ཡུ་རོབ་ཀྱི་བོད་མི་མང་པོར་དཀའ་ངལ་ཆེན་པོ་འཕྲད་ཉེན་འདུག

དེ་རིང་ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་དང་ཐུབ་བསྟན་དབང་ཆེན་ལགས་རྣམ་གཉིས་ཀྱིས། ཡུ་རོབ་ཀྱི་ཁྲིམས་ལ་འགྱུར་བ་ཕྱིན་སྟབས་བོད་མི་སྐྱབས་བཅོལ་བ་ཚོས་ཡིད་གཟབ་མ་བྱས་ན་དཀའ་ངལ་ཆེན་པོ་འཕྲད་ཉེན་ཡོད་པའི་གསལ་བསྒྲགས་ཤིག་སྤེལ་འདུག

ཉེ་བའི་ལོ་ཤས་ནས་བཟུང་ཡུ་རོབ་ནང་ཁྲིམས་ཀྱི་གནས་བབས་ལ་འགྱུར་བ་ཕྱིན་པར་བརྟེན། ཡུ་རོབ་ཁུལ་དུ་ཡོད་པའི་བོད་མི་མང་པོར་དཀའ་ངལ་འཕྲད་བཞིན་ཡོད་སྟབས། དེ་རིང་ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་དང་ཐུབ་བསྟན་དབང་ཆེན་ལགས་རྣམ་གཉིས་ཀྱིས། སི་པེན་གྱི་གྲོང་ཁྱེར་སྦར་སི་ལོ་ནཱ་དང་སུད་སིའི་གྲོང་ཁྱེར་རྫི་རིག་ནང་གསལ་བསྒྲགས་ཤིག་སྤེལ་ཏེ། བོད་མི་སུ་ཞིག་ཡིན་རུང་ཡུ་རོབ་ལ་མ་ཐོན་གོང་རྒྱལ་ཁབ་ཀྱི་ཁྲིམས་ལུགས་གནས་སྟངས་གསལ་བོ་མ་ཤེས་ན། ཡུ་རོབ་ཏུ་འབྱོར་སྐབས་བསམ་ཡུལ་ལས་འདས་པའི་དཀའ་ངལ་འཕྲད་སྲིད་སྐོར་བརྗོད་འདུག

གསལ་བསྒྲགས་ཐོག་སྤྱི་འཐུས་ཐུབ་བསྟན་དབང་ཆེན་གྱིས། ང་དང་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་གཉིས་ཀྱིས་སྦེལ་ཇམ་གཞུང་གི་འབྲེལ་ཡོད་མི་སྣ་ཁག་ལ་མཇལ་ཏེ། དཀའ་ངལ་འོག་ཡོད་པའི་བོད་མི་ཚོར་རོགས་རམ་གང་ཡོང་གནང་རོགས་ཞེས་འབོད་སྐུལ་ཞུས་ཀྱང་། གནས་བབས་དེར་ལས་སླ་པོར་འགྱུར་བ་འགྲོ་ས་མེད་པས་མུ་མཐུད་རེ་བ་བརྒྱབ་ན་སྟོང་པ་རེད་བསམ་གྱི་འདུག ང་ཚོས་ཤེས་རྟོགས་བྱུང་བ་ལྟར་ན། ཧྥ་རན་སིའི་ནང་དུའང་དཀའ་ངལ་དེ་བཞིན་འཕྲད་ཀྱི་ཡོད་པ་མ་ཟད། རེ་འགས་འདི་ལས་སྡུག་ཡིན་སྐོར་བརྗོད་ཀྱི་འདུག གནམ་གྲུའི་འཛིན་བྱང་དང་ཡིག་ཆ་ཉོ་བར་ཨ་སྒོར་སྟོང་ཕྲག་མང་པོ་གཡར་ནས་ཡུ་རོབ་ཏུ་ཡོང་མཁན་ཚོར་དམིགས་བསལ་གྱིས་དཀའ་ངལ་འཕྲད་རྒྱུ་ཉག་ཅིག་རེད། ཅེས་འདུག དེ་བཞིན་སྤྱི་འཐུས་བཀྲས་མཐོང་དབང་པོ་ལགས་ཀྱིས་ཀྱང་། སྐྱབས་བཅོལ་རག་པའི་གནས་ཚུལ་སྡུག་ཏུ་འགྲོ་བཞིན་པ་ཤེས་བཞིན་དུ་མི་སྒེར་བ་དང་ཁྱིམ་ཚང་ལ་དངུལ་གཡར་བ་དེ་དོ་འཁུར་མེད་པའི་བྱ་སྤྱོད་ཅིག་ཡིན་པས། དངུལ་དེ་ཚུར་རག་པའི་ཐོབ་ཐང་མེད་པ་ཆགས་སྲིད་པའི་ཐོག ཁོང་ཚོར་དངུལ་གཡར་ཏེ་དཀའ་ངལ་འོག་ཚུད་སྐབས་དཀའ་ངལ་སེལ་ཐབས་བྱེད་པའི་འགན་འཁྲི་ཡོད་པ་རེད། ཅེས་བརྗོད་ཡོད་འདུག

གསལ་བསྒྲགས་ནང་། ཉེ་ཆར་སུད་སིའི་འཛིན་སྐྱོང་དང་འབྲེལ་བའི་ཁྲིམས་ཁང་མཐོ་ཤོས་ཀྱིས་བོད་མི་སྐྱབས་བཅོལ་ཞུ་མཁན་ལ་གཞི་རྩའི་ཁྲིམས་གཅོད་བྱེད་ཕྱོགས་སྐོར་ཐག་གཅོད་གནང་བ་དེས། བོད་མི་སྐྱབས་བཅོལ་ཞུ་མཁན་གྱི་གནས་བབས་ཆེས་སྡུག་ཏུ་ཕྱིན་འདུག འདི་ལོའི་ཕྱི་ཟླ་ ༥ ཚེས་ ༢༠ ཉིན་ངོས་འཛིན་ལག་འཁྱེར་མེད་པ་དང་། སྐད་གདངས་དང་སྐད་ཆ་ཤོད་སྟངས་བཅས་ལ་ཞིབ་འཇུག་བྱེད་སྐབས། བོད་ཀྱི་ཕྱི་ལོགས་ནས་འཚར་ལོངས་བྱུང་བའི་རྟགས་མཚན་གསལ་པོ་ཡོད་པའི་བོད་མི་ཞིག་ལ། ཕྱི་ལོ་ ༡༩༥༡ ལོར་མཉམ་སྤྲེལ་རྒྱལ་ཚོགས་ཀྱིས་གཏན་འབེབས་གནང་བའི་སྐྱབས་བཅོལ་གནས་བབས་ཀྱི་གྲོས་མཐུན་ཡིག་ཆ་༼Convention on the Status of Refugees༽གཞིར་བཟུང་སྐྱབས་བཅོལ་དུ་ལེན་ཐུབ་དང་མི་ཐུབ་ཀྱི་ཐག་གཅོད་གནང་སྐབས། བོད་མི་དེ་སྐྱབས་བཅོལ་དུ་མ་བླངས་བ་མ་ཟད། སུད་སིར་ཁྲིམས་མཐུན་ངང་གནས་སྡོད་ཆོག་པའི་ཐོབ་ཐང་མི་སྤྲོད་པའི་ཐག་གཅོད་གནང་འདུག ཅེས་དང་།

ཡང་གསལ་བསྒྲགས་ནང། སྦེལ་ཇམ་གྱི་སྐྱབས་བཅོལ་དང་རྒྱལ་ཁབ་མེད་མཁན་ཚོའི་ཐོབ་ཐང་སྲུང་སྐྱོབ་བློན་ཆེན་གྱིས་འདི་ལོའི་ལོ་འགོ་ནས་བཟུང་སྐྱབས་བཅོལ་གྱི་གནས་བབས་ལ་ངོས་ལེན་མེད་པ་དང་། སྲུང་སྐྱོབ་ཁས་ལེན་མེད་པའི་ཐག་གཅོད་བྱུང་བ་༼Refusal of Recognition of Refugee Status and Refusal to Grant Subsidiary Protection Status༽ཐེངས་ཁ་ཤས་ལ་ཕྱིར་བསྒྲགས་གནང་འདུག སྦེལ་ཇམ་གཞུང་གི་འབྲེལ་ཡོད་མི་སྣས་རྒྱ་གར་ནང་ཡོད་པའི་བོད་མི་ཚོར་སྐྱབས་བཅོལ་ཐོབ་ཐང་ཡོད་པ་དང་། རྒྱ་གར་གཞུང་གིས་བོད་མི་སྐྱབས་བཅོལ་དུ་ཡོང་མཁན་ཚོ་བོད་དམ་རྒྱ་ནག་ནང་ཕྱིར་སློག་མི་གནང་བ་སོགས་ཆེས་མཐོའི་སྲུང་སྐྱོབ་གནང་གི་ཡོད་ལུགས་བརྗོད་དེ། སྦེལ་ཇམ་དང་སུད་སིའི་ནང་སྐྱབས་བཅོལ་ཞུ་མཁན་གྱི་བོད་མིར་སྐྱབས་བཅོལ་གྱི་ཐོབ་ཐང་ཕར་ཟད། གནས་སྡོད་ཆོག་པའི་སྔོན་འགྲོའི་ཡིག་ཆ་མ་རག་མཁན་མང་ནས་མང་དུ་འགྲོ་བཞིན་པ་དང་། ཁོང་ཚོ་ཡིག་ཆ་མེད་པའི་མིའི་གྲས་སུ་བཅུག་སྟེ། སྐྱབས་བཅོལ་སྡོད་ཁང་ནས་ཕྱིར་འབུད་སོགས་སྐྱོབ་གསོའི་ཐོབ་ཐང་ཅི་ཡང་མེད་ལ། ལས་ཀ་འཚོལ་རྒྱུའི་ཐོབ་ཐང་ཡང་མེད་སྟབས། འཚོ་ཐབས་ཡར་རྒྱས་གཏོང་བའི་གོ་སྐབས་མེད་པ་མ་ཟད། མི་ཚེའི་མདུན་ལམ་མེད་པར་ལུས་བའི་ཉེན་ཁ་འདུག ད་ལྟའི་ཆར་སྐྱབས་བཅོལ་སྙན་ཞུ་ ༡༩༦ ལས་ ༤༠ བར་སྐྱབས་བཅོལ་ཐོབ་ཐང་སྤྲད་མེད་ཅིང་གྲངས་འབོར་དེ་ད་དུང་འཕར་གྱི་འདུག སྤྱིར་བཏང་སྐྱབས་བཅོལ་གྱི་སྙན་ཞུ་ཕུལ་དུས། སྒེར་གྱི་གནས་ཚུལ་ཁོ་ནར་ཞིབ་འཇུག་བྱས་པ་གཞིར་བཞག་བཟུང་ཐག་གཅོད་བྱེད་ཀྱི་ཡོད་ཀྱང་། སྐྱབས་བཅོལ་གྱི་གནས་བབས་ངོས་ལེན་མེད་པའི་ཐག་གཅོད་དེས་བོད་མི་མང་པོ་ཞིག་ལ་དཀའ་ངལ་ཆེན་པོ་འཕྲད་ཀྱི་འདུག ཅེས་བརྗོད་འདུག

གསལ་བསྒྲགས་ཀྱི་མཇུག་ཏུ། དེང་སང་སུད་སི་གཞུང་གི་འབྲེལ་ཡོད་མི་སྣས་སྐྱབས་བཅོལ་ཞུ་མཁན་གྱི་ངོ་སྤྲོད་ཡིག་ཆ་གལ་ཆེན་དུ་རྩི་བཞིན་ཡོད་སྟབས། གལ་ཏེ་ངོ་སྤྲོད་ཡིག་ཆ་མ་སྤྲད་པའམ་སྤྲོད་རྒྱུ་མེད་པ་ཡིན་ན། སོ་སོའི་ལོ་རྒྱུས་སྦ་གསང་བྱས་པར་ངོས་འཛིན་བྱེད་ཀྱི་ཡོད་པ་མ་ཟད། སྐྱབས་བཅོལ་གྱི་ཆ་རྐྱེན་ཚང་མིན་ལ་ཞིབ་འཇུག་བྱེད་མ་ཐུབ་པར་སྐྱབས་བཅོལ་གྱི་ཐོབ་ཐང་དང་གནས་སྡོད་ཆོག་པའི་ཐོབ་ཐང་སྤྲོད་ཀྱི་མེད། དེར་བརྟེན་སུད་སིའི་ནང་བོད་མི་མང་པོ་ཁྲིམས་འགལ་གྱིས་སྡོད་བཞིན་ཡོད་སྟབས། ཁོང་ཚོ་དུས་ཡུན་ངེས་མེད་ཀྱིས་འཛིན་བཟུང་བྱེད་པའི་ཉེན་ཁ་ཡོད་པས་སེམས་འཚབ་ཆེན་པོ་འདུག ཅེས་བརྗོད་འདུག

གསར་འགོད་པ། པདྨ་མཚོ།