ཉེ་སྔོན་དཀར་མཛེས་ཁུལ་ལི་ཐང་རྫོང་རྒྱ་གཞུང་ཉེན་རྟོག་པས་མི་མང་ལ་ངན་སྐུལ་བྱས་པའི་ཉེས་མིང་འོག་བོད་མི་ཁག་ཅིག་འཛིན་བཟུང་བྱས་ཏེ་བོད་མི་ ༤ མུ་མཐུད་བཀག་ཉར་འོག་ཡོད་འདུག
དཀར་མཛེས་ཁུལ་ལི་ཐང་རྫོང་ཁོངས་ཀྱི་དགོན་པ་དང་གྲོང་སྡེའི་སྐུ་ཚབ་ཚོས། བོད་མིའི་རྩྭ་ས་འཕྲོག་རྩོད་དང་ནང་ཁུལ་རྙོག་དྲ་རིགས་འགྲིག་འཇགས་བཟོས་ཏེ། བོད་རིགས་ནང་ཁུལ་དུ་སྔར་ལས་མཐུན་སྒྲིལ་རྡོག་རྩ་ཆིག་སྒྲིལ་དགོས་པའི་དམངས་ཁྲོད་བྱ་འགུལ་སྤེལ་བར་བརྟེན། ཉེ་སྔོན་རྒྱ་གཞུང་ཉེན་རྟོག་པས་དགོན་གྲོང་གི་སྐུ་ཚབ་དྲུག་བདུན་ཞིག་ལི་ཐང་རྫོང་ཐོག་ཏུ་བཙན་ཁྲིད་བྱས་ཏེ་འདྲི་རྩད་བྱས་ཡོད་པ་མ་ཟད། བོད་མི་ ༤ མུ་མཐུད་བཀག་ཉར་འོག་ཡོད་འདུག
ལི་ཐང་སྤྲུལ་སྐུ་འཇམ་དབྱངས་ལགས་ཀྱིས་ནོར་ཝེ་རླུང་འཕྲིན་ཁང་ལ། རྒྱ་གཞུང་གིས་འཛིན་བཟུང་བྱས་པའི་བོད་མི་ཚང་མ་གྲོང་སྡེ་ཁག་གི་མགོ་ཁྲིད་ཤ་སྟག་ཡིན་ཞིང་། ཁོང་ཚོའི་ནང་ནས་མི་ ༤ ཙམ་མུ་མཐུད་བཀག་ཉར་བྱས་ཏེ་འདྲི་རྩད་བྱེད་བཞིན་ཡོད་པ་དང་། ཁོང་ཚོས་རྒྱུན་དུ་བོད་རིགས་ནང་ཁུལ་གྱི་རྙོག་དྲ་དང་རྩྭ་ས་རྩོད་གླེང་སོགས་འགྲིག་འཇགས་གཏོང་བའི་སྤྱི་ཚོགས་ཞབས་ཞུ་བསྒྲུབ་ཀྱིན་ཡོད་པ་ལས་ཁྲིམས་འགལ་གྱི་ནག་ཉེས་ཅི་ཡང་བཟོས་མེད་ཀྱང་། རྒྱ་གཞུང་གིས་རྒྱལ་ཁབ་ཀྱི་སྲིད་བྱུས་ལ་རྒྱབ་འགལ་བྱས་ཏེ། ནུབ་ཕྱོགས་ཀྱི་བྱེད་ཐབས་སྤྱད་དེ་སློབ་གསོ་ལོག་སྤེལ་དང་མང་ཚོགས་ངན་སྐུལ་བྱས་པའི་ཉེས་མིང་གཡོགས་ཏེ་འཛིན་བཟུང་བྱས་ཡོད་པ་རེད། ཅེས་བརྗོད་འདུག
ཡང་གནས་ཚུལ་མཁོ་སྤྲོད་པས་ཉེ་ཆར་གོང་ས་མཆོག་གི་སྐུའི་འཁྲུངས་སྐར་གྱི་སྔོན་ཙམ་ནས་བཟུང་རྒྱ་གཞུང་གིས་ལི་ཐང་ཁུལ་དུ་སྐད་འཕྲིན་དང་ཁ་པར་སོགས་བརྒྱུད་ལམ་ཁག་ལ་བཀག་སྡོམ་དང་། གང་སར་དམག་མི་མང་པོ་འགྲེམས་འཇོག་བྱས་ཡོད་སྟབས། ད་ལྟའི་ཆར་འཛིན་བཟུང་བྱས་པའི་བོད་མི་ཚོའི་གནས་སྟངས་ཤེས་རྟོགས་ཐུབ་ཀྱི་མི་འདུག ཅེས་བརྗོད་འདུག
གསར་འགོད་པ། པདྨ་མཚོ།
རྒྱ་གཞུང་ལ་དགོས་རྒྱུ་ནི་བོད་ནང་ཁུལ་གསོད་རེ་སོགས་མི་མཐུན་པ་ཀྱང་ཀྱང་དགོས་པ་ལས་མཐུན་ལམ་རྡོག་རྩ་ཆིག་སྒྲིལ་བྱས་ན་རྒྱ་གཞུང་གིས་མིག་ནང་མི་འཇོག་ཐག་ཆོད་