བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༢༨ སྟེང་གི་རྩོམ་སྒྲིག་པའི་གཏམ།
ཉེ་ལམ་མཐོ་སྒང་གི་པུ་ཝང་དཀར་པོ་ཟེར་བའི་ཨ་མདོའི་གཞས་པ་དགེ་བྷེ་རྒྱ་གཞུང་གིས་འཛིན་བཟུང་བྱས་ཡོད་འདུག འཛིན་དགོས་པའི་རྒྱུ་མཚན་ད་སྔ་གསལ་ཁ་མེད་ཀྱང་ཁོ་ལ་རྒྱ་གཞུང་གིས་ཆབ་སྲིད་ཉེས་འཛུགས་བྱས་ཡོད་པ་མ་བཤད་ཀྱང་ཤེས་ཐུབ། གླུ་བ་ལོ་ལོ་དང་བཀྲ་ཤིས་དོན་གྲུབ། ཕུལ་བྱུང་དང་འཕྲིན་ལས་ཚེ་དཀར་སོགས་ཀྱང་དེ་སྔོན་འདི་ལྟར་ཁུ་སིམ་སིམ་འཛིན་བཟུང་བྱས་ཏེ། ཆབ་སྲིད་ཀྱི་ཉེས་མིང་སྣ་ཚོགས་འོག་རྡུང་རྡེག་མནར་གཅོད་མྱངས་དང་མྱོང་གི་ཡོད། གཞན་རྩོམ་པ་པོ་དང་སྒྱུ་རྩལ་པ་གང་མང་ཞིག་ཀྱང་ཉེས་མིང་འདིའི་འོག་ནས་རྨེག་མེད་བཏང་དང་གཏོང་གི་ཡོད།
གནས་ཚུལ་འདི་བྱུང་བའི་ཁ་ཐུག་ལ་ཕྱི་ལོགས་ཀྱི་གསར་ལམ་ཁག་གིས་འགོད་ཐུབ་ལ་མི་ཐུབ་དང་། སྤྱི་ཚོགས་ནང་དུ་ཡང་གནས་ཚུལ་དེ་ཁྱབ་བསྒྲགས་བྱས་ན་ཡག་སྡུག་ཅི་འབྱུང་ཆ་འཚལ་སྐོར་བཤད་མཁན་འདུག འདི་ལ་ང་ཚོར་གདམ་ག་གཞན་མེད། ཁོ་རང་མི་སྒེར་ལ་བསམ་བློ་གཏོང་རྒྱུ་ཡིན་ནམ། བོད་སྤྱི་བའི་རྩ་དོན་འཐབ་རྩོད་ལ་བསམ་བློ་གཏོང་རྒྱུ་ཡིན། ཁོ་རང་གི་རེ་བ་དང་དམིགས་ཡུལ་བོད་སྤྱི་དོན་རེད་དམ་ཁོ་རང་སྒེར་གྱི་བདེ་དོན་རེད། ཡང་ན། གནས་ཚུལ་དེ་བདག་མེད་དུ་གཡུག་ན་ཁོ་ལ་ཕན་གི་རེད་དམ། ཕྱི་ནང་གཉིས་ནས་སྐད་བརྒྱབ་ན་ཁོ་ལ་ཕན་གི་རེད། འདི་ལ་ང་ཚོས་འདང་ཡག་པོ་འཕོག་དགོས།
བོད་ནང་གི་བོད་མི་ཚོས་ས་ཞིང་བདག་ཉེར་དང་ཁོར་ཡུག་སྲུང་སྐྱོབ། ཆོས་ལུགས་ཆོ་ག་སྒྲུབ་པ། འདུ་འཛོམས་ཐུགས་སྤྲོ་གཏོང་བ་ཚུན་ལ་རྒྱ་གཞུང་གིས་ཆབ་སྲིད་ནག་ཉེས་གཡོག་གི་ཡོད། རྒྱལ་ཁབ་ཀྱི་རྩ་ཁྲིམས་དང་མི་རིགས་ཀྱི་བཅའ་ཁྲིམས། ས་གནས་ཀྱི་སྲོལ་ཡིག་སོགས་ཀྱིས་བསྐུར་བའི་ཐོབ་དབང་གླེང་ན་ཡང་བཙོན་འཇུག་བྱེད་ཀྱིན་ཡོད། ང་ཚོས་དཀྱིལ་ཤར་ཡུལ་གྲུའི་ལས་འགུལ་བ་དང་རྒྱ་འོག་གི་ཡུ་གུར་བ་ཚོ་ལྟར་འགུལ་སྐྱོད་ཐ་དག་ཕར་ཆབ་སྲིད་འཐབ་རྩོད་ངོ་བོར་བསྒྱུར་ཐབས་བྱེད་མི་ཕོད་ཀྱང་། ཆབ་སྲིད་དང་འབྲེལ་བ་མེད་ན་མེད་པའི་གནས་ལུགས་དང་ཉེས་མེད་ཉེས་འཛུགས་ཀྱི་གནས་ཚུལ་དེ་རྒྱལ་སྤྱིའི་ཐོག་བསྒྲགས་ཐུབ་དགོས།
གླུ་བ་དགེ་བྷེ་ཡའི་གླུ་གཞས་ནང་། ངའི་ས་མཐའི་ཨ་ཇོ་ང་ཡོང་གི་ཡོད། མིག་མཆུ་མའི་གང་བཞིན་ཡོང་གི་ཡོད། བོད་ཁ་བའི་བདེ་སྡུག་ཞུ་རུ་ཡོང་གི་ཡོད། མགོན་ཁྱེད་རང་དྲན་བཞིན་ཡོང་གི་ཡོད། ཞེས་གདངས་སུ་གྱེར་ནས་ངག་ལ་སྐྱོར་གི་ཡོད་པ་འདི་བོད་མི་ཞིག་གི་སེམས་ཚོར་ངོ་མ་རེད་ལ་བོད་ནང་གི་སྐད་སྐུར་ཡང་རེད། སྐད་སྒྲ་འདིས་རལ་གྲི་སོ་གཉིས་མ་ལྟར་ཁ་གཅིག་ནང་ལ་གཏད་ནས་བོད་མི་གཞན་ལ་སེམས་ཚོར་སློང་གི་ཡོད་ལ། ཁ་གཅིག་ཕྱི་ལ་གཏད་དེ་འཛམ་གླིང་མི་མང་ལ་འབོད་སྐུལ་དང་རེ་འདུན་ཞུ་བཞིན་ཡོད། ཐབས་སྣ་ཚོགས་བརྒྱུད་ནས་སྐད་སྒྲ་འདི་རྒྱལ་སྤྱིའི་སྡིངས་ཆར་བསྐྱལ་རྒྱུའི་ལས་འགན་དེ་ང་ཚོའི་ཕྲག་པར་ཡོད་པ་ངོས་ཟིན་དགོས།
ང་ཚོས་ངེས་པར་དུ་གཟབ་ནན་བྱེད་དགོས་པ་དང་གཏན་འགོག་བྱེད་དགོས་པའི་གནད་དོན་དག་ནི། བོད་ནང་མ་བྱས་པ་ཞིག་བྱས་འདུག་དང་མ་ཡིན་པ་ཞིག་རེད་འདུག་ཟེར་བར་གཟབ་ནན་བྱེད་དགོས་པ་དང་། རྐུ་འཕྲོག་བཅོམ་གསུམ་དང་རྒྱན་འགུག་ཤོ་རྒྱག་གི་གནས་ཚུལ་འོག་ནས་འཛིན་བཟུང་བྱས་རིགས་ཀྱང་བོད་དོན་ཡིན་ཚུལ་བཤད་པ་དེ་བསྒྱུར་བཅོས། རྒྱ་ནག་གི་བཙོན་ཁང་མིག་གིས་མ་མཐོང་ཞིང་བོད་དོན་ལ་ཁ་ལག་གང་ཡང་མ་འགུལ་བ། ཐ་ན་ཆབ་སྲིད་བཙོན་པ་དང་འབྲེལ་ཡོད་འབྲེལ་ཆགས་གང་གི་ཁོངས་སུའང་མི་གཏོག་མཁན་མང་པོ་ཞིག་ལ་བརྒྱུད་ལམ་སྣ་ཚོགས་ནས་གོ་སྐབས་དང་ཐོབ་ཐང་མང་པོ་ཞིག་སྤྲོད་བཞིན་པ་དེ་དག་གཏན་འགོག་བྱེད་དགོས།
