སི་རི་ཡའི་སྲིད་འཛིན་འོས་བསྡུ།

དེ་རིང་སི་རི་ཡའི་ནང་སྲིད་འཛིན་འོས་བསྡུ་བྱས་ཡོད་ཀྱང་རྒྱལ་སྤྱིའི་སྟེང་ལྟ་སྟངས་སྣ་ཚོགས་ཡོང་བཞིན་ཡོད་པ་མ་ཟད་སི་རི་ཡའི་ཕྱོགས་འགལ་ཚོགས་པས་ངོས་ལེན་མེད་པའི་རྣམ་འགྱུར་བསྟན་ཡོད་འདུག

དེ་རིང་སི་རི་ཡའི་སྔ་དྲོའི་ཆུ་ཚོད་ ༧།༠༠ པ་ནས་ཉིན་རྒྱབ་ཆུ་ཚོད་ ༦ བར། སི་རི་ཡའི་རྒྱལ་ཡོངས་སྲིད་འཛིན་འོས་བསྡུ་དེ་གནང་ཡོད་ཅིང་། འོས་མི་གསུམ་ཁྱབ་བསྒྲགས་བྱས་ཡོད་པ་དག་ནི། ད་ལྟའི་སི་རི་ཡའི་སྲིད་འཛིན་བྷ་ཤཱར་ (Bashar al-Assad)དང་། གྲོས་ཚོགས་འོག་མའི་འཐུས་མི་ནོ་རེ་ (Hassan Abdullah al-Nouri)། ཆབ་འབངས་བདེ་སྐྱོང་ཚོགས་པའི་གྲོས་ཚོགས་འཐུས་མི་མཱ་ཧེར་ (Maher Abdul-Hafiz Hajjar)བཅས་ཡིན་འདུག

སི་རི་ཡའི་རྒྱལ་ཡོངས་སུ་མི་འབོར་ས་ཡ་ ༢༣ ལྷག་ཡོད་པ་ལས་གདམ་བྱ་འདེམ་བྱེད་ཀྱི་ཐོབ་ཐང་ཡོད་མཁན་ས་ཡ་ ༡༥།༨ ཡོད་ཅིང་། ཐེངས་འདིའི་འོས་བསྡུར་དེབ་སྐྱེལ་བྱེད་མཁན་ས་ཡ་ ༦ ཙམ་ལས་བྱུང་མེད་པ་དང་། གཞུང་ཕྱོགས་ནས་གསལ་བསྒྲགས་སྤེལ་བ་ལྟར་ན། ཐེངས་འདིའི་འོས་བསྡུའི་ཆ་ཤས་ལེན་མཁན་བརྒྱ་ཆ་ ༦༠ ཙམ་གཞོན་སྐྱེས་ལོ་ ༡༨ ནས་ ༤༦ བར་ཡིན་སྐོར་བརྗོད་འདུག

སི་རི་ཡའི་སྲིད་བློན་ཨལ་ཧལ་ཁེ་ (Wael al-Halqi)ཀྱིས། “ ད་ཐེངས་སི་རི་ཡའི་སྲིད་འཛིན་གྱི་འོས་བསྡུ་དེ་རྒྱལ་སྤྱིའི་སྤྱི་ཚོགས་ཐོག་མིག་དཔེ་འོས་པའི་རྒྱལ་ཡོངས་འོས་བསྡུ་ཞིག་ཆགས་ཡོད་སྟབས། མང་ཚོགས་ཚོས་རྒྱལ་ཁབ་ཀྱི་བརྟན་བརླིང་སྲུང་སྐྱོབ་དང་དཔལ་འབྱོར་འཕེལ་རྒྱས། ཡུལ་བདེ་ཞི་འཇགས་གཏོང་མཁན་གྱི་སྲིད་འཛིན་ཞིག་འོས་འདེམས་བྱ་དགོས།” ཞེས་བརྗོད་འདུག

སྲིད་འཛིན་འོས་མི་གསུམ་གྱིས་ཁ་གཅིག་གྲག་ཏུ། སི་རི་ཡའི་ཟིང་འཁྲུག་ཞི་འཇགས་དང་མང་ཚོགས་ཀྱི་དཔལ་འབྱོར་འཕེལ་རྒྱས་བཏང་སྟེ། ཞི་བདེ་བརྟན་བརླིང་གི་གཞུང་ཞིག་འཛུགས་རྒྱུ་ཡིན་པའི་ཁས་ལེན་བྱེད་བཞིན་ཡོད་ཀྱང་། ཆབ་སྲིད་དབྱེ་ཞིབ་པ་ཚོས། སི་རི་ཡའི་རྒྱལ་ཡོངས་འོས་བསྡུ་འདི་ནི། གཞུང་འཛིན་ཚོགས་པས་ཐད་བསྐོས་བྱས་པའི་འོས་མི་གསུམ་གྱི་འཁྲབ་སྟོན་ཙམ་ཡིན་སྟབས། མང་ཚོགས་ཚོས་ཁས་ལེན་བྱ་རྒྱུ་ཁག་པོ་ཡིན་སྐོར་བརྗོད་འདུག

ཐེངས་འདིར་སི་རི་ཡའི་ཁྱིམ་མཚེས་རྒྱལ་ཁབ་ཁག་ནང་སྐྱབས་བཅོལ་དུ་བསྡད་ཡོད་པ་ཚོས་འོས་བསྡུའི་ཆ་ཤས་བླངས་མེད་པ་མ་ཟད། སི་རི་ཡའི་ཕྱོགས་འགལ་ཚོགས་པ་ཆེ་ཤོས་གཉིས་ཀྱིས་ཀྱང་འོས་བསྡུའི་ཆ་ཤས་བླངས་མེད་པར། འོས་བསྡུ་འདི་ནི་བཙན་པོ་དབང་ཡོད་དང་མི་གསོད་ཁྲག་སྦྱོར་གྱི་འོས་བསྡུ་ཞིག་ཡིན་སྐོར་བརྗོད་དེ་ངོ་རྒོལ་བྱེད་བཞིན་ཡོད་འདུག

སི་རི་ཡའི་གནད་དོན་ཆེད་མཁས་པ་སྐུ་ཞབས་མར་ཌིན་ལགས་ཀྱིས། “ ཐེངས་འདིའི་འོས་བསྡུ་དེར་སི་རི་ཡའི་མང་ཚོགས་ཀྱིས་ངོས་ལེན་བྱེད་ཀྱི་མེད་པ་མ་ཟད། རྒྱལ་སྤྱིའི་སྤྱི་ཚོགས་ཀྱིས་ཀྱང་ལྟ་སྟངས་ཡག་པོ་འཛིན་གྱི་མེད་སྟབས། འོས་བསྡུ་འདིས་སི་རི་ཡའི་དཀའ་རྙོག་སེལ་རྒྱུ་ཁག་པོ་ཆགས་ཡོད།” ཅེས་བརྗོད་འདུག

ཧྥ་རན་སིའི་ཕྱི་སྲིད་བློན་ཆེན་ལུའུ་རན་ཌི་(Laurent Fabius)ལགས་ཀྱིས། “ ད་རེབ་ཀྱི་སི་རི་ཡའི་སྲིད་འཛིན་འོས་བསྡུ་དེ་ནི། ད་ལྟའི་སྲིད་འཛིན་བྷ་ཤཱར་ལ་རྒྱལ་ཁ་ཐོབ་ཐབས་ཀྱི་འོས་བསྡུ་ཞིག་ཆགས་ཡོད་སྟབས། རྒྱལ་སྤྱིའི་སྒྲིག་འཛུགས་ཁག་གིས་ངོས་ལེན་བྱ་ཁག་པོ་ཆགས་ཡོད།” ཅེས་བརྗོད་འདུག

༢༠༡༠ ལོ་ནས་བཟུང་དཀྱིལ་ཤར་ཨེ་ཤ་ཡའི་རྒྱལ་ཁབ་ཁག་ནང་ཁ་ཆེའི་དཔྱིད་དུས་གསར་བརྗེ་བྱུང་བ་དང་སྦྲགས། ༢༠༡༡ ལོའི་ཟླ་ ༣ ཚེས་ ༡༥ ཉིན། སེ་རི་ཡའི་མང་ཚོགས་ཀྱིས་སྲིད་འཛིན་བྷ་ཤཱར་གྱིས་རྩ་དགོངས་ཞུ་དགོས་སྐོར་ངོ་རྒོལ་བྱས་སྟབས། གཞུང་འཛིན་ཚོགས་པ་དང་མང་ཚོགས་བར་རྙོག་ཟིང་བྱུང་སྟེ་ད་བར་ཡུལ་མི་  ༡༦༢༠༠༠ ལྷག་གི་ཚེ་སྲོག་ཤོར་ཡོད་པ་དང་། མི་ས་ཡ་ ༧ ལྷག་ཡུལ་གྱར་ཕྱིན་པ། མི་ས་ཡ་ ༢།༥ ལྷག་ཧྥ་རན་སི་དང་འཇར་མན་སོགས་ནང་སྐྱབས་བཅོལ་འགྲོ་དགོས་བྱུང་ཡོད།

༢༠༡༡ ལོའི་ཟླ་ ༨ པའི་ནང་ད་ལྟའི་སྲིད་འཛིན་བྷ་ཤཱར་གྱིས་རྒྱལ་སྤྱིའི་གནོན་ཤུགས་འོག འོས་བསྡུའི་སྒྲིག་གཞི་བསྐྱར་བཅོས་བཅའ་ཡིག་ ༡༠༡ ལ་མིང་རྟགས་བཀོད་པ་དང་འབྲེལ། མང་མོས་བསམ་ཤོག་བསྡུས་ཏེ་ཆབ་སྲིད་ཚོགས་པ་གཅིག་གི་ལམ་ལུགས་ལ་བཅོས་བསྒྱུར་བཏང་སྟེ། ཆབ་སྲིད་ཚོགས་པ་གང་མང་ལས་གྲུབ་པའི་དམངས་གཙོའི་ལམ་ལུགས་ཤིག་འཛུགས་དགོས་བྱུང་ཡོད།

༢༠༡༡ ལོ་ནས་བཟུང་སི་རི་ཡའི་གཞུང་འཛིན་ཤོག་ཁག་དང་གྱེན་ལོག་ཤོག་ཁག་བར་ཟིང་འཁྲུག་བསྟུད་མར་བྱུང་ཞིང་། གཞུང་འཛིན་ཚོགས་པས་གྱེན་ལོག་པའི་ཁྲོད་རྫས་འགྱུར་མཚོན་ཆ་བེད་སྤྱོད་བཏང་སྟེ། ཉེས་མེད་མི་སེར་མང་པོ་བསད་སྟབས་མཉམ་འབྲེལ་རྒྱལ་ཚོགས་ཀྱིས་སྔ་རྗེས་སུ་སི་རི་ཡའི་གནད་དོན་སྐོར་ལ་གྲོས་ཆོད་ཐེངས་གསུམ་ལ་བཞག་ཡོད།

༢༠༡༣ ལོའི་ཟླ་ ༦ པའི་ཚེས་ ༡༧ ཉིན་གྱི་འཛམ་གླིང་འབྱོར་ལྡན་རྒྱལ་ཁབ་ཁག་ ༨ ཀྱི་ཚོགས་འདུ་ཐེངས་ ༣༩ པའི་སྐབས། སི་རི་ཡར་ཨ་སྒོར་ཐེར་འབུམ་ ༡།༥ ཡི་སྐྱོབ་གསོའི་རོགས་དངུལ་སྤྲོད་རྒྱུ་དང་། སི་རི་ཡའི་གཞུང་དང་ཁ་གཏད་ངོ་རྒོལ་ཚོགས་པ་གཉིས་གྲོས་མོལ་ཡོང་ཐབས་བྱ་རྒྱུ། ཇི་ནེ་བཱ་( Geneva) གྲོས་མོལ་གྱི་སྔོན་ལ་སི་རི་ཡའི་བར་བརྒལ་སྲིད་གཞུང་ཞིག་འཛུགས་ཐུབ་པ་བྱས་ཏེ་མི་མང་ལ་བདེ་འཇགས་ཡོང་ཐབས་བྱེད་དགོས་པ་སོགས་གྲོས་མཐུན་དོན་ཚན་ ༧ བཞག་ཡོད་པ་མ་ཟད། སི་རི་ཡ་གཞུང་གིས་ཁ་གཏད་ཚོགས་པར་རྫས་འགྱུར་མཚོན་ཆ་བེད་སྤྱོད་བྱས་པར་སྐྱོན་བརྗོད་བྱས་ཡོད།