དེ་རིང་རྒྱ་ནག་གི་མཚོ་དམག་གྲུ་གཟིངས་གཉིས་ཀྱིས་ཞི་བདེ་རྒྱ་མཚོའི་མངའ་ཁུལ་སཱིན་ཁཱ་ཁའོ་མཚོ་གླིང་ལ་བཙན་འཛུལ་བྱས་འདུག
དེ་རིང་སྔ་དྲོའི་ཆུ་ཚོད་ ༡༠།༠༠ ཐོག ཉི་ཧོང་དང་རྒྱ་ནག་གིས་རྩོད་གླེང་བྱེད་བཞིན་པའི་ཞི་བདེ་རྒྱ་མཚོའི་མངའ་ཁུལ་སཱིན་ཁཱ་ཁའོ་མཚོ་གླིང་གི་སྤྱི་གཡར་མཚོ་ཁུལ་དུ། རྒྱ་ནག་གི་མཚོ་དམག་གྲུ་གཟིངས་གཉིས་ཀྱིས་མཚོ་ལེ་ ༡༢ ཙམ་གྱི་སར་གློ་བུར་བཙན་འཛུལ་གྱིས་ཉི་ཧོང་གི་མཚོ་དམག་ལ་འཇིགས་སྣང་སྐུལ་ཡོད་སྟབས། ཨ་རི་དང་ཉི་ཧོང་གཞུང་གིས་རྒྱ་ནག་གི་བྱ་སྤྱོད་དེར་སྐྱོན་བརྗོད་བྱས་འདུག
འདིའི་ཐད་ཉི་ཧོང་གི་སྲིད་བློན་ཤིང་ཛོ་ཨ་བྷེ་ཡིས། “ རྒྱ་ནག་གིས་ཟླ་འདིའི་ནང་སཱིན་ཁཱ་ཁའོ་མཚོ་གླིང་དུ་ཐེངས་གསུམ་བཙན་འཛུལ་བྱས་ཡོད་སྟབས། མ་འོངས་པར་ཉི་ཧོང་གིས་རྒྱལ་སྤྱིའི་ཁྲིམས་ལུགས་དང་མཐུན་པ་རྒྱ་ནག་ལ་ཁ་གཏད་གཅོག་རྒྱུ་ཡིན།” ཞེས་བརྗོད་འདུག ཨ་རིའི་བདེ་སྲུང་དྲུང་ཆེ་ཧེ་གྷལ་ (Chuck Hagel ) ལགས་ཀྱིས། “ རྒྱ་ནག་གི་བྱ་སྤྱོད་དེ་ནི་ཨེ་ཤ་ཡའི་བརྟན་བརླིང་སྲུང་སྐྱོབ་ལ་གཏོར་རྒོལ་གཏོང་གཞི་ཞིག་ཡིན་སྟབས། གལ་ཏེ་རྒྱ་གཞུང་གིས་རྒྱལ་སྤྱིའི་བདེ་འཇགས་ལ་གནོད་སྐྱོན་བཟོས་ཚེ་ཨ་རིས་དེ་མཚུངས་འཁོན་ལན་སློག་རྒྱུ་ཡིན།” ཞེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། ཁ་སང་ཤིང་ཛོ་ཨ་བྷེ་མཆོག་གིས་ལྷོ་ཤར་ཨེ་ཤ་ཡའི་རྒྱལ་སྲུང་བདེ་འཇགས་ཀྱི་ཚོགས་འདུའི་སྐབས་རྒྱ་ནག་ལ་སྐྱོན་བརྗོད་ཤུགས་ཆེན་བྱས་ཡོད་སྟབས། རྒྱ་ནག་གཞུང་ཁོང་ཁྲོ་ལངས་ཏེ་ཐེངས་འདིར་སཱིན་ཁཱ་ཁའོ་མཚོ་གླིང་ལ་བཙན་འཛུལ་བྱས་པ་ཞིག་ཡིན་ཞིང་། གལ་ཏེ་རྒྱལ་ཁབ་གཉིས་པོས་ཞི་མོལ་བརྒྱུད་དཀའ་རྙོག་དེ་དག་མ་སེལ་ཚེ། མ་འོངས་པར་ཨེ་ཤ་ཡའི་མངའ་ཁུལ་ནང་དམག་འཁྲུག་ལངས་རྒྱུ་ཡིན་སྐོར་བརྗོད་འདུག
༢༠༡༢ ལོའི་ཟླ་ ༩ ནང་ཉི་ཧོང་གཞུང་གིས་རྒྱ་ནག་དང་བདག་དབང་རྩོད་ལེན་བཞིན་པའི་ཤར་རྒྱ་ནག་རྒྱ་མཚོའི་མཚོ་ཁུལ་ཁག་ཅིག་བདག་བཟུང་བྱ་རྒྱུ་ཡིན་སྐོར་བསྒྲགས་རྗེས། རྒྱ་ནག་གིས་ཉི་ཧོང་གཞུང་ལ་སྡིགས་ར་ཐེངས་མང་བྱས་ཡོད་ཅིང་། ལྷག་པར་དུ་ཉི་ཧོང་དང་རྒྱ་ནག་གི་རྩོད་གཞི་ཅན་གྱི་སཱིན་ཁཱ་ཁཱའོ་མཚོ་གླིང་དུ་རྒྱ་ནག་གི་མཚོ་དམག་གྲུ་གཟིངས་བཏང་སྟེ། ཟླ་འདིའི་ཚེས་ ༢ དང་ཚེས་ ༡༢། དེ་རིང་བཅས་བཙན་འཛུལ་ཐེངས་གསུམ་བྱས་ཡོད་འདུག
༢༠༡༣ ལོའི་ཟླ་ ༡༡ པའི་ཚེས་ ༧ ཉིན་རྒྱ་གཞུང་གིས་ཞི་བདེ་རྒྱ་མཚོའི་ཐོག་མཁའ་དབྱིངས་ཐིག་ཚད་བཟོས་ཏེ། ཨེ་ཤ་ཡའི་མངའ་ཁུལ་གྱི་ཁྱིམ་མཚེས་རྒྱལ་ཁབ་ཁག་ལ་གནོན་ཤུགས་སྤྲད་ཡོད་སྟབས། བྷུར་ནི་ (Brunei) དང་མ་ལི་ཤི་ཡ། ཝེ་ཋི་ནམ། ཧྥི་ལི་ཕིན། ཐེ་ཝན་བཅས་ཀྱིས་རྒྱ་ནག་ལ་ཁ་གཏད་གཅོག་ཐབས་བྱེད་བཞིན་ཡོད།
སིང་གྷ་པུར་གྱི་རྒྱལ་སར་ལྷོ་ཤར་ཨེ་ཤ་ཡའི་རྒྱལ་སྲུང་བདེ་འཇགས་སྐོར་གྱི་བགྲོ་གླེང་ཚོགས་འདུ་ཞིག་ཁ་སང་ནས་ཚོགས་བཞིན་ཡོད་ཅིང་། དེར་མཐུན་ཚོགས་ཀྱི་ཚོགས་མའི་རྒྱལ་ཁབ་ཁག་དང་ཨ་རི། ཨོ་སི་ཌོ་ལི་ཡ་བཅས་ཀྱི་འཐུས་མི་མཉམ་ཞུགས་གནང་ཡོད་ལ། ཚོགས་ཐོག་ཏུ་ཉི་ཧོང་གི་སྲིད་བློན་ཤིང་ཛོ་ཨ་བྷེས་ཨེ་ཤ་ཡའི་བརྟན་བརླིང་ནི་རྒྱལ་སྤྱིའི་བདེ་འཇགས་ལ་འབྲེལ་བ་ཡོད་སྟབས། ང་ཚོས་བཙན་འཛུལ་པར་ཁ་གཏད་གཅོག་དགོས་བའི་འབོད་སྐུལ་ཞུས་ཡོད་འདུག
གསར་འགོད་པ། དོན་གྲུབ།
ལམ་འགྲོ་བས་བཤད་པ་འདི་ཧ་ཅང་བདེན་པར་སྙམ། རྒྱ་ནག་གི་ནང་ན་རྙོག་དྲ་ཡོད་དུས། མི་དམངས་ལ་སྐྲག་ནས་མི་དམངས་ཀྱི་བློ་ཁ་བསྒྱུར་བྱེད་ཅིག་རེད།
ཁྱི་ངན་ཞིག་དང་འདྲ་བ་རྒྱ་ནག་དབང་འཛིན་པ་ཚོས་རྒྱལ་ཁབ་ཆུང་ཆུང་རྐྱང་ལ་མ་གཏོགས་ཐུབ་ཚོད་གཏང་བའི་སྙིང་སྟོབས་དེ་མེད་པར་འདས་དང་ད་ལྟ་བར་དུ་བྱུང་མྱངས་མེད།
རྒྱ་ནག་ཧམ་པའི་རང་ཚོད་མ་ཟིན་ན་བསམ་དོན་བཞིན་མི་འགྲུབ་
རྒྱ་ནག་གི་བྱེད་ཐབས་འདི་དྲུག་བཞི་དོན་རྐྱེན་བསྐྱར་ལངས་བྱེད་པར་དོགས་ཏེ་མི་དམངས་ཀྱི་ཁ་ཕྱོགས་བསྒྱུར་བའི་གཡོ་ཐབས་ཤིག་ཏུ་བེད་སྤྱོད་ཀྱི་ཡོད་མོད། རྒྱལ་སྤྱིའི་མི་མང་རྣམས་རྒྱ་ནག་ཟེར་ན་ཁོང་སྤྲོ་ཟ་ས་ཞིག་ཏུ་འགྱུར་བཞིན་པ་འདི་ཡང་། འཛམ་གླིང་ཞི་བདེར་དགའ་བའི་སྐྱེ་བོ་དག་གིས་བཙན་རྒྱལ་རིང་ལུགས་ལ་ཁ་གཏད་ལྕོག་པའི་སྟོབས་ཤུགས་གསར་བ་ཞིག་གི་མགོ་འབུས་པ་ཡིན་པས་དགའ་འོས་པ་ཞིག་རེད།
་་་་་་ ལྷག་པར་དུ་ཉི་ཧོང་དང་རྒྱ་ནག་གི་རྩོད་གཞི་ཅན་གྱི་སཱིན་ཁཱ་ཁཱའོ་མཚོ་གླིང་དུ་རྒྱ་ནག་གི་མཚོ་དམག་གྲུ་གཟིངས་བཏང་སྟེ། ཟླ་འདིའི་ཚེས་ ༢ དང་ཚེས་ ༡༢། དེ་རིང་བཅས་བཙན་འཛུལ་ཐེངས་གསུམ་བྱས་ཡོད་འདུག་་་་་་་་་