དེ་རིང་ཕྱི་དྲོར་དུས་དབང་གོ་སྒྲིག་ཚོགས་ཆུང་གི་ཚོགས་གཙོས་ལས་རིམ་དང་དཔལ་འབྱོར་འཚོལ་སྒྲུབ་སོཊ་ཀྱི་སྐོར་ནས་གསར་འགོད་གསལ་བསྒྲགས་གནང་སོང་།
དེ་རིང་ཕྱི་དྲོའི་ཆུ་ཚོད་ ༣།༤༠ སྟེང་ལ་དྭགས་ཞི་བའི་ཚལ་ཕོ་བྲང་ཉེ་འགྲམ་དུས་དབང་གསུང་ཆོས་རྭ་བའི་གསར་འགྱུར་ལས་རིགས་པའི་སྡོད་གནས་སུ། དུས་དབང་གོ་སྒྲིག་ཚོགས་ཆུང་གི་ཚོགས་གཙོ་དོན་འགྲུབ་ཚེ་དབང་ལགས་ཀྱིས་ཐེངས་འདིའི་དུས་དབང་སྐོར་ལ་གསར་འགོད་གསལ་བསྒྲགས་ཤིག་གནང་སོང་། དེར་རྒྱལ་སྤྱིའི་གསར་འགོད་པ་དང་། རྒྱ་གར་དང་ལ་དྭགས་ས་གནས་གསར་འགོད་པ། བོད་རིགས་གསར་འགོད་པ་ ༢༥ ལྷག་འཛོམས་འདུག
གསར་འགོད་གསལ་བསྒྲགས་ཐོག་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་ལགས་ཀྱིས། ༢༠༡༢ ལོར་༸གོང་ས་མཆོག་ལ་དྭགས་རྒྱལ་ས་སླེ་རུ་ཆིབས་བསྒྱུར་གནང་སྐབས། ལ་དྭགས་མི་མང་གིས་ལ་དྭགས་ནང་པའི་ལྷན་ཚོགས་དང་ལ་དྭགས་དགོན་ཚོགས་བརྒྱུད། ༢༠༡༣ དང་ ༢༠༡༤ ་ལོ་གང་རུང་ལ་དྭགས་སུ་དུས་འཁོར་དབང་ཆེན་ཞིག་གནང་རྒྱུའི་སྙན་སེང་ཞུས་པ་ལྟར། ༸གོང་ས་མཆོག་གིས་ཐུགས་བརྩེ་བ་ཆེན་པོས་བཀའ་བཞེས་གནང་སྟེ། ད་ལོའི་ཟླ་ ༧ ཚེས་ ༣ ནས་ ༡༣ བར་དུས་དབང་ཐེངས་ ༣༣ པ་ལ་དྭགས་སུ་གནང་གཏན་འཁེལ་ཡོད་པ་དང་། སང་ཉིན་ནས་བཟུང་དུས་དབང་མགོ་འཛུགས་གནང་གི་ཡོད་སྐོར་བརྗོད་སོང་བར་མ་ཟད། གོ་སྒྲིག་ཚོགས་ཆུང་ནང་སྦྱིན་བདག་གཙོ་བོ་ཁག་ལས་གཞན་ལས་རིགས་འདྲ་མིན་གྱི་གནད་ཡོད་མི་སྣ་དང་། མཐོ་རིམ་དཔོན་རིགས་བཅས་མི་ ༢༦ ཡོད་པ་དང་། གཞན། ལ་དྭགས་ནང་ཡོད་པའི་ཡེ་ཤུ་དང་ཁ་ཆེ། ཧིན་དྷི། སིག་ (Sikh)བཅས་ཀྱི་དབུ་ཁྲིད་ཚོ་མཉམ་ལས་ཚོགས་མི་ཆགས་ཡོད་སྐོར་སོགས་བརྗོད་སོང་།
དཔལ་འབྱོར་དང་འཛུགས་སྐྲུན་རོགས་སྐྱོར་ཐད་ཁོང་གིས། ཉེ་བའི་ཟླ་བཞི་རིང་ཇེམ་ཀ་ཤི་མུར་མངའ་སྡེའི་གྲོང་དང་གྲོང་ཁྱེར་འཛུགས་སྐྲུན་བློན་ཆེན་ངག་དབང་རིག་འཛིན་ཇོ་ར་ལགས་དང་། ལ་དྭགས་རང་སྐྱོང་རི་ལྗོངས་ལྷན་ཚོགས་ཀྱི་སྤྱི་ཁྱབ་འགན་རིག་འཛིན་བཟོད་པ་ལགས་བརྒྱུད་དེ་མངའ་སྡེའི་གཞུང་ནས་རོགས་དངུལ་དང་གཞུང་ལམ་འཛུགས་བསྐྲུན་བཅས་གནང་ཡོད་པ་དང་། དེ་བཞིན། ལ་དྭགས་རྫོང་སྲིད་གཞུང་། ལ་དྭགས་གཞོན་སྐྱེས་ཚོགས་པ། ལ་དྭགས་བུད་མེད་ཚོགས་པ། ལ་དྭགས་བོད་མིའི་གཞིས་ཆགས་ལས་ཁུངས། ས་གནས་བོད་ཀྱི་གཞོན་ནུ་ལྷན་ཚོགས་བཅས་ཀྱི་དང་བླངས་ཞབས་ཞུ་བ་ ༧༠༠༠ ལྷག་གིས་ཞབས་ཞུ་གནང་གི་ཡོད་སྐོར་དང་། དུས་དབང་ཐོག་མི་འབུམ་གཅིག་དང་ཕྱེད་ཀའི་རྩིས་རྒྱག་གི་ཡོད་པ་ལས། ད་ཆར་ཕྱི་རྒྱལ་མི་རིགས་དང་བོད་པ། ལ་དྭགས་པ། ཧི་མ་ལ་ཡའི་རི་རྒྱུད་ཀྱི་མི་རིགས་བཅས་ཆོས་ཞུ་བ་འབུམ་གཅིག་ལྷག་གིས་ཐོ་འགོད་བྱས་ཡོད་སྐོར་སོགས་བརྗོད་སོང་།
དེ་བཞིན་ཁོང་གིས། ཐེངས་དུས་འཁོར་དབང་ཆེན་དབྱིན་སྐད་དང་ཧིན་རྡུ། ཝེ་ཐི་ནམ། རྒྱ་སྐད། ཨུ་རུ་སུ། པོ་ཊོ་གྷིལ། ཨི་ཊ་ལི། ཉི་ཧོང་། ཀོ་རི་ཡ། སི་པན། ཧྥ་རན་སི། བོད་སྐད། ལ་དྭགས་སྐད་བཅས་སྐད་རིགས་ ༡༣ ནང་གསུང་བསྒྱུར་གནང་གི་ཡོད་འདུག་ལ། བོད་སྐད་དང་དབྱིན་སྐད། རྒྱ་སྐད། ཧིན་རྡུའི་སྐད་། ཝེ་ཐི་ནམ། ཨུ་སུ་རུ་བཅས་སྐད་ཡིག་ ༦ གི་ཐོག་ཐད་རྒྱང་བསྲིངས་བྱེད་ཀྱི་ཡོད་སྐོར་བརྗོད་སོང་།
སང་ཉིན་ཞོགས་པའི་ཆུ་ཚོད་ ༧ ནས་ ༡༠ བའི་བར་ཞལ་འདོན་གསོག་སྒྲུབ་དང་། དེའི་རྗེས་སློབ་མ་རྗེས་འཛིན་བཅས་དུས་དབང་གི་སྟ་གོན་མགོ་འཛུཊ་གནང་རྒྱུ་ཡིན་པ་དང་། ཚེས་ ༦ ཉིན་གྱི་ཞོགས་པའི་ཆུ་ཚོད་ ༨།༠༠ ནས་སྐར་མ་ ༤༥ རིང་༸གོང་ས་མཆོག་འཁྲུངས་སྐར་སྲུང་གཙི་གནང་རྒྱུ་ཡིན་འདུག
གསར་འགོད་པ་ལྷ་སྐྱབས་རྒྱལ་གྱིས་ལ་དྭགས་རྒྱལ་ས་སླེ་ནས།
