རྒྱ་ནག་ཧྲན་ཞི་ཞིང་ཆེན་སྲིད་གྲོས་ཀྱི་མགོ་ཁྲིད་ལིན་ཀྲིན་ཙི་དང་ཧྲན་ཏུང་ཞིང་ཆེན་གྱི་མགོ་ཀྲིད་གཞོན་པ་ཏོའུ་ཧྲན་ཞེ་གཉིས་ལ་ཞིབ་བཤེར་བྱེད་བཞིན་ཡོད་འདུག
ཟླ་འདིའི་ཕྱི་ཚེས་ ༡༩ ཉིན་ཧྲན་ཞི་ཞིང་ཆེན་ཨུ་ཡོན་ལྷན་ཁང་གི་ཚོགས་ཆེན་ཐོག རྒྱ་ནག་དབུས་སྒྲིག་ཁྲིམས་ཞིབ་བཤེར་ཁང་གིས་ཧྲན་ཞི་ཞིང་ཆེན་སྲིད་གྲོས་ཀྱི་མགོ་ཁྲིད་གཞོན་པ་ལིན་ཀྲིན་ཙི་དང་། ཧྲན་ཞི་ཞིང་ཆེན་གྱི་མགོ་ཁྲིད་གཞོན་པ་ཏོའུ་ཧྲན་ཞེ་གཉིས་ཀྱིས་ཁྲིམས་འགལ་གྱི་ནག་ཉེས་ཚབས་ཆེན་བྱས་པའི་དོགས་གཞིའི་འོག ད་ལྟ་ཞིབ་བཤེར་བྱེད་བཞིན་ཡོད་ལུགས་བསྒྲགས་འདུག
ཅིན་ཀྲིན་ཙི་དང་ཏོའུ་ཧྲན་ཞེ་གཉིས་ལ་ཞིབ་བཤེར་བྱེད་བཞིན་ཡོད་ལུགས་ཕྱིར་བསྒྲགས་བྱས་པའི་དགོང་མོ་དེར། ཧྲན་ཞི་ཞིང་ཆེན་ཡཱེན་ཁྲིན་གྲོང་ཁྱེར་ཨུ་ཡོན་ལྷན་ཁང་གི་མགོ་ཁྲིད་ཝང་མའོ་སི་དང་། ཁོང་གི་དྲུང་ཡིག་དང་ཁ་ལོ་བ་ཞིག་བཅས་འཛིན་བཟུང་བྱས་ཡོད་པ་དང་། བརྒྱུད་ལམ་ཁག་ནས་གནས་ཚུལ་ཐོན་པ་ལྟར་ན། ཝང་མའོ་སུ་དང་ཏོའུ་ཧྲན་ཞེ། ལིན་ཀྲིན་ཙི་བཅས་ཀྱི་བར་འབྲེལ་འདྲིས་ཆེན་པོ་ཡོད་པ་མ་ཟད། ཝང་མའོ་ཞེ་ཡི་པེ་ཅིན་གྱི་རང་ཁྱིམ་དུ་སྔོག་བཤེར་བྱས་ཏེ་རྒྱ་སྒོར་ས་ཡ་ ༡༠ ལྷག་རྙེད་སོན་བྱུང་ཡོད་སྐོར་རྗོད་ཀྱི་ཡོད་ཀྱང་། ད་ལྟའི་ཆར་གཞུང་ཕྱོགས་ནས་གནས་ཚུལ་དེ་བདེན་པ་ཡིན་མིན་གསལ་བཤད་གང་ཡང་བྱས་མི་འདུག
ལིན་ཀྲི་ཙི་ནི་རྒྱ་ནག་གི་སྲིད་འཛིན་ཟུར་པ་ཧུའུ་ཅིན་ཐའོ་ཡི་དྲུང་ཡིག་ཟུར་པ་དང་རྒྱ་ནག་དབུས་འཐབ་ཕྱོགས་གཅིག་གྱུར་ཁང་གི་མགོ་ཁྲིད་ལིན་ཅི་ཧྭ་ཡི་ཕུ་བོ་ཡིན་སྟབས། ལིན་ཅི་ཧྭ་ལ་ཞིབ་བཤེར་བྱེད་བཞིན་པ་བསྒྲགས་རྗེས། ལིན་ཅི་ཧྭ་ལ་ཀུན་གྱིས་དོ་སྣང་ཆེན་པོ་སླེབ་ཀྱི་ཡོད་ཀྱང་། ཕྱི་ཚེས་ ༢༠ ཉིན་ཀྲུང་དབྱང་བརྙན་འཕྲིན་ཁང་གིས། རྒྱ་ནག་དབུས་འཐབ་ཕྱོགས་གཅིག་གྱུར་ཁང་གིས་བསྡུས་པའི་ཏང་ཕྱིའི་གནད་ཡོད་མི་སྣའི་ཆེད་དོན་བཞུགས་མོལ་ཚོགས་འདུའི་ཐོག ལིན་ཅི་ཧྭ་ཞུགས་ཡོད་པ་བརྙན་འཕྲིན་དུ་བསྟན་ཡོད་པ་མ་ཟད། བཞུགས་མོལ་ཚོགས་འདུའི་སྐོར་གྱི་གསར་འགྱུར་མཇུག་ཏུ་ལིན་ཅིན་ཧྭ་ཚོགས་འདུར་ཞུགས་འདུག་ཅེས་གསལ་བོར་བརྗོད་ཡོད་འདུག
རྡོ་སོལ་སོགས་རང་བྱུང་ཐོན་ཁུངས་ཕྱུག་པོ་ཡིན་པའི་ཧྲན་ཞི་ཞིང་ཆེན་ནང་། འདས་པའི་དུས་ཡུན་ཐུང་ངུའི་ནང་ཞིང་ཆེན་ཨུ་ཡོན་ལྷན་ཁང་གི་མགོ་ཁྲིད་གཞོན་པ་ཅིན་ཏོ་མེན་སོགས་མཐོ་རིམ་དཔོན་རིགས་མང་པོ་ཁྲིམས་འགལ་གྱི་ནག་ཉེས་འོག་འཛིན་བཟུང་བྱས་ཡོད་པ་དང་། འདི་ལོའི་ཕྱི་ཟླ་ ༤ ནང་འཛིན་བཟུང་བྱས་པའི་ཧྭ་རིན་ཚོང་གཉེར་ཁང་གི་སྤྱི་གཉེར་བ་སུང་ལིན་ཀྱང་ཧྲན་ཞི་ཞིང་ཆེན་གྱི་མཐོ་རིམ་དཔོན་རིགས་དང་འབྲེལ་བ་ཟབ་མོ་ཡོད་ལུགས་རྗོད་ཀྱི་འདུག
གསར་འགོད་པ། པདྨ་མཚོ།
