ཁ་སང་དགོང་མོའི་ཆུ་ཚོད་ ༡༠ ཐོག ཧོང་ཀོང་གི་སྤྱི་མང་བསམ་ཚུལ་བསྡུ་ལེན་གྱི་ལས་འགུལ་མཇུག་བསྡུས་ཡོད་པ་དང་། ཐེངས་འདིའི་ལས་འགུལ་ནང་མི་གྲངས་འབུམ་ ༧ ལྷག་གིས་རྒྱབ་སྐྱོར་གྱི་འོས་བླུགས་ཡོད་འདུག
ཟླ་འདིའི་ཕྱི་ཚེས་ ༢༠ ཉིན་ནས་བཟུང་ཧོང་ཀོང་གི་ཤེས་ཡོན་པ་ཏཱེ་ཡོ་ཐིན་དང་ཁྲིན་ཅན་མེན། ཀྲུའུ་ཡོ་མེན་བཅས་ཀྱིས་སྣེ་ཁྲིད་དེ། ༢༠༡༧ ལོའི་ཧོང་ཀོང་སྲིད་སྐྱོང་མི་མང་གིས་འོས་འདེམས་དགོས་པའི་༼དཀྱིལ་དབུས་བཙན་བཟུང་༽ཞེས་པའི་སྤྱི་མང་བསམ་ཚུལ་བསྡུ་ལེན་གྱི་འོས་བསྡུ་ལས་འགུལ་ཞིག་སྤེལ་ཡོད་པ་ལྟར། ཁ་སང་ཕྱི་ཚེས་ ༢༩ ཉིན་གྱི་དགོང་མོའི་ཆུ་ཚོད་ ༡༠ ཐོག་ལས་འགུལ་དེ་མཇུག་བསྡུས་ཡོད་པ་དང་། ལས་འགུལ་གོ་སྒྲིག་པས་ཐེངས་འདིར་དྲ་ཐོག་ནས་འགོག་རྐྱེན་གང་མང་བཟོས་ཡོད་ཀྱང་། ཁྱོན་མི་གྲངས་འབུམ་ ༧ དང་ཁྲི་ ༩ ལྷག་གིས་རྒྱབ་སྐྱོར་གྱི་འོས་བླུགས་ཡོད་ལུགས་བརྗོད་འདུག
ཐེངས་འདིའི་ལས་འགུལ་ཐད་ཧོང་ཀོང་ནོར་སྲིད་ཁང་གི་མགོ་ཁྲིད་ཙིན་ཅིན་ཧྭ་ཡིས། འོས་བསྡུ་དང་ཁྲོམ་སྐོར་སོགས་ཚང་མ་མི་མང་གི་མངོན་འདོད་ཡིན་པས། སྲིད་གཞུང་གི་མགོ་ཁྲིད་ཚོས་མི་མང་གི་མངོན་འདོད་ལ་བསམ་ཞིབ་བྱས་ཏེ། འོས་འཚམ་དང་འདྲ་མཉམ་གྱི་ཐོག་ནས་ཐག་གཅོད་བྱེད་པའི་ལས་འགན་ཡོད་ལུགས་བརྗོད་ཡོད་ཀྱང་། རྒྱ་ནག་གཞུང་གིས་སྤྱི་མང་བསམ་ཚུལ་བསྡུ་ལེན་གྱི་ལས་འགུལ་དེ་ཁྲིམས་འགལ་དང་རྙོག་ཟིང་བསླངས་བ་ཞིག་ཡིན་སྟབས། ལས་འགུལ་དེས་རྒྱ་ནག་དབུས་གཞུང་གི་ལངས་ཕྱོགས་ལ་འགྱུར་བ་གང་ཡང་གཏོང་མི་ཐུབ་ལ། རྒྱལ་ཁབ་ཀྱི་བདག་དབང་གནད་དོན་ཐོག་ཕྱི་ནུར་གཏན་ནས་བྱེད་རྒྱུ་མིན་ལུགས་བརྗོད་ཡོད་འདུག
ཟླ་འདིའི་ཕྱི་ཚེས་ ༡༠ ཉིན་རྒྱ་ནག་གཞུང་གིས་ཧོང་ཀོང་དམིགས་བསལ་སྲིད་འཛིན་ས་ཁུལ་དུ་རྒྱབ་ཤ་དཀར་པོའི་ཡིག་ཆ་དང་པོ་འགྲེམས་སྤེལ་བྱས་ཏེ། རྒྱ་ནག་རྒྱལ་ཡོངས་འཐུས་མི་ཚོགས་ཆེན་གྱིས་ཧོང་ཀོང་གི་ཁྲིམས་ལུགས་གཏན་འབེབས་དང་ ༢༠༡༧ ལོའི་ཧོང་ཀོང་སྲིད་འཛིན་བསྐོ་བཞག་བྱ་རྒྱུ་ཡིན་ལུགས་བསྒྲགས་ཡོད་སྟབས། ཧོང་ཀོང་མི་མང་གི་གཙོས་རྒྱ་ནག་སོགས་ཀྱི་ཤེས་ཡོན་པ་མང་པོས་རྒྱ་གཞུང་གི་སྲིད་བྱུས་དེར་སྐྱོན་བརྗོད་བྱེད་བཞིན་ཡོད་པ་ལྟར། སང་ཉིན་ཕྱི་ཚེས་ ༡ ཉིན་ནི་དབྱིན་གཞུང་གིས་ཧོང་ཀོང་རྒྱ་ནག་ལ་རྩིས་སྤྲོད་བྱས་ཏེ་ལོ་ངོ་ ༡༧ འཁོར་བའི་དུས་དྲན་གྱི་ཉིན་མོར་ཁེལ་ཡོད་པས། ཧོང་ཀོང་མི་མང་སྔར་ལས་མང་པོས་རྒྱ་གཞུང་ལ་ངོ་རྒོལ་ཁྲོམ་སྐོར་གནང་འཆར་ཡོད་འདུག
གསར་འགོད་པ། པདྨ་མཚོ།
