དེ་རིང་ཕྱི་དྲོར་རྒྱ་གར་གྱི་རྒྱལ་ས་ལྡི་ལི་གསར་བར་སྲིད་བློན་གསར་བ་སྐུ་ཞབས་མུ་དྷི་མཆོག་གིས་སྲིད་བློན་གྱི་ལས་འཁུར་དམ་འབུལ་ཞུ་རྒྱུ་ཡིན་འདུག
དེ་རིང་ཕྱི་དྲོའི་ཆུ་ཚོད་ ༦།༠༠ སྟེང་རྒྱ་གར་རྒྱལ་ས་ལྡི་ལི་གསར་བའི་སྲིད་འཛིན་ལས་ཁུངས་ཀྱི་མདུན་ཐང་དུ། རྒྱ་གར་གྱི་སྲིད་འཛིན་པུར་ནཱ་པུ་མོར་ཀར་ཇེ་ (Pranab Mukherjee)མཆོག་མདུན་དུ། སྐབས་ ༡༦ པའི་རྒྱ་གར་གྲོས་ཚོགས་འོག་མའི་རྒྱལ་ཡོངས་འོས་བསྡུ་ཆེན་མོའི་ཁྲོད་རྒྱལ་ཁ་ཐོབ་མཁན་བྷེ་ཇེ་པེ་སྲིད་དོན་ཚོགས་པའི་སྲིད་བློན་འོས་མི་སྐུ་ཞབས་ནཱ་རན་ཌི་མུ་དྷེ་ (Narendra Modi) མཆོག་གིས། རྒྱ་གར་གྱི་སྲིད་བློན་ ༡༥ པའི་ལས་འཁུར་དམ་འབུལ་གནང་རྒྱུ་ཡིན་པ་དང་། དེ་བཞིན་ཁོང་གི་སྲིད་གཞུང་གསར་བའི་བློན་ཆེན་ལྷན་ཚོགས་ནང་བློན་ཆེན་ ༤༠ ཙམ་ཡོད་པའི་ཁྲོད་བློན་ཆེན་ ༢༠ ཙམ་གསར་བསྐོ་དང་དམ་འབུལ་གནང་རྒྱུ་ཡིན་སྟབས། ད་ལྟ་རྒྱ་གར་གསར་ལམ་ཁག་གིས་ཚ་ཚ་འུར་འུར་གྱིས་གྲ་སྒྲིག་བྱེད་བཞིན་ཡོད་འདུག
སྲིད་བློན་དམ་འབུལ་མཛད་སྒོའི་སྟེང་། རྒྱ་གར་གྱི་ཁྱིམ་མཚེས་རྒྱལ་ཁབ་པ་ཀི་སི་ཐན་གྱི་སྲིད་བློན་ནཱ་ཝ་རྫི་ཞཱར་ཧྥི (Nawaz Sharif) མཆོག་དང་། སིང་གྷ་ལའི་སྲིད་འཛིན་མཱ་ཧིན་ཊིར་ (Mahinda Rajapaksa) མཆོག ཨབ་གྷན་གྱི་སྲིད་འཛིན་ཁྰར་ཛེ་ (Hamid Karzai) མཆོག བལ་ཡུལ་གྱི་སྲིད་བློན་སོ་ཤེལ་ཀོ་རེ་ལཱ་( Susshil Koirala)མཆོག འབྲུག་གི་སྲིད་བློན་ཚེ་རིང་སྟོབས་རྒྱལ་མཆོག མོ་རི་ཤི་ཡ་ (Mauritius) སྲིད་བློན་ནཱ་བིན་(Navin Ramgoolam) མཆོག མལ་ཌེབ་སི་ (Maldives) ཡི་སྲིད་འཛིན་ཨབ་པུ་ཊོབ་ལཱ་ཡཱ་མེན་ (Abdulla Yameen Abdul Gayoom) མཆོག བྷང་ག་ལའི་སྲིད་བློན་གྱི་སྐུ་ཚབ་གྲོས་ཚོགས་ཀྱི་ཚོགས་གཙོ་ལྕམ་ཞི་རེན་ (Shirin Chowdhury) མཆོག་བཅས་འཛམ་གླིང་རྒྱལ་ཁབ་ཁག་གི་སྐུ་ཚབ་མི་ ༣༠༠༠ ལྷག་མཉམ་ཞུགས་གནང་རྒྱུ་ཡིན་འདུག
ཐེངས་འདིར་པ་ཀི་སི་ཐན་གྱི་སྲིད་བློན་ནཱ་ཝ་རྫི་ཞཱར་ཧྥི་མཆོག་རྒྱ་གར་ལ་མ་འབྱོར་བའི་སྔོན་དུ། པ་ཀི་སི་ཐན་གཞུང་གིས་རྒྱལ་ཁབ་གཉིས་ཀྱི་ཕྱི་སྲིད་འབྲེལ་ལམ་བསྐྱར་གསོ་ཡོང་བའི་རྣམ་འགྱུར་སྟོན་ཆེད། དེ་སྔོན་པ་ཀི་སི་ཐན་གྱིས་འཛིན་བཟུང་བྱས་པའི་རྒྱ་གར་གྱི་ཉ་བ་ ༡༥༡ ཡོད་པ་དེ་དག་ཀློད་གྲོལ་བཏང་ཡོད་འདུག་ལ། ད་ལྟའི་བར་རྒྱ་གར་གཞུང་གིས་པ་ཀི་སི་ཐན་གྱི་མགོ་ཁྲིད་གང་ཡང་སྲིད་བློན་དམ་འབུལ་གྱི་མཛད་སྒོར་མགྲོན་འབོད་བྱས་མྱོང་མི་འདུག
རྒྱ་གར་གྱི་སྲིད་བློན་གསར་པ་མུ་དྷི་མཆོག་གིས་ཁོང་གི་བཀའ་བློན་ལྷན་ཚོགས་ཁྲོད། སྐུ་ཞབས་ཨཱ་རོན་ཇིད་ཌི་ལེ་( Arun Jaitley) ལགས་དང་སྐུ་ཞབས་རའ་ཇི་ནཱ་ཐི་སིན་ (Rajnath Singh) ལགས། ལྕམ་སོ་ཞི་མྰ་ (Sushma Swaraj)ལགས། སྐུ་ཞབས་གྷོ་ཌི་ཀ་རེ་(Nitin Gadkari) ལགས། སྐུ་ཞབས་ནིབ་ཌོབ་(Venkaiah Naidu) ལགས། སྐུ་ཞབས་ཨ་ནམ་ཐི་ཀོ་མར་ (Ananth Kumar)ལགས ། སྐུ་ཞབས་རཱ་བེ་ཞང་ཀར་(Ravi Shankar Prasad) ལགས། ལྕམ་ཨོ་མྰ་བྷར་ཊེ་(Uma Bharti) ལགས། སྐུ་ཞབས་ཧར་ནཱ་བཱར་ལྡན་(Harsh Vardhan) སྐུ་ཞབས་པེ་ཡོ་ཞི་( Piyush Goel) བཅས་སོགས་བདམས་ཡོད་འདུག་ཀྱང་ལས་གནས་ཆ་བགོ་བྱེད་ཕྱོགས་ད་སྔ་གསལ་ཁ་མི་འདུག
རྒྱ་གར་གྱི་གསར་ལམ་ཁག་ཏུ་གནས་ཚུལ་ཐོན་པར་ལྟར་ན། མུ་དྷིའི་སྲིད་གཞུང་གིས་དགུང་ལོ་ ༨༦ ལ་ཕེབས་པའི་བྷེ་ཇེ་པེ་སྲིད་དོན་ཚོགས་པའི་མགོ་ཁྲིད་རྒན་པ་ཨད་ཌི་བཱ་ནེ་(L.K Advani)ལགས་བློན་ཆེན་དང་གྲོས་ཚོགས་འོག་མའི་ཚོགས་གཙོ་སོགས་ཀྱི་མཚན་གནས་གང་ཡོད་ད་སྔ་གསལ་ཁ་བཟོས་མེད་སྟབས། ཁོ་རང་སྲིད་དོན་ཚོགས་པའི་སློབ་སྟོན་པ་དང་བྷེ་ཇེ་པེ་རྒྱལ་ཡོངས་དམངས་གཙོ་མནའ་འབྲེལ་ཚོགས་པ་ (NDA) ཡི་ཚོགས་གཙོ་བསྐོ་བཞག་བྱེད་སྲིད་པའི་ཚོད་དཔག་བྱེད་བཞིན་ཡོད་འདུག
ཉེ་ལམ་རྒྱ་གར་དབུས་འོས་བསྡུ་ལྷན་ཁང་གིས་འོས་བསྡུའི་གྲུབ་འབྲས་གསལ་བསྒྲགས་བསྐྱངས་ཏེ་སྐུ་ཞབས་ནཱ་རན་ཌི་མུ་དྷེ་མཆོག་ལ་སྲིད་བློན་རྒྱལ་ཁ་ཐོབ་ཡོད་པ་བསྒྲགས་རྗེས། བོད་མིའི་དབུ་ཁྲིད་༧གོང་ས་མཆོག་གིས་ཁོང་ལ་འཚམས་འདྲིའི་གསུང་འཕྲིན་བསྩལ་ཡོད་སྟབས། སྐུ་ཞབས་ནཱ་རན་ཌི་མུ་དྷེ་མཆོག་གིས་ཏཱ་ལའི་བླ་མ་མཆོག་གིས་ངའི་ལས་དོན་ལམ་ལྷོང་ཡོང་བར་ཐུགས་སྨོན་མཛད་པ་དེར་ཐུགས་རྗེ་ཆེ་ཞུ་རྒྱུ་ཡིན་ཞེས་དགའ་སྤྲོ་ཆེན་པོ་མཛད་ཡོད་འདུག
གསར་འགོད་པ། ལྷ་སྐྱབས་རྒྱལ།
སྲིད་བློན་མཆོག་ལས་དོན་ལེགས་འགྲུབ་ཡོང་པའི་སྨོན་འདུན་གྲང་མེད་ཞུ་རྒྱ་གར་ང་ཚོ་ལོ་ངོ་ལྔ་བཅུ་ང་གྲང་རིང་ལྷོད་སྡོད་བྱེད་བཅུག་པ་མ་ཟད་ད་ལམ་སྲིད་བློན་མཛད་སྒོ་ལ་ཡང་ང་ཚོ་སྐད་གཏོང
རྒྱ་གར་གྱི་ཇ་ཚོང་མཁན་རྒྱལ་འགྱུར་ཅིག
བོད་ཀྱི་བདེན་པ་བརྡར་མཁན་རྒྱལ་འགྱུར་ཅིག
སྲིད་བློན་མཆོག་་་ལས་འགན་ལེགས་གྲུབ་ཡོང་བའི་འཚམས་དྲིན་བཀྲ་ཤིས་བདེ་ལེགས་གྲང་མེད་ཞུའོ་་་་་་་་ཚེ་རིང་ལོ་རྒྱ་་་་།