བོད་ཀྱི་སྨན་རྩིས་ཁང་གི་ལ་དྭགས་དུས་དབང་ཐོག་རིན་མེད་སྨན་སྦྱིན་དང་སྨན་བཅོས་བརྟག་དཔྱད་བྱེད་ཀྱིན་པར་མ་ཟད། བོད་ནང་ཡོང་བའི་ཆོས་ཞུ་བ་ཚོར་དམིགས་བསལ་རིན་ཆེན་རིལ་བུ་བཙོང་གི་ཡོད་འདུག
ཟླ་སྔོན་མའི་ཟླ་མཇུག་ནས་བཟུང་བོད་ཀྱི་སྨན་རྩིས་ཁང་གི་དམིགས་བཀར་ལས་རིགས་འགན་འཛིན་དང་། སྐུ་བཅར་སྨན་པ་གཅིག ཨམ་ཆི་གཅིག ཁ་ལོ་བ་གཅིག་བཅས་དང་། ལ་དྭགས་ས་གནས་ཡན་ལག་སྨན་པ་བཅས་ཁྱོན་མི་ ༡༤ ཡིས། ལ་དྭགས་དུས་འཁོར་དབང་ཆེན་གྱི་གསུང་ཆོ་རྭ་བའི་ཉེ་འཁྲིས་ཀྱི་ར་སྐོར་ནང་སྨན་སྤྲོད་ཁང་ ༢ དང་། བརྟག་དཔྱད་ཁང་ ༣། སྤྱི་ཚོགས་ཀྱི་དུས་རིམ་སྔོན་འགོག་བྱེད་ས་ ༡ བཅས་བཙུགས་ཏེ། ད་བར་ལ་དྭགས་དང་ཧི་མ་ལ་ཡའི་རི་རྒྱུད་གཙོས། ཕྱི་རྒྱལ་དང་བོད་མི་བཅས་ཁྱོན་མི་ ༣༠༠༠ ལ་རིན་མེད་ཐོག་བརྟག་དཔྱད་གནང་ཡོད་པར་མ་ཟད། རིན་ཆེན་རིལ་བུ་ཕུད་པའི་ཞག་མ་བདུན་རེའི་སྨན་སྨན་སྦྱིན་གཏོང་གི་ཡོད་འདུག་ལ། བོད་ནང་རིན་ཆེན་རིལ་བོ་རག་ཁག་པོ་ཡོད་པའི་གནས་སྟངས་ལ་གཞིགས་ཏེ། བོད་ནང་གི་ཆོས་ཞུ་བ་ཚོར་རིན་ཆེན་རིལ་བུ་སྣ་ཁ་ ༨ བཙོང་གི་ཡོད་འདུག
འདིའི་ཐད་བོད་ཀྱི་སྨན་རྩིས་ཁང་གི་དམིགས་བཀར་ལས་རིགས་འགན་འཛིན་བསྟན་འཛིན་རྡོ་རྗེ་ལགས་ཀྱིས་ངོ་སྤྲོད་གནང་བ་ལྟར་ན། བོད་ཀྱི་སྨན་རྩིས་ཁང་གི་སྨན་པ་དང་ལས་བྱེད་ཚོ་ཟླ་སྔོན་མའི་ཕྱི་ཚེས་ ༢༨ ཉིན་ནས་བཟུང་ལ་དྭགས་སུ་བསླེབ་ཏེ། དུས་དབང་གོ་སྒྲིག་ཚོགས་ཆུང་ལ་གསུང་ཆོས་རྭ་བའི་སྒོ་ཆེན་མདུན་དང་། ཉེ་འཁྲིས་ཀྱི་རྭ་སྐོར་བཅས་ས་ཆ་གཉིས་སློང་ཡོད་ཀྱང་། ས་ཆ་གཅིག་མ་གཏོགས་མ་སྤྲད་སྟབས། ཕྱི་ཚེས་ ༣༠ ཉིན་གྱི་དགོང་མོར་ཁོང་ཚོ་རང་ངོས་ནས་དམག་མིར་གུར་གཡར་ཏེ། གསུང་ཆོས་རྭ་བའི་ཉེ་འཁྲིས་ཀྱི་རྭ་སྐོར་ནང་བརྟག་དཔྱད་ཁང་ ༢ དང་། སྨན་སྤྲོད་ཁང་ ༢ ། སྤྱི་ཚོགས་ནད་ཡམས་སྔོན་འགོག་ས་ཆ་གཅིག་བཅས་དང་། རིག་གཞུང་ལྟེ་གནས་ཁང་གི་ར་སྐོར་ནང་ཨམ་ཆི་བཞིའི་བརྟག་དཔྱད་ཁང་བཅས་བཙུགས་རྗེས། ཉིན་རེའི་ཞོགས་པའི་ཆུ་ཚོད་ ༤ ནས་དགོང་མོ་ནད་པ་མ་རྫོགས་པར་བརྟག་དཔྱད་དང་སྨན་སྦྱིན་གནང་གི་ཡོད་འདུག
ཁོང་ལ་ཐེངས་འདིའི་སྨན་བཅོས་སྐབས་ནད་པ་འདས་གྲོངས་གྱུར་བའི་རིགས་བྱུང་ཡོད་མེད་དང་། ན་ཚ་གཙོ་བོ་གང་དག་ཡིན་མིན་དྲིས་པར། ང་ཚོའི་སྨན་ཁང་ཡོད་ས་འདིར་ང་ཚོ་དང་ལ་དྭགས་བསོད་ནམས་ནོར་བུ་སྨན་ཁང་། དམག་མི་སྨན་ཁང་བཅས་གསུམ་འདུག ད་ལྟའི་བར་འདིར་མི་འདས་གྲོངས་སུ་གྱུར་བའི་རིགས་བྱུང་མ་སོང་། ཡིན་ནའང་། ཁ་སང་ཚེས་ ༡༡ ཉིན་གྱི་དགོང་མོར་ལམ་ནས་ཚུར་ཡོང་མཁན་གྱི་བོད་པའི་རྒན་མོ་ཞིག་ཁ་དབུགས་མ་འདང་བར་གྲོངས་རྗེས་འདིར་འཁུར་བསླེབ་སོང་། དེ་མིན་གནས་ཚུལ་དེ་འདྲ་བྱུང་མ་སོང་། ན་ཚའི་ཕྱོགས་ནས་ལ་དྭགས་ནང་དང་ཧི་མ་ལ་ཡའི་རི་རྒྱུད་མང་ཆེ་བ་འཆམ་རིམ་དང་ཕོ་བ། ཁྲག་ཤེད་བཅས་ཀྱི་ན་ཚ་ཤུགས་ཆེན་པོ་འདུག ཕྱི་ལོགས་ནས་ཡོང་མཁན་གྱི་ནད་པ་ས་ཆ་མ་འཕྲོད་པ་དང་ཁ་རླུང་མ་འདང་བ། ཚ་བ་ཤུགས་ཆེ་བའི་དབང་གིས་མིག་དང་མགོ་ན་བའི་རིགས་མང་པོ་འདུག ཅེས་བརྗོད་བྱུང་།
ཡང་ཁོང་ལ་སྨན་སྦྱིན་གྱི་ལས་དོན་འདིས་མི་མང་ལ་ཕན་ཐོགས་གང་འདྲ་བྱུང་གི་ཡོད་མེད་དྲིས་པར། ཁ་སང་ཚེས་ ༡༡ ཉིན་གོ་སྒྲིག་ཚོགས་ཆུང་གིས་མི་འབུམ་གཅིག་དང་སྟོང་ཕྲག་ཞེ་བཞི་བདུན་བརྒྱ་བརྒྱད་ཅུའི་བསླེབ་འདུག་ལབ་སོང་། ང་ཚོ་འདིར་མ་བསླེབ་ཡར་སྔོན་ལ་ཁོང་ཚོས་མི་འབུམ་གཉིས་བརྒལ་བའི་སྐད་ཆ་བཤད་པ་རེད། ཁོང་ཚོས་བཤད་པ་ལྟར་ད་རེབ་ང་ཚོས་སྨན་རླངས་འཁོར་ཆེན་པོ་གཉིས་འཁུར་ཡོད། ང་ཚོའི་ངོས་ནས་ད་ལྟའི་བར་༸གོང་ས་མཆོག་གི་བཀའ་གཞིར་བཟུང་སྨན་སྦྱིན་ཕུལ་བསྡད་ཀྱི་ཡོད་པ་རེད། འདིར་ཉམ་ཐག་དང་འབྱོར་ལྡན་ཅན་ཚང་མར་ཕན་ཐོགས་ཡོང་གི་འདུག་ཅེས་ལབ་མཁན་མང་པོ་འདུག ང་ཚོའི་ངོས་ནས་ཀྱང་མི་མང་ལ་འདི་ང་ཚོའི་བཀའ་དྲིན་མ་རེད། ༸གོང་ས་མཆོག་གི་ཐུགས་རྗེ་བཀའ་དྲིན་རེད་ཅེས་ཞུ་བསྡད་ཀྱི་ཡོད། གང་ལྟར། རིན་མེད་བརྟག་དཔྱད་དང་སྨན་སྦྱིན་ཕུལ་བ་དེས་མི་མང་ལ་ཕན་ཐོགས་ཆེན་པོ་ཡོང་གི་འདུག་ཅེས་མི་མང་གི་ལབ་ཡོང་གི་འདུག ཅེས་བརྗོད་བྱུང་།
མཇུག་ཏུ་ཁོང་ལ་ད་རེབ་དུས་དབང་ཐོག་སྐབས་སྔོན་མ་དག་དང་མི་འདྲ་བའི་དཀའ་ངལ་ག་རེ་འཕྲད་ཡོད་མེད་དྲིས་པར་ཁོང་གིས། ང་ཚོར་དཀའ་ངལ་ཆེ་ཤོས་སྨན་ཁང་འཛུགས་སའི་ས་ཆ་གང་སར་མེད་པ་དང་། གུར་གྱི་མཐུན་རྐྱེན་མེད་པ། སྨན་ཁང་གི་གཡས་གཡོན་དུ་ཆུ་དང་གསང་སྤྱོད་མཐུན་རྐྱེན་མི་འདུག དཀའ་ངལ་འདི་དག་འཕྲད་དགོས་དོན་གཙོ་བོ། དང་པོ་ནས་གོ་སྒྲིག་བྱེད་མཁན་ཚོས་མཐུན་རྐྱེན་ཡོད་ཚུལ་བསྒྲགས་ཏེ། ས་གནས་སུ་བསླེབ་དུས་མེད་པ་དེ་རེད། དང་པོ་ནས་མེད་ལབ་པ་ཡིན་ན། ང་ཚོའི་ངོས་ནས་མཐུན་རྐྱེན་སྦྱོར་ཐུབ་ཀྱི་རེད། དང་པོ་ས་གནས་སུ་མཐུན་རྐྱེན་ཡོད་ཚུལ་བཤད། འདིར་བསླེབ་སྐབས་ཕར་འགྱངས་ཚུར་འགྱངས་བྱས་པ་ཡིན་ན། དཀའ་ངལ་འཕྲད་ཀྱི་འདུག ང་རང་གི་ངོས་ནས་གྲ་སྒྲིག་ཚོགས་ཆུང་གིས་མ་གནང་བ་མིན་པར། ཉམས་མྱོང་མེད་པའི་དབང་གིས་བྱུང་བ་རེད་བསམ་བསྡད་ཡོད། མ་འོངས་པར་གོ་སྒྲིག་བྱེད་མཁན་ཚོས་མི་མང་གི་མཐུན་རྐྱེན་གཙོས་པའི་ལས་དོན་འདིའི་རིགས་ལ་གོ་སྒྲིག་ཡག་པོ་ཞིག་གནང་རྒྱུ་ཧ་ཅང་གལ་ཆེན་པོ་རེད་བསམ་པ་དྲན་བྱུང་། ཞེས་བརྗོད་བྱུང་།
བོད་ཀྱི་སྨན་རྩིས་ཁང་གི་སྨན་སྦྱིན་གྱི་ལས་རིམ་འདི་འགན་འཛིན་ཚེ་རིང་བཀྲ་ཤིས་ལགས་ཕེབས་པ་ནས་བཟུང་མགོ་འཛུགས་གནང་བ་ཞིག་ཡིན་འདུག་ལ། ད་ལྟའི་བར་༸གོང་ས་མཆོག་གིས་རྒྱ་གར་ལྷོ་ཕྱོགས་སུ་གནང་བའི་ལམ་རིམ་ཆེན་མོའི་གསུང་ཆོས་རིམ་པའི་སྐབས་དང་། ཝ་ན་དང་རྡོར་གདན། སྦང་བྷེ། ལ་དྭགས་དུས་དབང་བཅས་སུ་གནང་ཡོད་འདུག
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
