“རང་ལས་གཞན་གཅེས” ཟེར་བ་རང་ཉིད་བློས་གཏོང་དགོས་པའི་དོན་མ་རེད།

དེ་རིང་ཕྱི་ཚེས་ ༦ ཉིན་གྱི་ཞོགས་པའི་ཆུ་ཚོད་ ༧།༣༠ ཡས་མས་སུ་༧གོང་ས་མཆོག་བཞུགས་སྒར་ཕོ་བྲང་ནས་དྷ་སྟེང་བོད་ཁྱིམ་སློབ་གྲྭར་ཆིབས་བསྒྱུར་གནང་སྟེ། དྷ་སྟེང་བོད་ཁྱིམ་སློབ་གྲྭའི་ལག་རྩེད་སྤོ་ལོ་རྩེད་ཐང་དུ་སློབ་ཕྲུག་གཙོས་པའི་དད་ལྡན་མང་ཚོགས་ ༣༠༠༠ བརྒལ་བར་ཐུགས་རྗེ་ཆེན་པོའི་བཀའ་དབང་གནང་སོང་།

བཀའ་དབང་མ་གནང་གོང་༧གོང་ས་མཆོག་གིས་སློབ་ཕྲུག་དང་མང་ཚོགས་ལ་བཀའ་སློབ་གནང་སྐབས། དུས་རབས་དགུ་བའི་སྐབས་དང་བོད་སིལ་བུར་ཆགས་པ་སོགས་ཆབ་སྲིད་ཀྱི་གཡོ་འགུལ་དང་ཆབས་ཅིག་ཆོས་ཕྱོཊ་ཀྱི་རབ་བྱུང་གི་སྡེ་མེད་པ་ཆགས་ཤིང་། གོས་དཀར་ལྕང་ལོའི་སྡེས་བསྟན་པ་བཟུང་བ་སོགས་བསྟན་པ་ཚད་ལྡན་མ་བྱུང་བ་གསང་སྔགས་འཆལ་སྤྱོད་བྱས་ཏེ། བུད་མེད་བསྟེན་པ་དང་ཆང་བཏུང་བ་སོགས་བྱས་པ་དང་། རྒྱ་གར་ལ་མཚོན་ན་སྔོན་མ་སངས་རྒྱས་ཀྱི་བསྟན་པ་ཉམས་པའི་རྒྱུ་རྐྱེན་གཙོ་བོ་གཅིག་དགེ་འདུན་པ་ཚོས་རྒྱུར་དང་དོད་བྱས་པ་དང་། ཁ་ཤས་འཁྲུག་པོ་ཆགས། མང་ཚོགས་ཀྱི་དད་གུས་བརླགས་པ་བཅས་ལ་བརྟེན་ནས་གསང་སྔགས་ཉམས་ལེན་འཆལ་སྤྱོད་ཀྱི་དབང་དུ་ཕྱིན་ཏེ་མང་ཚོགས་ཀྱི་གུས་བརྩི་བརླག་པ་དང་། ཡུལ་གྱི་རྒྱལ་པོ་ཚོ་ཡང་འགྱུར་བ་ཕྱིན་པ་སོགས་ནང་གི་རྐྱེན་དང་། དམག་འཁྲུག་སོགས་ཕྱིའི་རྐྱེན་དེ་འདྲའི་དབང་གིས་བྱུང་ཞིང་། བོད་ལ་མཚོན་ནའང་གསང་སྔགས་འཆལ་སྤྱོད་དུ་ཕྱིན་པའི་སྐྱོན་ཆ་ལྷག་ཡོད་པ་རེད། ཅེས་སོགས་གསུངས་སོང་།

སློབ་ཕྲུག་ཚོར་གཞན་གཅེས་འཛིན་གྱི་སྐོར་ལ་བཀའ་གནང་སྐབས་ཁོང་གིས། ཁྱེད་རང་ཚོར་ནམ་རྒྱུན་རང་ལས་གཞན་གཅེས་ཞེས་པའི་འབོད་ཚིག་ཅིག་ཡོད་པ་རེད། རང་ལས་གཞན་གཅེས་ཞེས་ལབ་དུས་དབྱིན་ཇིའི་ཚིག་ཁ་ཤས་ནང་སོ་སོ་རང་བློས་བཏང་ཞེས་པ་དེ་འདྲ་འདུག དེ་མ་རེད། རང་གཞན་དོན་ནི་རབ་བསྒྲུབ་ཕྱིར་བྱང་ཆུབ་སེམས་ནི་བསྐྱེད་པར་བགྱིས་ཞེས་ལབ་ཀྱི་ཡོད་པ་རེད། རང་གི་དོན་བསྒྲུབ་པར་བྱང་ཆུབ་སེམས་སྒོམ་པ་ལས་ལྷག་ཡོད་པ་མ་རེད་ལ། གཞན་གྱི་དོན་བསྒྲུབ་པ་ལའང་བྱང་ཆུབ་སེམས་སྒོམ་པ་ལས་ལྷག་ཡོད་མ་རེད། རང་དོན་དང་གཞན་དོན་གང་བསྒྲུབ་ཀྱང་བྱང་ཆུབ་སེམས་ལས་ལྷག་པ་མི་འདུག རིགས་ཁ་ཤས་ཀྱིས་ང་བློས་གཏོང་ཐུབ་པ་མི་འདུག རང་ལས་གཞན་གཅེས་པ་བྱེད་ཐུབ་པ་མི་འདུག་བསམ་ན་མ་ཤེས་པའི་རྟགས་རེད། ཅེས་གསུངས་སོང་།

བཀའ་དབང་གི་མཇུག་ཏུ་སློབ་ཕྲུག་ཚོར། “ ད་ལོའི་དབྱར་ཆོས་ཚར་བ་རེད། ཡང་སང་ལོ་ང་ཚོ་ཡང་བསྐྱར་ཐུག་གི་རེད། དེའི་རིང་ཕྱོཊ་གཅིག་ནས་སློབ་སྦྱོང་ཡག་པོ་བྱོས། ཕྱོཊ་གཅིག་ནས་སངས་རྒྱས་ཀྱི་ལྟ་གྲུབ་རིགས་དེ་དག་ལ་བསམ་བློ་བཏང་སྟེ། ཁ་སང་སྐད་ཆ་བྱུང་བ་ལྟར་དགེ་རྒན་ཚོས་ཀྱང་སློབ་ཚན་སྤྲོད་རྒྱུ་དེ་རིག་ལམ་གྱི་ཐོག་ནས་ཡག་པོ་གོ་བརྡ་སྤྲོད་རྒྱུ་ཁྱེད་རང་ཚོས་ཤེས་པར་བྱོས། ལོ་གཅིག་ཕྱིན་པའི་རྗེས་སུ་ཕྱི་རྫིག་ནང་རྫིག་ཟེར་བའི་ཕྱི་ལོགས་ཀྱི་དངོས་པོའི་ཡར་རྒྱས་དང་འབྲེལ་བའི་རིགས་ཡར་རྒྱས་ཡོད་བསྡད་པ་ཞིག་དང་། ནང་གཤིས་རྒྱུད་ཀྱང་ཡར་རྒྱས་ཡོད་བསྡད་པ་ཞིག་བྱུང་ན་དངོས་ནས་མི་ཚེ་སྐྱིད་པོ་ཡོང་གི་རེད། གཞན་ལའང་ཕན་གྱི་རེད། ” ཅེས་གསུངས་སོང་།

མཇུག་ཏུ་གསར་འགོད་པས་སློབ་ཕྲུག་ཁག་ཅིག་ལ་ཉིན་གསུམ་རིང་གི་གསུང་ཆོས་ལས་བློ་སྐྱེད་གང་འདྲ་བྱུང་མིན་དང་། ༧གོང་ས་མཆོག་བཀའ་སློབ་ལས་སེམས་ཚོར་བ་གང་འདྲ་བྱུང་མིན་དྲིས་པར། ལྡི་ལིའི་བུད་མེད་མཐོ་སློབ་ལེ་ཌེ་ཤི་རམ་ (Lady Shri Ram College) ནང་སློབ་གཉེར་གནང་བཞིན་པའི་སློབ་མ་བསྟན་འཛིན་ཆོས་སྐྱིད་ལགས་ཀྱིས། ང་༧གོང་ས་མཆོག་གིས་གཞོན་སྐྱེས་ཚོར་གསུང་ཆོས་གནང་བར་ཞུགས་པ་ཐེངས་དང་པོ་ཡིན། སློབ་གྲྭའི་སྐབས་ལ་ཞལ་འདོན་མང་པོ་བསྐྱོར་མྱོང་ཡོད་ཀྱང་ནང་དོན་གཅིག་ཀྱང་གོ་ཡི་ཡོད་མ་རེད། ད་རེབ་༧གོང་ས་མཆོ་གིས་རེ་རེ་བཞིན་འགྲེལ་བཤད་བསྐྱོན་ཡོང་སྐབས་ཕྲན་བུ་ཞིག་འབབ་རྒྱུ་བྱུང་སོང་། ཅེས་བརྗོད་བྱུང་།

ཅོང་ཏ་ར་བོད་ཁྱིམ་གྱི་སློབ་མ་པདྨ་དངོས་གྲུབ་ལགས་ཀྱིས། ང་ཡང་༧གོང་ས་མཆོག་གིས་གཞོན་སྐྱེས་ཚོར་གསུང་ཆོས་གནང་བར་ཞུགས་པ་ཐེངས་དང་པོ་ཡིན། ༧གོང་ས་མཆོག་བཀའ་གཞོན་སྐྱེས་ཚོས་ནང་ཆོས་ལ་སློབ་གཉེར་གནང་དགོས་པ་ནན་པོ་གསུངས་པ་དེས་ང་ལ་ཚོར་བ་མ་འདྲ་བ་ཞིག་སྐྱེས་བཅུག་སོང་། དམིགས་བསལ་༧གོང་ས་མཆོག་དགུང་ལོ་བགྲེས་པོ་ཆགས་ཡོང་སྐབས། ང་ཚོར་རེ་བ་ཆེན་པོ་ཞིག་གནང་གི་ཡོད་སྟབས། ང་ཚོ་བོད་པ་ཞིག་ཡིན་པའི་ཆ་ནས་འགན་ཆེན་པོ་ཞིག་ཡོད་པ་རེད་བསམ་གྱི་འདུག ཅེས་བརྗོད་བྱུང་།

དྷ་སྟེང་བོད་ཁྱིམ་སློབ་གྲྭའི་སློབ་མ་བསྟན་འཛིན་ངག་དབང་ལགས་ཀྱིས། ང་༧གོང་ས་མཆོག་གིས་གཞོན་སྐྱེས་ཚོར་གསུང་ཆོས་གནང་བར་ཞུགས་ཐེངས་གཉིས་པ་ཡིན། ད་རེབ་ཐེངས་སྔོན་མ་ལས་ཀྱང་ནང་ཆོས་ལ་གོ་བ་ཆེ་ཙམ་ལོན་ཐུབ་པ་བྱུང་སོང་། དམིགས་བསལ་གང་བློ་མ་དེ་སྔོན་དགེ་རྒན་གྱིས་འགྲེལ་བཤད་གནང་བ་ལས་ལྷག་གི་གོ་བ་ཡག་པོ་ལོན་སོང་། ང་རང་གི་བསམ་པར་ནང་ཆོས་ཤེས་རྒྱུ་གལ་ཆེན་པོ་རེད་དེ། གང་ཤེས་པ་དེ་ཉམས་ལེན་བྱ་རྒྱུ་དེ་ལས་གལ་ཆེན་པོ་རེད་བསམ་གྱི་འདུག ཅེས་བརྗོད་སོང་།

གསར་འགོད་པ། དོན་གོ