ནང་ཆོས་དེ་ཆོས་ལུགས་ཀྱི་འདུ་ཤེས་ཐོག་ནས་སྦྱོང་རྒྱུ་མ་ཡིན་པར་ཤེས་ཡོན་གྱི་འདུ་ཤེས་ཐོག་ནས་སྦྱོང་དགོས།
བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༠ སྟེང་གི་རྩོམ་སྒྲིག་པའི་གཏམ།
ཉེ་ལམ་དྷ་སྟེང་བོད་ཁྱིམ་དུ་༧གོང་ས་མཆོག་གིས་བོད་ཕྲུག་ཚོར་ནང་ཆོས་ངོ་སྤྲོད་གནང་སོང་། ད་ལོ་ནི་༧གོང་ས་མཆོག་གིས་བོད་ཕྲུག་ཚོར་ནང་ཆོས་འཛིན་གྲྭ་ཚོགས་ཐེངས་བདུན་པ་དེ་རེད། བཙན་བྱོལ་ནང་གི་བུ་ཕྲུག་འདི་དག་ཅི་འདྲའི་བསོད་བདེ་ཆེན་པོ་ཅན་རྐྱང་རེད། བོད་བརྒྱུད་ནང་བསྟན་ཀྱི་ཆེས་མཐོའི་དབུ་ཁྲིད་ཅིག་གི་ཞལ་དྲོན་མོ་ནས་ཟབ་ཅིང་རྒྱ་ཆེ་བའི་ནང་ཆོས་སློབ་ཁྲིད་འཐོབ་བཞིན་ཡོད། བོད་ནང་གི་སློབ་ཕྲུག་ཚོར་༧གོང་ས་མཆོག་གི་ནང་ཆོས་སློབ་ཁྲིད་ཕར་ཞོག ཁོང་གི་གསུང་སྐད་ཐོས་རྒྱུ་དང་སྐུ་པར་མཇལ་རྒྱུའི་སྐལ་བའང་བློ་ཁོག་ཅིག་དང་བློས་གཏོང་ཞིག་ལ་བརྟེན་དགོས། ཐ་ན་བོད་ཡིག་བོད་སྐད་ཀྱི་སློབ་དེབ་སློབ་ཐུན་དེ་དག་ཀྱང་རང་གི་ཚེ་སྲོག་གིས་སྲུང་སྐྱོབ་བྱེད་དགོས།
སྐྱ་སེར་ཕོ་མོ་དབྱེར་མེད་ཀྱིས་ནང་ཆོས་སློབ་སྦྱོང་བྱེད་དགོས་པ་དང་། ལྷག་པར་དུ་བོད་རིགས་གཞོན་སྐྱེས་ཚོས་ནང་ཆོས་ལ་དོ་སྣང་ཆེ་ཙམ་བྱེད་དགོས་པ་༧གོང་ས་མཆོག་གིས་ཡུན་རིང་སྙིང་དུ་བརྣག་པའི་འདོད་དོན་གཅིག་རེད། ད་ལོ་སླར་ཡང་སློབ་ཕྲུག་ཚོར། ང་ལ་མཚོན་ན་ལོ་བརྒྱད་ཅུའི་སྒང་ལ་འགྲོ་བསྡད་ཡོད། ཁྱེད་ཅག་གིས་ནང་ཆོས་སློབ་གཉེར་ཐོག་འབད་པ་བྱས་ཏེ་མི་རབས་རྗེས་མ་ཚོར་བོད་པའི་རིག་གཞུང་བརྒྱུད་སྤྲོད་བྱེད་དགོས། དུས་རབས་ཉེར་གཅིག་པ་འདིར་སངས་རྒྱས་བསྟན་པ་གནས་ཐུབ་དང་མི་ཐུབ་ཁྱེད་རང་ཚོར་ཐུག་ཡོད། དེ་དོན་དག་ཆུང་ཆུང་ཞིག་མ་རེད། ཅེས་གྲྭ་ས་ཁག་གི་བན་ཕྲུག་དང་སློབ་གྲྭ་ཁག་གི་སློབ་ཕྲུག་ཐུན་མོང་ལ་ལྕིད་ཏིག་ཏིག་གི་བཀའ་སློབ་གནང་སྟེ། གཡོལ་ཐབས་མེད་པའི་འགན་འཁྲི་བསྐྱོན་ཡོད།
༧གོང་ས་མཆོག་གིས་དུས་རྒྱུན་ནང་པའི་ཚན་རིག་དང་ནང་པའི་ལྟ་གྲུབ། ནང་པའི་ཆོས་ལུགས་བཅས་རིགས་གསུམ་དུ་བཀར་ནས་གསུང་གི་ཡོད་པ་དེ་ཡང་ཐོག་མ་དྷ་སློབ་ཕྲུག་ཚོར་ནང་ཆོས་ངོ་སྤྲོད་ལས་རིམ་འདི་ཐེངས་དང་པོ་དབུ་འཛུགས་སྐབས་དྷ་སྟེང་བོད་ཁྱིམ་དུ་གསུངས་པ་འདྲ། གསུང་སྟངས་འདི་༧གོང་ས་མཆོག་ལ་གཞན་དྲིང་མི་འཇོག་པའི་རླབས་ཆེན་གྱི་ཕྱག་རྗེས་མང་དག་ཅིག་ཡོད་པའི་ཁྲོད་ཀྱི་གཅིག་རེད་ལ། འཛམ་གླིང་གི་མཐོ་ཚད་དྲག་ཚད་ཚང་མས་ངོ་མཚར་བྱེད་ཡུལ་གཅིག་ཀྱང་འདི་ཡིན། སློབ་ཕྲུག་ཁྱེད་ཅག་གི་དྲན་ངོས་ན་༧གོང་ས་མཆོག་གི་བཀའ་གསུང་དེ་དག་གི་འབྲུ་དོན་ག་ཚོད་ཅིག་ལྷག་ཡོད་དམ། ཁྱེད་ཅག་གི་གཤིས་རྒྱུད་དུ་ནང་པའི་ལྟ་སྒོམ་སྤྱོད་གསུམ་གྱི་བག་ཆགས་ཅི་ཙམ་འགོས་ཡོད་དམ།
ལས་འགན་འདི་སློབ་ཕྲུག་གཅིག་པུར་ཁ་གཡར་ཁག་འགེལ་བྱེད་སྲོལ་གང་ན་ཡོད། ལོ་རེ་རེའི་༧གོང་ས་མཆོག་གི་ནང་ཆོས་ངོ་སྤྲོད་དང་། སློབ་གྲྭ་སློབ་ཕྲུག་སོགས་དང་འབྲེལ་བའི་མཛད་སྒོ་རིགས་ཀྱི་སྟེང་ཆོས་ཕྱོགས་ཀྱི་དབུ་ཁྲིད་རེ་ཕེབས་སྐབས། འཆར་ཅན་ལྟ་བུར་སློབ་ཕྲུག་ཚོར་རྟགས་གསལ་གཏོང་བའི་ལས་རིམ་རེ་གོ་སྒྲིག་བྱེད་ཀྱིན་ཡོད། རྒད་པོ་རྒན་མོ་འགའ་རེ་དང་། ཡང་ན་སློབ་ཕྲུག་རེ་གཉིས་ལ་རྟགས་གསལ་གཏོང་རྒྱུ་དང་ལན་འདེབས་རྩ་ཚིག་འགའ་རེ་བློ་འཛིན་བྱེད་དུ་བཅུག་སྟེ། མཛད་སྒོ་ནམ་ཡོད་ལ་གླུ་གར་བཞིན་ངག་སྐྱོར་གཏོང་གི་འཇུག་ཅིང་། མཛད་སྒོ་གྲོལ་བ་དང་གླུ་གར་འཁྲབ་སྟོན་གྲོལ་བ་ལྟར། སློབ་ཕྲུག་ཚོར་དོ་སྣང་མེད་ལ་སློབ་གྲྭའི་འཛིན་སྐྱོང་དང་ཆོས་དགེ་ཚོས་ཀྱང་ཆོ་ག་ཕྱག་ལེན་ཞིག་གི་ཟོལ་དུ་བཞག་ཡོད།
