ཀུ་ལུ་དཔལ་རབ་གླིང་གཞིས་ཁོངས་ནས་ཡིན་པའི་ཚེས་གཅིག་སྒྲོལ་མ་ཞུ་བས་ ༡༩༩༢ ལོར་བོད་མིའི་སྒྲིག་འཛུགས་ཀྱི་རོགས་རམ་འོག་ཨ་རིར་གཞིས་སྐྱོད་སྐབས་ས་གནས་མགོ་འཛིན་ལས་ཁུངས་ནས་ཧིན་སྒོར་ ༨༠༠༠ སྔ་གཡར་བྱས་པ་ད་བར་ཕྱིར་སློག་བྱས་མེད་སྟབས་སྤྱི་རྒྱུ་སྒེར་ཟས་བྱེད་པོར་ངོས་འཛིན་བྱས་འདུག
གོང་གནས་གསལ་ཚུལ་སྐོར་ལ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱིས། ཀུ་ལུ་དཔལ་རབ་གླིང་གཞིས་ཁོངས་ནས་ཡིན་པ་ཚེས་གཅིག་སྒྲོལ་མ་དེ་སྔ་ཕྱི་ལོ་ ༡༩༩༢།༩༣ ལོར་བོད་མིའི་སྒྲིག་འཛུགས་ཀྱིས་རོགས་མགོན་ཐབས་སྦྱོར་ཐོག་ཨ་རིར་གཞིས་བསྐྱོད་སྐབས་ལག་སྣེའི་དཀའ་ངལ་འཕྲད་དེ་ཀུ་ལུ་དཔལ་རབ་གླིང་ས་གནས་འགོ་འཛིན་ལས་ཁུངས་ ནས་ཧིན་སྒོར་ ༨༠༠༠།༠༠ (བརྒྱད་སྟོང་) ཐམ་པ་སྔ་གཡར་གནང་བ་ད་བར་གཙང་བཟོ་མ་ཐུབ་པར་ས་གནས་ཀྱི་རྩིས་སྙན་ནང་ལོ་བསྟུད་ མར་གསལ་བའི་ཐབས་སྐྱོའི་གནས་སྟངས་ཆགས་ཡོད། དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་མང་ཚོགས་རྩིས་ཁྲའི་ཚོགས་ཆུང་སྐབས་བཞི་པའི་གྲུབ་དོན་སྙན་ཐོ་དོན་ཚན་ ༣༡། ཅ་ ༤ དགོངས་དོན་ལྟར། འདི་ནས་ཕྱི་ལོ་ ༢༠༡༤།༥།༢༣ འཁོད་བོད་མིའི་སྒྲིག་འཛུགས་ཀྱི་གཞུང་འབྲེལ་གསར་ཤོག་དང་དྲ་རྒྱའི་ནང་མཇུག་འདེད་ཀྱིས་ཕྱི་ལོ་ ༢༠༡༤།༦།༣༠ འགྱངས་མེད་དངུལ་འབབ་གྲངས་ཚང་ཕྱིར་སློག་ཞུ་གལ་དང་། གལ་ཏེ་གོང་གསལ་དུས་བཀག་ནང་ཚུད་དངུལ་འབབ་གཙང་འབུལ་མ་ཞུས་ཚེ། གཞུང་འབྲེལ་ཚགས་ཤོག་སོགས་ནང་དོ་བདག་ནས་སྤྱི་རྒྱུ་སྒེར་སྤྱོད་བྱེད་པོར་གསལ་ བསྒྲགས་བྱ་རྒྱུ་ཡིན་སྐོར་གསལ་ཡོད། འདི་ནས་ ༢༠༡༤།༧།༨ འཁོད་ས་གནས་སུ་གོང་གསལ་ཚེས་གཅིག་སྒྲོལ་མའི་དཔར་དང་། ད་ལྟའི་སྡོད་གནས་ཁ་བྱང་། དཔྱ་ཁྲལ་ལག་དེབ་ཨང་སོགས་ཞིབ་ཕྲ་འཕྲལ་འབུལ་ཞུ་དགོས་ཞུས་པར་ས་གནས་ནས་དོ་བདག་ དང་འབྲེལ་བའི་གནས་དོན་འཚོལ་ཞིབ་སླད་ས་གནས་སྤྱི་བརྒྱ་ཁག་ལ་འདྲི་རྩད་ཞུས་པའི་ ཁོ་མོའི་གནས་ཚུལ་སྐོར་ཤེས་རྟོགས་གང་ཡང་མེད་སྐོར་ཞུས་འདུག ས་གནས་ནས་ཨ་རི་སྐུ་ཚབ་དོན་ཁང་བརྒྱུད་བརྡ་འདེད་ཐེངས་ ༣ ཙམ་གནང་ཡོད་རུང་ལན་གསལ་གང་ཡང་འབྱོར་མེད་སྟབས། ཚེས་གཅིག་སྒྲོལ་མ་སྤྱི་རྒྱུ་སྒེར་ཟས་བྱེད་པོར་ངོས་འཛིན་ཞུ་རྒྱུ་ཡིན། ཞེས་འཁོད་འདུག
གཞུང་དང་ཁྲིམས་མཐུན་གྱི་དངུལ་ཁང་སོགས་ནས་དངུལ་སྐྱི་གཡར་བྱས་པ་ཕྱིར་སློག་མ་བྱས་ཚེ་སྐྱེད་ཀ་ལྡབ་ནས་ལྡབ་འཕར་བ་དང་སྐྱེད་ཀའི་སྒང་ལ་སྐྱེད་ཀ་འཕར་སྟངས་ཤིག་ཡོད་པ་རེད། ཧིན་སྒོར་བརྒྱད་སྟོང་དེ་ཡང་ཉེས་ཁྲིམས་དེའི་འོག་ཏུ་བཞག་པ་ཡིན་ན་ཚེས་གཅིག་སྒྲོལ་མ་ཁྱོད་རང་གི་དངུལ་བུན་དེ་ད་བར་ལོ་ངོ་ ༢༢ ་ལྷག་སོང་ཚར་བ་དེར་ཧིན་སྒོར་འབུམ་གཅིག་གི་སྒང་ལ་སླེབས་ཡོད་པ་རེད་དོ།།