རྒྱ་ནག་གི་གྱོན་གོས་འཚེམ་བཟོ་བ་བཙོན་པ་ཞིག་གིས་ཡི་གེ་བསྐུར་ཏེ། གྱོན་གོས་ཕྱིར་ཚོང་ཆེད་བཙོན་པ་ཚོས་ཁྱི་ཕག་གི་ལྟོ་ཆས་ཟོས་ཏེ། ཉིན་རེའི་ཆུ་ཚོད་ ༡༥ ནང་ལས་ཀར་བཀོལ་བཞིན་ཡོད་པས་བཙོན་པ་ཚོ་སྐྱོབས་རོགས་ཞེས་རེ་འབོད་བྱས་འདུག
ཁ་སང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཁཱ་རིན་ཝེ་སིན་སི་ཀཱ(Karen Wisínska)ཟེར་བའི་བུད་མེད་ཅིག་གིས། བྱང་ཨར་ལན་ཌིའི་རྒྱལ་ས་བྷེལ་ཧྥ་སི་ཊིར་ཡོད་པའི་དབྱིན་ཇིའི་གྱོན་གོས་ཚོང་ཁང་(Primark )ཞེས་པའི་ནང་ནས་ཉོས་བའི་རྐང་སྣམ་(གོས་ཐུང)ཞིག་གི་ཁུག་མའི་ནང་། རྒྱ་ནག་ཧུའུ་པའེ་ཞིང་ཆེན་གྱི་ངལ་རྩོལ་བསྒྱུར་བཀོད་ར་བ་ཞིག་ཏུ་བཀག་ཉར་བྱས་པའི་བཙོན་པ་ཞིག་གི་རེ་འབོད་ཡི་གེ་རྙེད་སོན་བྱུང་ཡོད་པ་དང་། རྐང་སྣམ་ཉོ་མཁན་གྱི་བུད་མེད་དེས་ཡི་གེའི་ནང་དོན་ཤེས་རྟོགས་བྱུང་མ་ཐག་རེ་འབོད་ཡི་གེ་དེ་རྒྱལ་སྤྱིའི་ཉེས་ཡང་ཚོགས་པའི་འགྲོ་བ་མིའི་ཐོབ་ཐང་ཚན་པར་སྤྲད་ཡོད་འདུག
རེ་འབོད་ཡི་གེ་དེའི་ནང་དུ། ང་ཚོ་རྒྱ་ནག་ཧུའུ་པའེ་ཞིང་ཆེན་ཤིང་ལན་ངལ་རྩོལ་བསྒྱུར་བཀོད་ར་བའི་བཙོན་པ་ཡིན། ང་ཚོས་དུས་ཡུན་རིང་པོ་ནས་ཕྱིར་ཚོང་རྒྱན་གོས་ཐོན་སྐྱེད་ཀྱི་ལས་ཀ་བྱེད་ཀྱིན་ཡོད་པས། ཉིན་རེར་ཆུ་ཚོད་ ༡༥ རིང་ལས་ཀ་བྱེད་དགོས་པ་མ་ཟད། ཉིན་ལྟར་ཁྱི་ཕག་གི་ལྟོ་ཆས་ལས་ཀྱང་སྡུག་པའི་ཟ་མ་ཟོས་ཏེ། རྟ་ནོར་ལྟར་བཙན་སྐུལ་འོག་ལས་ཀ་བྱེད་བཞིན་ཡོད་སྟབས། རྒྱལ་སྤྱིའི་སྤྱི་ཚོགས་ཀྱིས་རྒྱ་གཞུང་གིས་བཙོན་པ་ཚོའི་འགྲོ་བ་མིའི་ཐོབ་ཐང་རྡོག་རོལ་ཏུ་གཏོང་བཞིན་པའི་བྱ་སྤྱོད་འདིར་སྐྱོན་བརྗོད་གནང་རོགས། ང་ཚོ་སྐྱོབས་རོགས་ཞེས་བྲིས་འདུག
ཁཱ་རིན་ཝེ་སིན་སི་ཀཱ་ཟེར་བའི་བུད་མེད་དེས། རྐང་སྣུམ་འདི་ངས་ཕྱི་ལོ་ ༢༠༡༡ ལོར་བྱང་ཨར་ལན་ཌི་ནས་ཉོས་པ་ཡིན། ཡིན་ནའང་། ཉེ་སྔོན་མ་གཏོགས་ཡི་གེ་དེ་མཐོང་མ་བྱུང་། ཡི་གེ་དེའི་ནང་དོན་ག་རེ་ཡིན་ཤེས་ཀྱི་མི་འདུག་པས། ངས་ཡི་གེ་དེ་རང་གི་ངོ་དེབ་ཏུ་བཏང་བ་དང་། ཕྱིས་སུ་དབྱིན་ཡིག་ཏུ་བསྒྱུར་ནས་མཐོང་སྐབས་ང་རང་ཧང་སང་སོང་ལ། ལྷག་པར་དུ་ངས་ཉོས་པའི་རྐང་སྣམ་དེ་རྒྱ་ནག་གི་བཙོན་པ་ཚོས་ངལ་རྩོལ་བྲན་གཡོག་གི་གནས་བབ་འོག་ཐོན་སྐྱེད་བྱས་པར་ཧང་སང་བྱུང་ཞེས་བརྗོད་འདུག
གནད་དོན་དེའི་ཐད་རྒྱལ་སྤྱིའི་ཉེས་ཡང་ཚོགས་པས། ཡི་གེ་དེའི་ནང་དོན་ཚང་མ་བདེན་པ་ཡིན་མིན་ཐག་གཅོད་ཐུབ་ཁག་པོ་ཡིན་ནའང་། གལ་སྲིད་བདེན་པ་ཡིན་ན་གནད་དོན་འདི་ཧ་ཅང་འཇིགས་སུ་རུང་བ་ཞིག་ཡིན་པས། གྱོན་གོས་ཚོང་ཁང་དེས་ངེས་པར་དུ་ཚོང་རྫས་ལ་ལྟ་ཞིབ་ནན་པོ་དགོས་པ་མ་ཟད། རྒྱ་ནག་གི་བཙན་འོག་ངལ་རྩོལ་ཁྲོད་དབྱིན་ཇིའི་ཚོང་གཉེར་ཁང་སུ་ལའང་ཁེ་སྤོགས་ལེན་པའི་ཐོབ་ཐང་གཏན་ནས་མེད་སྐོར་བརྗོད་འདུག
དབྱིན་ཇིའི་ཚོང་ཁང་དེས་རྐང་སྣམ་དེ་རིགས་ ༢༠༠༩ ལོའི་རྗེས་ནས་ཚོང་འདྲེན་བྱས་མེད་ཀྱང་། བུད་མེད་དེས་ཉོས་བའི་རྐང་སྣམ་ཕྱིར་བླངས་ནས་གནད་དོན་གྱི་བྱུང་རིམ་ལ་རྟོག་ཞིབ་བྱ་རྒྱུ་ཡིན་པ་མ་ཟད། རྗེས་ཕྱོགས་ཚོང་ཁང་གི་ངོས་ནས་ཡིད་གཟབ་དགོས་པའི་གནད་དོན་ཡོད་མེད་བརྟག་དཔྱད་བྱ་རྒྱུ་ཡིན་སྐོར་བརྗོད་འདུག
གསར་འགོད་པ། པདྨ་མཚོ།
