དེ་རིང་ཤེས་རིག་ལས་ཁུངས་ཀྱི་ཤེས་ཡོན་ཚན་པས་རྒྱ་གར་གྱི་ཤེས་ཡོན་ཆེད་མཁས་པ་གདན་འདྲེན་བྱས་ཏེ། བོད་མིའི་སློབ་གྲྭ་ཁག་གི་གཞི་རིམ་འོག་མའི་སློབ་དགེ་རྣམས་ལ་བྱིས་པའི་ཀློག་རྩལ་ཁྲིད་ཐབས་ཀྱི་ཟབ་སྦྱོང་ཞིག་སྤྲད་སོང་།
དེ་རིང་སྔ་དྲོའི་ཆུ་ཚོད་ ༩།༡༥ སྟེང་གངས་སྐྱིད་གཉའ་ཁྲི་ཚོགས་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་༼གཞི་རིམ་འོག་མའི་སློབ་དགེ་རྣམས་ལ་བྱིས་པའི་ཀློག་རྩལ་ཁྲིད་ཐབས་ཀྱི་ཟབ་སྦྱོང་༽ཞེས་པ་ཞིག་གོ་སྒྲིག་གནང་སྟེ། སྐུ་མགྲོན་གཙོ་བོ་ཤེས་རིག་དྲུང་ཆེ་དངོས་འགྲུབ་ཚེ་རིང་ལགས་དབུ་བཞུགས་ཐོག རྒྱ་གར་རྒྱལ་ཡོངས་ཤེས་ཡོན་ཉམས་ཞིབ་དང་ཟབ་སྦྱོང་ལྷན་ཚོགས་ཀྱི་འགན་འཛིན་སྐུ་ཞབས་མཁས་དབང་ཀུ་རི་ཤི་ནཱ་ (Prof Krishna Kumar)ལགས། ལྡི་ལི་གཙུག་ལག་མཐོ་སློབ་གྱི་ཤེས་ཡོན་ཟབ་ཁྲིད་པ་ལྕམ་ལཱ་ཊེ་ཀཱ་ (Dr Latika Gupta)ལགས་རྣམ་གཉིས་ཆེད་དུ་གདན་འདྲེན་ཞུས་ཏེ། བལ་ཡུལ་སློབ་གྲྭ་དང་སམ་བྷོ་ཊ་སློབ་གྲྭ་ཁག་གི་དགེ་རྒན་ ༢༥ ཙམ་ལ། བྱིས་པ་ཚོར་དཔེ་དེབ་ཀློག་རྩལ་ཡར་རྒྱས་གཏོང་ཐབས་སྐོར་གྱི་གཟབ་ཁྲིད་མགོ་འཛུགས་གནང་སོང་།
ཤེས་རིག་ལས་ཁུངས་ཟུང་དྲུང་ཚེ་རིང་ཕུན་ཚོགས་ལགས་ཀྱིས་ཟབ་སྦྱོང་ངོ་སྤྲོད་གནང་དོན་ལྟར་ན། ཤེས་ཡོན་སློབ་སྟོན་ཚོགས་ཆུང་གིས་གྲོས་བསྡུར་བྱས་པའི་ལམ་སྟོན་འོག ཤེས་རིག་ལས་ཁུངས་ཀྱིས་བོད་མིའི་སློབ་གྲྭ་ཁག་གི་བྱིས་པ་ཚོའི་རྒྱུད་ལ་ཀློག་རྩལ་གོམས་གཤིས་འཇགས་ཐབས་དང་དཔེ་ཀློག་གོམས་གཤིས་ཡར་རྒྱས་གཏོང་ཐབས་ཆེད། ན་ནིང་སྤྱི་ཟླ་ ༨ པའི་ནང་རྒྱ་གར་གྱི་དཔེ་མཛོད་ཆེད་མཁས་པ་གཉིས་འདེམས་སྒྲུག་བྱས་པའི་བོད་མིའི་སློབ་གྲྭ་ཁག་ཅིག་ནང་གཟིགས་སྐོར་གནང་སྟེ། སློབ་གྲྭ་ཁག་ནང་ཡོད་པའི་དཔེ་མཛོད་ཀྱི་ཆ་རྐྱེན་དང་ཀློག་དེབ་ཀྱི་མཐུན་རྐྱེན། དཔེ་ཀློག་གོམས་གཤིས་ཡོད་མེད་བཅས་ཀྱི་སྐོར་ཞིབ་འཇུག་བྱས་ཡོད་པ་དང་། སྔར་ལོའི་ཕྱི་ཟླ་ ༡༢ པའི་ནང་ཤེས་ཡོན་ལམ་སྟོན་ཚོགས་ཆུང་གི་ཚོགས་མི་མཁས་དབང་ཀུ་རི་ཤི་ནཱ་ (Prof Krishna Kumar)ལགས་ཀྱིས་སྣེ་འཁྲིད་པའི་ལྕམ་ལཱ་ཊེ་ཀཱ་ལགས་དང་ཆེད་མཁས་ཚོས་གཞི་རིམ་འོག་མའི་ཀློག་རྩལ་ལས་འཆར་གཏན་འབེབས་དང་ལག་བསྟར་ཐོག་ལམ་སྟོན་གནང་ཡོད་ཅིང་། ཤེས་རིག་ལས་ཁུངས་ཀྱིས་བོད་ཡིག་དཔེ་དེབ་དཔར་སྐྲུན་དང་དབྱིན་ཧིན་སྐད་ཡིག་ནང་ཡོད་པའི་བྱིས་པའི་དཔེ་དེབ་བོད་བསྒྱུར་བྱས་ཡོད་ཅེས་སོགས་བརྗོད་སོང་།
ཟབ་སྦྱོང་གནང་མཁན་མཁས་དབང་ཀུ་རི་ཤི་ནཱ་ལགས་ཀྱིས་བྱིས་པའི་ཀློག་རྩལ་གལ་ཆེན་ཡིན་པའི་སྐོར་ལ་བརྗོད་དོན། དེང་དུས་སྤྱི་ཚོགས་ནང་ང་ཚོ་ལ་ཤེས་ཡོན་སྲིད་བྱུས་གང་ཡོད་པ་དེས་བྱིས་པ་ལོ་ཆུང་སྐབས་ནས་དོན་སྙིང་ཟེར་བ་གཏོར་བཅོམ་གཏོང་གི་ཡོད། དོན་སྙིང་ནི་སྦྱིར་བཏང་གི་དངོས་པོ་ཞིག་མ་ཡིན་པར་མི་ཚེའི་ནང་རྙེད་ཀྱི་ཡོད། བྱིས་པ་ཚང་མས་སོ་སོའི་མི་ཚེའི་ནང་དོན་སྙིང་རེ་གསར་རྙེད་ཐུབ་ཀྱི་ཡོད་སྟབས། དཔེ་ཀློག་ནི་ཤིན་ཏུ་གཏིང་ཟབ་པའི་རྩལ་ཞིག་རེད། དཔེ་ཀློག་བྱེད་མཁན་ཚོས་དེབ་ནང་གི་དོན་སྙིང་གསར་རྙེད་བྱུང་ན་དཔེ་ཀློག་གོམས་འདྲིས་ཆགས་པ་དང་སྣང་བ་སྐྱིད་པོ་ཡོད་པ་མ་ཟད། སོ་སོས་ནུས་སྟོབས་ཐོག་ནས་དཔེ་དེབ་གང་རུང་ཀློག་ཐུབ། དེ་ནས་རིམ་བཞིན་དཔེ་ཀློག་གདེངས་ཚོད་བསླེབས་ནས་རང་ཉིད་ཀྱི་འཇིག་རྟེན་གཞན་དང་མ་འདྲ་བ་ཞིག་བཟོ་ཐུབ་ཀྱི་ཡོད། འདི་ཚོ་ཚང་མ་བྱིས་པ་ཆུང་དུས་སྐབས་དང་འབྲེལ་བ་ཡོད་སྟབས། བྱིས་པ་ཆུང་ལོ་བདུན་བརྒྱད་ཀྱི་དུས་སྐབས་ནི་མི་ཚེ་ནང་གི་དུས་ཚོད་གལ་ཆེན་ཞིག་ཡིན་ཞེས་སོགས་བརྗོད་སོང་།
དེའི་རྗེས་ཤེས་རིག་དྲུང་ཆེ་ལགས་ཀྱིས་ཟབ་སྦྱོང་ཚོགས་དགོས་པའི་དམིགས་ཡུལ་དང་འབྲེལ་ནས་བོད་མིའི་བོད་ཕྲུག་ཚོས་ཀློག་རྩལ་ཡར་རྒྱས་གཏོང་བ་དང་མཉམ་དུ་དེབ་གང་ཀློག་པ་དེའི་གོ་དོན་གོ་རྒྱུ་གལ་ཆེན་ཡིན་པ་དང་དེ་བཞིན་བྱིས་པ་ཚོར་དཔེ་དེབ་དང་ཁོར་ཡུག་སོགས་ཀྱི་མཐུན་རྐྱེན་སྒྲུབ་དགོས་སྐོར་བརྗོད་སོང་།
ཐེངས་འདིར་ཤེས་རིག་ལས་ཁུངས་ཀྱིས་གཞི་རིམ་འོག་མའི་དགེ་རྒན་རྣམས་ལ་བྱིས་པའི་ཀློག་རྩལ་ཁྲིད་ཐབས་ཀྱི་ཟབ་སྦྱོང་ཞེས་པ་རིམ་པ་གཉིས་ལ་བགོས་སྟེ་རིམ་པ་དང་པོ་དེ་རིང་བཟུང་ཚེས་ ༧ བར་གནང་རྒྱུ་ཡིན་དང་། ཟླ་འདིའི་ཚེས་ ༩ ནས་ཚེས་༡༣ བར་དྷ་ས་བོད་ཁྱིམ་དང་མ་སུ་རི་བོད་ཁྱིམ་གཉིས་ཀྱི་ཁྱབ་ཁོངས་སློབ་གྲྭ་ཁག་གི་གཞི་རིམ་འོག་མའི་དགེ་རྒན་ ༢༥ ལ་ཟབ་སྦྱོང་སྤྲོད་རྒྱུ་ཡིན་འདུག
གསར་འགོད་པ། ལྷ་སྐྱབས་རྒྱལ།
་་་་་་་ཤེས་རིག་ལས་ཁུངས་ཀྱིས་བོད་ཡིག་དཔེ་དེབ་དཔར་སྐྲུན་དང་དབྱིན་ཧིན་སྐད་ཡིག་ནང་ཡོད་པའི་བྱིས་པའི་དཔེ་དེབ་བོད་བསྒྱུར་བྱས་ཡོད་ཅེས་སོགས་བརྗོད་སོང་། ་་་་་་