དེ་རིང་ཕྱི་ཟླ་ ༦ ཚེས་ ༢༦ ཉིན་ཏེ་འཛམ་གླིང་མནར་གཅོད་བཀག་སྡོམ་ཉིན་མོ་དང་བསྟུན་ཏེ། དྷ་རམ་ས་ལའི་བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་བོད་མི་ཁག་ཅིག་ལ་བཅར་འདྲི་ཞུས་ཡོད་པའི་འོད་སྡེར་ཅིག་འགྲེམས་སྤེལ་དང་མཉམ་དུ་གསར་འགོད་བསྒྲགས་གཏམ་ཞིག་སྤེལ་སོང་།
བསྒྲགས་གཏམ་ནང་། དུས་དྲན་ཉིན་མོ་འདིའི་དམིགས་ཡུལ་ནི་མཐའ་གཅིག་ཏུ་མནར་གཅོད་རིགས་རྩ་མེད་གཏོང་རྒྱུ་དང་། རྒྱལ་ཚོགས་ཀྱིས་ ༡༩༨༧ ལོའི་ཟླ་ ༦ ཚེས་ ༢༦ ཉིན་གཏན་ལ་ཕབ་པའི་མི་སྤྱོད་ལས་འདས་པའི་མནར་གཅོད་བཀག་སྡོམ་སྐོར་གྱི་སྤྱི་ཆིངས་རྣམས་ལག་བསྟར་དོན་འཁྱོལ་ཡོང་རྒྱུ་དེ་རེད། མཉམ་འབྲེལ་རྒྱལ་ཚོགས་ཀྱིས་གསལ་བསྒྲགས་བྱས་པ་ལྟར། མནར་གཅོད་ནི་རྒྱལ་སྤྱིའི་ཁྲིམས་ལུགས་གཞིར་བཟུར་ནག་ཉེས་ཀྱི་བྱ་སྤྱོད་ཅིག་ལ་ངོས་འཛིན་བྱས་ཡོད་ལ། དེ་ནི་འགྲོ་བ་མིའི་རིགས་ཀྱི་ལྷན་སྐྱེས་གཤིས་སྤྱོད་ལ་བཤུ་གཞོག་གཏོང་མཁན་གྱི་ནག་ཉེས་བྱ་སྤྱོད་ཅིག་ཡིན། གང་ཟག་ཅིག་གིས་གང་ཟག་གཞན་ཞིག་ལ་མནར་གཅོད་གཏོང་བ་ལས་ལྷག་པའི་ཆེས་གདུག་རྩུབ་ ཀྱི་བྱ་སྤྱོད་གཞན་གང་ཡང་མེད་ཅེས་མཉམ་འབྲེལ་རྒྱལ་ཚོགས་ཀྱིས་གསལ་བརྗོད་བྱས་ཡོད། དེའི་རྒྱུ་མཚན་ནི་མནར་གཅོད་ཀྱི་དམིགས་ཡུལ་གཙོ་བོ་ནི། འགྲོ་བ་མིའི་ལྷན་སྐྱེས་གཤིས་སྤྱོད་རྣམས་རྩ་མེད་གཏོང་རྒྱུ་དེ་ཡིན་པ་མ་ཟད། འགྲོ་བ་མིའི་ལྷན་སྐྱེས་ཆེ་མཐོང་ལ་དམའ་འབེབས་རྡོག་རོལ་གྱི་བྱ་སྤྱོད་ཅིག་ཆགས་ཡོད། ཅེས་སོགས་འཁོད་འདུག
གསར་འགོད་གསལ་བསྒྲགས་ནང་མུ་མཐུད་དོན། བོད་ནང་དུ་བོད་མི་ཚོས་༧གོང་ས་མཆོག་བོད་དུ་གདན་འདྲེན་དགོས་པ་དང་། འགྲོ་བ་མིའི་ཐོབ་ཐང་དང་ཆོས་ལུགས་དད་མོས་རང་དབང་དགོས་ཞེས་ཞི་བའི་སྐད་འབོད་བྱས་པ་ཙམ་གྱིས་ཀྱང་། འཇུ་བཟུང་བཀག་ཉར་ཐོག་མནར་གཅོད་དྲག་པོ་གཏོང་བཞིན་ཡོད། བོད་མི་རྣམས་ལ་མནར་གཅོད་གཏོང་སྟངས་དཔེར་མཚོན་ཙམ་བརྗོད་ན། དཔྲལ་བར་ཐ་མག་གིས་མེར་བསྲེགས་བྱེད་པ་དང་། བྲང་ཁར་རྡོག་བརྫིས་གཏོང་བ། གནམ་བཏེགས་རྒྱག་པ། གློག་རྒྱུགས་སྣ་ཚོགས་ཀྱིས་སྣུན་པ། རྐང་ལག་དང་མཐེ་བོང་ལྕགས་སྒྲོག་གིས་བཅུམས་པ། ཆུ་ཚོད་མང་པོའི་རིང་གཉིད་དང་ཟ་མ་བཀག་པ། ཡུན་རིང་གྲང་ངར་ཁྲོད་འཁྱགས་ལུམས་དུ་འཇུག་པ། དེ་བཞིན། ཁེར་རྐྱང་དུ་མུན་བཙོན་དུ་འཇུག་པ་སོགས་རེད། མནར་གཅོད་དེ་རིགས་ཀྱིས་བཙོན་དུ་ཚུད་པའི་བོད་མི་རྣམས་ཀྱི་ལུས་ལ་རྨ་ཁ་བཟོས་པ་མ་ཟད། སེམས་ལ་དྲག་སྐྱེལ་དཀའ་བའི་རྨ་ཁ་ཟབ་མོ་བཟོ་བཞིན་ཡོད་དེ། བོད་དེ་དག་གིས་སེམས་སུ་སྡུག་བསྔལ་དང་དངངས་སྐྲག་གིས་ཁེངས་པ་དང་། འཚོ་གནས་ལ་ཡི་ཐང་ཆད་དེ་ཆང་རག་དང་དུ་ནག་སྤྱོད་ཀྱི་ཡོད་པ་མ་ཟད། སྐབས་རེར་རང་ཤི་རྒྱག་རྒྱུའི་བསམ་བློ་འཁོར་ཡོང་གི་ཡོད་པ་རེད། ཅེས་འཁོད་འདུག
ལྟེ་གནས་ཁང་གིས་བོད་ནང་གི་མནར་གཅོད་ཐད་བཟོ་སྐྲུན་བྱས་པའི་༼ཤ་ཟད་རུས་ལ་མ་ཐུག་བར།༽ཞེས་པའི་དངོས་བྱུང་གློག་བརྙན་ཞིག་གཟིགས་འབུལ་ཞུས་ཡོད་ཅིང་། གློག་བརྙན་དེ་ནི་རྒྱ་གཞུང་གི་གཅིག་སྡུད་དྲག་གནོན་འོག་མནར་གཅོད་མྱངས་པའི་བོད་རིགས་རྒན་གཞོན་ཕོ་མོ་ ༦ ལ་དྲི་བ་དྲིས་ལན་བྱས་པའི་སྐོར་ཡིན་པ་དང་། མི་དེ་དག་གིས་བོད་ཀྱི་རང་དབང་ཆེད་ཞི་བའི་སྐད་འབོད་བྱས་པར་བརྟེན་ཏེ། རྒྱ་གཞུང་གིས་ཁོང་ཚོར་མནར་གཅོད་ཚད་མེད་བཏང་ཡོད་འདུག གསལ་བསྒྲགས་ནང་འཁོད་དོན། “མནར་གཅོད་མྱངས་མཁན་བོད་མི་དེ་དག་གི་མི་ཚེ་ལོ་རྒྱུས་ཀྱིས་མི་སྤྱོད་ལས་འདས་པའི་མནར་གཅོད་ལ་གདོང་ལེན་བྱེད་པའི་སྙིང་སྟོབས་དང་ཆེ་མཐོང་། བཟོད་བསྲན་བཅས་འགྲོ་བ་མིའི་ལྷན་སྐྱེས་ཀྱི་གཤིས་སྤྱོད་བཟང་བོ་རྣམས་མངོན་པར་བྱས་ཡོད། ལྷག་པར་དུ་ཁོང་ཚོས་བོད་རྒྱའི་དཀའ་རྙོག་ཞི་འགྲིག་ཡོང་ཆེད། རང་ཉིད་ལ་མནར་གཅོད་གཏོང་མཁན་གྱི་དགྲ་བོའི་གདུག་རྩུབ་ལ་བཟོད་བསྲན་དང་གུ་ཡངས་བྱེད་པའི་འདུན་པ་བཅངས་ཡོད་པ་དེས་འགྲོ་བ་མིའི་རིགས་ཀྱི་བདེན་ལུགས་སྐྱོང་བའི་མཐའ་མའི་རྒྱལ་ཁ་དེ་སུ་ལ་ཐོབ་ཡོད་མེད་གསལ་པོར་བསྟན་ཡོད” ཅེས་སོགས་འཁོད་འདུག
གློག་བརྙན་ནང་དུ་ཆབ་སྲིད་བཙོན་ཟུར་ཚེ་རིང་རྒྱ་མཚོ་ལགས་ཀྱིས། “རྒྱ་ནག་མགོ་ཁྲིད་ཚོས་ང་ཚོ་ཆབ་སྲིད་བཙོན་པ་རྣམས་ལ་མནར་གཅོད་བཏང་སྟེ་སྤྱི་ཚོགས་འཚོ་བའི་ཁྲོད་རིགས་འཚོ་མ་ཐུབ་པ་བཟོ་བཞིན་ཡོད། དེ་བཞིན། ཁོང་ཚོས་དེ་སྔ་ནས་འཆར་གཞི་སྒྲིག་སྟེ་ང་ཚོ་བཙོན་གྲོལ་ཐོབ་རྗེས་སྤྱི་ཚོགས་ཁྲོད་མི་ཚེར་ཁུངས་རྟེན་མེད་པ་བཟོ་བཞིན་ཡོད། དེ་བས་ང་རང་བཙོན་གྲོལ་ཐོབ་རྗེས་སློབ་སྦྱོང་ཡག་པོ་ཞིག་ཐོབ་པར་བྱས་ཏེ། སོ་སོའི་ལྷན་སྐྱེས་ཀྱི་འཇོན་ནུས་བེད་སྤྱོད་བྱས་པའི་ཐོག་ནས། དེ་སྔ་ལས་ལྷག་པའི་མི་ནུས་པ་ཅན་ཞིག་ཏུ་འགྱུར་ཐུབ་བྱ་རྒྱུ་ཡིན། རྒྱ་གཞུང་གིས་ང་ཚོའི་མི་ཚེ་ཁུངས་རྟེན་མེད་པ་བཟོ་རྒྱུའི་འཆར་གཞི་དེར་ངས་འདི་ལྟར་གདོང་ལེན་བྱེད་བཞིན་ཡོད” ཅེས་བརྗོད་འདུག
