ཟླ་འདིའི་ཕྱི་ཚེས་ ༡༠ ཉིན་ནས་བཟུང་༧གོང་ས་མཆོག་གིས་ཨི་ཊ་ལིར་མང་ཚོགས་ལ་ཆོས་འབྲེལ་དང་བཀའ་སློབ་སོགས་མཛད་འཕྲིན་ཁག་བསྐྱང་རྒྱ་ཡིན་འདུག
ཁ་སང་ཕྱི་ཚེས་ ༨ ཉིན་༧གོང་ས་མཆོག་བཞུགས་སྒར་དྷ་རམ་ས་ལ་ནས་ལྡི་ལིར་ཆིབས་བསྒྱུར་གནང་ཡོད་པ་དང་། དེ་རིང་ཚེས་ ༩ ཉིན་ལྡི་ལིར་ཤེས་ལྡན་པ་དང་གཞུང་འབྲེལ་མིན་པའི་ཚོགས་སྡེ་ཁག་གི་མི་སྣ། གཞུང་ཚབ་ཁག་གི་འཐུས་མི་བཅས་ལ་ཐུག་འཕྲད་གནང་གི་ཡོད་འདུག ཟླ་འདིའི་ཚེས་ ༡༠ ཉིན་༧གོང་ས་མཆོག་ཡུ་རོབ་ཙོང་ཁ་པ་ནང་ཆོས་བསྟི་གནས་ཁང་ (Istituto Lama Tzong Khapa) གིས་ཇི་ལྟར་གསོལ་འདེབས་ཞུས་དོན་ལྟར་ཆིབས་བསྒྱུར་གནང་སྟེ། ཚེས་ ༡༤ ཉིན་ཨི་ཊ་ལིའི་ལེ་ཝོ་ནོར་ (Livorno) མངའ་ཁུལ་དུ་མང་ཚོགས་ལ་མགོན་པོ་ཀླུ་སྒྲུབ་ཀྱིས་མཛད་པའི་༼བཤེས་སྦྲིངས༽ བཀའ་ཆོས་དང་། ཚེས་ ༡༥ ཉིན་གྱི་སྔ་དྲོར་མོ་ཊི་ལ་ནེ་ཧྥོ་རིམ་ (Modigliani Forum) དུ་མང་ཚོགས་ལ་སྤྱན་རས་གཟིགས་ཀྱི་བཀའ་དབང་། ཚེས་ ༡༥ ཉིན་གྱི་ཕྱི་དྲོར་མང་ཚོགས་ལ་བྱམས་སྙིང་རྗེ་དང་བཟང་སྤྱོད་ཀྱི་སྐོར་གྱི་བཀའ་སློབ་གནང་རྒྱུ་ཡིན་འདུག
དེའི་རྗེས་༧གོང་ས་མཆོག་ཇམ་མུ་ཀ་ཤི་མུར་ཆིབས་བསྒྱུར་གནང་སྟེ། ཚེས་ ༢༣ ནས་ ༢༥ བར་ཇམ་མུ་ཀ་ཤི་མུར་ཟངས་དཀར་ས་གནས་སུ་མང་ཚོགས་ལ་༼ལམ་རིམ་བསྡུས་དོན༽ གསུང་ཆོས་དང་སྤྱན་རས་གཟིགས་ཀྱི་བཀའ་དབང་གནང་རྒྱུ་ཡིན་འདུག་ལ། ཚེས་ ༢༩ ཉིན་ལ་དྭགས་ཀླུ་འཁྱིལ་དགོན་པར་ཆིབས་བསྒྱུར་གྱིས་ཕར་ཕྱིན་དབྱར་ཆོས་ཆེན་མོ་དང་དབུ་མའི་བགྲོ་གླེང་དབུ་འབྱེད་བཅས་གནང་རྒྱུ་ཡིན་པ་དང་། ཚེས་ ༣༠ ཉིན་ཕར་ཕྱིན་མཁས་པའི་བགྲོ་གླེང་གི་ཚོགས་མགོན་དུ་ཆིབས་བསྒྱུར་དབུ་བཞུགས་གནང་རྒྱུ་ཡིན་འདུག
ཕྱི་ཟླ་ ༧ ཚེས་ ༡ ཉིན་ལ་དྭགས་ཀླུ་འཁྱིལ་དགོན་པར་མང་ཚོགས་ལ་༼ཤེས་རབ་སྙིང་པོ༽ ཆོས་འབྲེལ་གནང་རྒྱུ་ཡིན་པར་མ་ཟད། མངའ་རིས་ཚང་དགོན་ཁག་བདུན་གྱི་དགེ་འདུན་འདུས་དམངས་དང་སེར་སྐྱ་ཐུན་མོང་གིས་༧གོང་ས་མཆོག་ལ་བརྟན་བཞུགས་འབུལ་རྒྱུ་ཡིན་འདུག ཚེས་ ༣ ནས་ ༡༤ བར་༧གོང་ས་མཆོག་གིས་ཕྱི་ནང་གི་དད་ལྡན་ཆོས་ཞུ་བར་དུས་འཁོར་དབང་ཆེན་གནང་རྒྱུ་ཡིན་འདུག
གསར་འགོད་པ། དོན་གོ
