མཛངས་མའི་དབུ་རྒྱན་བསྟན་འཛིན་དབྱངས་འཛོམས་ལ་གཡོག་རྒྱུ་རེད།

དེ་རིང་སྔ་དྲོར་བོད་ཀྱི་མཛངས་མ་འགྲན་སྡུར་གྱི་གསར་འགོད་གསལ་བསྒྲགས་ཚོགས་སོང་བ་དང་། འདི་ལོའི་བོད་ཀྱི་མཛངས་མའི་དབུ་རྒྱན་སྒང་ཏོག་ནས་ཡོང་བའི་བུ་མོ་བསྟན་འཛིན་དབྱངས་འཛོམས་ལགས་ལ་གཡོག་རྒྱུ་ཡིན་འདུག

དེ་རིང་སྔ་དྲོའི་ཆུ་ཚོད་ ༡༡ ཐོག འདི་ལོའི་བོད་ཀྱི་མཛངས་མ་འགྲན་སྡུར་གྱི་གསར་འགོད་གསལ་བསྒྲགས་ཚོགས་སོང་བ་དང་། ཐེངས་འདིའི་མཛངས་མ་འགྲན་སྡུར་ནང་དངོས་སུ་ཞུགས་མཁན་སྒང་ཐོག་ནས་ཡོང་བའི་བུ་མོ་བསྟན་འཛིན་དབྱངས་འཛོམས་ལགས་གཅིག་པུ་ཡིན་ལ། ཟླ་འདིའི་ཕྱི་ཚེས་༨ ཉིན་གྱི་ཕྱི་དྲོར་བོད་ཀྱི་ཟློས་གར་ཁང་དུ། བསྟན་འཛིན་དབྱངས་འཛོམས་ལགས་ལ་ ༢༠༡༤ ལོའི་བོད་ཀྱི་མཛངས་མའི་དབུ་རྒྱན་གཡོག་པའི་དགོང་ཚོགས་བསྡུ་རྒྱུ་ཡིན་འདུག

བོད་ཀྱི་མཛངས་མ་གོ་སྒྲིག་པ་བློ་བཟང་དབང་རྒྱལ་ལགས་ཀྱིས་གསར་འགོད་བསྒྲགས་གཏམ་སྒྲོགས་སྦྱངས་བྱས་པའི་ནང་། འདི་ལོའི་བོད་ཀྱི་མཛངས་མ་འགྲན་སྡུར་ལ་བུ་མོ་ ༨ ཀྱིས་སྙན་ཞུ་སྤྲད་ཡོད་པའི་ནང་བུ་མོ་ ༥ འགྲན་སྡུར་ནང་དངོས་སུ་ཞུགས་པའི་གཏན་འཁེལ་བྱུང་ཡོད་ཀྱང་། མི་སྒེར་གྱི་དཀའ་ངལ་སོགས་ཀྱིས་བུ་མོ་ ༤ འགྲན་སྡུར་ནང་ཞུགས་ཐུབ་མེད་སྟབས། འདི་ལོའི་བོད་ཀྱི་མཛངས་མའི་དབུ་རྒྱན་བསྟན་འཛིན་དབྱངས་འཛོམས་ལགས་ལ་གཡོག་གཏན་འཁེལ་ཡོད་པ་དང་། འདི་ལོ་ནི་བོད་ཀྱི་མཛངས་མ་འགྲན་སྡུར་གྱི་ལོ་རྒྱུས་ནང་འགྲན་ཞུགས་པ་གཅིག་ལས་མེད་པ་ཐེངས་ ༤ པ་དེ་ཆགས་ཡོད་ཀྱང་། འགྲན་ཞུགས་པ་ཅི་ཙམ་མཉམ་ཞུགས་བྱེད་མིན་གྱི་གནད་དོན་དེ་གོ་སྒྲིག་པའི་ལག་ཏུ་མེད་སྟབས། མ་འོངས་པར་བོད་ཀྱི་མཛངས་མ་འགྲན་སྡུར་མུ་མཐུད་དུ་གོ་སྒྲིག་བྱེད་རྒྱུ་ཡིན་ལ། ལོ་རྗེས་མར་འགྲན་ཞུགས་པ་མང་ཙམ་ཡོང་བའི་རེ་བ་ཡོད་ལུགས་བརྗོད་སོང་།

བསྟན་འཛིན་དབྱངས་འཛོམས་ལགས་ཀྱིས་ཁོ་མོ་མཛངས་མའི་འགྲན་སྡུར་ནང་ཞུགས་པའི་དམིགས་ཡུལ་བརྗོད་དོན། “ང་རང་ཆུང་དུས་ནས་ཕ་མ་གཉིས་ཀྱིས་བོད་དོན་ཐོག་དོ་ཁུར་བྱེད་དགོས་པའི་སྐུལ་མ་གནང་བ་ལྟར་བོད་དོན་ཐོག་དོ་སྣང་ཡོད་མཁན་ཞིག་ཡིན་ལ། གོ་སྐབས་འདི་ནི་ངའི་མི་ཚེ་ནང་བོད་དོན་ཐོག་ལས་ཀ་བྱེད་པའི་གོམ་པ་དང་པོ་དེ་ཆགས་ཡོད། ང་རང་ངོས་ནས་བོད་ཀྱི་མཛངས་མའི་འགྲན་སྡུར་འདི་བོད་རིགས་བུ་མོ་ཚོའི་གོ་སྐབས་ཡག་པོ་ཞིག་ཏུ་ངོས་འཛིན་བྱེད་ཀྱིན་ཡོད་པ་ལྟར། ཐེངས་འདིའི་འགྲན་སྡུར་ནང་ཆ་ཤས་བླངས་བ་ཡིན། ”ཞེས་དང་།

ཡང་ཁོ་མོས་མ་འོངས་འཆར་གཞིའི་སྐོར་ལ། “བོད་ཀྱི་མཛངས་མའི་སྡིངས་ཆ་འདི་བརྒྱུད་ནས་བོད་དོན་ཐོག་ལག་ཀ་བྱེད་པའི་གོ་སྐབས་མང་པོ་ཡོད་སྟབས། ངས་ད་ལྟ་ནས་མགོ་ཡག་པོ་ཞིག་བརྩམས་ཏེ་མུ་མཐུད་བོད་དོན་ཐོག་ལས་ཀ་བྱེད་པའི་འདུན་པ་ཡོད། ད་ལྟའི་བར་བོད་དོན་ཆེད་བོད་མི་ ༡༣༠ ལྷག་གིས་རང་ལུས་མེར་བསྲེགས་གནང་ཡོད་སྟབས། ང་ཚོ་ཚང་མ་རྡོག་རྩ་གཅིག་སྒྲིལ་གྱིས་ཁོང་ཚོའི་མངོན་འདོད་ལ་རྒྱབ་སྐྱོར་བྱེད་དགོས་པ་རེད། ཆེས་མ་མཐའ་ཡང་བོད་ལ་རང་སྲིད་རང་སྐྱོང་གི་བདག་དབང་འཐོབ་པར་ང་ཚོ་ཚང་མས་རྡོག་རྩ་གཅིག་སྒྲིལ་གྱིས་འབད་བརྩོན་གནང་རོགས། ང་རང་གི་ངོས་ནས་བོད་མིའི་སྤྱི་ཚོགས་ནང་ཤེས་ཡོན་ཧ་ཅང་གལ་ཆེན་པོ་མཐོང་སྟེ་ཆེད་དམིགས་ཀྱིས་དགེ་རྒན་ཆེད་སྦྱོང་བྱས་པ་ཡིན་ལ། མ་འོངས་བོད་ཀྱི་མི་རབས་གསར་པ་ཚོའི་ཤེས་ཡོན་ཡར་རྒྱས་ལ་ཕན་ཐོགས་ཡོང་ཆེད། ང་རང་ལ་དགེ་རྒན་ཡག་པོ་ཞིག་བྱེད་པའི་འདུན་པ་ཡོད། ”ཅེས་བརྗོད་སོང་།

བསྟན་འཛིན་དབྱངས་འཛོམས་ལགས་ནི་རྒྱ་གར་བྱང་ཤར་འབྲས་ལྗོངས་མངའ་སྡེའི་རྒྱལ་ས་སྒང་ཏོག་ནས་ཡིན་ཞིང་། ད་ལྟ་རང་ལོ་ ༢༣ ཡིན་པ་དང་། ཁོ་མོ་ཆུང་དུས་ནས་ས་གནས་སློབ་གྲྭར་འགྲིམས་ཏེ་བྷང་ལོར་ནས་སེམས་ཁམས་རིག་པ་དང་སྤྱི་ཚོགས་རིག་པའི་ཐོག་ཉེ་བའི་གཙུག་ལག་རབ་འབྱམས་པ་དང་། དགེ་རྒན་ཆེད་སྦྱོང་བཅས་ཐོན་ཡོད་འདུག

གསར་འགོད་པ། པདྨ་མཚོ།