མཚན་ཉིད་དང་རིག་ལམ་རྩོད་རྒྱུ་དགེ་ལུཊ་པ་གཅིག་པུའི་དོན་དག་མ་རེད།

དེ་རིང་༸གོང་ས་མཆོག་གིས་ལ་དྭགས་ཀླུ་འཁྱིལ་དགོན་པར་བཀའ་སློབ་གནང་སྟེ། སངས་རྒྱས་ཀྱི་ཆོས་སློབ་སྦྱོང་བྱེད་སྐབས་སྔོན་མའི་སྲོལ་གཅིག་པུའི་ཐོག་ཕྱིན། དཔྱད་བསྡུར་གནང་རྒྱུའི་རིགས་མེད་པ་ཡིན་ན་འགྲིག་གི་མེད་པར། རིག་པའི་སྒྲུབ་བྱེད་ཀྱི་ཐོག་ནས་འགྲོ་བར་གཞུང་ཆེན་སློབ་སྦྱོང་བྱ་རྒྱུ་ཧ་ཅང་གལ་ཆེན་ཡིན་སྐོར་གསུངས་སོང་།

དེ་རིང་ཕྱི་ཚེས་ ༣༠ ཉིན་གྱི་སྔ་དྲོའི་ཆུ་ཚོད་ ༨།༣༠ ཡས་མས་སུ་༸གོང་ས་མཆོག་ལ་དྭགས་ཀླུ་འཁྱིལ་དགོན་དགའ་ལྡན་དར་རྒྱས་གླིང་དུ་ཚོགས་བཞིན་པའི་ཕར་ཕྱིན་དབྱར་ཆོས་ཆེན་མོའི་ཚོགས་མགོན་དུ་ཆིབས་བསྒྱུར་གནང་སོང་། དེར་དགའ་ལྡན་ཁྲི་པ་རི་རྫོང་སྲས་སྦྲུལ་ཐུབ་བསྟན་ཉི་མ་མཆོག་དང་། རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག རྒྱུད་སྨད་མཁན་རིན་པོ་ཆེ་མཆོག མངའ་རིས་རིན་པོ་ཆེ་མཆོག་གཙོས་པའི་བླ་སྤྲུལ་དང་དགེ་བཤེས། མཁན་པོ་བཅས་དང་། དེ་བཞིན། ཇམ་མུ་ཀ་ཤི་མུར་མངའ་སྡེའི་བློན་ཆེན་ངག་དབང་རིག་འཛིན་ཇོ་ར་ལགས། ལ་དྭགས་རང་སྐྱོང་རི་ལྗོངས་ཡར་རྒྱས་ཚོགས་པའི་རིག་འཛིན་ལགས་དང་སྤྱི་འཐུས་། བཀའ་བློན། སླེ་རྫོང་གི་རྫོང་དཔོན་དང་ལས་ཁུངས་ཁག་གི་ལས་བྱེད།  དགེ་འདུན་པ་དང་ས་གནས་མི་མང་བཅས་མི་ ༥༠༠ ཡས་མས་འཛོམས་འདུག

མཛད་སྒོའི་ཐོག་དགའ་ལྡན་ཁྲི་རིན་པོ་ཆེ་མཆོག་དང་།  བླ་མ་ཆོས་འཕེལ་བཟོད་པ་རིན་པོ་ཆེ། དགེ་བཤེས་དཀོན་མཆོག་དབང་རྒྱལ་བཅས་རིམ་པས་གསུང་བཤད་གནང་བ་དང་། དགེ་འདུན་པ་རྣམས་ཀྱི་རྟགས་གསལ་དམ་བཅའ་གཟིགས་འབུལ། མངའ་རིས་ཚང་དགོན་སྡེ་ཤེས་རིག་འཛིན་སྐྱོང་ལྷན་ཚོགས་ཀྱིས་གསོལ་འདེབས་ལྟར་དགའ་ལྡན་ཁྲི་རིན་པོ་ཆེ་མཆོག་ནས་མངའ་རིས་རིན་པོ་ཆེའི་ལ་དྭགས་དགོན་ཁག་བདུན་གྱི་དགེ་བཤེས་ལྷ་རམས་པ་དང་སྔགས་རམས་པ་ ༨༠ ལྷག་གི་མཛད་རྗེས་ལ་བསྔགས་བརྗོད་དང་མ་འོངས་མུ་མཐུད་བསྟན་པ་འཛིན་སྐྱོང་སྤེལ་གསུམ་བྱ་བར་སྐུལ་སློང་ཆེད་ཆེ་མཐོང་ཕྱག་ཁྱེར་དང་སྟོན་པའི་སྣང་བརྙན་རེ་བཅས་འབུལ་བཞེས། ལ་དྭགས་ཀྱི་གླུ་གཞས་གཟིགས་འབུལ་བཅས་གནང་སོང་།

མངའ་རིས་རིན་པོ་ཆེའི་ཕྱག་མཛོད་སླེ་འཇམ་དབྱངས་སློབ་གྲྭའི་ངེས་སྟོན་པ་དགེ་བཤེས་བློ་བཟང་བསམ་གཏན་ལགས་ཀྱིས་ངོ་སྤྲོད་གནང་བ་ལྟར་ན། ཐེངས་འདིའི་ཕར་ཕྱིན་དབྱར་ཆོས་ཆེན་མོ་དེ་ཕྱི་ཟླ་ ༦ ཚེས་ ༢༣ ནས་བཟུང་ལ་དྭགས་ཀླུ་འཁྱིལ་དགོན་དགའ་ལྡན་དར་རྒྱས་གླིང་དུ་ལ་དྭགས་ས་ཁུལ་གྱི་རིས་སུ་མ་ཆད་པའི་དགོན་སྡེ་ཁག་གི་སློབ་གཉེར་བ་ ༡༠ ཙམ་དང་། གདན་ས་ཁག་དང་། བཤད་གྲྭ་སྒྲུབ་གྲྭ་ཁག་ནས་སློབ་གཉེར་གནང་བཞིན་པའི་དགེ་འདུན་པ་བཅས་གདན་ཞུའི་ཐོག་ཀླུ་འཁྱིལ་དགོན་དུ་ཚོགས་འདུག དམིགས་ཡུལ་གཙོ་བོ་བོད་རྒྱུད་ནང་བསྟན་གྱི་ཟབ་ཅིང་རྒྱ་ཆེའི་ཆོས་ཚུལ་གདན་ས་ཁག་ཏུ་བསླབ་པ་སློབ་གཉེར་གྱི་སྲོལ་བཟང་དར་ཡོད་པ་དེ་ལ་དྭགས་ཀྱི་དགོན་སྡེ་ཁག་ནང་མིག་དཔེ་སྟོན་ཐུབ་ཆེད་དང་། ལ་དྭགས་ཀྱི་ནང་པ་ཚོ་དང་ཁོང་ཚོའི་བར་གྱི་འབྲེལ་ལམ་ཡར་རྒྱས་གཏོང་ཐབས། དགོན་པ་སོ་སོའི་དམ་ཚིག་མཐུན་པོ་ཡོང་ཆེད་བཅས་ཡིན་སྐོར་དང་། དམིགས་བསལ་བོད་ནང་གི་ཛ་དྲག་གནས་སྟངས་ལ་གཞིགས་ཏེ་ལ་དྭགས་ཧི་མ་ལ་ཡའི་རི་རྒྱུད་ཀྱི་དགོན་སྡེ་དང་མི་མང་གིས་འཆར་གཞི་ཡོད་པའི་ཐོག་སངས་རྒྱས་བསྟན་པ་སྲུང་སྐྱོབ་བྱ་རྒྱུར་སྐུལ་སློང་བཅས་ཀྱི་ཆེད་ཡིན་སྐོར་སོགས་ངོ་སྤྲོད་གནང་སོང་།

དེ་རིང་གི་མཛད་སྒོར་༸གོང་ས་མཆོག་གིས་བཀའ་སློབ་གནང་སྐབས།  ང་རང་ཚོར་ཡོད་པའི་རྩ་ཆེའི་གཞུང་ཆེན་ཁག་དང་གསང་སྔགས་ཀྱི་ཆོས་འཁོར་དེ་དག་ན་ལེཎྡྲའི་མཁས་པའི་བཙུགས་བཞག་པ་ཤ་སྟག་རེད། ཡིན་ནའང་། ང་ཚོར་ན་ལེཎྡྲའི་ཆོས་བརྒྱུད་ཅེས་པའི་ཐ་སྙད་དེ་བེད་སྤྱོད་དེ་འདྲ་མི་འདུག ངས་ན་ལེཎྡྲའི་ཆོས་བརྒྱུད་ཅེས་ཡང་ཡང་བཤད་པའི་རྒྱུ་མཚན་ང་ཚོ་དངོས་ཡོད་ཀྱི་ཐོག་ནས་ན་ལེཎྡྲའི་ཆོས་རྒྱུད་རེད། ཐ་སྙད་འབོད་ཕྱོཊ་ཀྱི་ཐོག་ནས་ལེཎྡྲའི་ཆོས་རྒྱུད་ཅེས་ལབ་པ་ཡིན་ན། བོད་ཀྱི་བླ་མ་ཡི་དམ་ཞེས་པའི་སྐད་ཆ་དེ་བཤད་རྒྱུ་ཡོད་མ་རེད། དོན་དག་ཤེས་མ་ཤེས་གང་ལྟར་ཡང་ཨེ་ཤ་ཡ་དང་ལྷག་པར་དུ་ཤེར་ཕྱིན་གྱི་ཤེས་རབ་སྙིང་པོ་འདོན་བསྡད་མཁན་རྒྱ་མི་དང་ཉི་ཧོང་། ཝེ་ཐི་ནམ། ཀོ་རི་ཡ་བཅས་རེད། དེར་བརྟེན། ན་ལེཎྡྲ་ཞེས་པ་དང་དཔལ་མགོན་འཕགས་པ་ཀླུ་སྒྲུབ་ཅེས་ལབ་དུས་ཚང་མས་གོ་བསྡད་པ་ཞིག་རེད། ང་ཚོ་བོད་ཀྱི་སངས་རྒྱས་པའི་ཆོས་དཔལ་ན་ལེཎྡྲའི་ཆོས་རྒྱུད་དྲི་མ་མེད་པ་ཡིན་བསྡད་པ་དེ་མིང་འདོགས་ཕྱོཊ་ཤིག་གི་ཐོག་ནས་བླ་མ་ཡི་དམ་རེད་ཅེས་དང་། ང་རང་ཚོའི་ཆོས་ནང་དུའང་ང་བཀའ་རྒྱུད་དང་ང་དགེ་ལུགས་ཡིན། ང་རྙིང་མ། ང་ས་སྐྱ། ང་ཇོ་ནང་ཡིན་ཞེས་ལབ་དུས་གསལ་བོ་མ་ཆགས་པ་ཞིག་འདུག

དེ་བསྟན་པ་སྤྱི་མཚན་དང་གང་ཟག་སྒེར་མཚན་ཞེས་དབྱེ་རྒྱུ་གལ་ཆེན་པོ་རེད། ང་ཚོ་བོད་ཀྱི་ས་དགེ་བཀའ་རྙིང་། ཇོ་ནང་བཅས་ཆོས་རྒྱུད་མི་འདྲ་བར་ཞི་བའི་དཀའ་ཆེན་བཅུ། སྒྲུབ་རྒྱུད་ཆེན་པོ་བརྒྱད་ཅེས་ཡོད་བསྡད་པ་དེ་ཚོའི་གྲས་མང་ཆེ་བ་དེ་གསང་སྔགས་ཀྱི་ཐོག་ནས་ཡོང་བསྡད་ཀྱི་ཡོད་པ་རེད། གསང་སྔགས་ཀྱི་ཆོས་དེར་ཞིབ་འཇུག་དང་བསམ་བློ་ཡག་པོ་གཏོང་སྐབས། ཕལ་ཆེར་གང་ཟག་སྒེར་མཚན་ཆགས་བསྡད་ཡོད་པ་རེད། ས་སྐྱ་བའི་ལམ་འབྲེལ་པ་ཞེས་ལབ་དུས་གང་ཟག་སྒེར་མཚན་རེད། བཀའ་རྒྱུད་ཀྱི་ནང་གསེས་བཀའ་རྒྱུད་ཆེ་བཞི་ཆུང་བརྒྱད་དེ་དག་ཀྱང་གང་ཟག་སྒེར་མཚན་བྱས་ནས་བླ་མ་མཁས་གྲུབ་གཉིས་ལྡན་གྱི་སྐྱེས་བུ་དམ་པ་རྗེ་བཙུན་མུ་ལ་ལྟ་བུར་ཆ་བཞག་ན་དངོས་ནས་སྒྲུབ་པའི་རྒྱལ་མཚན་འཛིན་མཁན་བསམ་གྱི་མི་ཁྱབ་པ་རེད། དེ་དག་ལ་བལྟས་ཡོང་དུས་གང་ཟག་སྒེར་མཚན་ཆགས་པ་རེད། གང་ཟག་སྒེར་མཚན་ཆ་བཞག་པ་ཡིན་ན་མཐས་ཡས་པ་ཞིག་ཡོང་བསྡད་ཀྱི་རེད། དེར་བརྟེན། བོད་ཀྱི་སངས་རྒྱས་པའི་ཆོས་དཔལ་ན་ལེཎྡྲའི་ཆོས་རྒྱུད་ཅེས་ལབ་ཡོང་སྐབས། ཆོས་རྒྱུད་འཛིན་མཁན་ཚང་མར་ཚིག་གི་འགྲེལ་བཤད་རྒྱག་མི་དགོས་པར། བོད་ཀྱི་སངས་རྒྱས་པའི་ཆོས་དེ་ལེཎྡྲར་ཁུངས་གཏུག་པ་ལམ་སེང་གོ་ཡོང་གི་ཡོད་སྟབས། ངས་དེ་གནད་འགག་ཅིག་ཏུ་མཐོང་སོང་། ཞེས་གསུངས་སོང་།

ལ་དྭགས་པ་ཚོར་བཀའ་སློབ་གནང་སྐབས༸གོང་ས་མཆོག་གིས། སྔོན་མ་ང་ཚོར་ལོ་བརྒྱ་ཕྲག་མང་པོ་ཞིག་ལ་ལམ་ཞིག་ཡོད་བསྡད་པའི་དད་པ་རྐྱང་རྐྱང་གི་སྔར་ལམ་དེད་དེ། གསར་བ་ཞིག་བྱེད་དུ་ཕྱིན་པ་ཡིན་ན་དེ་སྔ་མོའི་གསལ་བཀྲོལ་རེད་ཟེར་བའི་མཐོང་ཚུལ་ནམ་རྒྱུན་ཡོང་བསྡད་ཀྱི་འདུག སྔོན་མའི་གསལ་བཀྲོལ་བྱས་ཆོག་གི་མེད་ན། ག་ཏེ་ག་ཏེ་པཱ་ར་ས་ག་ཏེ་བོ་དཱི་སྭཱ་ཧཱ་ཟེར་བ་དེ་སྔ་མའི་གསལ་བཀྲོལ་རེད། སྔ་མོ་ཁོ་རང་དེད་དེ་ཕྱིན་པ་ཡིན་ན་བསྟན་ལུགས་བདེན་འཛིན་དང་རང་གཅེས་འཛིན་གཉིས་ད་ལྟའི་བར་གོ་ནས་བསྡད་པ་རེད། སྔ་མོ་དེ་རེད། ད་ཡང་དེའི་སྒང་བསྡད་རྒྱུ་རེད། ཕྱི་དངོས་པོར་ཆ་བཞག་ནའང་། སྔར་ལམ་ཁོ་རང་བསྡད་དེ་ཁྱེད་རང་ཚོ་ལ་དྭགས་པ་ཚོ་ཏིར་ཀེ་འདྲ་ཟོས་ཆང་འདྲ་བཏུང་། ཙོག་པུར་བསྡད་པ་དེ་འགྲིག་གི་མི་འདུག ཁྱེད་རང་ཚོར་ཡར་རྒྱས་གཏོང་གི་ཡོད་པ་རེད། ཡར་རྒྱས་འགྲོ་དགོས་པ་རེད། རྒྱ་གར་སྤྱི་ཡོངས་ལ་ཆ་བཞག་ནའང་ཡར་རྒྱས་ཆེན་པོ་འགྲོ་བཞིན་འདུག སྔ་མོ་ང་རྒྱ་གར་དུ་ཡོང་དུས་ ༡༩༥༦ ལོར་རེད། སྐབས་དེ་ནས་འདས་པའི་ལོ་ ༥༠ ལྷག་རིང་ཡར་རྒྱས་ཆེན་པོ་ཕྱིན་འདུག ང་རང་ཚོ་ནང་གི་རྟོག་པའི་ངོས་ནས་ཀྱང་། ལོ་རེ་ནས་ལོ་རེར། ལོ་ཁྱི་བདག་ཁྱི་ཐོན་ཐུབ་པ་ཞིག་ཉམས་ལེན་བྱེད་དགོས་པ་རེད། དེ་འདྲའི་ཉམས་ལེན་ཡོང་བར་ལྐུག་པའི་ཨུ་ཚུཊ་བྱས་ནས་རྟོག་པ་སྐྱེས་ཁག་པོ་རེད། ཆོས་དང་རྣམ་དཔྱོད་ཀྱི་ཤེས་རབ་བེད་སྤྱོད་ཀྱིས་བསམ་བློ་གཏོང་དགོས་པ་རེད། སྐྱབས་སུ་མཆི་ལབ་པ་གཅིག་པུས་འགྲིག་གི་མི་འདུག རྒྱུ་མཚན་མཐོང་བ་དང་ཤེས་བའི་སྒོ་ནས་དད་པ་ཐོབ་པ་ཞིག་དགོས་པར་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།

ཡང་༸གོང་ས་མཆོག་གིས་མུ་མཐུད་གསུང་དོན། ཡང་ཁག་ཅིག་གིས་གཞུང་ཆེན་བལྟས་ནས་རིག་ལམ་སློབ་པ་དེ་དགེ་ལུཊ་པའི་དོན་དག་རེད། བཀའ་རྒྱུད་རྙིང་མ་ལ་དགོས་ཀྱི་མ་རེད་ཅེས་བཤད་མཁན་ཡོང་གི་འདུག པད་ནོར་རིན་པོ་ཆེས་རྒྱ་གར་ལྷོ་ཕྱོགས་སུ་རྣམ་གྲོལ་གླིང་བཤད་གྲྭ་ཆེན་པོ་ཞིག་ཡོད་རེད། དེར་མཚན་ཉིད་རིག་ལམ་སློབ་གནང་སྐབས། སྔ་འགྱུར་རྙིང་མའི་བླ་ཆེན་འགའ་ཤས་ཀྱིས་དགོངས་མ་ཚིམ་པ་གནང་གི་འདུག་ཅེས་པད་ནོར་རིན་པོ་ཆེ་ཁོ་རང་གིས་ང་ལ་གསུངས་པ་རེད། ཡིན་ནའང་། པད་ནོར་རིན་པོ་ཆེས་ཨུ་ཚུགས་བརྒྱབ་ཏེ་རིག་ལམ་གྱི་ཐོག་ནས་རྩོད་པ་རྩོད་རྒྱུ་དེ་བཙུགས་པ་ཡིན་ཞེས་རིན་པོ་ཆེས་གསུང་གི་འདུག དེ་ཚོའི་གྲས་ཏེ་ང་ཚོས་དེ་སྔོན་སྔ་ལམ་རྐྱང་རྐྱང་། བཀའ་གདམས་གོང་མ་ཚོའི་གསུང་ལ་ཆ་བཞག་ནའང་། མོས་གུས་རྩ་ཆེན་པོ་རེད། མོས་གུས་ཀྱི་གྲོགས་ཐེ་ཚོམ་རེད་ཟེར་བ། ཐེ་ཚོམ་གྱི་ཐོག་ནས་བརྟག་དཔྱད་བྱས་ཏེ་ཕྱིན་པ་ཡིན་ན། རྟོགས་སུ་བྱས་པའི་རྟོག་གེ་བ། དེ་ལ་དཔྱོད་པའི་དངོས་གྲུབ་རིག་ཅེས་གསུངས་འདུག དེ་འདྲའི་གསུང་སྟངས་ཁ་ཤས་ཡོང་གི་རེད།  དད་པ་སྤྱིའི་སྒོ་ནས་འགྲོ་དགོས་སྟབས། དེར་རིག་ལམ་གྱི་ཐོག་ནས་དཔྱད། བསྟན་པའི་ཆོས་ཚུལ་དེ་དག་རིག་ལམ་གྱི་ཐོག་ནས་གཏན་ལ་ཕབ་ཏེ་དཔྱད་ནས་རྒྱུ་མཚན་འཕེར་བའི་ཐོག་བཤད་ཐུབ་པ་བྱུང་བ་ཡིན་ན། ཕྱི་ནང་སུ་ཡིན་རུང་ཞུམ་པ་མེད་པའི་ཐོག་ནས་སྐད་ཆ་བཤད་རྒྱུ་ཡོང་གི་རེད། སྔོན་མའི་སྲོལ་གཅིག་པུའི་ཐོག་ཕྱིན། དཔྱད་པ་དང་གོ་བསྡུར་གནང་རྒྱུའི་རིགས་མེད་པ་ཡིན་ན་འགྲིག་གི་མེད། གཙོ་བོ་རིག་པའི་སྒྲུབ་བྱེད་ཀྱི་ཐོག་ནས་འགྲོ་དགོས་སྟབས། གཞུང་ཆེན་སྦྱོང་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།

མཇུག་ཏུ་༸གོང་ས་མཆོག་གིས། ང་རང་སྒེར་ལ་ཆ་བཞག་ནའང་རྒྱ་ཆེན་པོ་དེ་འདྲ་ཤེས་ཀྱི་མེད། ཡིན་ནའང་། བསྡུས་གྲྭ་ནས་བཟུང་སྟེ་གཞུང་གི་རིགས་བསླབ་ཡོད་པ་རེད། ད་ལྟ་རང་དེའི་མཚན་ཉིད་ཞོག དབྱེ་བ་ཞོག་ལབ་ན་དྲན་མདོག་ཁ་བོ་མ་རེད། ཡིན་ནའང་། དེའི་རིགས་ཚུར་བསྡོམས་བརྒྱབ་ཏེ་བསམ་བློའི་ནང་ག་རེ་འགྲེལ་བཤད་རྒྱག་དགོས་པ་དང་བཤད་དགོས་བྱུང་ཡང་། བཤད་ཐུབ་པ་ཞིག་འདུག མཁས་པའི་དབང་བོ་སུ་ལ་ཐུག་ནའང་བཤད་ཐུབ་པ་ཞིག་འདུག དེ་གཞན་མ་རེད། ང་རང་ལ་མཚོན་ན་དེང་རབས་ཀྱི་སློབ་སྦྱོང་གི་སློབ་ཁྲིད་ལ་ཉིན་གཅིག་ཀྱང་འགྲོ་མ་མྱོང་། གཅིག་ཀྱང་ཤེས་ཀྱི་མེད། ཡིན་ནའང་། དེའི་རིགས་དེ་པན་གྲུབ་བཅུ་བདུན་གྱི་གཞུང་གི་རིག་པའི་སྒོ་ཕྱེས་ཡོད་སྟབས། ཕྱི་ནང་སུར་སྐད་ཆ་བཤད་དགོས་བྱུང་ཡང་། ཕར་ནས་དྲི་བ་ཞིག་དྲིས་པ་ཡིན་ན་ལམ་སེང་འདི་ལ་འདི་ཞེས་ཤར་ཡོང་གི་འདུག དེར་བརྟེན། ང་ཚོ་མི་གཅིག་པ་རེད། ངས་ཉམས་མྱོང་གི་ཐོག་ནས་ཁྱེད་རང་ཚོར་མར་བཤད་བཞག་པ་དེར་ཁྱེད་རང་ཚོས་འབད་བརྩོན་བྱས་ན་གཅིག་པ་ཡོང་གི་རེད་མ་གཏོགས། ༸རྒྱལ་བ་རིན་པོ་ཆེར་འདྲ་གི་མ་རེད་ཅེས་དམིཊ་བསལ་དེ་འདྲ་ཡོད་མ་རེད། ང་ཚོ་ཚང་མ་གཅིག་གྱུར་ཡིན་པའི་འདུ་ཤེས་ཐོག་བསམ་བློ་གཏོང་དགོས་པ་རེད། སྐྱབས་གནས་བླ་མ་ཞེས་ཡར་བཞག སོ་སོ་འོག་ནས་ལོག་གར་བཞག་དེ་བསྡད་ན་འགྲིག་གི་ཡོད་མ་རེད། ཅེས་གསུངས་སོང་།

དེ་རིང་ཉིན་རྒྱབ་༸གོང་ས་མཆོག་གིས་སྙེ་རུ་སྟོན་པའི་སྣང་བརྙན་ལ་རབ་གནས་དང་མི་མང་ལ་བཀའ་སློབ་གནང་སོང་ལ། སང་ཉིན་སྔ་དྲོ་མངའ་རིས་རིན་པོ་ཆེའི་དགོན་ཁག་བདུན་གྱི་སེར་སྐྱང་ཡོངས་ལ་ཤེས་རབ་སྙིང་པོ་དང་རྟེན་འབྲེལ་བསྟོད་པའི་བཀའ་ཆོས་གནང་རྗེས། དགོན་ཁག་བདུན་གྱི་སེར་སྐྱ་ཡོངས་ནས་༸གོང་ས་མཆོག་ལ་བརྟན་བཞུགས་བསྟར་འབུལ་གནང་རྒྱུ་ཡིན་འདུག

གསར་འགོད་པ་དོན་གོས་ལ་དྭགས་རྒྱལ་ས་སླེ་ནས།