དུས་དབང་མགོ་འཛུགས་མ་གནང་བའི་སྔོན་དུ་ ༸གོང་ས་མཆོག་གིས་བླ་སློབ་ཀྱི་དམ་ཚིག་གཙང་མ་ཡོང་ཆེད་ཆོས་ཞུ་བའི་ཁྲོད་དོལ་རྒྱལ་བསྟེན་མཁན་བསྡད་ན་འགྲིག་གི་མེད་སྐོར་དང་། བོད་པའི་ཆོས་བརྒྱུད་ཁག་གིས་མཐུན་སྒྲིལ་བྱེད་གལ་ཆེན་པོ་ཡིན་ཚུལ་སོགས་བཀའ་གནང་སོང་།
དེ་རིང་སྔ་དྲོའི་ཆུ་ཚོད་ ༧། ༤༠ ཙམ་ལ་ ༸ གོང་ས་མཆོག་ལ་དྭགས་རྒྱལ་ས་སླེ་ཞི་བའི་ཚལ་གསུང་ཆོས་རྭ་བར་ཆིབས་བསྒྱུར་གནང་སྟེ་དུས་འཁོར་ཆེན་དང་འབྲེལ་བའི་ཆོ་ག་གསོག་སྒྲུབ་དང་དགེ་འདུན་པ་ཅིག་གིས་མཚན་ཉིད་རྩོད་སྒྲུབ་གནང་བར་གསན་གཟིགས་གནང་ཡོད་པ་དང་། ཉིན་རྒྱབ་དུས་འཁོར་དབང་ཆེན་གྱི་བླ་མ་དང་སློབ་མའི་བཀའ་དབང་གནང་ཡོད། སྐབས་དེར་དགའ་ལྡན་ཁྲི་རིན་པོ་མཆོག་དང་ས་སྐྱའི་གདུང་སྲས། སྲིད་སྐྱོང་བློ་བཟང་སེང་གེ་མཆོག ཇ་མུ་ཀ་ཤི་མུར་མངའ་སྡེའི་འཛུགས་སྐྲུན་བློན་ཆེན་ངག་དབང་རིག་འཛིན་ཇོ་ར་ལགས། ལ་དྭགས་རང་སྐྱོང་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་རིག་འཛིན་བཟོད་པ་ལགས། ལ་དྭགས་ནང་པའི་ལྷན་ཚོགས་ཀྱི་ཚོགས་གཙོ་དོན་འགྲུབ་ཚེ་དབང་ལགས། བོད་དོན་རྒྱབ་སྐྱོར་བ་རེ་ཅཱ་ཊི་གྷིར་ (Richard Gere)ལགས་སོགས་གཙོ་བོར་གྱུར་བའི་བླ་སྤྲུལ་དགེ་བཤེས་དང་། ཐེངས་འདིའི་དུས་དབང་ལ་ཆེད་དུ་ཕེབས་པའི་ཆོས་ཞུ་བ་ཆིག་འབུམ་བཞི་ཁྲི་ ༡༤༤༨༨༣ ལྷག་བཅས་འཛོམས་ཡོད།
སྐབས་དེར་༸གོང་ས་མཆོག་གིས་བླ་སློབ་གཉིས་ཀྱི་དམ་ཚིག་གཙང་མ་ཡོང་གལ་ཆེ་སྐོར་གསུངས་དོན། དེ་རིང་དབང་སྐུར་བ་དང་སྡོམ་པ་ཞུ་བ་བྱེད་ཀྱི་ཡོད་སྟབས། བླ་མ་དང་སློབ་མའི་འདུ་ཤེས་ཀྱི་ཐོག་ནས་ཆོས་འཆད་ཉན་བྱེད་དགོས་ཀྱི་ཡོད། ཁྱེད་རང་ཚོས་དགོས་དབང་གིས་བླ་མ་དུས་ཀྱི་འཁོར་ལོར་ཤེས་པར་བྱས་ཏེ་དད་པ་བྱེད་དགོས་པ་དང་། ངའི་ངོས་ནས་ཆ་བཞག་ན་བཅོམ་ལྡན་འདས་དཔལ་དུས་ཀྱི་འཁོར་ལོའི་དཀྱིལ་འཁོར་བདག་པོའི་ཚུལ་དུ་ཡོད་པའི་བསམ་བློ་བཏང་ནས་བྱེད་དགོས་ཀྱི་ཡོད། དེས་བླ་མ་དང་སློབ་མའི་འབྲེལ་བ་ཆགས་ཡོང་དུས་དམ་ཚིག་གཙང་མ་དགོས་ཀྱི་ཡོད། ཅེས་དང་།
ཁོང་གིས་མུ་མཐུད་དུ། རྒྱལ་བོ་ཤུགས་ལྡན་ནམ་དོལ་རྒྱལ་ངས་སྔོན་མ་བསྟེན་པ་ཡིན། ཕྱིས་སུ་ལོ་རྒྱུས་ཡིག་རྙིང་སོགས་ལ་ཞིབ་འཇུག་དང་དོ་སྣང་བྱས་ཡོང་དུས། ༸གོང་ས་ལྔ་ཆེན་པོས་རྒྱལ་བོ་ཤུགས་ལྡན་འདི་སྨོན་ལམ་ལོག་པའི་དམ་སྲི་འབྱུང་པོ། བསྟན་དང་འགྲོ་བ་ལ་འཚེ་བ་བྱེད་པ་ཞེས་གསུང་གི་འདུག དངོས་ཡོད་གནས་ཚུལ་ཐོག་དོལ་རྒྱལ་བསྟེན་མཁན་ཚོས་གྲུབ་མཐའི་ཕྱོགས་ལྷུང་ཞེ་དྲག་བྱེད་བསྡད་པ་དགེ་ལུགས་ནང་ཡོད་པ་རེད་ལ། ས་སྐྱའི་ནང་དུའང་དོལ་རྒྱལ་བསྟེན་མཁན་ཡོད། དགེ་ལུགས་ནང་དོལ་རྒྱལ་བསྟེན་མཁན་ཚོས་སོ་སོའི་ཤག་ནང་རྙིང་མའི་དཔེ་ཆ་ཞིག་བཞག་པ་ཡིན་ན་རྒྱལ་པོ་ཤུགས་ལྡན་གྱིས་གནོད་སྐྱེལ་གྱི་རེད་ཟེར་བ་ཞིག་འདུག ང་རང་ལ་ཆ་བཞག་ན་སྔ་མོ་ངས་དོལ་རྒྱལ་བསྟེན་པ་རེད། དོལ་རྒྱལ་བསྟེན་པའི་རིང་ངས་རྙིང་མའི་ཆོས་ཞུ་བའི་རིགས་བདེ་བོ་མ་བྱུང་བ་རེད་དཱ། དོལ་རྒྱལ་བསྟེན་རྒྱུ་མཚམས་འཇོག་བྱས་རྗེས་ངས་རྙིང་མའི་ཆོས་སྐོར་དང་ས་སྐྱའི་ལམ་འབྲས། བཀའ་རྒྱུད་ཀྱི་ཐར་རྒྱན་སོགས་མང་པོ་ཞུས་པ་ཡིན་སྟབས། ང་ལ་རིས་མེད་བྱེད་ཐུབ་པའི་གོ་སྐབས་བྱུང་བ་རེད། གལ་སྲིད། དུས་འཁོར་དབང་ཆེན་ཞུ་བར་ཡོང་བའི་ནང་དོལ་རྒྱལ་བསྟེན་མཁན་ཡོད་ན་འདིར་མ་འདུག་རོགས་ཞེས་འཆར་ཅན་ཞུ་བཞིན་ཡོད། དོལ་རྒྱལ་བསྟེན་དང་མ་བསྟེན་སོ་སོའི་འདོད་པ་རེད། བསྟེན་པ་ཡིན་ན་ངའི་འཁྲིས་སུ་དབང་དང་སྡོམ་པ་ཞུ་པའི་རིགས་བྱས་ན་དམ་ཚིག་ཉམས་འགྲོ་བས་ཡག་པོ་མེད་སྟབས། དམ་ཚིག་གཙང་མ་ཞིག་ཡོང་མེད་དུས་མ་འདུག་རོགས་ཞུ་རྒྱུ་ཡིན། ཞེས་གསུངས་སོང་།
༸གོང་ས་མཆོག་གིས་འཛམ་གླིང་གི་ཆོས་ལུགས་ཚང་མས་མཐུན་འབྲེལ་བྱེད་དགོས་པ་གལ་ཆེན་ཡིན་པའི་སྐོར་ལ་གསུངས་དོན། སྦྱིར་ང་ཚོ་འཛམ་གླིང་སྟེང་ཡེ་ཤུ་དང་ཁ་ཆེ། ཇེའུ། མུ་རྟག་པ། དེ་དང་དེ་འདྲ་བའི་ཆོས་ལུགས་ཚང་མས་མི་ལ་ཕན་ཐོགས་ཀྱི་ཡོད། མི་ལ་ཕན་ན་འགྲིག་པ་རེད། རང་སོ་སོའི་ཆོས་བརྒྱུད་དེར་སེམས་པ་རྣམ་དག་བྱེད་མཁན་འདྲ་འདུག ངས་ངོ་ཤེས་པའི་ཡེ་ཤུ་དང་ཁ་ཆེ། ཧིན་རྡུ། ཇེའུ་སོགས་ཀྱི་ཆོས་པ་མང་པོ་ཡོད། རང་རང་གི་ཆོས་རྣམ་དག་བྱས་ནས་ཕྱིན་ན་སེམས་རྒྱུད་སྤོབས་མདོག་ལྷོད་པོ་ཆགས་པ་དང་། བྱམས་བརྩེའི་བསམ་པས་གཞན་ཕན་སྒྲུབ་པའི་རིགས་ཆོས་བརྒྱུད་ཚང་མར་ཡོད་སྟབས། ཆོས་ལུགས་ཚང་མར་གུས་བརྩི་དང་མཐུན་པོ་བྱེད་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།
༸གོང་ས་མཆོག་གིས་མུ་མཐུད་དུ་བོད་པའི་ཆོས་ལུགས་ཆོས་བརྒྱུད་ཁག་གིས་མཐུན་འབྲེལ་བྱེད་དགོས་སྐོར་གསུངས་དོན། བོད་གངས་ཅན་ལྗོངས་ཀྱི་ས་དགེ་བཀའ་རྙིང་། ཇོ་ནང་བོན་དང་བཅས་པ་ཚང་མ་མཐུན་སྒྲིལ་ཡོང་རྒྱུ་གལ་ཆེན་རེད། དེ་རིང་ཁ་སང་བོན་གྱི་གདན་སའི་ནང་གཞུང་སྦྱོང་རྒྱུ་དང་། རྩོད་པ་དང་བརྟག་གསལ་གཏོང་བ། གཞུང་ཆེན་རིགས་དབུ་མ་འཇུག་པ་ལ་སོགས་པའི་སངས་རྒྱས་ཀྱི་གཞུང་དག་ལ་གཟིགས་པའི་ལམ་སྲོལ་ཞིག་ཆགས་ཡོད་སྟབས། བོད་གངས་ཅན་ལྗོངས་ཀྱི་སངས་རྒྱས་ཀྱི་ཆོས་བརྒྱུད་འཛིན་མཁན་ཚང་མར་སྟོན་པ་ཅིག་གི་འགྲིག་འགྲོ་བ་དང་། དེའི་ནང་ཚན་ནས་དཔལ་ན་ལཎྜའི་གཅིག་གྱུར་ཆགས་ཡོད་དུས། དགེ་ལུགས་ཟེར་བ་འདྲ་བོ་དང་རྙིང་མ་ཟེར་བ་འདྲ་བོ། ས་སྐྱ་ཟེར་བ་འདྲ་བོ། བཀའ་རྒྱུད་ཟེར་བ་འདྲ་བོ། བཀའ་བརྒྱུད་ལའང་འབྲི་གུང་པ་ཟེར་བ། འབྲུག་པ་བཀའ་བརྒྱུད་ཟེར་བ། དེ་བཞིན་ཀམ་ཚང་བཀའ་བརྒྱུད་བཅས་ཀྱི་དབྱེ་བ་མང་པོ་དབྱེ་ན་ཡག་པོ་ཡོད་པ་མ་རེད། ཐུགས་མཐུན་ཁྲིམས་གཙང་ཧ་ཅང་གལ་ཆེན་པོ་རེད། ཐུགས་མཐུན་ཁྲིམས་གཙང་ཟེར་བ་དེ་ས་དགེ་བཀའ་རྙིང་རིས་སུ་མ་མཆིས་པའི་གཞུང་དག་ཀློག་པ་དང་ལྟ་བ། བསམ་བློ་བཏང་ནས་དཔྱད་བརྡར་བྱོས། ས་དགེ་བཀའ་རྙིང་སུ་དང་སུ་ཡིན་ནང་བླ་མ་ཚད་ལྡན་ཞིག་ཡིན་ན་དེའི་འཁྲིས་སུ་བཀའ་ཆོས་དང་བྱིན་རླབས་ཞུ། དངོས་གནས་དྲང་གནས་ཆོས་ལུགས་མཐུན་འབྲེལ་འདི་ལྟར་ཡོང་གི་རེད།
ཆོས་ལུགས་མཐུན་འབྲེལ་ཟེར་ནས་འདྲ་ཆགས་པོ་བྱས་ན་ཡོང་རྒྱུ་གང་ཡང་མེད་པར་སེམས་ཀྱི་སྟེང་ནས་ཡིད་ཆེས་དགོས་ཀྱི་ཡོད། ཡིད་ཆེས་མེད་ན་མཐུན་འབྲེལ་ཞིག་གང་ནས་ཡོང་གི་རེད། ཡིད་ཆེས་ཡོང་བར་ཤེས་དགོས་ཀྱི་ཡོད། ཤེས་པར་བརྟག་དཔྱད་བྱེད་དགོས་པ་རེད། འདི་ལྟར་བྱས་ནས་ང་རང་ཚོའི་རིས་སུ་མཆིས་པའི་རྒྱལ་བའི་བསྟན་པ་ཚང་མ་མཐུན་འབྲེལ་དགོས་པ་གལ་ཆེན་པོ་རེད། ང་ཚོས་ལོ་རྒྱུས་ལ་བལྟས་ན། དགེ་ལུགས་དགོན་པ་དེ་འདྲས་རྙིང་མ་དང་བཀའ་བརྒྱུད་ཀྱི་དགོན་པར་ཐུབ་ཚོད་བཏང་བ་དང་། ཡང་བཀའ་བརྒྱུད་པའི་དུས་ཚོད་ཤིག་ལ་བཀའ་བརྒྱུད་པས་དགེ་ལུགས་པར་ཐུབ་ཚོད་བྱས་ཏེ་སྨོན་ལམ་ཚོགས་མ་ཐུབ་པ་བྱུང་བ་རེད། དེ་དག་ཞབས་འདྲེན་དང་སྡིག་པ་བསགས་པ་མ་གཏོགས་ཕན་ཐོགས་གང་ཡང་བྱུང་མེད། ཅེས་སོགས་གསུངས་སོང་།
སང་ཉིན་སྔ་དྲོ་༸གོང་ས་མཆོག་གི་སེམས་བསྐྱེད་ཀྱི་ཆོ་ག་གསོག་སྒྲུབ་དང་ཉིན་གུང་རྗེས་དུས་དབང་གནང་རྒྱུ་ཡིན་འདུག
