སྐབས་ཉི་ཤུ་བའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་རྐང་རྩེད་སྤོ་ལོ་འགྲན་བསྡུར་གྱི་མཐའ་མའི་རྒྱལ་ཁ་བལ་ཡུལ་སྤོག་ར་བཀྲ་ཤིས་གླིང་རུ་ཁག་ལ་ཐོབ་འདུག
ཟླ་འདིའི་ཕྱི་ཚེས་ ༤ ཉིན་ནས་བཟུང་བོད་རྒྱལ་ཡོངས་རྩེད་རིགས་ཚོགས་པས་གོ་སྒྲིག་འོག རྒྱ་གར་བྱང་ཕྱོཊ་ལྡེ་ར་རྡུན་དོན་འགྲུབ་གླིང་བོད་མིའི་གཞིས་ཆགས་སུ་ ༢༠༡༤ ལོའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་རྐང་རྩེད་སྤོ་ལོ་འགྲན་བསྡུར་ཚོགས་བཞིན་ཡོད་པ་ལྟར། ཁ་སང་ཚེས་ ༡༥ ཉིན་གྱི་སྔ་དྲོ་ས་གནས་རྩེད་ཐང་དུ་བོད་ཁྱིམ་བུ་མོའི་མཉམ་འབྲེལ་རུ་ཁག་དང་ལྡེ་ར་རྡུན་གྱི་བུ་མོའི་དམག་མིའི་རུ་ཁག་གཉིས་འགྲན་བསྡུར་གནང་བ་དང་། ཕྱི་དྲོའི་ཆུ་ཚོད་ ༣།༠༠ པའི་ཐོག་སྐུ་མགྲོན་གཙོ་བོར་ལྡེ་ར་རྡུན་དམག་ཁང་ཨང་ ༢༢ པའི་སྐུ་ཞབས་སྦིར་གྷེ་ཌི་ཡར་དྷ་ཡ་ཅན་དྷི་ (Brigadier Daya Chand) མཆོག་དང་། ས་གནས་མགོ་འཛིན། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ། ས་གནས་མི་མང་བཅས་མི་ ༣༠༠༠ ཡས་མས་འདུ་འཛོམས་ཐོག སྤོག་ར་བཀྲ་ཤིས་གླིང་རུ་ཁག་དང་དོན་འགྲུབ་གླིང་རུ་ཁག་ཀ་བ་གཉིས་བར་མཐའ་མའི་འགྲན་བསྡུར་གནང་སྟེ། སྤོག་ར་བཀྲ་ཤིས་གླིང་རུ་ཁག་སྤོ་ལོ་ ༢ དང་ལྡེ་ར་རྡུན་དོན་འགྲུབ་གླིང་རུ་ཁག་ཀླད་ཀོར་ཆགས་ཏེ་སྤོག་བཀྲ་ཤིས་གླིང་རུ་ཁག་ལ་རྒྱལ་ཁ་ཐོབ་ཡོད་འདུག
ཁ་སང་མཐའ་མའི་རྩེད་འགྲན་གྲུབ་རྗེས་སྐུ་མགྲོན་གཙོ་བོ་མཆོག་ནས་ཨང་དང་པོ་ཐོབ་མཁན་སྤོག་ར་རུ་ཁག་ལ་རྒྱལ་ཡུམ་ཆེན་མོ་དྲན་རྟེན་གསེར་གྱི་རྟགས་མ་དང་ཧིན་སྒོར་འབུམ་ ༡ བྱ་དགའ་དང་། ཨང་གཉིས་པ་དོན་འགྲུབ་གླིང་རུ་ཁག་ཀ་པར་རྟགས་མ་དང་ཧིན་སྒོར་སྟོང་ཕྲག་ ༧༠ བྱ་དགའ། རྩེད་མོ་ཡག་ཤོས་རྩེད་མཁན་མོན་གྷོ་རུ་ཁག་ལ་རྟགས་མ་དང་ཧིན་སྒོར་ཁྲི་ ༡ བྱ་དགའ། རྩེད་མོ་ཡག་ཤོས་དང་སྤོ་ལོ་མང་ཤོས་ལྡུག་མཁན་བལ་ཡུལ་སྤོག་ར་བཀྲ་ཤིས་གླིང་རུ་ཁག་གི་ནོར་བུ་ལགས་སུ་རྟགས་མ་དང་ཧིན་སྒོར་ ༥༠༠༠ བཅས་ཀྱི་བྱ་དགའ་སྤྲད་ཡོད་འདུག
སྐབས་ ༢༠ པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་པའི་རྐང་སྤོ་འགྲན་བསྡུར་ནང་རྒྱ་བལ་གཉིས་ཀྱི་རང་ཁག་ ༢༡ འགྲན་ཞུགས་གནང་ཡོད་འདུག་ལ། དེ་དག་ནི་དོན་འགྲུབ་གླིང་རུ་ཁག་ཀ་བ་དང་། གྷོ་ལ་དྷ་ལ་གཞོན་ནུའི་རུ་ཁག གྷོ་ཝ་རུ་ཁག རབ་རྒྱས་གླིང་རུ་ཁག སྦོན་ཊ་ཆོལ་གསུམ་རུ་ཁག བོད་ཁྱིམ་མཉམ་འབྲེལ་རུ་ཁག སྤོག་ར་བཀྲ་ཤིས་གླིང་རུ་ཁག གླིང་ཚང་རུ་ཁག དྷ་རམ་ས་ལའི་རུ་ཁག དོན་ལྡན་གླིང་རུ་ཁག དོན་འགྲུབ་གླིང་རུ་ཁག་ཁ་བ། མཚམས་རུ་ཁག འཕགས་ཤིང་མཉམ་འབྲེལ་རུ་ཁག མོན་གྷོ་རུ་ཁག ཝར་ན་རུ་ཁག ནོར་རྒྱས་གླིང་རུ་ཁག སིམ་ལ་རུ་ཁག ཁྲེ་ཌེ་ཨེལ་ལུས་རྩལ་རུ་ཁག(སྦེལ་ཀོབ)། ཕུན་ཚོགས་གླིང་མཉམ་འབྲེལ་རུ་ཁག(ཌལ་ཧོར)། ཅོན་ཏ་ར་མཉམ་འབྲེལ་རུ་ཁག ལྡི་ལིའི་རུ་ཁག་བཅས་ཡིན་འདུག
དེ་རིང་གསར་འགོད་པས་ཁ་པར་བརྒྱུད་བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོ་སྐལ་བཟང་དོན་འགྲུབ་ལགས་སུ་ཐེངས་འདིའི་རྩེད་འགྲན་གྱི་སྐོར་ལ་སྐད་ཆ་དྲིས་པར་ཁོང་གིས། རྩེད་མོ་གོ་སྒྲིག་པའི་ངོས་ནས་ད་བར་དཀའ་ངལ་གཙོ་བོ་རྩེད་མོའི་སྐབས་རྙོག་ཟིང་བྱུང་བཞིན་པའི་སྐོར་ཡིན་ཡང་། ད་ལོ་དེའི་རིགས་གཅིག་ཀྱང་མ་བྱུང་བར་རྩེད་མོ་རྒྱལ་ཁའི་ངང་ལེག་འགྲུབ་བྱུང་ཡོད་པ་དང་། དངུལ་གྱི་ཐད་ནས་ཀྱང་རྩེད་མོ་བ་ལག་ནས་བསྡུ་བའི་དངུལ་དང་། དགའ་ལྡན་ཕོ་བྲང་གིས་ཞལ་འདེབས་བཅས་ལས་དམིགས་བསལ་དཀའ་ངལ་བྱུང་མེད་སྐོར་བརྗོད་བྱུང་བར་མ་ཟད། ད་ཆར་རྩེད་མོ་རྩེད་མཁན་ལོ་ཆུང་ཡིན་པ་དང་རྩེད་སྟངས། རྩེད་མོ་རྩེད་ཡུལ་ས་གནས་མི་མང་གི་མཉམ་རུབ་ཀྱིས་མཐུན་འགྱུར་རོགས་རམ་གནང་བ་བཅས་ཕྱོཊ་ཡོངས་ནས་ཡར་རྒྱས་འགྲོ་བཞིན་ཡོད་སྐོར་སོགས་བརྗོད་བྱུང་།
སྐབས་ ༢༡ པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་རྟགས་མའི་རྐང་སྤོ་འགྲན་བསྡུར་བཞུགས་སྒར་དྷ་རམ་ས་ལར་འཚོགས་འཆར་ཡོད་འདུག
གསར་འགོད་པ། དོན་གོ
སྦོག་ར་བཀྲ་ཤིས་གླིང་གི་སྤོ་ལོ་རུ་ཁག་ལ་བོད་རྒྱལ་ཡོངས་རྐང་རྩེད་སྤོ་ལོ་རྩེད་འགྲན་ཆེན་མོའི་སྐབས་གཟི་བརྗིད་ངང་རྒྱལ་ཁ་ཐོབ་པར་རྟེན་འབྲེལ་ཞུ།