ཁ་སང་སྔ་དྲོར་ལ་དྭགས་ནང་གི་དུས་འཁོར་དབང་ཆེན་མཇུག་བསྒྲིལ་བ་དང་བསྟུན་ཏེ་༧གོང་ས་མཆོག་ལ་བརྟན་བཞུགས་བསྟར་འབུལ་ཞུས་ཤིང་། སྐབས་དེར་མངའ་སྡེ་སྤྱི་ཁྱབ་བློན་ཆེན་དང་། དུས་དབང་གོ་སྒྲིག་ཚོགས་ཆུང་བཅས་ཀྱིས་གཏམ་བཤད་གནང་སོང་།
ཁ་སང་ཞོགས་པའི་ཆུ་ཚོད་ ༧ པ་ནས་ ༡༡ བར་༸གོང་ས་མཆོག་གིས་ལ་དྭགས་ཞི་བའི་ཚལ་གསུང་ཆོས་རྭ་བར་ཆོས་ཞུ་བ་རྣམས་ལ་སྒྲོལ་དཀར་གྱི་ཚེ་དབང་གནང་གྲུབ་རྗེས་གནས་ཆུང་ཆོས་རྒྱལ་དང་ཚེ་རིང་མཆེད་ལྔ་གཉིས་སྦྱན་འདྲེན་ཞུས་ཡོད་པ་དང་། དེའི་རྗེས་དུས་དབང་གོ་སྒྲིག་ཚོགས་ཆུང་གིས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུས་ཤིང་། སྐབས་དེར་ལ་དྭགས་ཀྱི་ཡུལ་མི་ཁག་ཅིག་གིས་སྲོལ་རྒྱུན་གཞས་སྣ་འཁྲབ་སྟོན་བཅས་གནང་སོང་།
དུས་དབང་གི་ཉིན་མཐའ་མའི་མཛད་སྒོའི་ཐོག་ཇ་མུ་ཀ་ཤི་མུར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཨོ་མར་ཨཱ་ཌོབ་ (Omar Abdullah) མཆོག་གཙོས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག རྒྱ་གར་གྲོས་ཚོགས་ཀྱི་འཐུས་མི་ཐུབ་བསྟན་ཚེ་དབང་ལགས། མངའ་སྡེའི་འཛུགས་སྐྲུན་བློན་ཆེན་ངག་དབང་རིག་འཛིན་ཇོ་ར་ལགས།ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་རིག་འཛིན་བཟོད་པ་ལགས། ལ་དྭགས་ནང་པའི་ལྷན་ཚོགས་ཀྱི་ཚོགས་གཙོ་དོན་འགྲུབ་ཚེ་དབང་ལགས། བོད་དོན་རྒྱབ་སྐྱོར་བ་རེ་ཅཱ་ཊི་གྷིར་(Richard Gere) ལགས་སོགས་གཙོ་བོར་གྱུར་བའི་བླ་སྤྲུལ་དགེ་བཤེས་དང་མི་མང་ཆིག་འབུམ་བཞི་ཁྲི་ལྷག་འཛོམས་པའི་ཐོག གོ་སྒྲིག་ཚོགས་ཆུང་གི་ཚོགས་གཙོ་དོན་འགྲུབ་ཚེ་དབང་ལགས་ཀྱིས་བརྗོད་དོན། དེ་རིང་ ༸གོང་ས་མཆོག་གིས་འཛམ་གླིང་ཞི་བདེ་ཆེད་ལ་དྭགས་སུ་དུས་དབང་ཐེངས་ ༣༣ པ་གནང་གྲུབ་པའི་ཉིན་མཐའ་མ་ཆགས་ཡོད། ཐེངས་འདིའི་དུས་དབང་ཐོག་བོད་རིགས་ཚུད་པའི་ལ་དྭགས་དང་ཁུ་ནུ་གཉིས་ཀྱི་མི་ ༨༦༠༠༠ ཙམ་དང་། ཧི་མ་ཡའི་རི་རྒྱུད་ཀྱི་དགོན་སྡེ་ཁག་ནས་མི་ ༩༠༠༠ ། ཨ་རུ་ནཱ་ཅལ་མངའ་སྡེ་དང་ཧི་མ་ཅལ་མངའ་སྡེ། འབྲས་ལྗོངས་སོགས་ནས་ཆོས་ཞུ་བ་ ༡༢༠༠༠། གཞན་རྒྱལ་ཁབ་ ༧༣ ནས་ཆོས་ཞུ་བ་ ༦༠༠༠། ཐོ་འགོད་མ་བྱས་པའི་བྱིས་པ་ལོ་ ༡༥ མན་གྱི་ ༢༥༠༠༠ ཙམ། དང་བླངས་ཞབས་ཞུ་བ་ ༡༠༠༠༠ ལྷག་བཅས་ཁྱོན་ཆོས་ཞུ་བ་གཅིག་འབུམ་ལྔ་ཁྲི་ལྷག་ཕེབས་ཡོད། ཅེས་སོགས་བརྗོད་སོང་།
ཁོང་གིས་མུ་མཐུད་དུ། ལ་དྭགས་བོད་བརྒྱུད་ནང་བསྟན་གྱི་སྲོལ་རྒྱུན་ལ་དམིགས་བསལ་འབྲེལ་བ་ཡོད་མ་ཟད། ལ་དྭགས་པ་ཚོ་༸གོང་ས་མཆོག་གི་ཆོས་འབྲེལ་གྱི་རྗེས་འབྲང་པ་ཡིན་སྟབས། ལ་དྭགས་ཀྱི་མི་སྒེར་དང་ཁྱིམ་ཚང་། ཚོགས་སྡེ་ཚང་མས་གང་ཐུབ་ཀྱིས་རྒྱབ་སྐྱོར་རོགས་འདེགས་བྱས་ཡོད། ལ་དྭགས་དཔལ་འབྱོར་ཐོག་ནས་ས་ཁུལ་གཞན་དང་བསྡུར་ན་ཡག་པོ་མེད་ཀྱང་གང་ཐུབ་གནང་ཡོད། ཐེངས་འདིར་གོ་སྒྲིག་ཚོགས་ཆུང་གིས་བསམ་བཞིན་མིན་པའི་ལས་ཕྱོགས་ཁག་མང་པོ་ཞིག་དགའ་ལྡན་ཕོ་བྲང་གི་རྩ་བའི་དམིགས་ཡུལ་དང་འགལ་ཡོད་སྟབས་༸གོང་ས་མཆོག་ལ་སེམས་གཏིང་ནས་དགོངས་སེལ་ཞུས་བ་ཡིན། ཞེས་བརྗོད་སོང་།
དེའི་རྗེས་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་རིག་འཛིན་བཟོད་པ་ལགས་དང་མངའ་སྡེ་འཛུགས་སྐྲུན་བློན་ཆེན་ངག་དབང་རིག་འཛིན་ཇོ་ར་རྣམ་གཉིས་ནས་ཀྱང་༸གོང་ས་མཆོག་གིས་དུས་དབང་ཐེངས་ ༣༣ པ་ལ་དྭགས་ནང་བསྩལ་བར་ལ་དྭགས་མི་མང་གི་ཚབ་བྱས་ཏེ་ཐུགས་རྗེ་ལེགས་གསོལ་དང་། འབྱུང་འགྱུར་ཡང་༸གོང་ས་མཆོག་གིས་ལ་དྭགས་གཙོ་བོར་གྱུར་བའི་ཧི་མ་ལ་ཡའི་རི་རྒྱུད་ཀྱི་མི་མང་ལ་དུས་དང་དུས་སུ་གཟིགས་སྐྱོང་ལམ་སྟོན་གནང་རོགས་ཞེས་སོགས་བརྗོད་སོང་།
ཇ་མུ་ཀ་ཤི་མུར་མངའ་སྡེ་སྤྱི་ཁྱབ་བློན་ཆེན་སྐུ་ཞབས་ཨོ་མར་ཨཱ་ཌོབ་མཆོག་གིས། ༸གོང་ས་མཆོག་གིས་ལ་དྭགས་ནང་ཡང་བསྐྱར་དུས་འཁོར་དབང་ཆེན་སྐུར་བའི་གོ་སྐབས་བསྩལ་བར་ལ་དྭགས་མི་མང་དགའ་སྤྲོ་ཚད་མེད་སྐྱེས་ཡོད། ལ་དྭགས་མི་མང་གིས་༸གོང་ས་མཆོག་གི་དུས་དབང་ཞུ་རྒྱུ་བྱུང་བ་དེ་སྐྱིད་པའི་ཉི་མ་དང་། ལ་དྭགས་མི་མང་དང་ས་ཆ། མངའ་སྡེར་ཐུགས་རྗེ་བྱིན་རླབས་ཀྱིས་ཞི་བདེ་སླར་གསོ་ཡོང་བར་ཡིད་ཆེས་ཡོད། ང་རང་དོ་སྣང་བྱུང་བར།Â ༸གོང་ས་མཆོག་གིས་ལ་དྭགས་ནང་དུས་དབང་དང་པོ་གནང་སྐབས་ངའི་སྤོ་བོ་ལགས་མངའ་སྡེ་སྤྱི་ཁྱབ་བློན་ཆེན་རེད། ཐེངས་གཉིས་པའི་སྐབས་ངའི་ཕ་ལགས་མངའ་སྡེའི་སྤྱི་ཁྱབ་བློན་ཆེན་རེད། དེ་རིང་༸གོང་ས་མཆོག་གི་དུས་དབང་ཐེངས་གསུམ་པ་གནང་སྐབས་ང་རང་མངའ་སྡེའི་སྤྱི་ཁྱབ་བློན་ཆེན་ཡིན་པ་སྟས་དབང་ཞིག་རེད། གལ་སྲིད།Â དུས་དབང་གོ་སྒྲིག་འཐུས་ཚང་མེད་པ་དང་དཀའ་ངལ་སོགས་བྱུང་ཡོད་ཚེ་ང་དང་ངའི་གཞུང་གིས་དགོངས་དག་ཞུས་པ་ཡིན། མ་འོངས་པར་མངའ་སྡེའི་མི་མང་ལ་ཡང་ཡང་བྱིན་རླབས་གནང་རྒྱུ་དང་གུས་པར་ཡང་ཡང་ཐུག་འཕྲད་གནང་རོགས། ཞེས་སོགས་གསུངས་སོང་།Â
མཇུག་ཏུ་༸གོང་ས་མཆོག་གིས།Â དུས་འཁོར་དབང་ཆེན་ཐོག་མཐའ་བར་གསུམ་དུ་རྒྱས་ཤིང་ཞིབ་པ་ཡག་པོ་བྱུང་བར་ཚང་མར་ཐུགས་རྗེ་ཞུས་བ་ཡིན། དེ་རིང་ཉིན་མཐའ་མའི་བར་དགའ་ལྡན་ཁྲི་རིན་པོ་ཆེ་དབུ་བཞུགས་ཀྱིས་སྒྲོལ་དཀར་གྱི་ཚེ་སྒྲུབ་བདུན་ཕྲག་ཅིག་རིང་གསོག་གནང་རྗེས། ང་ལ་བརྟན་བཞུགས་གནང་བར་ཐུགས་རྗེ་ཆེ་ཞུས་བ་ཡིན། ངའི་ངོས་ནས་ཡུན་རིང་དུ་འཚོ་བཞུགས་བྱེད་པར་སྨོན་ལམ་བྱ་རྒྱུ་ཡིན། དེ་རིང་བརྟན་བཞུགས་སྐབས་གཟུགས་ཅན་མིའི་ཐོག་ལ་གཟུགས་མེད་དྲག་པ་ཕོ་རྒྱུད་མོ་རྒྱུད་རྗེས་འབྲང་པ་བཅས་པ་མང་པོ་ཞིག་བསླེབས་པ་རེད། སངས་རྒྱས་ཀྱི་གཞུང་ནས་སྲིད་པ་གསུམ་གསུང་གི་འདུག འདོད་ཁམས་ནང་ཆ་བཞག་ན་མིའི་འགྲོ་བ་དང་དུད་འགྲོའི་འགྲོ་བ། དེ་མིན་གྱི་ཕུང་བོ་རགས་པ་མིན་པའི་འགྲོ་བ་མང་པོ་ཞིག་འདིར་ཡོང་བསྡད་པ་རེད། དེར་བརྟེན། གཟུགས་མེད་གྲོགས་པོ་ཚོར་ཆ་བཞག་ན་མི་ལ་ཕན་ཐོགས་བྱེད་པར་གལ་ཆེན་པོ་རེད། སྐབས་རེར་ལྷ་དང་ཀླུ། རྒྱལ་བོ་ཟེར་བ་དེ་ཚོས་མི་ལ་གནོད་པ་སྐྱེལ་པ་དེ་འདྲ་ཡོང་གི་ཡོད། མི་ལ་ཕན་འདོག་དགོས་པ་རེད་མ་གཏོགས་གནོད་པ་བྱེད་རྒྱུ་ཡོད་པ་མ་རེད། ཅེས་སོགས་གསུངས་སོང་།
༸གོང་ས་མཆོག་གིས་མུ་མཐུད་གསུངས་དོན། དེ་རིང་མངའ་སྡེའི་སྤྱི་ཁྱབ་བློན་ཆེན་འདིར་ཕེབས་འདུག ཁོང་ལ་ཆ་བཞག་ན་མི་རབས་གསུམ་པ་དེ་རེད། དང་པོ་ཤི་ཁུ་ཨ་ཌོབ་ (Sheikh Abdullah) ལགས་རེད། སྔོན་མ་རྒྱ་གར་སྲིད་བློན་ནེའུ་རུ་སྐབས་ནས་ང་ལ་ཡག་པོ་བྱེད་ཀྱི་ཡོད། དེའི་རྗེས་ཧྤོབ་རོབ་ཨ་ཌོབ་ (Farooq Abdullah) ལགས་རེད། ངེད་གཉིས་ཀྱང་གྲོགས་པོ་ཡག་པོ་ཡིན། དེ་ནས་ཨོ་མ་ཨ་ཌོབ་ཁོ་རང་རེད། དེར་བརྟེན། ང་མི་རྒན་པ་རེད་ཁྱེད་རང་གཞོན་པ་རེད། ངས་ཁྱེད་རང་གི་སྤོ་བོ་ལགས་དང་ཕ་ལགས་ངོ་ཤེས་ཀྱི་ཡོད། མི་རབས་གསུམ་ཀས་བོད་ཀྱི་སྤྱི་དོན་ཐོག་ཤ་ཚ་ཞེ་དྲག་ཡོད་བསྡད་པ་རེད། ང་རང་སྒེར་ལ་ཆ་བཞག་ན་ཁོང་ཚོ་གྲོགས་པོ་ནང་ཚགས་དེ་འདྲ་ཡིན། དེ་རིང་ཆེད་མངགས་འདིར་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། Â དེ་ནས་ལ་དྭགས་ནང་ཚོགས་དང་དགོན་ཚོགས་གཉིས་ངོས་ནས་དངུལ་གྱི་སྐོར་གསལ་བོ་ཞུས་པར་དགའ་བོ་བྱུང་སོང་ལ་ཐུགས་རྗེ་ཆེ་ཞུ་རྒྱུ་ཡིན། ཡིན་ནའང་།Â ངས་འབུལ་བ་རྩ་བ་ཉིད་ནས་ལེན་རྒྱུ་མིན། འབུལ་བ་ལེན་པ་ཡིན་ན་ཆོས་བཙོང་པ་དང་གཅིག་པ་རེད། ཅེས་སོགས་གསུངས་སོང་།
གོ་སྒྲིག་ཚོགས་ཆུང་གིས་གསལ་བསྒྲགས་གནང་བ་ལྟར་ན། ཐེངས་འདིའི་དུས་འཁོར་དབང་ཆེན་དངུལ་བྱུང་བ་ཧིན་སྒོར་ས་ཡ་ ༡༢༠ ལྷག་དང་། ཕར་འགྲོ་སོང་ཕྱིན་པ་ཧིན་སྒོ་ས་ཡ་ ༡༡༠ ཙམ་ཡིན་འདུག
ཚེས་ ༡༤ དང་ ༡༥ ཉིན་གཉིས་རིང་ཆོས་ཞུ་བ་ཚོར་དཀྱིལ་འཁོར་ལ་མཇལ་ཁ་གཏོང་རྒྱུ་ཡིན་འདུག
གསར་འགོད་པ་ལྷ་སྐྱབས་རྒྱལ་གྱིས་ལ་དྭགས་རྒྱལ་ས་སླེ་ནས།
