༧གོང་ས་མཆོག་རྒྱ་གར་གྱི་གྲོང་ཁྱེར་མུམ་བྷེར་ཆིབས་བསྒྱུར་གྱིས་ཉིན་གྲངས་བཞིའི་རིང་ཆོས་ཕྱོཊ་ཀྱི་མཛད་འཕྲིན་ཁག་བསྐྱང་རྒྱུ་ཡིན་འདུག
དེ་རིང་ཕྱི་ཚེས་ ༢༩ ཉིན་གྱི་ཞོགས་པའི་ཆུ་ཚོད་ ༦།༡༥ ཡས་སམ་སུ། ༸གོང་ས་མཆོག་རྒྱ་གར་གྱི་གྲོང་ཁྱེར་མུམ་བྷེར་རྟེན་གཞི་བྱས་པའི་ནང་པའི་ཆོས་ཚོགས་ན་ལེནྡྲ་ཤི་ཀི་ཤ་ (Nalanda Shiksha) ཞེས་པས་ཇི་ལྟར་གསོལ་འདེབས་ཞུས་དོན་ལྟར་བཞུགས་སྒར་ནས་ཆིབས་བསྒྱུར་གནང་སོང་། སང་ཉིན་ཚེས་ ༣༠ ཉིན་ནས་འཆར་ཟླའི་ཚེས་ ༢ བར་གྱི་ཉིན་བཞིའི་རིང་༧གོང་ས་མཆོག་གིས་རྒྱ་གར་གྱི་མ་ཧྰ་ར་ཤི་ཊ་ (Maharashtra) མངའ་སྡེའི་རྒྱལ་ས་མུམ་བྷེར་ (Mumbai) ཡོད་པའི་སོ་མ་ཡའི་མཐོ་རིམ་སློབ་གཉེར་ཁང་དུ། རྒྱ་གར་གྱི་ནང་པའི་དད་ལྡན་པ་རྣམས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་གི་ལེའུ་དྲུག་པ་དང་བརྒྱད་པ་དང་། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་བཅས་ཀྱི་ཆོས་འབྲེལ་སྩལ་རྒྱུ་ཡིན་འདུག
ཁ་སང་ཚེས་ ༢༨ ཉིན་༧གོང་ས་མཆོག་གིས་བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་རྒྱ་གར་གྱི་ཡུལ་སྐོར་སྤྲོ་འཆམ་པ་གཙོས་པའི་འཛམ་གླིང་རྒྱལ་ཁབ་ ༦༢ ནས་ཕེབས་པའི་ཡུལ་སྐོར་བ་་ ༡༠༠༠ བརྒལ་བར་མཇལ་ཁ་དང་སྐུ་པར་ལྷན་སྒྲོན་གནང་ཡོད་པར་མ་ཟད། ༧གོང་ས་མཆོག་གིས་ཁོང་ཚོར་ཆོས་དང་མ་འབྲེལ་བའི་ཡ་རབས་བཟང་སྤྱོད་དང་འཚེ་མེད་ཞི་བ། ཆོས་ལུགས་མཐུན་སྒྲིལ་བཅས་ཀྱི་སྐོར་ནས་བཀའ་སློབ་དང་ཁོང་ཚོས་དྲི་བར་ལན་འདེབས་བཅས་གནང་ཡོད་འདུག
གསར་འགོད་པ། དོན་གོ
