མཱ་ལེ་ཞེ་ཡའི་བོར་བརླག་ཏུ་ཕྱིན་པའི་གནམ་གྲུའི་གནས་ཚུལ་མཁོ་སྤྲོད་བྱས་ན། ཨ་སྒོར་ས་ཡ་ ༥ ཡིས་བྱ་དགའ་སྤྲོད་འཆར་གྱིས་རོགས་དངུལ་བསྡུ་བཞིན་འདུག
འདི་ལོའི་ཕྱི་ཟླ་ ༣ ཚེས་ ༨ ཉིན་མཱ་ལེ་ཞེ་ཡའི་འགྲུལ་སྐྱེལ་གནམ་གྲུ་ཨང་རྟགས་ (MH370) ཅན་བོར་བརླག་ཏུ་ཕྱིན་ཏེ་ཟླ་བ་ ༣ ལྷག་འགྲོ་བཞིན་ཡོད་པ་དང་། ད་ལྟའི་བར་མཱ་ལེ་ཞེ་ཡའི་གཙོས་ཨ་རི་དང་རྒྱ་ནག ཨོ་སི་ཊོ་ལི་ཡ་སོགས་རྒྱལ་ཁབ་ཁག་གི་མཁའ་ལམ་ཞིབ་འཇུག་གི་ཚོགས་སྡེ་མང་པོས་འཚོལ་ཞིབ་བྱས་ཡོད་ཀྱང་། ཧིན་རྡུ་རྒྱ་མཚོའི་ལྷོ་ཁུལ་ནས་གནམ་གྲུ་ཞིག་གི་ཆག་རོ་རྙེད་པ་ཙམ་ལས་དོན་འབྲས་གང་ཡང་ཐོན་མེད་སྟབས། ཟླ་འདིའི་ཕྱི་ཚེས་ ༨ ཉིན་བོར་བརླག་ཕྱིན་པའི་འགྲུལ་བའི་ཁྱིམ་མི་དང་འབྲེལ་ཡོད་ཚོས། ཨ་རིའི་རོགས་དངུལ་འཚོལ་སྡུད་དྲ་བ་ཨིན་ཌི་གྷོ་གྷོ་ (https://www.indiegogo.com )ཟེར་བ་བརྒྱུད་དེ། རོགས་དངུལ་འཚོལ་སྒྲུབ་བྱེད་མགོ་བརྩམས་ཡོད་པ་དང་། མ་འོངས་པར་ཉུང་མཐར་ཨ་སྒོར་ས་ཡ་ ༥ བསྡུས་ཏེ། གནམ་གྲུ་གར་ཡོད་ཀྱི་གནས་ཚུལ་མཁོ་སྤྲོད་དང་ཡང་ན་གནམ་གྲུ་བོར་བརླག་དང་འབྲེལ་བའི་ནང་ཁུལ་གྱི་གསང་བ་མཁོ་སྤྲོད་བྱེད་མཁན་ལ་དགའ་རྟགས་སུ་སྤྲོད་འཆར་ཡོད་འདུག
ཁྱིམ་མི་བོར་བརླག་ཕྱིན་པའི་ཨ་མ་ཞིག་གིས་གསར་འགོད་པར། “འཛམ་གླིང་རྒྱལ་ཁབ་ཁག་གི་གཞུང་དང་འབྲེལ་ཡོད་ཚོགས་སྡེ་ཁག་ནས་ཐབས་ཤེས་གང་ཡོད་བཏོན་ཏེ། བོར་བརླག་ཏུ་ཕྱིན་པའི་གནམ་གྲུ་འཚོལ་ཞིབ་ཡུན་རིང་བྱས་ཡོད་ཀྱང་། ད་ལྟའི་བར་གནས་ཚུལ་ངེས་གཏན་ཞིག་ཤེས་རྟོགས་བྱུང་ཐུབ་མེད། འཚོལ་ཞིབ་ཀྱི་ཐབས་ལམ་འོས་འཚམ་མིན་པའམ་ཡང་ན་འཚོལ་ཞིབ་ཀྱི་ཁ་ཕྱོགས་ནོར་དུ་བཅུག་པ་གང་ཡིན་ཡང་། འཚོལ་ཞིབ་ལ་འབྲས་བུ་གང་ཡང་མ་ཐོན་པ་དེས་མི་མང་ལ་བློ་ཕམ་ཆེན་པོ་བཟོས་སོང་། ད་ལྟ་ང་ཚོས་བྱེད་ཐབས་འདི་བརྒྱུད་ནས་བོར་བརླག་ཏུ་ཕྱིན་པའི་གནམ་གྲུ་རྙེད་སོན་ཡོང་བར་རེ་བ་རྒྱག་བཞིན་ཡོད། ”ཅེས་བརྗོད་འདུག
རོགས་དངུལ་འཚོལ་སྡུད་ཀྱི་འགན་འཛིན་ལི་སཱང་གིས། “མཱ་ལེ་ཞེ་ཡའི་གནམ་གྲུ་བོར་བརླག་ཏུ་གྱུར་བའི་གནད་དོན་དེ་མཁའ་འགྲུལ་གྱི་ལོ་རྒྱུས་ནང་བྱུང་མ་མྱོང་བའི་གསང་བའི་གནད་དོན་ཆེན་པོ་ཞིག་ཡིན་ལ། འཚོལ་ཞིབ་ཀྱི་བྱེད་ཐབས་མང་པོར་འབྲས་བུ་མ་ཐོན་པར་བརྟེན། ང་ཚོས་མི་མང་གི་རྒྱབ་སྐྱོར་ལ་བརྟེན་ནས་བོར་བརླག་ཕྱིན་པའི་གནམ་གྲུ་དང་རང་གི་ཁྱིམ་མི་གཉེན་འབྲེལ་ཚོ་རྙེད་སོན་ཡོང་བའི་རེ་བ་རྒྱག་བཞིན་ཡོད་པ་མ་ཟད། ས་གནས་ག་གེ་མོ་ཞིག་ན་གནད་དོན་འདིའི་སྐོར་ཤེས་མཁན་གྱི་མི་ཞིག་ཡོད་པར་ང་ཚོས་ཡིད་ཆེས་བྱེད་ཀྱི་ཡོད་སྟབས། དངུལ་གྱི་བྱ་དགའ་འདིས་ནམ་ཞིག་ཁོའམ་ཡང་ན་ཁོ་མོས་ང་ཚོར་གནས་ཚུལ་ཞིག་མཁོ་སྤྲོད་བྱེད་པར་སྐུལ་སློང་ཐུབ་པའི་རེ་བ་ཡོད། ”ཅེས་བརྗོད་འདུག
ཁ་སང་ཕྱི་དྲོར་མཱ་ལེ་ཞེ་ཡ་གཞུང་གིས་གསར་འགོད་ལྷན་ཚོགས་ཤིག་བསྡུས་ཏེ། བོར་བརླག་ཕྱིན་པའི་གནམ་གྲུ་མུ་མཐུད་འཚོལ་ཞིབ་བྱེད་བཞིན་ཡོད་ལ། དེ་རིང་ཕྱི་ཚེས་ ༡༠ ཉིན་ལས་དོན་རུ་ཁག་ཅིག་ཨོ་སི་ཊོ་ལི་ཡའི་རྒྱལ་ས་ཁན་བྷི་རཱར་ཆེད་གཏོང་གིས། གནམ་གྲུ་འཚོལ་ཞིབ་ཀྱི་ལས་གཞི་གསར་པའི་ནང་མཱ་ལེ་ཞེ་ཡ་གཞུང་ཇི་ལྟར་མཉམ་ཞུགས་བྱེད་དགོས་པའི་ཐད་གྲོས་བསྡུར་བྱ་རྒྱུ་དང་། མ་འོངས་པར་ཧིན་རྡུ་རྒྱ་མཚོའི་ལྷོ་ཁུལ་གྱི་རྒྱ་མཚོའི་གཏིང་དུ་འཚོལ་ཞིབ་བྱེད་པའི་འཆར་གཞི་ཡོད་ཀྱང་། དེ་ནི་འཚོལ་ཞིབ་གཞི་རྒྱ་ཆེ་ཤོས་དང་དཀའ་ཁག་ཆེ་ཤོས་ཡིན་པས་ད་ལྟའི་ཆར་ལག་བསྟར་བྱེད་པར་དཀའ་ངལ་ཡོད་ལུགས་དང་། འཚོལ་ཞིབ་ཀྱི་འགྲོ་གྲོན་ཚང་མ་མཱ་ལེ་ཞེ་ཡ་དང་ཨོ་སི་ཊོ་ལི་ཡ་གཞུང་ནས་གཏོང་རྒྱུ་གཏན་འཁེལ་བྱུང་ཡོད་སྐོར་བསྒྲགས་ཡོད་པ་དང་། སྐབས་དེར་གསར་འགོད་པས་དངུལ་གྱི་བྱ་དགའ་སྤྲད་དེ་གནམ་གྲུ་འཚོལ་ཐབས་བྱེད་ཀྱིན་པར་གཞུང་ཕྱོགས་ནས་དགོངས་ཚུལ་ཅི་ཡོད་དྲིས་པར། ཁྱིམ་མི་གཉེན་འབྲེལ་ཚོར་ཐབས་ལམ་དེ་འདེམས་པའི་ཐོབ་ཐང་ཡོད་ལུགས་བརྗོད་འདུག
གསར་འགོད་པ། པདྨ་མཚོ།
གནས་ཆུང་སྐུ་ལྔའི་རྒྱལ་བོར་ལྷ་བཞེས་ཅིག་གནང་ནས་དོན་དག་འདི་ལ་རྩད་གཅོད་ཅིག་བྱས་ན་ཡག་པོ་ཡོད་རྒྱུ་རེད་བསམ། མི་ཉིས་བརྒྱ་ལྷག་གི་ཚེ་སྲོག་དང་འབྲེལ་བ་ཡོད་པའི་གནམ་གྲུ་བོར་སྟོར་འདི་འཛམ་གླིང་གི་རྒྱལ་ཁབ་ཁག་འདྲ་མིན་དང་། ཚོགས་པ་འདྲ་མིན། མི་སྒེར་བ་བཅས་ཀྱིས་ས་བཙལ་རྡོ་བཙལ་བྱེད་བཞིན་པའི་ཛ་དྲག་གི་སྐབས་འདི་འདྲར་ང་ཚོ་བོད་པ་ཚོས་ཀྱང་གོ་མེད་ཚོར་མེད་དུ་བསྐྱུར་ན་མི་འོས། དེས་ན་ང་ཚོར་ལས་དོན་འདི་ལ་མི་རྒྱུ་གཉིས་ཀྱི་ཐད་ནས་རོགས་བྱེད་རྒྱུའི་ཆ་རྐྱེན་འཛོམས་པོ་མེད་ཙང་།ལྷ་རྟེན་སྐུ་རྟེན་ཁག་ལ་འོ་བརྒྱལ་ཞིག་བཟོས་ན་ག་འདྲ་ཡིན་ནམ། ཅིག་བྱས་ན་བོད་ཀྱི་ལྷ་བ་མོ་བ་ཁག་གི་བརྩི་མཐོང་ལའང་གདེང་འཇོག་གསར་བ་ཞིག་འཐོབ་མི་སྲིད་པའི་ངེས་པ་མེད།
ང་ཚོ་བོད་པའི་མངོན་ཤེས་ནང་ཁུལ་མ་གཏོགས་རྒྱལ་སྤྱི་ལ་འཕྲོད་ལེ་མ་རེད