚོར་ཡིད་ཆེས་དང་དོ་སྣང་། དོན་གཅོད་ལས་ཁུངས་ཀྱི་ལས་གཞིར་མཐུན་འགྱུར་གནང་བསྡད་པ་དེ་འདྲ་ཁག་ཅིག་ཡོད་པ་རེད།
དྲི་བ། ཉི་ཧོང་གཞུང་ངོས་ནས་བོད་དོན་རྒྱབ་སྐྱོར་གནང་ཕྱོགས་གང་འདྲ་ཡིན་མིན་དང་། གཞུང་འཛིན་མི་སྣ་ཚོས་བོད་དོན་ཐོག་ལྟ་སྟངས་གང་འདྲ་འདུག་གམ།
ལན། ང་ཚོ་གཞུང་འབྲེལ་རང་གི་རྣམ་པའི་ཐོག་ནས་ཉི་ཧོང་གཞུང་དང་ང་ཚོ་བཙན་བྱོལ་བོད་མིའི་སྒྲིག་འཛུཊ་བར་འབྲེལ་ལམ་ཡོད་པ་མ་རེད། ཡིན་ནའང་དུས་ཚོད་ཀྱི་འགྱུར་བ་དང་བརྟེན་ཏེ་བོད་པའི་གནས་སྟངས་ཐོག་ཐུགས་སྣང་ཟབ་པོ་རེད། ཁོང་ཚོར་སྐབས་དང་དུས་ལ་གནས་ཚུལ་མཁོ་སྒྲུབ་བྱེད་རྒྱུ་དེ་ང་ཚོའི་ལས་འགན་ཡིན་པའི་ཆ་ནས་དེ་དག་ང་ཚོའི་ཏག་ཏག་ཞུ་ཐུབ་ཀྱི་ཡོད་པ་རེད། ཨེ་ཤ་ཡའི་རྒྱལ་ཁབ་སྤྱི་ཡོངས་ལ་བལྟས་པ་ཡིན་ན་ཉི་ཧོང་དེ་བོད་པར་ཡག་ཤོས་ཆགས་ཡོད། གཞུང་འཛིན་མི་སྣ་སྒེར་དང་ཆབ་སྲིད་པ། གསར་འགོད་པ་བཅས་ཀྱི་ཐོག་ནས་བོད་དོན་ཐོག་གོ་རྟོགས་ཡག་པོ་རེད། ཡིན་ནའང་སྒྲིག་འཛུཊ་དང་ཆབ་སྲིད་ཚོགས་པ་སོགས་གནས་ཚུལ་ལོག་ག་རེད། ད་སྔ་ཉི་ཧོང་གྲོས་ཚོགས་འཐུས་མིའི་སྒྲིག་འཛུཊ་ཤིག་གིས་༧གོང་ས་མཆོག་ཐེངས་གཉིས་དང་། སྔ་ལོར་སྲིད་སྐྱོང་ཐེངས་གཅིག་གྲོས་ཚོགས་འཐུས་མིའི་འདུ་ཚོགས་ཐོག་གདན་ཞུ་གནང་སྟེ། ༧གོང་ས་མཆོག་གིས་འགྲོ་བ་མིའི་སྤྱིའི་རིན་ཐང་དང་འཛམ་གླིང་སྤྱིའི་འགན་འཁུར་ཞེས་པའི་བརྗོད་གཞིའི་ཐོག་བཀའ་སློབ་དང་། སྲིད་སྐྱོང་མཆོག་གིས་བོད་པའི་ཆབ་སྲིད་གནས་སྟངས་ཐོག་གཏམ་བཤད་གནང་བ་རེད། དེ་དག་གཞུང་འབྲེལ་མ་རེད། ཆབ་སྲིད་ཚོགས་པ་ཁག་མཉམ་རུབ་ཐོག་མགྲོན་འབོད་གནང་བ་རེད། དེ་དག་གིས་བོད་པའི་ཆབ་སྲིད་ཀྱི་གོ་རྟོགས་སྤེལ་བར་ས་བོན་གང་འཚམ་འདེབས་ཐུབ་ཡོད་པ་རེད་བསམ་གྱི་འདུག
དྲི་བ། ཉི་ཧོང་མི་མང་གི་ངོས་ནས་བོད་དང་བོད་དོན་ཐོག་ལྟ་སྟངས་དང་རྒྱབ་སྐྱོར་གནང་ཕྱོགས་གང་འདྲ་ཡོད་དམ།
ལན། མི་མང་ནང་བོད་པའི་གནས་སྟངས་ཤེས་རྟོགས་ཡོད་མཁན་ཚོས་བོད་དོན་ལ་རྒྱབ་སྐྱོར་དང་གདུང་སེམས་མཉམ་སྐྱེད་ཀྱི་རྣམ་འགྱུར་གསལ་བོ་རེད། ཡིན་ནའང་། བོད་ཀྱི་གནད་དོན་ཉི་ཧོང་རྒྱལ་ཡོངས་ལ་ཁྱབ་ཐུབ་ཀྱི་ཡོད་དམ་ཞེ་ན། ཉི་ཧོང་གི་གསར་འགྱུར་བརྒྱུད་ལམ་ཁག་དང་ཆབ་སྲིད་པའི་བར་གྱི་གནས་ཚུལ་དང་གསར་ཁང་སོ་སོའི་སྲིད་བྱུས་བཅས་ཀྱི་ཐོག་ནས། དཔེར་ན། ༧གོང་ས་མཆོག་གི་ཉི་ཧོང་གི་མཛད་འཕྲིན་སྐོར་ཉི་ཧོང་རང་གི་གསར་འགྱུར་བརྒྱུད་ལམ་ཁག་ཏུ་དེ་ཙམ་ཐོན་མ་ཐུབ་པའི་གནས་སྟངས་ཡོད་པ་རེད། གཙོ་བོ་གསར་འགྱུར་ལས་ཁུངས་དང་ཆབ་སྲིད་ཚོགས་པ་སོགས་ཀྱིས་རྒྱ་མིར་དོགས་ཟོན་བྱས་ཏེ། བོད་དོན་ཁྱབ་བསྒྲགས་བྱེད་ཐུབ་ཀྱི་མེད་སྟབས་ཉི་ཧོང་རྒྱལ་ཡོངས་ནང་ཁྱབ་ཐུབ་ཀྱི་ཡོད་པ་མ་རེད། ༢༠༠༩ ལོར་ཡུ་ཀོ་ཧ་མར་འཛམ་གླིང་རྒྱལ་སྤྱིའི་རླངས་འཁོར་ཚོང་ར་ཚོགས་པས་གོ་སྒྲིག་གནང་སྐབས། འགྲོ་སོང་གཅིག་པུར་ཨ་སྒོར་འབུམ་ལྔ་ལྷག་ཕྱིན་པའི་སྐད་ཆ་རེད། ཚོགས་ཁང་བཞིའི་ནང་ཉི་ཧོང་གཅིག་པུ་མིན་པར་ཀོ་རི་ཡ་དང་ཐའེ་ཝན། ནང་པའི་རྒྱལ་ཁབ་ནས་ཡོང་མཁན་ ༡༣༠༠༠ ཕེབས་ཡོད་པ་རེད།
དྲི་བ། ཉི་ཧོང་དང་རྒྱ་ནག་བར་ཆབ་སྲིད་དང་ཚོང་འབྲེལ་གྱི་གནས་སྟངས་གང་འདྲ་ཡོད་མེད་དང་། དེས་བོད་དོན་རྒྱབ་སྐྱོར་ཐད་ཤུགས་རྐྱེན་གང་འདྲ་ཐེབས་ཀྱི་འདུག་གམ།
ལན། རྒྱ་ནག་དང་ཉི་ཧོང་གཉིས་རྒྱ་རབས་ལོ་རྒྱུས་ཀྱི་ཐོག་ནས་ཕྱོགས་གཉིས་ཀ་འཁོན་འཛིན་ཤུགས་ཆེན་པོ་ཡོད་པ་རེད། ཐོག་མ་ཉི་ཧོང་གིས་དཔལ་འབྱོར་གྱི་ཐོག་ནས་རྒྱ་ནག་ལ་མཐུན་འགྱུར་བྱས་ཏེ་རྒྱ་ནག་སྟོབས་ཆེན་པོ་ཆགས་ཡོང་སྐབས། ད་ལྟ་ཕན་ཚུན་གཅིག་ལ་གཅིག་བརྟེན་ཆགས་ཡོད། ཆབ་སྲིད་ཐོག་མི་མང་ནང་བསམ་བློའི་བར་ཁྱད་ཡོད་ཀྱང་། ཚོང་འབྲེལ་གྱི་དབང་གིས་ཕར་ཚུར་གཉིས་ཀ་ཁོག་པ་ཆེན་པོ་བྱས་ནས་བསྡད་ཡོད། མཚོ་གླིང་གི་རྙོག་གྲ་དེ་ཚོ་གཅིག་བྱས་ན་དམག་དོན་དང་འབྲེལ་བ་ཆགས་ཀྱི་ཡོད་ཀྱང་། ཁོང་ཚོས་ད་ལྟ་ནས་བརྩིས་པའི་ལོ་བརྒྱ་ཕྲག་གི་ནག་རྩིས་རྒྱག་གི་ཡོད་པ་རེད། ཉི་ཧོང་ལ་ཆ་བཞག་ན་རྒྱ་ནག་གིས་རྫིག་ཉམས་འདྲ་མིན་སྟོན་གྱི་ཡོད་ཀྱང་ཁོག་པ་ཆེན་པོ་བྱས་ནས་བསྡད་འདུག རྒྱ་ནག་ལ་མཚོན་ན་ནང་ཁུལ་གྱི་རྙོག་གྲ་དང་དབང་ཆའི་འཐབ་རྩོད་འོག་མི་མང་ལ་མགོ་སྐོར་དང་། མི་མང་གི་དོ་སྣང་ཁ་ལོ་བསྒྱུར་ཆེད་གནས་ཚུལ་གསར་པ་བཟོ་བཞིན་ཡོད་པ་ཉི་ཧོང་མི་མང་གིས་ཧ་གོ་བསྡད་ཡོད་པ་རེད། རྒྱ་ནག་གི་རྒྱལ་རབས་ལོ་རྒྱུས་ཐོག་གཡོ་སྒྱུ་འཁྲབ་རྒྱུར་ཧ་ཅང་བྱང་ཆུབ་པ་ཞིག་ཡིན་པ་ཧ་གོ་ཡོད་པ་རེད། གནས་སྟངས་དེའི་འོག་ནས་ང་ཚོ་བོད་པར་ཁེ་བཟང་ཞིག་རག་གི་ཡོད་པ་རེད། བོད་པའི་གནས་ཚུལ་ཁྱབ་བསྒྲགས་བྱེད་སྐབས་ཉི་ཧོང་མི་མང་གིས་བོད་ནང་གི་བོད་མི་ཚོས་སྡུག་པོ་མྱོང་གི་ཡོད་པ་དང་། རྒྱ་ནག་ལ་གཡོ་རྒྱུ་དང་ཧམ་པ་ཆེ་བ་སོགས་རང་བཞིན་གྱིས་ངོས་ལེན་བྱེད་ཀྱི་ཡོད། ཡིན་ནའང་དམིགས་ཡུལ་རྒྱ་ནག་དང་ཉི་ཧོང་གཉིས་དམག་འཁྲུག་བརྒྱབ་ནས་འབྲེལ་བ་སྡུག་པོ་ཆགས་རྒྱུ་དེ་མ་རེད། རྒྱལ་ཁབ་འདི་གཉིས་ཨེ་ཤ་ཡའི་རྒྱལ་ཁབ་སྟོབས་ཆེན་གཉིས་ཆགས་ཡོད་སྟབས་ཕྱོགས་གཉིས་ཀྱི་འབྲེལ་བ་དེ་ཧ་ཅང་གལ་ཆེན་པོ་ཆགས་བསྡད་ཡོད་པ་རེད།
དྲི་བ། ཉི་ཧོང་ནང་བོད་ཀྱི་ནང་ཆོས་ལ་ལྟ་སྟངས་གང་འདྲ་ཡོད་མེད་དང་། ནང་ཆོས་དར་སྤེལ་གྱི་གནས་སྟངས་གང་འདྲ་ཡིན་ནམ།
ལན། སྤྱིར་བཏང་ཉི་ཧོང་དེ་ནང་པའི་རྒྱལ་ཁབ་ཅིག་ཆགས་ཡོད་པ་རེད། གཞི་རྩའི་ཁོང་ཚོར་གདོད་མའི་ཆོས་ལུགས་ཤིན་ཏོ་ཡོད་ཀྱང་། དུས་རབས་དྲུག་པར་ནང་པ་སངས་རྒྱས་པའི་ཆོས་ལུགས་དར་བ་རེད། ཁོང་ཚོ་ནང་པ་ཡིན་པའི་གཞི་རྟེན་ཡོད་སྟབས། ད་ལྟའི་ཆར་ཨེ་ཤ་ཡའི་ནང་པའི་རྒྱལ་ཁབ་མང་ཆེ་བ་གཞི་རྩའི་ཆ་ནས་བསླབ་པ་སློབ་གཉེར་དེ་ཙམ་མེད་ཀྱང་། ཉི་ཧོང་དང་ནང་པ་གཅིག་པ་ཡིན་པའི་ཆ་ནས་གོ་རྟོགས་ཐུབ་པའི་གནས་སྟངས་ཤིག་ཡོད་པ་རེད། ཉི་ཧོང་དང་ཨེ་ཤ་ཡའི་ཐེག་དམན་གྱི་ལུང་པ་དེ་དག་ནང་ཤེས་རབ་སྙིང་པོ་འདོན་གྱི་ཡོད་ཀྱང་། འགྲེལ་བཤད་ཡག་པོ་རྒྱག་ཐུབ་མཁན་ཁག་པོ་ཆགས་བསྡད་ཡོད་པ་ཁོ་རང་ཚོས་ཚུར་ལབ་ཀྱི་ཡོད་པ་རེད། གནས་སྟངས་དེ་འདྲའི་འོག་༧གོང་ས་མཆོག་ཉི་ཧོང་དུ་ཡང་ཡང་ཕེབས་ཏེ་ཆོས་འབྲེལ་བཞག་པ་དང་། འདི་ལོའི་ཆིབས་བསྒྱུར་སྐབས་གསང་སྔགས་དར་ལུགས་དར་སྟངས་དང་། གསང་སྔགས་སངས་རྒྱས་ཀྱི་བཀའ་མ་རེད་འདོད་མཁན་ཚོར་རྒྱུ་མཚན་དང་ལྡན་པའི་ཐོག་ནས་འགྲེལ་བཤད་གནང་བ་བཅས་ལ་བརྟེན་ཏེ། ནང་ཆོས་སྤྱི་དང་ལྷག་པར་དུ་གསང་སྔཊ་ཀྱི་བསྟན་པའི་སྐོར་ལ་དོ་སྣང་ཆེ་རུ་ཕྱིན་ཡོད་པ་དང་། ༧གོང་ས་མཆོག་གིས་གསུང་ལུཊ་གསུང་སྟངས་ཧ་ཅང་ངོ་མཚར་ཆེན་པོ་ཞིག་རེད་ཟེར་ནས་ཁོ་རང་ཚོས་ལབ་ཀྱི་འདུག
དྲི་བ། མ་འོངས་པར་བོད་མིའི་སྒྲིག་འཛུཊ་དང་བོད་མི་ཚོའི་ངོས་ནས་ཉི་ཧོང་ནང་བོད་དོན་རྒྱབ་སྐྱོར་འཚོལ་ཐབས་དང་འབྲེལ་ལམ་ཡར་རྒྱས་གཏོང་ཕྱོཊ་ཐད་ག་རེ་གནང་དགོས་ཀྱི་འདུག་གམ།
ལན། སྐུ་ཚབ་དོན་གཅོད་ཀྱི་ལས་ཡུན་རིང་ལས་ཀ་ག་རེ་གནང་ཡོད་མེད་གོང་དུ་ཞུས་ཟིན་པ་ཡིན། སོ་སོའི་ངོས་ནས་གང་ཐུབ་ཞུས་པའི་གྲུབ་དོན་དེ་རེད། རྗེས་མ་སྐུ་ཚབ་དོན་གཅོད་གསར་བ་ཕེབས་ཀི་རེད། སྐུ་ཚབ་དོན་གཅོད་གསར་པ་ལུང་རྟོགས་ལ་མཚོན་ན། ཉི་ཧོང་དོན་གཅོད་ཀྱི་ལས་རོགས་བྱས་ཏེ་རྒྱུན་རིང་པོར་ཕྱག་ལས་གནང་བ་རེད། ཉི་ཧོང་གི་གནས་སྟངས་ཆ་ཚང་ཡག་པོ་མཁྱེན་མཁན་ཞིག་རེད། སྐད་ཡིག་དང་དེ་འདྲའི་ཐོག་དཀའ་ངལ་ཁྱོན་ནས་ཡོད་པ་མ་རེད། ལུང་རྟོགས་ལགས་ཀྱི་འོག་ཏུ་འཕྱར་གྲུ་མཉམ་འདེགས་བྱེད་མཁན་གལ་ཆེ་ཤོས་ས་གནས་བོད་མི་ཚོ་ཆགས་བསྡད་ཡོད་དུས། ཁོང་ཚོས་དོན་གཅོད་འོག་མཉམ་རུབ་དང་འཕྱར་གྲུ་མཉམ་འདེགས་བྱས་ན། ད་བར་ལས་ཀ་བྱས་བཞག་པ་དང་ས་བོན་བཏབ་བཞག་པ་དེར་འབྲས་བུ་སྨིན་གི་རེད། ས་གནས་བོད་མིའི་སྐྱིད་སྡུག་དེ་དག་གིས་དོན་གཅོད་ཀྱི་ལས་ཀར་མཐུན་འགྱུར་འགྲོ་བ་ལས་ཆབ་སྲིད་ཚོགས་པའི་ངོ་བོར་ཕྱིན་པ་ཡིན་ན་འགོག་རྐྱེན་ཡོང་གི་རེད། དེ་ལྟར་མ་ཡོང་བར་འབོད་སྐུལ་དང་རེ་བ་ཞུས་པ་ཡིན།
དྲི་བ། འདི་ལོའི་ཕྱི་ཟླ་ ༦ ཚེས་ ༢༥ ཉིན་ནས་བཟུང་སྐུ་ཉིད་ནས་ཨོ་སི་ཊོ་ལི་ཡའི་སྐུ་ཚབ་དོན་གཅོད་ཀྱི་ལས་འགན་བཞེས་ཀྱི་ཡོད་སྟབས། དམིགས་བསལ་གྲ་སྒྲིག་དང་འཆར་གཞི་གསར་བ་འདྲ་ཡོད་དམ།
ལན། ང་ལ་གྲ་སྒྲིག་དང་འཆར་གཞི་གསར་བ་དང་དམིགས་བསལ་མེད། ཐོག་མར་ས་གནས་ཀྱི་གནས་སྟངས་ལ་ཉན་ཞིབ་བྱེད་དགོས་པ་རེད། སྤྱི་ཡོངས་ཀྱི་ཆ་ནས་དོན་གཅོད་ཟུར་པས་ལུང་པའི་གནས་སྟངས་སྐོར་རྩིས་ལེན་རྩིས་སྤྲོད་སྐབས་གསལ་བཤད་གནང་གི་རེད། ཉི་ཧོང་ནས་ཨོ་སི་ཊོ་ལི་ཡར་གནས་སྤོར་བྱས་པ་ཙམ་རེད་མ་གཏོགས་ལས་འགན་དང་ལས་ཀའི་ངོ་བོ་ཧ་ལམ་གཅིག་པ་རེད། ང་རང་གིས་དུས་རྒྱུན་དུ་ཀུན་སློང་འཁུར་སྟངས་དེ་གནད་དོན་གསུམ་གྱི་ཐོག་འགྲོ་བསྡད་ཀྱི་ཡོད། དང་པོ་ག་དུས་ཡིན་ཡང་༧གོང་ས་མཆོག་ལ་མཚན་ཤས་མི་འགྲོ་བ་དང་། ཁོང་གི་དགོངས་པ་དང་མཐུན་པའི་ལས་ཀ་བྱེད་ཐབས་འབད་བརྩོན་བྱེད་རྒྱུ། གཉིས་པ། བོད་དང་བོད་མིར་མཚན་ཤས་མི་འགྲོ་བ། བོད་དང་བོད་མིའི་བདེ་དོན་དང་འབྲེལ་བའི་ལས་ཀའི་ཐོག་ཤུགས་རྒྱག་རྒྱུ། གསུམ་པ། སོ་སོས་ས་གནས་གང་དུ་ལས་ཀ་བྱེད་ཀྱིན་ཡོད་པའི་ལུང་པ་དེའི་ཁྲིམས་དང་སྒྲིག་གཞི་བརྩི་སྲུང་ཡག་པོ་བྱེད་རྒྱུ་བཅས་གཞིར་བཞག་ཏེ་ད་ལྟའི་བར་ལས་ཀ་བྱས་བསྡད་པ་ཡིན་ལ། མ་འོངས་པར་ཡང་དེ་དག་གཞིར་བཞག་ཏེ་ལས་ཀ་བྱེད་རྒྱུ་ཡིན།
གསར་འགོད་པ། དོན་གོ
ག་རེ་རེད། སྐུ་ངོ་འདིས་གོང་ས་མཆོག་མ་གཏོགས་སྲིད་སྐྱོང་དང་སྒྲིག་འཛུགས་གླེང་ཙམ་ཡང་གནང་མི་འདུག འདི་འགལ་བ་ཆེན་པོ་ཞིག་མ་རེད་དམ།