ཡུའུ་ཁུ་རེན་གྱི་སྲིད་འཛིན་གསར་པ།

ཡུའུ་ཁུ་རེན་མི་མང་ལ་འོས་བསྡུ་བྱས་ཏེ་སྲིད་འཛིན་གསར་པ་བདམས་ཐོན་བྱུང་ཡོད་པ་དང་། ཟླ་རྗེས་མའི་ནང་ཨུ་རུ་སུ་ཧྥ་རན་སིའི་སྲིད་འཛིན་རྣམ་གཉིས་ཐུག་འཕྲད་བྱ་རྒྱུ་སོགས་ཀྱི་གནས་ཚུལ་ཐོན་འདུག

ཟླ་འདིའི་ཚེས་ ༢༥ ཉིན་རྒྱལ་སྤྱིའི་རང་དབང་ལྡན་པའི་ཚོགས་པའི་སྐུ་ཚབ་དང་ཕྱི་འབྲེལ་མི་སྣ་ ༣༥༠༠ ལྷག་གི་ལྟ་རྟོག་འོག  ཡུའུ་ཁུ་རེན་རྒྱལ་ཡོངས་སྲིད་འཛིན་འོས་བསྡུ་བྱས་པའི་ཁྲོད་ཡུའུ་ཁུ་རེན་མི་མང་ས་ཡ་ ༣༥།༥ ཙམ་གྱིས་འོས་ཤོག་བླུགས་ཏེ། འབྱོར་ལྡན་པ་སྐུ་ཞབས་པོ་རོབ་ཤེན་ཀོ་ (Petro Poroshenko) ལགས་ལ་འོས་གྲངས་བརྒྱ་ཆ་ ༥༦ ཐོབ་སྟབས་ཏེ་སྲིད་འཛིན་དུ་བདམས་ཐོན་གསལ་བསྒྲགས་སྤེལ་ཡོད་ཅིང་། དེ་མ་ཐག་ཨ་རི་དང་ནུབ་ཕྱོགས་རྒྱལ་ཁབ་ཚོས་ཁོང་ལ་འཚམས་འདྲི་དང་སྦྲགས་དཔལ་འབྱོར་སོགས་ཀྱི་རོགས་སྐྱོར་བྱ་རྒྱུ་ཡིན་ཚུལ་ཁས་ལེན་བྱས་ཡོད། ཟླ་རྗེས་མའི་ཚེས་མགོར་ཁོང་ཡུའུ་ཁུ་རེན་གྱི་སྲིད་འཛིན་གསར་པས་ལས་འཁུར་ཞུ་རྒྱུ་ཡིན་འདུག

སྐུ་ཞབས་པོ་རོབ་ཤེན་ཀོ་ (Petro Poroshenko) ལགས་ཀྱིས་མང་ཚོགས་ལ་གཏམ་བཤད་ཅིག་སྤེལ་བའི་ནང་། ཁོང་གིས་སྲིད་འཛིན་བྱེད་པའི་དུས་ཡུན་ནང་ཡུའུ་ཁུ་རེན་ནང་ཟིང་འཁྲུག་བཀག་འགོག་བྱས་ཏེ་རྒྱལ་ཁབ་ནང་བརྟན་བརླིང་དང་ཆིག་སྒྲིལ་ཡོང་བར་འབད་བརྩོན་བྱེད་རྒྱུ་ཡིན་པ་མ་ཟད། དཔལ་འབྱོར་བསྐྱར་གསོའི་བྱེད་ཆེད་ཡུ་རོབ་མཐུན་ཚོགས་དང་མཉམ་དུ་དཔལ་འབྱོར་ཚོང་འབྲེལ་གྲོས་ཆོད་ལ་གང་མགྱོགས་མིང་རྟགས་དགོད་རྒྱུ་ཡིན་ཚུལ་དང་། ཡུའུ་ཁུ་རེན་གྱི་མང་ཚོགས་ནང་ཕྱོགས་འགལ་མི་འགྲོ་བ་དང་ཨུ་རུ་སུའི་མགོ་ཁྲིད་ཚོས་ཡུའུ་ཁུ་རེན་ལ་ལྟ་སྟངས་ངན་པ་མ་ཡོང་ཆེད། ཡུའུ་ཁུ་རེན་ཨ་རིས་སྣེ་ཁྲིད་པའི་ནུབ་ཕྱོགས་མཉམ་འབྲེལ་དམག་དཔུང་ (NATO) ནང་འཛུལ་ཞུགས་མི་བྱེད་པར་ཨུ་རུ་སུ་དང་མཉམ་དུ་གྲོས་མོལ་བརྒྱུད་འགྲིག་འཇགས་ཡོང་ཐབས་བྱ་རྒྱུ་ཡིན་ཚུལ་སོགས་བརྗོད་འདུག

ཐེངས་འདིའི་སྲིད་འཛིན་འོས་བསྡུའི་སྐབས་གྱེན་ལོག་པ་ཚོས་སྲིད་འཛིན་འོས་བསྡུ་ལ་ངོས་ལེན་མེད་པའི་རྣམ་འགྱུར་སྟོན་ཆེད། ཤར་ཕྱོགས་གྲོང་ཁྱེར་ཁག་ཅིག་ནང་གི་འོས་བསྡུའི་ས་གནས་ལ་འཇིགས་སྐུལ་བཙན་འཛུལ་བྱས་ཡོད་ཀྱང་། སྐུ་ཞབས་པོ་རོབ་ཤེན་ཀོ་ཡིས་གྱེན་ལོག་པ་ཚོས་སྲིད་གཞུང་ལ་མཚོན་ཆ་ཕྱིར་སྤྲོད་དང་མགོ་བཏགས་ན་ནག་ཉེས་གུ་ཡངས་གཏོང་རྒྱུ་ཡིན་པར་བསྒྲགས་ཡོད། ད་ལྟའི་ཆར་ཡུའུ་ཁུ་རེན་བར་བརྒལ་སྲིད་གཞུང་གིས་གྱེན་པ་ཚོར་ཁ་གཏོད་གཅོག་པའི་ནུས་ཤུགས་ཇེ་ཆེར་བཏང་སྟབས། ཨུ་རུ་སུས་ཡུའུ་ཁུ་རེན་མཉམ་དུ་གྲོས་མོལ་བྱེད་པར་སྒོ་ཕྱེས་ཡོད་ཀྱང་། ཡུའུ་ཁུ་རེན་གྱིས་ངེས་པར་དུ་ཤར་ཕྱོགས་གྲོང་ཁྱེར་ཁག་ནང་གི་དམག་མི་ཕྱིར་འཐེན་དགོས་པར་ནན་བརྗོད་བྱས་ཡོད་འདུག

ཁ་སང་ཕྱི་ཚེས་ ༢༨ ཉིན་ཨུ་རུ་སུ་གཞུང་གིས་གསལ་བསྒྲགས་སྤེལ་བ་ལྟར་ན། ཟླ་རྗེས་མའི་ཚེས་ ༥ ཉིན་ཧྥ་རན་སིའི་སྲིད་འཛིན་སྡོད་གནས་ཨེ་ལེ་སེ་ཕོ་བྲང་དུ། ཨུ་རུ་སུའི་སྲིད་འཛིན་པུ་ཊིན་དང་ཧྥ་རན་སིའི་སྲིད་འཛིན་ཧོད་ལན་ཌི་ (Francois Hollande)གཉིས་ཀྱིས་ཐུག་འཕྲད་གནང་སྟེ། ཡུའུ་ཁུ་རེན་གྱི་གནད་དོན་ཚུད་པའི་རྒྱལ་སྤྱི་དང་རྒྱལ་ཁབ་གཉིས་ཀྱི་གནད་དོན་ཁག་ཅིག་ལ་གྲོས་མོལ་བྱ་རྒྱུ་ཡིན་པ་དང་། དེ་ནི་ཨུ་རུ་སུས་ཡུའུ་ཁུ་རེན་གྱི་རང་སྐྱོང་མངའ་ཁུལ་ཁུ་རེ་མཱེ་ཡ་བཙན་བཟུང་བྱས་རྗེས་ནུབ་ཕྱོགས་རྒྱལ་ཁབ་ཀྱི་མགོ་ཁྲིད་བར་ཐུག་འཕྲད་བྱེད་པ་ཐོག་མ་དེ་ཆགས་རྒྱུ་ཡིན་འདུག

ཡུའུ་ཁུ་རེན་ཤར་ཕྱོགས་གྲོང་ཁྱེར་ཊོབ་ནེ་ཌི་སི་ཁུ་ (Donetsk) ཡི་གྱེན་ལོག་པ་ཚོས། གྲོང་ཁྱེར་གྱི་གནམ་ཐང་བཙན་བཟུང་བྱས་པར་བརྟེན། ཡུའུ་ཁུ་རེན་དམིགས་བསལ་དམག་དཔུང་གིས་གྱེན་ལོག་པ་ཚོར་འཇབ་རྒོལ་བྱས་ཏེ་གནམ་ཐང་དང་གྲོང་ཁྱེར་ཕྱིར་བླངས་ཡོད་པ་མ་ཟད། འཐབ་འཛིང་ཁྲོད་མི་ ༤༠ ཙམ་བསད་ཡོད་འདུག གནད་དོན་འདིའི་ཐད་ཡུའུ་ཁུ་རེན་གཞུང་གིས་བསྐོ་བཞག་བྱས་པའི་གྲོང་ཁྱེར་སྤྱི་ཁྱབ་ལོབ་ཁུ་ཡན་ཆན་ཀོ་(Oleksandr Luckyanchenko)ལགས་ཀྱིས་གསར་འགོད་པར། ཁོང་ཚོ་ཁྲོད་ཀྱི་མི་གཉིས་མ་གཏོགས་གཞན་ཚང་མ་ཨུ་རུ་སུའི་མི་ཡིན་སྐོར་བརྗོད་འདུག

གནད་དོན་དབྱེ་པ་ཚོས། སྲིད་འཛིན་པུ་ཊིན་གྱིས་ཧྥ་རན་སི་བརྒྱུད་ནས་ཡུ་རོབ་མཐུན་ཚོགས་མཉམ་དུ་ཡང་བསྐྱར་འབྲེལ་ལམ་གསར་བ་ཞིག་སྒོ་འབྱེད་ཐུབ་པར་འབད་བརྩོན་བྱེད་ཀྱིན་ཡོད་ཀྱང་། ཨུ་རུ་སུས་ཡུའུ་ཁུ་རེན་གྱི་གནད་དོན་སེལ་རྒྱུར་གཞུང་གསར་བར་གཞོགས་འདེགས་མ་བྱས་ཚེ། ཨ་རི་གཙོས་ནུབ་ཕྱོགས་རྒྱལ་ཁབ་ཚོས་མུ་མཐུད་དུ་ཨུ་རུ་སུ་ཁེར་རྐྱང་འཇོག་རྒྱུ་ཡིན་པར་ཚོད་དཔག་བྱེད་བཞིན་ཡོད་འདུག